Matíe 15 - MAWUXÓWÉMA

Jezu ɖɔ xó dó Jwifu lɛ́ɛ sín hwɛndo wú

¹ Hwenɛ́nu ɔ́, Falizyɛn lɛ́ɛ kpódó sɛ́nkplɔ́nmɛtɔ́ lɛ́ɛ kpó gosín Jeluzalɛ́mu, bó wá Jezu gɔ́n, bó kanbyɔ́ ɛ ɖɔ:

² “Aniwútu wɛ ahwanvú towe lɛ́ɛ ma ka nɔ́ xwedó mɛxó mitɔn lɛ́ɛ sín hwɛndo ǎ? Ɖó yě nɔ klɔ́ alɔ lě e sɛ́n ɔ́ zɔ́n gbɔn é cóbó nɔ ɖu nǔ ǎ.”

³ Jezu ka ɖɔ nú yě ɖɔ: “Bɔ aniwútu wɛ midɛɛ lɛ́ɛ ka nɔ gba Mawusɛ́n ɔ́, bó nɔ́ xwedó mi ɖésúnɔ sín hwɛndo lɛ́ɛ?

⁴ Ɖó Mawu ɖɔ: ‘Sí tɔ́ towe kpódó nɔ towe kpó; mɛ e ka na ɖɔ nǔ nyanya dó tɔ́ tɔn abǐ nɔ tɔn wú ɔ́, è ní hu i.’

⁵ Midɛɛ lɛ́ɛ ka nɔ́ ɖɔ mɛ e ná ɖɔ nú tɔ́ tɔn abǐ nɔ tɔn ɖɔ: ‘Nǔ e un ɖó bo na dó gɔ́ alɔ nú we ɔ́, un ko sɔ́ ɖó ayǐ nú Mawu’ ɔ́,

⁶ mɛ énɛ́ ɔ́ sɔ́ ɖó nǔɖé bó ná wa nú tɔ́ tɔn abǐ nɔ tɔn dandan ǎ. Mɔ̌ wɛ mi nɔ gba Mawusɛ́n ɔ́, bó nɔ́ xwedó hwɛndo tɔ́gbó mitɔn lɛ́ɛ tɔn gbɔn.

⁷ Yɛmɛnúwatɔ́ e mi! Xó e Ezayíi ɖɔ dó mi wú ɔ́ ɖi mi wú dódó. É wɛ nyí ɖɔ:

⁸ ‘Togun élɔ́ nɔ sɔ́ mì su ɖo nu; ayi tɔn ka ɖo wǔ ce ǎ.

⁹ Yě ɖo sinsɛn mì wɛ bo ɖɔ; lo ɔ́, nǔ yǎyá wa wɛ yě ɖe; yě ɖo Mawuxó kplɔ́n mɛ wɛ bo ɖɔ; lo ɔ́, gbɛtɔ́ lɛ́ɛ sín sɛ́n kplɔ́n mɛ wɛ yě ɖe.’ ”

Nǔ e nɔ hɛn gbɛtɔ́ blí lɛ́ɛ

¹⁰ Jezu ylɔ́ togun ɔ́, bo ɖɔ n'i ɖɔ: “Mi ɖótó ganjí, bo se;

¹¹ nǔ e nɔ byɔ́ gbɛtɔ́ nu mɛ ɔ́ wɛ nɔ hɛn gbɛtɔ́ blí ǎ; lo ɔ́, nǔ e nɔ tɔ́n sín gbɛtɔ́ nu mɛ ɔ́ wɛ nɔ hɛn gbɛtɔ́ blí.”

¹² Énɛ́ gúdo ɔ́, ahwanvú tɔn lɛ́ɛ sɛkpɔ́ ɛ, bo ɖɔ n'i ɖɔ: “A ka nywɛ́ ɖɔ xó e a ɖɔ nɛ́ lɛ́ɛ vɛ́ Falizyɛn lɛ́ɛ wú a?”

¹³ Jezu ka yí gbe nú yě ɖɔ: “Atín ɖěbǔ e tɔ́ ce e ɖo sɛ́xwé ɔ́ ma tun ǎ ɔ́, è nǎ hɔn.

¹⁴ Mi jó yě dó; nukúntíntɔ́nnɔ lɛ́ɛ wɛ ɖo yěɖée kplá wɛ; ényí nukúntíntɔ́nnɔ ɖě ɖo ali xlɛ́ ɖě wɛ ɔ́, yě mɛ we lɛ́ɛ bǐ wɛ nɔ yi jɛ do mɛ.”

¹⁵ Piyɛ́ɛ ka yí xó, bó ɖɔ nú Jezu ɖɔ: “Tín lǒ énɛ́ mɛ nú mǐ.”

¹⁶ Bɔ Jezu yí gbe n'i bo ɖɔ: “Midɛɛ lɛ́ɛ lɔmɔ̌ ɔ́, nǔnywɛ́ lɛ́ hwedó mi sɔ mɔ̌ wɛ a?

¹⁷ Hǔn, mi tunwun ɖɔ nǔ ɖěbǔ byɔ́ gbɛtɔ́ sín nu mɛ ɔ́, adɔgo mɛ wɛ é nɔ dín yi, bó nɔ́ wá yi tɔ́n hwenu e è yi afɔjí ɔ́ ǎ cé?

¹⁸ Lo ɔ́, nǔ e tɔ́n sín gbɛtɔ́ nu mɛ ɔ́, ayi tɔn mɛ wɛ é gosín; nǔ énɛ́ wɛ nɔ́ hɛn gbɛtɔ́ blí;

¹⁹ ɖó ayi mɛ wɛ nǔ nyanya tɛnmɛ tɛnmɛ lɛ́ɛ nɔ́ gosín: mɛhuhu, agalilɛ, nǔblíblí wiwa, ajojija, kúnnu agɔ ɖiɖe, hɛ̌ndómɛ.

²⁰ Nǔ énɛ́ lɛ́ɛ wɛ nɔ́ hɛn gbɛtɔ́ blí. Alɔ ma klɔ́, cóbó ɖu nǔ e ɖo sɛ́n ɔ́ mɛ ɔ́ wɛ nɔ́ hɛn gbɛtɔ́ blí ǎ.”

Nyɔ̌nu e ma nyí Jwifu ǎ é ɖokpó ɖi nǔ nú Jezu

²¹ Jezu gosín fínɛ́, bo wá yi Tíi kpódó Sidɔ́ɔn to kpó gbé jí.

²² Nyɔ̌nu Kanáanu ɖokpó ka gosín gbě nɛ́ ɔ́ jí, bó wá Jezu gɔ́n. É jɛ xó sú jí, bó ɖɔ: “Aklúnɔ! Davídi ví, kú nǔbláwǔ nú mì. Yɛ nyanya ɖo vǐ ce nyɔ̌nu jí, bɔ é ɖo wǔvɛ́ mɔ wɛ baɖabaɖa.”

²³ Jezu ka kɛ nu ǎ. Ahwanvú tɔn lɛ́ɛ ka sɛ yá ɛ, bó ɖɔ n'i ɖɔ: “Nya nyɔ̌nu ɔ́, ɖó é ɖo xó sú ɖo gǔdo mǐtɔn wɛ dín.”

²⁴ Jezu ka yí gbe bo ɖɔ: “Izlayɛ́li ví e ci lɛ̌ngbɔ́ búbú ɖɔhun lɛ́ɛ kɛ́ɖɛ́ gbé mɛ wɛ Mawu sɛ́ mì dó.”

²⁵ Lo ɔ́, nyɔ̌nu ɔ́ wá jɛ kpo ɖo Jezu nukɔn, bó ɖɔ: “Aklúnɔ, hwlɛ̌n mì!”

²⁶ Jezu ka yí gbe n'i bó ɖɔ: “É jɛ xá bónú è nǎ zé nǔɖuɖu yɔkpɔ́vú lɛ́ɛ tɔn jó nú cukú lɛ́ɛ ǎ.”

²⁷ Nyɔ̌nu ɔ́ ka yí gbe nú Jezu bó ɖɔ: “Nǔgbó wɛ Aklúnɔ; é ka ɖo mɔ̌ có cukú lɛ́ɛ nɔ́ cyán mɛ e ɖó yě lɛ́ɛ sín nǔɖuɖu e nɔ́ hlɛ́n kɔn nyi ayǐ hwenu e è ɖo nǔ ɖu wɛ ɔ́ ɖu.”

²⁸ Ée nyɔ̌nu ɔ́ ɖɔ mɔ̌ ɔ́, Jezu yí gbe n'i ɖɔ: “Nyɔ̌nu, nǔɖiɖi towe d'agba; lě e a jlǒ gbɔn ɔ́, ní bó nyí mɔ̌ nú we.” Hwenɛ́nu tlóló ɔ́, azɔn gbɔ nú vǐ tɔn.

Jezu gbɔ azɔn nú azinzɔnnɔ gěgé

²⁹ Jezu gosín fínɛ́, bó yi Galilée xutó. É xá só jí, bó jínjɔ́n ayǐ.

³⁰ Mɛ lɛ́ɛ ka nyi ahwan kpɔ́ gégé wá gɔ̌n tɔn. Yě kplá nukúntíntɔ́nnɔ lɛ́ɛ, sékúnɔ lɛ́ɛ, wɔ̌ngblénánɔ lɛ́ɛ, ɖɛ̌kúnánɔ lɛ́ɛ, kpódó azinzɔnnɔ ɖěvo ɖěvo lɛ́ɛ kpó wá nukɔn tɔn, bɔ é gbɔ azɔn nú yě bǐ.

³¹ Ée mɛ lɛ́ɛ mɔ ɖɔ ɖɛ̌kúnánɔ lɛ́ɛ ɖo xó ɖɔ wɛ céɖécéɖé, bɔ wǔ syɛ́n wɔ̌ngblénánɔ lɛ́ɛ, bɔ sékúnɔ lɛ́ɛ ɖo zɔnlin ɖi wɛ, bɔ nukúntíntɔ́nnɔ lɛ́ɛ ɖo nǔ mɔ wɛ ɔ́, é kpácá yě ɖésú, bɔ yě jɛ susu kpa nú Mawu e Izlayɛ́li ví lɛ́ɛ nɔ́ sɛn é jí.

Jezu ná nǔɖuɖu gbɛtɔ́ děgba (4.000)

³² Jezu ylɔ́ ahwanvú tɔn lɛ́ɛ, bó ɖɔ nú yě ɖɔ: “Mɛ élɔ́ lɛ́ɛ sín nǔ blá wǔ nú mì, ɖó, sín azǎn atɔn ɖíe ɖokpóó wɛ yě ko ɖo kpɔ́ xá mì; yě ká sɔ́ ɖó nǔɖé bó ná ɖu ǎ. Un ka jló ná ɖó yě xovɛ́ bó nyi yě ǎ; yě táá wá yi ba yěɖée kpo ɖo alixo, bó ná jɛ ayǐ.”

³³ Ahwanvú tɔn lɛ́ɛ ka ɖɔ n'i ɖɔ: “Fítɛ́ wɛ mǐ ka ná ba nǔɖuɖu sín ɖo gblǒlǒ mɛ fí din, bɔ é ná kpé ahwan wɔ̌buwɔ́bú élɔ́?”

³⁴ Jezu ka kanbyɔ́ yě ɖɔ: “Wɔ̌xúxú nabí wɛ ɖo mi sí?” Bɔ yě yí gbe n'i ɖɔ: “Wɔ̌xúxú tɛ́nwe wɛ, bɔ hweví kpɛví kpɛví ɖé lɛ́ɛ ka gɔ́ ná.”

³⁵ Jezu ɖe gbe nú mɛ lɛ́ɛ, bɔ yě jínjɔ́n ayǐ.

³⁶ É sɔ́ wɔ̌xúxú tɛ́nwe lɛ́ɛ kpódó hweví lɛ́ɛ kpó, bó dó kú nú Mawu. Énɛ́ gúdo ɔ́, é kán, bó bɛ́ jó nú ahwanvú tɔn lɛ́ɛ, bɔ yě má nú mɛ lɛ́ɛ.

³⁷ Mɛ lɛ́ɛ bǐ ɖu nǔ bó gɔ́ xo ganjí, bɔ ahwanvú tɔn lɛ́ɛ wá bɛ́ nǔɖuɖu e kpo lɛ́ɛ kplé, bɔ é gɔ́ xasun tɛ́nwe.

³⁸ Gbɛtɔ́ děgba ɖokpó (4.000) wɛ ɖu nǔ ɖo fínɛ́; è ka xa nyɔ̌nu lɛ́ɛ kpódó yɔkpɔ́vú lɛ́ɛ kpó ǎ.

³⁹ Énɛ́ gúdo ɔ́, Jezu nyi mɛ lɛ́ɛ, bɔ é ɖésú byɔ́ tɔjíhún mɛ, bó yi Magadán gbé jí.