Mɛsɛ́dó 11 - MAWUXÓWÉMA

Piyɛ́ɛ tín nǔ e wú é yi Kɔnɛ́yi gɔ́n ɔ́ mɛ nú agun Jeluzalɛ́mu tɔn

¹ Mɛsɛ́dó lɛ́ɛ kpódó nɔví ɖo Klísu mɛ e ɖo Judée lɛ́ɛ kpán se ɖɔ mɛ e ma nyí Jwifu ǎ lɛ́ɛ lɔmɔ̌ yí Mawuxó se.

² Énɛ́ wú wɛ hwenu e Piyɛ́ɛ lɛ́ kɔ yi Jeluzalɛ́mu ɔ́, Jwifu klísusɛntɔ́ lɛ́ɛ dó hwɛ ɛ,

³ bó kanbyɔ́ ɛ ɖɔ: “Étɛ́wú a ka yi mɛ e ma nyí Jwifu ǎ lɛ́ɛ gɔ́n, bó ɖu nǔ xá yě?”

⁴ Piyɛ́ɛ ka yí xó, bó tín lě e nǔ lɛ́ɛ yi gbɔn ɔ́ mɛ nú yě ɖokpó ɖokpó;

⁵ é ɖɔ nú yě ɖɔ: “Jopée wɛ un ɖe, bó ɖo ɖɛ xo wɛ, bó byɔ́ nǔ dlɔ̌ ɖɔhun ɖé mɛ, bó mɔ nǔ avɔ ɖaxó ɖɔhun ɖé gosín jǐnukúnsin wá káká gɔ̌n ce, ɖo dodomɛ, bɔ tó tɔn ɛnɛ lɛ́ɛ ɖo sinsin;

⁶ bɔ un jɛ kpínkpɔ́n jí tlítlí, bó mɔ kanlin e nɔ zɔn afɔ ɛnɛ jí lɛ́ɛ, gběkanlin lɛ́ɛ, kanlin e nɔ sá gbɔn kɔ́ mɛ lɛ́ɛ, kpódó xɛ alɔkpa alɔkpa lɛ́ɛ kpó ɖ'é mɛ.

⁷ Un ka se gbe ɖé, bɔ é ɖɔ nú mì ɖɔ: ‘Piyɛ́ɛ, sí te, hu bo ɖu.’

⁸ Un ka yí gbe ɖɔ jí: ‘Éeǒ Aklúnɔ! Đó nǔ e nyí su é kpódó nǔ e nɔ hɛn mɛ blí é kpó ɔ́, un ɖu ɖě kpɔ́n gbeɖé ǎ.’

⁹ Gbe ɔ́ ka lɛ́ ɖɔ nú mì sín jǐxwé azɔn wegɔ́ ɔ́ ɖɔ: ‘Nǔ e Mawu ɖɔ è hɛn ɔ́, è nǎ ɖu ɔ́, hwɛ ma ɖɔ é vɛ́ mɛ ó.’

¹⁰ Azɔn atɔn wɛ nǔ énɛ́ jɛ; énɛ́ ɔ́ gúdo ɔ́, nǔ avɔ ɖaxó ɖɔhun ɔ́ kpódó nǔ e ɖ'é mɛ lɛ́ɛ bǐ kpó yi jǐxwé.

¹¹ Hwenɛ́nu tlóló ɔ́, mɛ atɔn ɖé lɛ́ɛ wá xwé e gbe un ɖe ɔ́ sín hɔn jí; Sezalée wɛ è sɛ́ yě dó sín.

¹² Yɛsinsɛn ka ɖɔ ma xwedó yě; nyɛ ní má xo kpɔ́n ó. Nɔví mǐtɔn ayizɛ́n élɔ́ lɛ́ɛ e mɔ wɛ mi ɖe din lɛ́ɛ ká kplá mì yi Sezalée, bɔ mǐ bǐ byɔ́ Kɔnɛ́yi xwé,

¹³ bɔ nya ɔ́ wlí lě e é mɔ wɛnsagun Mawu tɔn ɖé wá xwé tɔn gbe, bó ɖɔ xó n'i gbɔn ɔ́ ɖɔ nú mǐ; wɛnsagun ɔ́ ɖɔ n'i ɖɔ: ‘Sɛ́ mɛ dó Jopée nú è yi ylɔ́ Sinmɔ́ɔ e nɔ lɛ́ nyí Piyɛ́ɛ é wá.

¹⁴ É ná ɖɔ xó e ná hwlɛ́n hwi kpódó hɛ̌nnu towe bǐ kpó gán ɔ́ nú we.’

¹⁵ Xó ɖɔ nú yě jí wɛ un jɛ, bɔ Yɛsinsɛn jɛ te wá yě jǐ, lě e é jɛ te wá mǐ jǐ ɖo bǐbɛ́mɛ gbɔn é,

¹⁶ bɔ un flín xó e Aklúnɔ kó ɖɔ ɔ́; é wɛ nyí ɖɔ: ‘Jǎan sɔ́ sin dó lɛ yɛhwesin nú mɛ; amɔ̌ Yɛsinsɛn wɛ è nǎ sɔ́ dó lɛ yɛhwesin nú midɛɛ lɛ́ɛ.’

¹⁷ Ényí Mawu ná nǔníná ɖokpó ɔ́ yě, lě e é ná mǐ lɔ gbɔn hwenu e mǐ ɖi nǔ nú Aklúnɔ Jezu Klísu ɔ́, mɛ̌ nyɛ ka nyí, bó ná yi gbɛ́ gbe nú Mawu.”

¹⁸ Ée yě se mɔ̌ ɔ́, xomɛ yětɔn fá, bɔ yě jɛ susu kpa nú Mawu jí, bó nɔ́ ɖɔ: “Mawu bló, bɔ mɛ e ma nyí Jwifu ǎ lɛ́ɛ lɔmɔ̌ sixú lɛ́ kɔ sín hwɛ yětɔn lɛ́ɛ gúdo, bó ná sixú mɔ gbɛ mavɔ mavɔ.”

Agun Antyɔ́ci tɔn

¹⁹ Yadónúmɛ e tíin hwenu e è hu Etyɛ́ni ɔ́ zɔ́n bɔ mɛ e ɖi nǔ nú Jezu lɛ́ɛ gbadó. Mɛ ɖé lɛ́ɛ ɖo yě mɛ, bó hun káká yi Fenisíi; mɛɖé lɛ́ɛ yi to e ɖo tɔ tɛ́ntin bɔ è nɔ ylɔ́ ɖɔ Cíplu ɔ́ mɛ; mɛ ɖě ka yi to e è nɔ ylɔ́ ɖɔ Antyɔ́ci ɔ́ mɛ; lo ɔ́, Jwifu lɛ́ɛ kɛ́ɖɛ́ wɛ yě nɔ́ jlá Mawuxó ɔ́ ná.

²⁰ Amɔ̌, Cíplunu kpódó Silenɛ́ɛnu ɖé lɛ́ɛ kpán ka ɖo yě mɛ, bɔ hwenu e yě yi Antyɔ́ci ɔ́, yě jɛ Wɛn Ɖagbe Aklúnɔ Jezu tɔn sín xó jlá Glɛ̌sinu lɛ́ɛ lɔmɔ̌ jí.

²¹ Aklúnɔ sín hlɔ̌nhlɔ́n ɖo kpɔ́ xá yě, bɔ mɛ gěgé ɖi nǔ, bó húzú jɛ Aklúnɔ li jí.

²² Nǔ énɛ́ wá yi jɛ tó mɛ nú agun Jezu tɔn e ɖo Jeluzalɛ́mu ɔ́, bɔ yě sɛ́ Baanabási dó Antyɔ́ci.

²³ Ée é wá, bó mɔ lě e Mawu wa ɖagbe nú togun ɔ́ gbɔn ɔ́, é hun xomɛ n'i, bɔ é ná akɔ́nkpinkpan yě bǐ, ɖɔ yě ní nɔ gbejí nú Aklúnɔ kpó ayixa ɖokpó kpó.

²⁴ Đó Banabási ɔ́, ɖagbewatɔ́ wɛ, bɔ Yɛsinsɛn kpódó nǔɖiɖi kpán gɔ́ ayi tɔn mɛ, bɔ mɛ gěgé lɛ́ jɛ Aklúnɔ sín ali jí.

²⁵ Énɛ́ gúdo ɔ́, Baanabási yi to e è nɔ ylɔ́ ɖɔ Táasi ɔ́ mɛ, bó ná yi kplá Sólu.

²⁶ Ée é mɔ ɛ ɔ́, é kplá ɛ wá Antyɔ́ci, bɔ yě mɛ we lɛ́ɛ bló xwe ɖokpó kpíkpé ɖo agun mɛ e ɖi nǔ nú Jezu lɛ́ɛ tɔn e ɖo fínɛ́ ɔ́ mɛ, bó kplɔ́n nǔ mɛ gěgé. Antyɔ́ci fínɛ́ wɛ mɛ lɛ́ɛ ylɔ́ ahwanvú Jezu tɔn lɛ́ɛ ɖɔ klísusɛntɔ́ ɖe dó nukɔn.

²⁷ Hwe énɛ́ nu ɔ́, gbeyíɖɔ Mawu tɔn ɖé lɛ́ɛ gosín Jeluzalɛ́mu, bó yi Antyɔ́ci.

²⁸ Mɛ e è nɔ ylɔ́ ɖɔ Agabusi ɖo yě mɛ ɔ́ sí te, bɔ Yɛsinsɛn sɔ́ dó ayi mɛ n'i bɔ é ɖɔ adɔ ɖaxó ɖé ná wá tɔ́n ɖo ayǐkúngban ɔ́ bǐ jí. (Adɔ énɛ́ ka tɔ́n nǔgbó hwenu e Klódu ɖo axɔ́sú ɖu wɛ é.)

²⁹ Énɛ́ ɔ́, ahwanvú lɛ́ɛ ɖe gbeta tɔ́n, ɖɔ émí ɖokpó ɖokpó ná ná nǔ e wú émí kpé ɔ́, bɔ è nǎ sɛ́ dó nɔví émítɔn ɖo Klísu mɛ e ɖo Judée lɛ́ɛ, bó dó dó alɔ yě ná.

³⁰ Yě sɛ́ nǔ e yě jɔ lɛ́ɛ dó agunnukɔntɔ́ lɛ́ɛ ɖo Judée, gbɔn Baanabási kpódó Sólu kpó jí.