Matíe 23 - MAWUXÓWÉMA

Jezu ɖɔ è ní cɔ́ mɛɖée dó sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó wú

¹ Jezu ɖɔ xó nú mɛ e xwedó e lɛ́ɛ kpódó ahwanvú tɔn lɛ́ɛ kpó ɖɔ:

² “Sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó wɛ sɔ́ yěɖée ɖó Mɔyízi sín tɛnmɛ, bo nɔ tín Mɔyízi sɛ́n lɛ́ɛ mɛ nú mɛ.

³ Hǔn, mi bo nɔ se tónú nú yě, bó nɔ́ bló nǔ e yě ɖɔ nú mi lɛ́ɛ bǐ; mi ma ka nɔ wa nǔ yě ɖɔhun ó; ɖó nǔ e kplɔ́n mi wɛ yě ɖe lɛ́ɛ ɔ́, yě ɖésú nɔ bló gbɔn jí ǎ.

⁴ Sɛ́n gěgé tíin, bɔ yě nɔ zé dó kɔ jí nú mɛ lɛ́ɛ ɖɔ yě ɖó ná nɔ nyi; lo ɔ́, yě nɔ bló nǔ ɖěbǔ, bónú sɛ́n énɛ́ lɛ́ɛ sín nyinyi na bɔkun nú mɛ lɛ́ɛ ǎ.

⁵ A mɔ mì a sín nǔ wɛ yě nɔ bló; yě nɔ blá tíla gbajagbaja dó wǔ; yě nɔ xo kɛyɛ dó awu yětɔn lɛ́ɛ tó gblɛlɛ .

⁶ Yě nɔ ba ná jínjɔ́n tɛn nukɔn nukɔntɔn lɛ́ɛ mɛ ɖo jǒnɔgbé, bó nɔ lɛ́ jló ná jínjɔ́n zinkpo nukúnɖéjí lɛ́ɛ mɛ ɖo kplɔ́ngbasá Jwifu lɛ́ɛ tɔn.

⁷ È nǐ dó gbe yě ɖo tokplétɛn lɛ́ɛ wɛ yě nɔ yí wǎn ná. Yě nɔ́ jló ɖɔ gbɛtɔ́ lɛ́ɛ ní ylɔ́ émí ɖɔ: ‘Mɛ̌si.’

⁸ Midɛɛ lɛ́ɛ ɔ́, mi ma lɔn nú mɛɖé ylɔ́ mi ɖɔ: ‘Mɛ̌si’ ó, ɖó nɔví nɔví wɛ mi bǐ nyí ɖo nǔɖiɖi mɛ, bó ɖó Mɛ̌si ɖokpó géé.

⁹ Mi ma ylɔ́ mɛ ɖěbǔ ɖo ayǐkúngban jí fí ɖɔ: ‘Tɔ́’ ó, ɖó Mawu e ɖo jǐxwé ɔ́ ɖokpónɔ géé wɛ nyí Tɔ́ mitɔn.

¹⁰ Mi ma ka lɔn nú mɛɖé ní ylɔ́ mi ɖɔ: ‘Gǎn’ ó, ɖó Klísu ɖokpónɔ géé wɛ nyí Gǎn mitɔn.

¹¹ Mɛ e nyí gǎn mitɔn ɔ́ ɖó ná nyí mɛsɛntɔ́ mitɔn.

¹² Mɛ e nɔ sɔ́ éɖée su ɔ́, Mawu ná sɔ́ ɛ hwe; mɛ e ka nɔ sɔ́ éɖée hwe ɔ́, Mawu ná sɔ́ ɛ su.”

Jezu sá heelú mɛ

¹³ Jezu ka lɛ́ ɖɔ: “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó, yɛmɛnúwatɔ́ e mi! Ɖó mi nɔ sú axɔ́súɖuto sɛ́xwé tɔn sín ali dó mɛ lɛ́ɛ, mi ɖésú ka nɔ byɔ́ ɛ mɛ ǎ; mi ka nɔ ná tɛn mɛ e jló ná byɔ́ ɛ mɛ lɛ́ɛ ǎ. [

¹⁴ “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó, yɛmɛnúwatɔ́ e mi! Ɖó mi nɔ klá jɛ nǔ e nyí asúkúsi lɛ́ɛ tɔn ɔ́ bǐ nu, bó ka nɔ ɖo ɖɛ gaga xo wɛ, bó ná dó ɖe xlɛ́ gbɛtɔ́ lɛ́ɛ ɖɔ mɛ ɖagbe wɛ émí nyí. Énɛ́ ɔ́ wútu wɛ Mawu ná dɔn tó nú mi bɔ é ná syɛ́n ɖésú.]

¹⁵ “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpán, yɛmɛnúwatɔ́ e mi! Mi nɔ kán wezun gbɔn agě kpó tɔ kpó, bónú mɛ ɖokpó géé ná sixú byɔ́ sinsɛn mitɔn mɛ. Ényí mi ka yi mɔ mɛɖé, bónú é yí gbe, bó xwedó mi ɔ́, mi nɔ bló, bɔ é nɔ húzú zojimací sín vǐ azɔn we hú midɛɛ lɛ́ɛ.

¹⁶ “Heelú mi alixlɛ́mɛtɔ́ nukúntíntɔ́nnɔ lɛ́ɛ! Mi nɔ ɖɔ: ‘Mɛ e xwlé sinsɛnxɔ Mawu tɔn dó dó akpá ná ɔ́, nǔ énɛ́ ɔ́ kún nyí nǔɖé ó; amɔ̌, mɛ e ka xwlé siká e ɖo xɔ ɔ́ mɛ lɛ́ɛ dó dó akpá ná ɔ́, mɛ énɛ́ ɔ́ ɖó ná ɖe akpá ɔ́ dandan.’

¹⁷ Taɖunɔ nukúntíntɔ́nnɔ e mi! Ɖě tɛ́ wɛ ɖo tají ɖo we lɛ́ɛ mɛ? Siká e ɖo xɔ ɔ́ mɛ lɛ́ɛ wɛ a, abǐ sinsɛnxɔ e zɔ́n bɔ sikánú ɔ́ húzú nǔ mímɛ́ é?

¹⁸ Mi nɔ lɛ́ ɖɔ: mɛ e xwlé vɔ̌sákpe Mawu tɔn dó dó akpá ná ɔ́ kún ɖó ná ɖe akpá ɔ́ dandan ó; amɔ̌, mɛ e xwlé vɔ̌sánú e ɖo vɔ̌sákpe ɔ́ jí ɔ́ ɖó ná ɖe akpá e é dó ɔ́.

¹⁹ Nukúntíntɔ́nnɔ lɛ́ɛ e mi, ɖě tɛ́ wɛ ɖo tají ɖo we lɛ́ɛ mɛ? Vɔ̌sánú ɔ́ wɛ a? Abǐ vɔ̌sákpe e zɔ́n bɔ vɔ̌sánú ɔ́ húzú nǔ mímɛ́ é?

²⁰ Mɛ e xwlé vɔ̌sákpe ɔ́ ko xwlé vɔ̌sákpe ɔ́ kpódó nǔ e ɖ'é jí lɛ́ɛ bǐ kpó.

²¹ Mɛ e xwlé sinsɛnxɔ Mawu tɔn ɔ́, ko xwlé sinsɛnxɔ ɔ́ kpódó Mawu e nɔ nɔ mɛ ɔ́ kpó.

²² Mɛ e xwlé jǐnukúnsin ɔ́ ko xwlé axɔ́súzinkpo Mawu tɔn, kpódó Mawu e jínjɔ́n jí ɔ́ kpó.

²³ “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó, yɛmɛnúwatɔ́ e mi! Mi nɔ ná mǎɖówǒ nǔhwɛ́nkún mitɔn lɛ́ɛ tɔn Mawu, bó ka nɔ jó nǔ e ɖo tají ɖo Mawusɛ́n mɛ lɛ́ɛ dó. Yě wɛ nyí: Hwɛjijɔ, nǔbláwǔkúnúmɛ, gbejíninɔ; nǔ énɛ́ lɛ́ɛ wɛ ɖo tají bɔ mi ɖó ná bló; amɔ̌, mi ɖó ná dó vɛ̌ nú nǔɖé lɛ́ɛ lɔmɔ̌ ǎ.

²⁴ Alixlɛ́mɛtɔ́ nukúntíntɔ́nnɔ e mi! Ɖó mi nɔ xwí nǔvínúví, bó ka nɔ mi lǎkúnmí.

²⁵ “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó! Yɛmɛnúwatɔ́ e mi! Mi nɔ klɔ́ ká kpódó agbǎn kpó gúdo; lo ɔ́, nǔ e mi fin lɛ́ɛ kpódó nǔ e mi hízí lɛ́ɛ kpó wɛ gɔ́ yě mɛ.

²⁶ Falizyɛn nukúntíntɔ́nnɔ! To klɔ́ ká ɔ́ xomɛ hwɛ̌, bónú gúdo tɔn lɔ na mɛ́.

²⁷ “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó! Yɛmɛnúwatɔ́ e mi! Ɖó mi cí yɔta ɖěe è sá nǔ wěwé dó, bɔ é nyɔ́ ɖɛkpɛ ɖo wěxo ɔ́ ɖɔhun. Lo ɔ́, xo tɔn mɛ gɔ́ nú xúgloxú kpódó nǔ nyinyɔ kpán.

²⁸ Mi ɖésú ɔ́, mɔ̌ wɛ mi cí. Ɖó mi nɔ cí mɛ ɖagbe ɖɔhun ɖo gbɛtɔ́ lɛ́ɛ nukún mɛ, lo ɔ́, ayi mitɔn gɔ́ nú yɛmɛnúwiwa kpódó nǔ nyanya wiwa kpó.”

Hwɛɖónúmɛ Mawu tɔn

²⁹ “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpán; yɛmɛnúwatɔ́ e mi! Mi nɔ xo kpe ɖagbe lɛ́ɛ nyi gbeyíɖɔ Mawu tɔn lɛ́ɛ sín yɔta, bó nɔ́ ba acɔ́ nú hwɛjijɔnɔ lɛ́ɛ sín yɔta;

³⁰ lobo nɔ ɖɔ: ‘Ényí mǐ ko jɔ ɖo tɔ́gbó mǐtɔn lɛ́ɛ sín hwenu wɛ ɔ́, mǐ ná lɔn bo hu gbeyíɖɔ Mawu tɔn lɛ́ɛ xá yě ǎ.’

³¹ Mi ɖésú wɛ ɖo kúnnu ɖe nú miɖée wɛ, ɖɔ émí nyí mɛ e hu gbeyíɖɔ Mawu tɔn lɛ́ɛ sín vǐvú.

³² Mi bo gbɛ kan dó kan e tɔ́gbó mitɔn lɛ́ɛ gbɛ kpo ɖ'ayǐ nú mi ɔ́ nu yi fó.

³³ Dan jɔmɔ e mi! Jakpata kúnkan e mi! Nɛ̌ mi ka sixú lin ɖɔ émí ná gló hwɛɖónúmɛ e nɔ dɔn mɛ yi zojimací mɛ ɔ́ gbɔn?

³⁴ Énɛ́ ɔ́ wútu ɔ́, mi ɖótó bó se: ‘Un ná sɛ́ gbeyíɖɔ lɛ́ɛ dó mi, bó ná sɛ́ nǔnywɛ́tɔ́ lɛ́ɛ kpódó sɛ́nkplɔ́nmɛtɔ́ lɛ́ɛ kpó dó mi. Mi ná hu mɛ ɖě, bó ná ká mɛ ɖě nyi aklúzu jí, bó ná zé lanbá dó xo mɛɖé lɛ́ɛ ná ɖo kplɔ́ngbasá mitɔn lɛ́ɛ. Mi ná dó ya nú yě gbɔn toxo ɖaxó ɖaxó lɛ́ɛ mɛ.’

³⁵ Mi ná wa mɛ énɛ́ lɛ́ɛ nú gbɔn mɔ̌, bónú xomɛvɔ́nɔ e è hu ɖo ayǐkúngban jí lɛ́ɛ bǐ sín hwɛ ná jɛ kɔ nú mi, bɛ́ sín Abɛ́li hwɛjijɔnɔ ɔ́ jí, káká yi jɛ Zakalíi, Bɛlɛ́kya ví e mi hu ɖo sinsɛnxɔ mɛ, ɖo tɛn mímɛ́ ɔ́ kpódó vɔ̌sákpe ɔ́ kpán tɛ́ntin é jí.

³⁶ Má ɖɔ nǔgbó nú mi: tódɔnnúmɛ e jɛ xá mɛhuhu énɛ́ lɛ́ɛ bǐ é ɔ́, gbɛtɔ́ din tɔn lɛ́ɛ jí wɛ é ná kɔn nyi.

Wǎn yíyí e Jezu ɖó nú Jeluzalɛ́mu é

³⁷ “Jeluzalɛ́munu e mi, Jeluzalɛ́munu e mi, mi mɛ e nɔ hu gbeyíɖɔ Mawu tɔn lɛ́ɛ, bo nɔ nyi awǐnnyaglo dó hu mɛ e Mawu nɔ sɛ́ dó mi lɛ́ɛ é! Azɔn mɔ̌kpán wɛ un ko jló ná kplé mi dó awa ce lɛ́ɛ glɔ́, lě e kokló nɔ kplé vǐ tɔn lɛ́ɛ dó awa tɔn lɛ́ɛ glɔ́ ɔ́ ɖɔhun. Lo ɔ́, mi jló ǎ.

³⁸ Din ɔ́, è nǎ ɖe alɔ sín sinsɛnxɔ mitɔn wú nú mi, bɔ é ná jɛ vɔ̌.

³⁹ Ɖó má ɖɔ nǔgbó nú mi: bɛ́ sín din ɔ́, mi sɔ́ ná mɔ mì ɖě káká yi jɛ gbe e gbe mi na ɖɔ susu nú mɛ e jǎwe ɖo Aklúnɔ nyǐkɔ mɛ é ǎ.”