Matíe 2 - MAWUXÓWÉMA

Nǔnywɛ́tɔ́ e nɔ́ mɔ nǔ jɛ sun sín wuntun wú lɛ́ɛ wá Jezu gɔ́n

¹ È ji Jezu ɖo Bɛteleyɛ́mu ɖo Juda yíkúngban jí, axɔ́sú Elódu hwenu; nǔnywɛ́tɔ́ e nɔ́ mɔ nǔ jɛ sun sín wuntun wú lɛ́ɛ ɖěe gosín zǎnzǎnhwe jí wá Jeluzalɛ́mu.

² Ée yě wá ɔ́, yě ɖɔ: “Fítɛ́ Jwifu lɛ́ɛ xɔ́sú e è ji ɔ́ ɖe? Ɖó mǐ mɔ sunví e ɖe jiji tɔn xlɛ́ ɔ́ ɖo zǎnzǎnhwe jí fí e mǐ gosín ɔ́, bó wá xwé kanbyɔ́ gbé.”

³ Ée axɔ́sú Elódu se xó énɛ́ ɔ́, ayi tɔn bǐ gbadó é kpódó Jeluzalɛ́mu togun ɔ́ bǐ kpó,

⁴ bɔ é ylɔ́ vɔ̌sánú-xwlémawutɔ́gán lɛ́ɛ bǐ kplé kpódó sɛ́nkplɔ́nmɛtɔ́ tɔn lɛ́ɛ kpó, lobo kan fí e è ɖǒ ná ji Klísu ɖe ɔ́ byɔ́ yě.

⁵ Yě ká yí gbe n'i ɖɔ: “Bɛteleyɛ́mu, Judée yíkúngban jí wɛ, ɖó Mawu kó ɖɔ gbɔn gbeyíɖɔ tɔn lɛ́ɛ jí ɖɔ:

⁶ ‘Hwɛ, Bɛteleyɛ́mu, toxo e ɖo Juda yíkúngban jí é! A ɖo tó ɖěbǔ ɖo Juda toxo ɖaxó lɛ́ɛ mɛ ǎ, ɖó agblo towe mɛ wɛ axɔ́sú ɖé ná tɔ́n ɖe, bó ná kpé nukún dó togun ce Izlayɛ́li wú.’ ”

⁷ Elódu ka zɔ́n, bɔ è yi ylɔ́ nǔnywɛ́tɔ́ lɛ́ɛ wá n'i. Ée yě wá ɔ́, é kplá yě yi kpá, bo kan hwenu e sunví ɔ́ tɔ́n dó ɔ́ byɔ́ yě tlítlí.

⁸ Énɛ́ gúdo ɔ́, é nyi nǔnywɛ́tɔ́ énɛ́ lɛ́ɛ sɛ́ dó Bɛteleyɛ́mu bó ɖɔ nú yě ɖɔ: “Mi yi ba do nú vǐ ɔ́ céɖécéɖé, mi ka mɔ ɛ hǔn, mi wá ɖɔ nú mì, nú nyɛ lɔmɔ̌ ná yi kan xwé byɔ́.”

^9-10 Ée axɔ́sú ɔ́ ɖɔ mɔ̌ nú yě gúdo ɔ́, yě jɛ ali. Sunví e tɔ́n bɔ yě kó mɔ ɖ'ayǐ ɔ́ wá jɛ nukɔn nú yě. Ée yě lɛ́ mɔ sunví ɔ́ lě ɔ́, é hun xomɛ nú yě tlala, bɔ sunví ɔ́ ɖo nukɔn nú yě mɔ̌, káká yi fí e vǐ ɔ́ ɖe ɔ́, bó nɔ te.

¹¹ Énɛ́ ɔ́, yě byɔ́ xwé ɔ́ gbe, bó mɔ vǐ ɔ́ kpódó nɔ tɔn kpó, bó jɛ kpo, bó ɖe kɔ́ n'i; yě hun gbǎví yětɔn lɛ́ɛ, bó kan agban n'i; yě ná ɛ siká, bó ná ɛ zǎlínkpɔ́n kpódó célu xɔ akwɛ́ ɖé kpán, bɔ è nɔ ylɔ́ célu ɔ́ ɖɔ Mǐla.

¹² Mawu ka wá xo dlɔ̌ yě ɖɔ yě ní ma sɔ́ lɛ́ kɔ gbɔn Elódu gɔ́n ó; bɔ yě wlí ali ɖěvo bo yi to yětɔn mɛ.

Jozɛ́fu hɔn yi Ejípu

¹³ Ée nǔnywɛ́tɔ́ énɛ́ lɛ́ɛ yi gúdo ɔ́, wɛnsagun Aklúnɔ tɔn wá xo dlɔ̌ Jozɛ́fu bó ɖɔ n'i ɖɔ: “Sí te, zě vǐ ɔ́, kplá nɔ tɔn, bó hɔn yi Ejípu; nɔ dɔ̌n káká yi jɛ hwenu e un ná lɛ́ wá ɖɔ xó nú we dó é. Ɖó Elódu ɖo vǐ ɔ́ ba ná hu wɛ.”

¹⁴ Jozɛ́fu ka sí te zǎn ɔ́ mɛ nǔgbó, bó zé vǐ ɔ́, bó kplá vǐ ɔ́ sín nɔ, bɔ yě hɔn yi Ejípu,

¹⁵ lobo nɔ fínɛ́ káká jɛ hwenu e Elódu kú é. Nǔ nyí mɔ̌, nú xó e Aklúnɔ ko ɖɔ ɖ'ayǐ gbɔn gbeyíɖɔ tɔn jí ɔ́ ná dó jɛ; é wɛ nyí ɖɔ: “Un ylɔ́ vǐ ce sín Ejípu.”

Elódu ná gbe ɖɔ è nǐ hu yɔkpɔ́vú lɛ́ɛ ɖo Bɛteleyɛ́mu

¹⁶ Ée Elódu mɔ ɖɔ nǔnywɛ́tɔ́ lɛ́ɛ flú émí ɔ́, xomɛ sin i tlala. É kpɔ́n hwenu e è ji vǐ ɔ́ dó bɔ nǔnywɛ́tɔ́ lɛ́ɛ ɖɔ céɖécéɖé tɔn n'i ɔ́, bó sɛ́ mɛ dó ɖɔ yě nǐ yi hu vǐ súnnu e ma ko ɖó xwe we ǎ lɛ́ɛ káká yi jɛ ée kó ɖó xwe we lɛ́ɛ jí gbɔn Bɛteleyɛ́mu kpódó gletoxo e lɛ́ lɛ̌ dó e lɛ́ɛ kpó mɛ.

¹⁷ Énɛ́ ɔ́, nǔ e gbeyíɖɔ Jelemíi kó ɖɔ ɖ'ayǐ ɔ́ jɛ; é wɛ nyí ɖɔ:

¹⁸ “È se mɛɖé ɖo xó sú wɛ ɖo Lama, bɔ é ɖo avǐ ya wɛ, bó ɖo alě ná wɛ tlala; Hlacɛ́li wɛ ɖo vǐ tɔn lɛ́ɛ ví wɛ, bó jló ná se gbɔ ǎ, ɖó vǐ tɔn lɛ́ɛ sɔ́ ɖe ǎ.”

Jozɛ́fu lɛ́ kɔ sín Ejípu, bó wá cí Nazalɛ́ti

¹⁹ Ée Elódu kú ɔ́, wɛnsagun Aklúnɔ tɔn ɖokpó wá xo dlɔ̌ Jozɛ́fu ɖo Ejípu,

²⁰ bó ɖɔ n'i ɖɔ: “Sí te; zě vǐ ɔ́, kplá nɔ tɔn, bó lɛ́ kɔ yi Izlayɛ́li; ɖó mɛ e ɖo vǐ ɔ́ ba ná hu wɛ lɛ́ɛ kó kú.”

²¹ Nǔgbó ɔ́, Jozɛ́fu sí te, bó zé vǐ ɔ́, bó kplá vǐ ɔ́ sín nɔ, bó lɛ́ kɔ yi Izlayɛ́li.

²² Lo ɔ́, ée é se ɖɔ Akelawúsi wɛ ɖo tɔ́ tɔn Elódu zinkpo jí, bó ɖo axɔ́sú ɖu wɛ ɖo Judée ɔ́, fínɛ́ yiyi dó xɛsi n'i; Mawu ka lɛ́ xo dlɔ̌ ɛ, bɔ é gbɔ bó yi Galilée yíkúngban jí,

²³ lobo yi cí to e è nɔ ylɔ́ ɖɔ Nazalɛ́ti ɔ́ mɛ, bónú nǔ e gbeyíɖɔ Mawu tɔn lɛ́ɛ kó wlán ɔ́ ná dó jɛ, é wɛ nyí ɖɔ: “È nǎ ylɔ́ Mɛhwlɛ́ngántɔ́ ɔ́ ɖɔ Nazalɛ́tinu.”