Matíe 14 - MAWUXÓWÉMA

È hu Jǎan Yɛhwesinlɛnúmɛtɔ́

¹ Hwenɛ́nu ɔ́, tokpɔngán Elódu se nǔwiwa Jezu tɔn lɛ́ɛ,

² bó ɖɔ nú mɛsɛntɔ́ tɔn lɛ́ɛ ɖɔ: “Jǎan Yɛhwesinlɛnúmɛtɔ́ ɔ́ wɛ; é fɔ́n sín mɛkúkú lɛ́ɛ mɛ; énɛ́ wútu wɛ é ɖó hlɔ̌nhlɔ́n, bó ɖo nǔ énɛ́ lɛ́ɛ jlɛ́ wɛ.”

^3-4 Ɖó tokpɔngán Elódu yí nɔví tɔn Filípu sín asi e è nɔ ylɔ́ ɖɔ Elodiadi ɔ́, bó da. Jǎan ka ɖɔ n'i ɖɔ: “Sɛ́n ɔ́ ná gbe we ɖɔ a nǐ da ɛ ǎ.” Xó énɛ́ e Jǎan ɖɔ n'i ɔ́ wɛ zɔ́n, bɔ é wlí i, bó blá ɛ, bó zé e dó gankpá mɛ,

⁵ bó jló ná hu i; lo ɔ́, é ɖo xɛsi ɖi nú togun ɔ́ wɛ, ɖó togun ɔ́ nɔ́ mɔ Jǎan dó mɔ gbeyíɖɔ Mawu tɔn ná.

⁶ Gbe ɖokpó ka wá su, bɔ Elódu ɖo jijizán tɔn sín xwe ɖu wɛ; Elodiadi sín vǐ ɖyɔ̌vǐ ɔ́ ka wá ɖú we ɖo jǒnɔ lɛ́ɛ nukɔn. We tɔn nyɔ́ Elódu nukún mɛ,

⁷ bɔ é dó akpá nú vǐ ɖyɔ̌vǐ ɔ́, bo xwlé nǔ d'é jí ɖɔ é byɔ́ nǔ ɖěbǔ ɔ́, émí ná ná ɛ.

⁸ Vǐ ɔ́ sín nɔ ka kplɔ́n nǔ i bɔ é ɖɔ: “Nǎ Jǎan Yɛhwesinlɛnúmɛtɔ́ ɔ́ sín ta mì dó gannúgbɛ́jɛ́ mɛ ɖo fí din tlóló.”

⁹ Ée é ɖɔ mɔ̌ ɔ́, wǔ kú gǎn ɔ́; lo ɔ́, ée é kó dó akpá, bó xwlé nǔ d'é jí ɖo jǒnɔ lɛ́ɛ nukɔn ɔ́, é ná gbe

¹⁰ ɖɔ è nǐ yi gbo Jǎan sín ta ɖo gankpá mɛ wá n'i.

¹¹ Bɔ è yi gbo ta tɔn dó gannúgbɛ́jɛ́ mɛ wá nú ɖyɔ̌vǐ ɔ́, bɔ é sɔ́ yi jó nú nɔ tɔn.

¹² Jǎan sín ahwanvú lɛ́ɛ wá sɔ́ cyɔ tɔn bó yi ɖi, bó ká yi ɖɔ nǔ e jɛ ɔ́ nú Jezu.

Jezu ná nǔɖuɖu gbɛtɔ́ děgba ɖě afatɔ́n (5.000)

¹³ Ée Jezu se ɖɔ Jǎan Yɛhwesinlɛnúmɛtɔ́ ɔ́ kú ɔ́, é byɔ́ tɔjíhún ɖé mɛ, bó ɖidó zɔ fí e mɛɖé ma ná mɔ ɛ ɖe ǎ é. Ahwan ɔ́ ka wɔ́ fí e é xwe ɔ́, bó gosín to lɛ́ɛ mɛ to lɛ́ɛ mɛ, bó zɔn afɔ jɛ gǔdo tɔn.

¹⁴ Ée Jezu wá tɔ́n sín tɔjíhún ɔ́ mɛ ɔ́, é mɔ gbɛtɔ́ wɔ̌buwɔ́bú ɖé lɛ́ɛ; nǔ yětɔn blá wǔ n'i, bɔ é gbɔ azɔn nú azinzɔnnɔ e ɖo yě mɛ lɛ́ɛ.

¹⁵ Ée gbadanu wá su ɔ́, ahwanvú Jezu tɔn lɛ́ɛ sɛ yá ɛ, bó ɖɔ n'i ɖɔ: “Fí e mǐ ɖe ɖo fí ɔ́ yá dó toxo ɖěbǔ ǎ; zǎn ɖíe ká ɖo kúkú wɛ e; gbɔ bo nyi mɛ lɛ́ɛ, bónú yě ná yi ba nǔɖé ɖu ɖo gletoxo lɛ́ɛ mɛ.”

¹⁶ Jezu ka yí gbe nú yě ɖɔ: “Yě ɖó ná yi gbɔn mɔ̌ ǎ; mi ɖésúnɔ mi ná nǔɖuɖu yě.”

¹⁷ Lo ɔ́, yě ɖɔ n'i ɖɔ: “Wɔ̌xúxú atɔ́ɔ́n kpódó hweví we kpó jɛ́n ɖo mǐ sí.”

¹⁸ Jezu ka ɖɔ nú yě ɖɔ: “Mi bɛ́ yě wá nú mì.”

¹⁹ Bɔ é ɖe gbe nú mɛ lɛ́ɛ, bɔ yě jínjɔ́n gběhan jí. É fɔ wɔ̌xúxú atɔ́ɔ́n lɛ́ɛ, kpódó hweví we lɛ́ɛ kpán, bó kpɔ́n jǐ, bó dó kú nú Tɔ́ ɔ́. Énɛ́ ɔ́ gúdo ɔ́, é kán wɔ̌xúxú lɛ́ɛ, lobo bɛ́ nú ahwanvú tɔn lɛ́ɛ, bɔ yě má nú mɛ lɛ́ɛ.

²⁰ Yě bǐ ɖu nǔ, bó gɔ́ xo, bɔ è kplé nǔɖuɖu e kpo ɔ́, bɔ é gɔ́ xasun wěwe.

²¹ Mɛ e ɖu nǔ lɛ́ɛ ka yi gbɛtɔ́ děgba ɖě afatɔ́n (5.000); è ka xa nyɔ̌nu lɛ́ɛ kpódó yɔkpɔ́vú lɛ́ɛ kpó ǎ.

Jezu ɖi zɔnlin gbɔn tɔ jí

²² Énɛ́ gúdo tlóló ɔ́, Jezu ɖɔ nú ahwanvú tɔn lɛ́ɛ ɖɔ hwenu e émí ná ɖo mɛ lɛ́ɛ nyi sɛ́ dó xwé wɛ ɔ́, yědɛɛ lɛ́ɛ ní byɔ́ tɔjíhún ɔ́ mɛ, bó jɛ nukɔn ɖidó agě ɖě ɔ́ jǐ.

²³ Ée Jezu nyi mɛ lɛ́ɛ sɛ́ dó xwé ɔ́, é wá yi xá só ɖé jí, bó ná yi xo ɖɛ. Zǎn kú, bɔ é kpo é ɖokpónɔ géé ɖo fínɛ́.

²⁴ Tɔjíhún ɔ́ ko sɛ yi xuzan mɛ, bɔ xu ɔ́ nɔ xo wá gba kɔn nyi wú, ɖó hǔn ɔ́ ɖo jɔhɔn kpé wɛ.

²⁵ Sín gan atɔn sɔ́ yi gan ayizɛ́n mɛ ayǐtéhɔ̌nnu mɔ̌ ɔ́, Jezu ɖi zɔnlin gbɔn xu ɔ́ jí, bó ɖidó yě gɔ̌n.

²⁶ Ée ahwanvú tɔn lɛ́ɛ mɔ ɛ ɖo zɔnlin ɖi wɛ gbɔn xu jí ɔ́, ayi yětɔn gbadó, bɔ yě ɖɔ: “Nǔ ɖíe kpé wɛ mǐ ɖe e!” Énɛ́ ɔ́, xɛsi jɛ yě jí, bɔ yě sú xó.

²⁷ Jezu ka ɖɔ nú yě tlóló ɖɔ: “Mi kpan akɔ́n, nyɛ wɛ; mi ma ɖi xɛsi ó.”

²⁸ Piyɛ́ɛ ka ɖɔ n'i ɖɔ: “Aklúnɔ, ényí hwi jɛ́n wɛ nǔgbó hǔn, bo ɖe gbe nú ma ɖi zɔnlin gbɔn tɔ ɔ́ jí wá kpé we.”

²⁹ Bɔ Jezu ɖɔ n'i ɖɔ: “Wǎ!” Piyɛ́ɛ ka tɔ́n sín tɔjíhún ɔ́ mɛ, bó jɛ zɔnlin ɖi jí, bó ɖidó Jezu gɔ́n.

³⁰ Lo ɔ́, ée Piyɛ́ɛ mɔ ɖɔ jɔhɔn ɔ́ ɖo syɛ́nsyɛ́n d'é jí wɛ ɔ́, xɛsi jɛ jǐ tɔn, bɔ é jɛ do yi jí, bó sú xó bó ɖɔ: “Aklúnɔ, hwlɛ̌n mì!”

³¹ Tlóló ɔ́, Jezu dlɛ́n alɔ, bó hɛn ɛ, bó ɖɔ n'i ɖɔ: “Nǔɖiɖihwedónánɔ, étɛ́wú wɛ a xo nǔ kpɔ́n?”

³² Bɔ yě byɔ́ tɔjíhún ɔ́ mɛ, bɔ jɔhɔn ɔ́ xwɛ.

³³ Mɛ e ɖo tɔjíhún ɔ́ mɛ lɛ́ɛ wá jɛ kpo ɖo Jezu nukɔn, bó ɖɔ: “Mawu ví wɛ a nyǐ nǔgbó.”

Jezu gbɔ azɔn nú azinzɔnnɔ lɛ́ɛ ɖo Jenɛzalɛ́ti gbé jí

³⁴ Ée yě jɛ agě ɖě ɔ́ jí ɔ́, yě jɛ Jenɛzalɛ́ti sín ayǐkúngban jí.

³⁵ Mɛ e ɖo fínɛ́ lɛ́ɛ ka mɔ ɖɔ Jezu wɛ wá, bó sɛ́ wɛn dó mɛ e ɖo toxo ɔ́ mɛ lɛ́ɛ bǐ, bɔ yě kplá azinzɔnnɔ lɛ́ɛ bǐ wá n'i;

³⁶ énɛ́ ɔ́, è sa vo n'i ɖɔ é ní ná gbe yě nú yě vɛ́ kó ɖó alɔ awu tɔn tó kpowun; bɔ azinzɔnnɔ e ɖó alɔ awu tɔn tó lɛ́ɛ bǐ sín azɔn gbɔ.