Matíe 7 - MAWUXÓWÉMA

Mi ma ɖó hwɛ nú mɛɖé ó

¹ “Mi ma ɖó hwɛ nú mɛɖé ó, énɛ́ ɔ́, Mawu na ɖó hwɛ nú mi lɔmɔ̌ ǎ.

² Ɖó lě e mi nɔ ɖɔ hwɛ xá mɛ gbɔn ɔ́, mɔ̌ wɛ Mawu na ɖɔ hwɛ xá mi lɔmɔ̌ gbɔn. Nǔ e mi sɔ́ dó jlɛ́ nǔ nú mɛ ɖě lɛ́ɛ ɔ́ wɛ Mawu ná sɔ́ dó jlɛ́ nǔ nú mi lɔmɔ̌.

³ Étɛ́wú a ka ɖo nǔywɛ́ e ɖo nukún jí nú nɔví towe ɔ́ kpɔ́n wɛ, bó má ka mɔ atínkpo e ɖo nukún towe jí ɔ́ ǎ?

⁴ Abǐ hwi mɛ e atínkpo ɖo nukún jí ná ɔ́, nɛ̌ wɛ a sixú ɖɔ nú nɔzo towe ɖɔ: ‘Gbɔ nú ma ɖe nǔywɛ́ sín nukún jí nú we’ gbɔn?

⁵ Yɛmɛnúwatɔ́, vɛ̌ yi ɖe atínkpo sín nukún jí nú hwiɖée hwɛ̌; énɛ́ ɔ́, a nǎ mɔ nukúnnú ganjí, bó ná sixú ɖe nǔywɛ́ e ɖo nukún jí nú nɔví towe ɔ́ síin.

⁶ “Nǔ e nyí nǔ mímɛ́ ɔ́, mi ma sɔ́ jó nú cukú lɛ́ɛ ó; yě táá wá húzú kpan nukɔn mi, bó wɔ mi ɖu. Mi ma ka bɛ́ jɛ̌ ɖagbe ɖagbe mitɔn lɛ́ɛ nyi dó nukɔn nú han lɛ́ɛ ó; yě táá wá sɔ́ afɔ dó gbídí ná.

Mi byɔ́, mi ba, mi xúxú hɔn

⁷ “Mi byɔ́ nǔ Mawu, é ná ná mi; mi ba, mi ná mɔ; mi xúxú hɔn, è nǎ hun nú mi.

⁸ Ɖó mɛ ɖěbǔ byɔ́ nǔ ɔ́, è nǎ ná ɛ; mɛɖé ba ɔ́, é ná mɔ; mɛɖé xúxú hɔn ɔ́, è nǎ hun n'i.

⁹ Mɛ̌ ka ɖo mi mɛ, bɔ vǐ tɔn ná byɔ́ ɛ nǔɖuɖu, bɔ é ná ná ɛ awǐnnya?

¹⁰ Abǐ, nú vǐ tɔn byɔ́ ɛ hweví ɔ́, é ná ná ɛ dan?

¹¹ Midɛɛ lɛ́ɛ ɔ́, lě e mi dá sɔ ɔ́ nɛ́, có mi ka tunwun nǔ ɖagbe bo nɔ ná vǐ mitɔn lɛ́ɛ. Nɛ̌ wɛ Tɔ́ mitɔn e ɖo sɛ́xwé ɔ́ ma ka ná ná nǔ ɖagbe mɛ e byɔ́ ɛ lɛ́ɛ ǎ gbɔn?

¹² “Nǔ e mi jló ɖɔ gbɛtɔ́ lɛ́ɛ ní bló nú émí ɔ́, mi nɔ bló nú yě lɔmɔ̌; ɖó nǔ e ɖɔ wɛ Mɔyízi sɛ́n lɛ́ɛ, kpódó gbeyíɖɔ Mawu tɔn lɛ́ɛ kpó ɖe ɔ́ nɛ́.

Hɔn kpɛví ɔ́

¹³ “Mi gbɔn hɔn kpɛví ɔ́ nu; ɖó fí e è nɔ gbɔn, bó nɔ yi dɔn ɔ́, hɔn tɔn d'agba, bɔ ali tɔn gbló, bo vɛ́ gbɔn ǎ; mɛ gěgé wɛ nɔ gbɔn fínɛ́.

¹⁴ Lo ɔ́, hɔn e nu è nɔ gbɔn, bó nɔ́ yi gbɛ mavɔ mavɔ mɛ ɔ́ hwe, bɔ ali e è nɔ gbɔn yi ɔ́ sóbwé, bó vɛ́ gbɔn, bɔ mɛ kpɛɖé jɛ́n nɔ ba mɔ.”

Atín kpódó sínsɛ́n tɔn kpó

¹⁵ “Mi cɔ́ miɖée dó mɛ e nɔ sɔ́ yěɖée dó ɖó gbeyíɖɔ Mawu tɔn lɛ́ɛ wú. Ninɔmɛ lɛ̌ngbɔ́ tɔn wɛ yě nɔ zé, bó nɔ́ wá mi gɔ́n; lo ɔ́, ɖo ayi yětɔn mɛ ɔ́, adǎnkanlin ɖi hla ɖɔhun wɛ nú yě.

¹⁶ Nǔwiwa yětɔn lɛ́ɛ wɛ na zɔ́n bɔ mi na tunwun nǔ e yě nyí ɔ́; ɖó è nɔ gbɛ vǐwun ɖo wunkan mɛ ǎ, è ka nɔ gbɛ fígi ɖo aklánti gbo mɛ ǎ.

¹⁷ Atín ɖagbe ɔ́, sínsɛ́n ɖagbe wɛ é nɔ́ ná, bɔ atín nyanya nɔ ná sínsɛ́n nyanya.

¹⁸ Atín ɖagbe ɖé sixú ná sínsɛ́n nyanya ǎ; mɔ̌ ɖokpó ɔ́ jɛ́n atín nyanya ɖé ma sixú ná sínsɛ́n ɖagbe ǎ é nɛ́.

¹⁹ Atín ɖěbǔ ma ná sínsɛ́n ɖagbe ǎ ɔ́, è nɔ gbo e, bo nɔ sɔ́ nyi myɔ mɛ.

²⁰ Hǔn, nǔwiwa yětɔn wɛ ná zɔ́n bɔ mi na dó tunwun nǔ e yě nyí ɔ́.

Un tunwun mi kpɔ́n gbeɖé ǎ

²¹ “Mɛ e nɔ ɖo ylɔ̌ylɔ́ mì wɛ ɖɔ: ‘Aklúnɔ, Aklúnɔ’ lɛ́ɛ ɔ́, yě bǐ ɖo axɔ́súɖuto sɛ́xwé tɔn mɛ na byɔ́ wɛ ǎ; lo ɔ́, mɛ e nɔ wa jlǒ Tɔ́ ce e ɖo sɛ́xwé ɔ́ tɔn lɛ́ɛ kɛ́ɖɛ́ wɛ na byɔ́ mɛ.

²² Ɖó gbe e gbe Mawu ná ɖɔ hwɛ xá gbɛtɔ́ lɛ́ɛ bǐ ɔ́, mɛ gěgé ná ɖɔ nú mì ɖɔ: ‘Aklúnɔ, Aklúnɔ, é ma ka nyí nyǐkɔ towe mɛ wɛ mǐ ɖɔ Mawuxó nú gbɛtɔ́ lɛ́ɛ dó a? É ma nyí nyǐkɔ towe mɛ wɛ mǐ nya yɛ nyanya lɛ́ɛ dó a? Nǔ tɛnmɛ tɛnmɛ e mǐ jlɛ́ lɛ́ɛ ɔ́, nyǐkɔ towe mɛ wɛ mǐ jlɛ́ dó ǎ cé?’

²³ Bɔ un ka na ɖɔ nyi wɛn nú yě ɖɔ: ‘Un tunwun mi kpɔ́n gbeɖé ǎ; mi bɛ́ miɖée sín nukún ce mɛ, nǔnyanyawatɔ́ lɛ́ɛ mi.’ ”

Xɔ we lɛ́ɛ

²⁴ “Énɛ́ ɔ́ wú ɔ́, mɛ ɖěbǔ e ko sixú se xó ce énɛ́ lɛ́ɛ bo bló d'é jí ɔ́, cí gbɛtɔ́ ayiɖotenánɔ e gbá xɔ tɔn nyi só jí é ɖɔhun.

²⁵ Jǐ ja, tɔ ɖi sin, jɔhɔn nyi dó xɔ ɔ́ jí kpódó hlɔ̌nhlɔ́n kpó có xɔ ɔ́ ka mu ǎ, ɖó só jí wɛ è dǒ xɔ ɔ́ do nyi.

²⁶ Amɔ̌, mɛ e se xó ce énɛ́ lɛ́ɛ, bó ma bló d'é jí ǎ ɔ́, cí mɛ e ayixa hwedó, bɔ é gbá xɔ tɔn nyi kɔ́gúdu mɛ é ɖɔhun.

²⁷ Jǐ ja, tɔ ɖi sin, jɔhɔn nyi kpódó hlɔ̌nhlɔ́n kpó, bɔ xɔ ɔ́ mu, bó gba hánnyá.”

Acɛkpikpa Jezu tɔn

^28-29 Ée Jezu ɖɔ xó énɛ́ lɛ́ɛ káká yi ɖó te ɔ́, lě e é nɔ́ kplɔ́n nǔ mɛ gbɔn ɔ́ kpácá togun ɔ́ bǐ, ɖó é nɔ́ kplɔ́n nǔ mɛ kpódó acɛkpikpa kpó. Nǔkplɔ́nmɛ tɔn cí sɛ́nkplɔ́nmɛtɔ́ lɛ́ɛ tɔn ɖɔhun ǎ.