Matíe 8 - MAWUXÓWÉMA

Jezu gbɔ azɔn nú nya gudunɔ ɖé

¹ Hwenu e Jezu jɛ te sín só ɔ́ jí ɔ́, ahwan wɔ̌buwɔ́bú ɖé xwedó e.

² Nya ɖé ɖo gudu jɛ wɛ bó sɛkpɔ́ Jezu, bó jɛ kpo ɖo nukɔn tɔn, bo ɖɔ: “Aklúnɔ, nú é jló we ɔ́, a hɛn ɔ́, a nǎ gbɔ azɔn nú mì.”

³ Jezu ka dlɛ́n alɔ, bó ɖó wǔtu tɔn, bó ɖɔ: “Un jló. Azɔn towe ní gbɔ.” Tlóló ɔ́, nya ɔ́ sín azɔn gbɔ.

⁴ Énɛ́ ɔ́ gúdo ɔ́, Jezu ka ɖɔ n'i ɖɔ: “Ɖǒ tó mì ganjí; ma ɖɔ nú mɛɖé ó; lo ɔ́, sɔ́ lě e a ɖe ɔ́ yi xlɛ́ vɔ̌sánú-xwlémawutɔ́ lɛ́ɛ, bó ná wǔsláslá sín agban e xó Mɔyízi ɖɔ ɔ́, bónú mɛ bǐ ná dó tunwun ɖɔ azɔn towe gbɔ nǔgbó.”

Jezu gbɔ azɔn nú sɔ́ja kanwekogán Hlɔ̌ma tɔn ɖé sín mɛsɛntɔ́

⁵ Ée Jezu byɔ́ Kafaanawúmu ɔ́, sɔ́ja kanwekogán Hlɔ̌ma tɔn ɖokpó sɛkpɔ́ ɛ, bó jɛ vo sa n'i jí;

⁶ é ɖɔ: “Aklúnɔ, mɛsɛntɔ́ ce ɖokpó xwe ayǐsó ɖo zan jí ɖo xwé gbe, bó ɖo wǔvɛ́ mɔ wɛ ɖésú.”

⁷ Ée é ɖɔ mɔ̌ ɔ́, Jezu ɖɔ n'i ɖɔ: “Un ná yi gbɔ azɔn n'i.”

⁸ Sɔ́ja kanwekogán ɔ́ ka yí xó bó ɖɔ: “Aklúnɔ, un nyí mɛ bónú a nǎ xwedó mì yi xwé cé gbe ǎ. Vɛ̌ ko ɖe gbe kpowun, énɛ́ ɔ́, azɔn ná gbɔ nú mɛsɛntɔ́ ce.

⁹ Ɖó nyɛ ɖésúnɔ ɔ́, mɛɖomɛglɔ́ wɛ nú mì, bɔ sɔ́ja lɛ́ɛ ka ɖo acɛ ce mɛ. Un ɖɔ nú mɛ ɖě ɖɔ: ‘Yi’ ɔ́, é nɔ yi; un ɖɔ nú mɛ ɖěvo ɖɔ: ‘Wǎ’ ɔ́, é nɔ wá; un ka ɖɔ nú mɛsɛntɔ́ ce ɖɔ: ‘Blǒ lě’ ɔ́, é nɔ bló.”

¹⁰ Ée Jezu se xó énɛ́ lɛ́ɛ ɔ́, é kpácá ɛ, bɔ é ɖɔ nú mɛ e ɖo xwixwedó e wɛ lɛ́ɛ ɖɔ: “Má ɖɔ nǔgbó nú mi; un mɔ mɛɖé ɖó nǔɖiɖi lěhunkɔtɔn ɖo Izlayɛ́li ví lɛ́ɛ mɛ ǎ.

¹¹ Lo ɔ́, un ɖo ɖiɖɔ nú mi wɛ ɖɔ mɛ gěgé ná gosín zǎnzǎnhwe jí, bó ná gosín gbadahwe jí wá, bó ná jínjɔ́n ayǐ, bó ɖu nǔ xá Ablaxámu kpódó Izáki kpó, kpódó Jakɔ́bu kpán, ɖo axɔ́súɖuto sɛ́xwé tɔn mɛ.

¹² Lo ɔ́, axɔ́súɖuto sɛ́xwé tɔn sín vǐ lɛ́ɛ ɔ́, è nǎ bɛ̌ yě kɔn nyi zǐnflú mɛ ɖo kɔ́xo. Fínɛ́ wɛ yě ná ya avǐ, bó ná ɖu aɖǔkún ɖe .”

¹³ Jezu ka wá ɖɔ nú sɔ́ja kanwekogán ɔ́ ɖɔ: “Bo yi xwé, nǔ e a ɖi ɔ́ ní nyí mɔ̌ nú we.” Ée Jezu ɖɔ mɔ̌ n'i tlóló ɔ́, azɔn gbɔ nú mɛsɛntɔ́ ɔ́.

Jezu gbɔ azɔn nú azinzɔnnɔ gěgé

¹⁴ Énɛ́ gúdo ɔ́, Jezu wá yi mɛsɛntɔ́ tɔn Piyɛ́ɛ sín xwé gbe. Fínɛ́ ɔ́, é mɔ Piyɛ́ɛ sín asinɔ bɔ é ɖo ayǐmlɔ́mlɔ́, bɔ avivɔ ɖo jǐ tɔn.

¹⁵ Jezu ɖó alɔ alɔ tɔn wú, bɔ avivɔ ɔ́ kɔ́n sín jǐ tɔn, bɔ é sí te, bó jɛ jǒnɔ tɔn yí jí.

¹⁶ Ée gbadanu wá su ɔ́, è kplá mɛ e jí yɛ nyanya ɖe lɛ́ɛ gěgé wá n'i. É ɖe gbe dó yɛ nyanya énɛ́ lɛ́ɛ, bɔ yě gosín mɛ e jí yě ɖe lɛ́ɛ jí, bɔ é lɛ́ gbɔ azɔn nú azinzɔnnɔ lɛ́ɛ bǐ,

¹⁷ bónú xó élɔ́ e gbeyíɖɔ Mawu tɔn Ezayíi ɖɔ ɔ́ na dó jɛ; é wɛ nyí ɖɔ: “É yí wɔ̌nzɔn e ɖo mǐ wú lɛ́ɛ, bó bɛ́ azɔngban mǐtɔn lɛ́ɛ hɛn.”

Mɛ e jló ná xwedó Jezu lɛ́ɛ

¹⁸ Ée Jezu mɔ ɖɔ ahwan e lɛ́ lɛ̌ dó émí ɔ́ sukpɔ́ ɔ́, é ɖɔ nú ahwanvú tɔn lɛ́ɛ ɖɔ: “Mi nú mǐ ná dó asá tɔ ɔ́, bó ná yi agě ɖě ɔ́ jí.”

¹⁹ Hwenɛ́nu ɔ́, sɛ́nkplɔ́nmɛtɔ́ ɖokpó sɛ yá ɛ, bó ɖɔ n'i ɖɔ: “Mɛ̌si, un ná xwedó we yi fí e a nǎ yi lɛ́ɛ bǐ.”

²⁰ Jezu ka yí gbe n'i bó ɖɔ: “Ayǐsájɛ lɛ́ɛ ɖó nɔtɛn yětɔn, bɔ xɛ e nɔ zɔ́n gbɔn jɔmɛ lɛ́ɛ ɖó adɔ̌ yětɔn. Lo ɔ́, nyɛ Gbɛtɔ́ví ɔ́ ɖó fí e un ná mlɔ́, bó ná gbɔjɛ́ ɔ́ ǎ.”

²¹ Ahwanvú tɔn ɖěvo ɖɔ n'i ɖɔ: “Aklúnɔ, gbɔ nú ma to yi ɖi tɔ́ ce hwɛ̌.”

²² Jezu ka yí gbe n'i ɖɔ: “Xwedó mì, bo jó mɛkúkú lɛ́ɛ dó nú yě ní ɖi mɛkúkú yětɔn lɛ́ɛ.”

Jezu hwíhwɛ́ jɔhɔn ɖaxó ɖé

²³ Jezu byɔ́ tɔjíhún mɛ, bɔ ahwanvú tɔn lɛ́ɛ xwedó e.

²⁴ È nǎ mɔ nǔɖé ɔ́, jɔhɔn ɖaxó ɖé jɛ́n jɛ nyinyi jí ɖo tɔ ɔ́ jí, bɔ tɔ ɔ́ fɔ́n adǎn, bó nɔ́ xo sin wá cyɔ́n tɔjíhún ɔ́. Hwenɛ́nu ɔ́, Jezu ka ɖo amlɔ dɔ́ wɛ.

²⁵ Ahwanvú tɔn lɛ́ɛ sɛ yá ɛ, bo fɔ́n ɛ, bo ɖɔ n'i ɖɔ: “Aklúnɔ, hwlɛ̌n mǐ gán; mǐ ɖo tɔ ná kú wɛ.”

²⁶ Jezu ka ɖɔ nú yě ɖɔ: “Étɛ́ sín xɛsi ɖi wɛ mi ka ɖe? Nǔɖiɖihwedónánɔ e mi!” Énɛ́ ɔ́ gúdo ɔ́, é sí te, bó ɖe gbe dó jɔhɔn ɔ́ kpódó xu ɔ́ kpó, bɔ fí bǐ cí tóó.

²⁷ Nǔ énɛ́ ɔ́ kpácá ahwanvú tɔn lɛ́ɛ káká, bɔ yě nɔ ɖɔ: “Mɛ nǎhún ká nyí mɛ élɔ́, bɔ jɔhɔn kpódó xu kpó lɔmɔ̌ nɔ se gbe n'i?”

Jezu nya yɛ nyanya sín nya we ɖé lɛ́ɛ jí

²⁸ Ée yě jɛ tɔ ɔ́ gúdo dɔ̌n, ɖo Gadaláanu lɛ́ɛ yíkúngban jí ɔ́, yɛnyanyanɔ we ɖé lɛ́ɛ tɔ́n sín sóxo mɛ, fí e è nɔ ɖi mɛkúkú lɛ́ɛ dó é, bó wá kpé Jezu. Yě nɔ́ ɖo nǔ baɖabaɖa dó sin wɛ káká bɔ mɛ ɖěbǔ nɔ́ sixú glá gbɔn fínɛ́ ǎ.

²⁹ Yɛnyanyanɔ we lɛ́ɛ jɛ xó sú jí, bó ɖɔ: “Mawu ví! Étɛ́ ká ɖo mǐ kpódó hwi kpán tɛ́ntin? A wǎ fí, bó ná dó ya nú mǐ cóbɔ hwenu e mǐ ná ji ya dó ɔ́ ná su wɛ a?”

³⁰ Aglǔzahwan ɖaxó ɖé ka ɖo zɔ zaan nú yě, bo ɖo nǔ ɖu wɛ.

³¹ Yɛ nyanya lɛ́ɛ jɛ vo sa nú Jezu jí ɖɔ: “Nú a jló ná nya mǐ hǔn, nyi mǐ sɛ́ dó aglǔzahwan énɛ́ mɛ.”

³² Jezu ka ɖɔ nú yě ɖɔ: “Mi bo yi;” tlóló ɔ́, yě gosín nya we nɛ́ lɛ́ɛ jí, bó byɔ́ aglǔza lɛ́ɛ mɛ. Azɔn ɖokpó ɔ́, aglǔza lɛ́ɛ nyi agbo sín só ɔ́ jí kɔn nyi xu mɛ, bó kú tɔ.

³³ Ée aglǔzanyitɔ́ lɛ́ɛ mɔ mɔ̌ ɔ́, yě dó afɔ wezun mɛ, bó yi toxo ɔ́ mɛ, lobo yi wlí nǔ e jɛ énɛ́ lɛ́ɛ bǐ ɖɔ nú mɛ lɛ́ɛ. Yě lɛ́ ɖɔ lě e yɛnyanyanɔ we nɛ́ lɛ́ɛ sín xó yi gbɔn é nú yě,

³⁴ bɔ togun ɔ́ bǐ nyi ahwan yi kpé Jezu. Ée yě mɔ ɛ ɔ́, yě jɛ vo sa n'i jí, bó ɖɔ é ní gosín ayǐkúngban émítɔn jí.