Matíe 13 - MAWUXÓWÉMA

Jezu dó lǒ dó nǔkúndótɔ́ ɖé wú

¹ Gbe nɛ́ gbe ɖokpó ɔ́, Jezu tɔ́n sín xwé gbe, bó yi jínjɔ́n xutó, bó ná kplɔ́n nǔ mɛ.

² Ahwan e lɛ́ lɛ̌ dó e ɔ́ sukpɔ́ káká, bɔ é byɔ́ tɔjíhún mɛ, bó jínjɔ́n ayǐ, bó ná kplɔ́n nǔ yě; mɛ lɛ́ɛ bǐ sésé ka ɖo te ɖo xu ɔ́ tó.

³ É dó lǒ dó ɖɔ xó nú yě dó nǔ gěgé jí; é ɖɔ nú yě ɖɔ: “Glesi ɖé tɔ́n gbe ɖokpó, bó yi nǔkún hú gbé.

⁴ Hwenu e é ɖo nǔkún ɔ́ hú gbɔn gle ɔ́ mɛ wɛ ɔ́, ɖě jɛ ali jí, bɔ xɛ lɛ́ɛ wá cyán ɖu;

⁵ ɖě yi jɛ awǐnnyakan mɛ fí e kɔ́ gěgé ɖé ma ɖe ǎ é; énɛ́ lɛ́ɛ yá wǔ wú, ɖó kɔ sukpɔ́ ɖo fínɛ́ ǎ;

⁶ lo ɔ́, ɖěe hwesivɔ́ hun ɔ́, yě fyɔ́ lobo xú, ɖó ɖɔ yětɔn yi do ǎ wútu.

⁷ Ɖěvo lɛ́ɛ jɛ wundonu, bɔ wun lɛ́ɛ wú, bó vun blá yě.

⁸ Ɖěvo lɛ́ɛ jɛ ayǐkúngban ɖagbe jí, yědɛɛ lɛ́ɛ wú, bó sɛ́n ganjí; bɔ nǔkún ɖě ná mɔ̌hunkɔtɔn donu kanwe ko (100); ɖěvo ná mɔ̌hunkɔtɔn donu kanɖé ko (60); ɖěvo lɛ́ ná mɔ̌hunkɔtɔn donu gban (30).”

⁹ Bó ná dó sú ta ná ɔ́, Jezu ɖɔ: “Mɛ e ɖó tó bó ná dó se nǔ ná ɔ́ ní ɖótó bó se.”

Étɛ́wú Jezu ka nɔ dó lǒ?

¹⁰ Ahwanvú Jezu tɔn lɛ́ɛ sɛ yá ɛ, bó kanbyɔ́ ɛ ɖɔ: “Aniwútu wɛ a ka nɔ dó lǒ dó ɖɔ xó nú yě?”

¹¹ Jezu yí gbe nú yě ɖɔ: “Axɔ́súɖuɖu sɛ́xwé tɔn sín nǔbúdo lɛ́ɛ ɔ́, midɛɛ lɛ́ɛ wɛ è hun xlɛ́; è ka xlɛ́ yědɛɛ lɛ́ɛ ǎ.

¹² Ɖó mɛ e ɖó nǔ ɔ́, è nǎ lɛ́ ná ɛ d'é jí, bɔ é ná túnflá; mɛ e ma ka ɖó nǔɖé ǎ ɔ́, è nǎ lɛ́ yí kpɛ e ɖo así tɔn é.

¹³ Nǔ e wú un nɔ dó lǒ dó ɖɔ xó nú yě ɔ́ nɛ́; ɖó yě ɖo nǔ mɔ wɛ, cóbó nyí mamɔtɔ́; yě ɖo nǔ se wɛ, cóbó nyí masetɔ́; yě ká nɔ lɛ́ mɔ nukúnnú jɛ nǔ ɖěbǔ mɛ ǎ.

¹⁴ Nǔ nyí mɔ̌, bónú xó e Mawu ɖɔ gbɔn gbeyíɖɔ tɔn Ezayíi jí ɔ́ ná ɖi yě wú; é wɛ nyí ɖɔ: ‘Mi ná se céɖécéɖé, mi ka ná mɔ nǔ jɛ mɛ ǎ; mi ná mɔ ganjí, có mi ka ná mɔ ǎ.

¹⁵ Ɖó togun élɔ́ sín ayixa ko syɛ́n; yě sú tó yětɔn, bó myɔ́ nukún, ɖó nukún yětɔn táá wá mɔ nǔ, bónú tó yětɔn táá wá se nǔ, nú ayixa yětɔn ná wá ja nǔ mɔ jɛ nǔ mɛ gbé, bónú yě ná wá ja kɔ lɛ́ sín hwɛ yětɔn lɛ́ɛ gúdo gbé, nú ma wá gbɔ azɔn nú yě. Xó e Aklúnɔ ɖɔ ɔ́ nɛ́.’

¹⁶ “Amɔ̌, midɛɛ lɛ́ɛ ɔ́, nǔ nyɔ́ nú mi, ɖó nukún mitɔn lɛ́ɛ nɔ́ mɔ nǔ, bɔ tó mitɔn lɛ́ɛ nɔ́ se nǔ.

¹⁷ Ma ɖɔ nǔgbó nú mi, gbeyíɖɔ Mawu tɔn gěgé kpódó hwɛjijɔnɔ gěgé kpó ko jló ná mɔ nǔ e mɔ wɛ mi ɖe lɛ́ɛ, yě ká mɔ ǎ; yě jló ná se nǔ e se wɛ mi ɖe din é, yě ká se ǎ.”

Jezu tín nǔkúndótɔ́ sín lǒ ɔ́ mɛ nú ahwanvú tɔn lɛ́ɛ

¹⁸ “Midɛɛ lɛ́ɛ ɔ́, mi bo ɖótó lǒ e un dó nú yě dó nǔkúndótɔ́ wú ɔ́ sín tínmɛ.

¹⁹ Ayǐkúngban e jí nǔkún lɛ́ɛ jɛ ɖo alixo ɔ́ wɛ nyí mɛ e se axɔ́súɖuɖu Mawu tɔn sín xó, bó ma mɔ nukúnnú jɛ wú ǎ é; awǒvi nɔ́ wá ɖe ée é se ɔ́ sín ayi tɔn mɛ.

²⁰ Awǐnnyakan mɛ fí e nǔkún ɖě lɛ́ɛ yi jɛ, bó wú tlóló ɔ́ wɛ nyí mɛ e se axɔ́súɖuɖu Mawu tɔn sín xó, bó yí dó ayi mɛ tlóló kpódó awǎjijɛ kpó é;

²¹ lo ɔ́, é ka dó ɖɔ do ǎ; é syɛ́nlǐn ǎ, bɔ hwenu e è nɔ wá ɖo tagba dó nú mɛ wɛ, abǐ è nɔ ɖo mɛ ɖe dó wɛ ɖó Mawuxó ɔ́ wútu ɔ́, nǔɖiɖi tɔn nɔ́ jɛ ayǐ.

²² Ayǐkúngban e jí nǔkún lɛ́ɛ jɛ ɖo wundonu ɔ́ wɛ nyí mɛ e nɔ se axɔ́súɖuɖu Mawu tɔn sín xó, bɔ gbɛmɛ fí sín tagba lɛ́ɛ, dɔkun gbɛmɛ fí tɔn sín mɛdindɔn lɛ́ɛ nɔ́ vun blá xó ɔ́, bɔ é má nɔ́ sixú ná sínsɛ́n ǎ é.

²³ Ayǐkúngban ɖagbe e jí nǔkún lɛ́ɛ jɛ, bó ná sínsɛ́n gěgé ɔ́ wɛ nyí mɛ e se axɔ́súɖuɖu Mawu tɔn sín xó, bó mɔ nǔ jɛ mɛ é. É nɔ ná sínsɛ́n, bɔ ɖě nɔ́ ná mɔ̌hunkɔtɔn donu kanwe ko (100); ɖě ká nɔ ná mɔ̌hunkɔtɔn donu kanɖé ko (60); ɖěvo nɔ lɛ́ ná mɔ̌hunkɔtɔn donu gban (30).”

Jezu lɛ́ dó lǒ dó gběhan nyanya wú

²⁴ Jezu lɛ́ dó lǒ ɖěvo nú yě bó ɖɔ: “Axɔ́súɖuto sɛ́xwé tɔn cí nya e dó jinukún ɖagbe kɛ́ɖɛ́ dó gle tɔn mɛ ɔ́ ɖɔhun;

²⁵ hwenu e mɛ lɛ́ɛ bǐ ɖo amlɔ dɔ́ wɛ zǎn mɛ ɔ́, kɛntɔ́ tɔn wá dó gběhan nyanya kɔn nyi gle tɔn mɛ bó yi.

²⁶ Hwenu e jinukún lɛ́ɛ su, bó jɛ sínsɛ́n jí ɔ́, è wǎ mɔ nukúnnú jɛ gběhan nyanya lɛ́ɛ lɔmɔ̌ wú.

²⁷ Xwétɔ́ ɔ́ sín mɛsɛntɔ́ lɛ́ɛ wá ɖɔ n'i ɖɔ: ‘Aklúnɔ, é ma ka nyí jinukún ɖagbe kɛ́ɖɛ́ wɛ a dǒ nyi gle towe mɛ ǎ cé? Fítɛ́ gběhan nyanya ka gosín, bó wá tɔ́n ɖ'é mɛ?’

²⁸ É ka yí gbe nú yě ɖɔ: ‘Kɛntɔ́ sín nǔwiwa wɛ.’ Mɛsɛntɔ́ tɔn lɛ́ɛ ka kanbyɔ́ ɛ ɖɔ: ‘A jlǒ ɖɔ mǐ ní hɔn gběhan nyanya lɛ́ɛ síin a?’

²⁹ Gǎn yětɔn ka gbɛ́ nú yě bó ɖɔ: ‘Éeǒ! Mi táá wá yi xwe gběhan nyanya lɛ́ɛ hɔn gbé, bó ná hɔn jinukún ɖagbe lɛ́ɛ kpódó yě kpó ɖó kpɔ́.

³⁰ Mi jó we lɛ́ɛ dó, bónú yě ní su zɛ̌nzɛ̌n. Nǔkún-yiyahwenu ko wá su ɔ́, un ná ɖɔ nú nǔkún-yatɔ́ lɛ́ɛ ɖɔ: mi to hɔn gběhan nyanya lɛ́ɛ síin hwɛ̌, bó blá yě ɖó sonu sonu, bónú è nǎ dó zo; lo ɔ́, mi bɛ́ jinukún lɛ́ɛ dó agɔ̌ ce mɛ.’ ”

Jezu dó lǒ dó atínkwín e wínní hú atínkwín lɛ́ɛ bǐ é wú

³¹ Jezu lɛ́ dó lǒ ɖěvo nú yě bó ɖɔ: “Axɔ́súɖuto sɛ́xwé tɔn cí atínkwín wínníwínní ɖé ɖɔhun, bɔ nya ɖé dó nyi gle tɔn mɛ.

³² Atínkwín énɛ́ ɔ́ wínní hú atínkwín ɖě lɛ́ɛ bǐ; lo ɔ́, hwenu e é wá wú ɔ́, atín tɔn yi jǐ hú atín ɖě lɛ́ɛ bǐ, káká bó húzú atín ɖaxó, bɔ xɛ lɛ́ɛ nɔ́ xo adɔ̌ nyi ala tɔn lɛ́ɛ mɛ.”

Jezu dó lǒ dó tɔ́n wú

³³ Jezu lɛ́ dó lǒ ɖěvo nú yě bó ɖɔ: “Axɔ́súɖuto sɛ́xwé tɔn cí tɔ́n ɖɔhun, bɔ nǎwe ɖé sɔ́ dó linfín nǎ yi gannú atɔn mɔ̌ mɛ, bónú linfín nyinya ɔ́ bǐ ná dó fɔ́n.”

Étɛ́wú Jezu ka nɔ dó lǒ dó ɖɔ xó nú mɛ?

³⁴ Lǒ wɛ Jezu nɔ dó ɖɔ xó énɛ́ lɛ́ɛ bǐ nú ahwan lɛ́ɛ. É nɔ́ ɖɔ xó nú yě ma gɔn lǒ dó ǎ;

³⁵ bónú xó e gbeyíɖɔ Mawu tɔn ko ɖɔ ɔ́ ná dó jɛ; é wɛ nyí ɖɔ: “Un ná nɔ́ dó lǒ dó ɖɔ xó nú yě; un ná jlá nǔ e ɖo wi mɛ sín hwenu e è ko ɖó gbɛ ɔ́ dó ɔ́ yě.”

Jezu tín lǒ e é dó dó gběhan nyanya wú ɔ́ mɛ nú ahwanvú tɔn lɛ́ɛ

³⁶ Jezu nyi togun ɔ́, bó yi xwé gbe, bɔ ahwanvú tɔn lɛ́ɛ sɛkpɔ́ ɛ, bó ɖɔ n'i ɖɔ: “Lǒ e a dǒ dó ɖɔ xó dó gběhan nyanya e ɖo gle mɛ ɔ́ wú ɔ́, tínmɛ nú mǐ.”

³⁷ Jezu ka yí gbe nú yě ɖɔ: “Mɛ e dó nǔkún ɖagbe ɔ́, nyɛ Gbɛtɔ́ví ɔ́ wɛ;

³⁸ gle ɔ́ wɛ nyí gbɛ ɔ́; nǔkún ɖagbe ɔ́ wɛ nyí axɔ́súɖuto Mawu tɔn sín vǐ lɛ́ɛ; gběhan nyanya ɔ́ wɛ nyí awǒvi sín vǐ lɛ́ɛ.

³⁹ Kɛntɔ́ e dó gběhan nyanya ɔ́, awǒvi wɛ; nǔkún-yiyahwenu ɔ́, gbɛvivɔzán gbe wɛ; nukún-yatɔ́ lɛ́ɛ wɛ nyí wɛnsagun Mawu tɔn lɛ́ɛ.

⁴⁰ Lě e è blá gběhan nyanya lɛ́ɛ ɖó kpɔ́, bó dó zo gbɔn ɔ́, mɔ̌ wɛ é ná nyí gbɔn ɖo gbɛvivɔzán gbe.

⁴¹ Nyɛ Gbɛtɔ́ví ɔ́ ná sɛ́ wɛnsagun ce lɛ́ɛ dó, bɔ yě ná wá bɛ́ hwɛmɛdɔnmɛdótɔ́ lɛ́ɛ bǐ kpódó nǔnyanyawatɔ́ lɛ́ɛ kpó sín axɔ́súɖuto Mawu tɔn mɛ,

⁴² bó ná bɛ́ yě nyi dó zo mɛ. Fínɛ́ wɛ yě ná ya avǐ, bó ná ɖu aɖǔkún ɖe.

⁴³ Hwenɛ́nu ɔ́, Mawu ná sɔ́ hwɛjijɔnɔ lɛ́ɛ su, bó ná zé yě dó húzú nǔɖaxó ná ɖo axɔ́súɖuto tɔn mɛ. Mɛ e ɖó tó bó ná dó se nǔ ná ɔ́ ní ɖótó bó se.”

Jezu dó lǒ dó ɖɔ xó dó dɔkun e è sɔ́ hwlá ɔ́ wú

⁴⁴ “Axɔ́súɖuto sɛ́xwé tɔn cí dɔkun e è zě hwlá dó gle ɖé mɛ ɔ́ ɖɔhun. Nya ɖé wá yi tɔ́n dó dɔkun énɛ́ ɔ́ jí, bó lɛ́ zé hwlá. É víví n'i káká, bɔ é yi sa nǔ e ɖo así tɔn lɛ́ɛ bǐ, bó zé akwɛ́ ɔ́ dó wá xɔ gle ɔ́ ná.”

Jezu dó lǒ dó jɛ̌ wú

⁴⁵ “Axɔ́súɖuto sɛ́xwé tɔn lɛ́ cí ajɔ̌tɔ́ e ɖo jɛ̌ ɖagbe ɖagbe lɛ́ɛ ba wɛ ɔ́ ɖɔhun.

⁴⁶ É wá yi mɔ jɛ̌ xɔ akwɛ́ ɖaxó énɛ́ ɖokpó ɖo mɛɖé sí, bó yi sa nǔ e ɖo así tɔn lɛ́ɛ bǐ, bó zé akwɛ́ ɔ́ dó wá xɔ ná.”

Jezu dó lǒ dó ɖɔ wú

⁴⁷ “Axɔ́súɖuto sɛ́xwé tɔn lɛ́ cí ɖɔ e è nyi dó tɔ mɛ, bɔ é wlí hweví tɛnmɛ tɛnmɛ é ɖɔhun.

⁴⁸ Ée hweví gɔ́ ɖɔ ɔ́, ɖɔnyitɔ́ lɛ́ɛ dɔn wá agě jí; yě jínjɔ́n tɔ ɔ́ tó, bó ɖe ɖɛ hweví lɛ́ɛ; yě cyán ɖagbe lɛ́ɛ dó nǔ mɛ, bó bɛ́ ée má nyɔ́ ǎ lɛ́ɛ nyi gbě.

⁴⁹ Mɔ̌ wɛ é ná nyí gbɔn ɖo gbɛvivɔzán gbe. Wɛnsagun Mawu tɔn lɛ́ɛ ná cyán mɛ nyanya lɛ́ɛ sín mɛ ɖagbe lɛ́ɛ mɛ,

⁵⁰ bó ná bɛ́ mɛ nyanya lɛ́ɛ kɔn nyi zo hɛhɛ mɛ. Fínɛ́ wɛ yě ná ya avǐ, bó ná ɖu aɖǔkún ɖe.”

Kplɔ́n yɔ̌yɔ́ lɛ́ɛ kpódó kplɔ́n xóxó lɛ́ɛ kpó

⁵¹ Ée Jezu ɖɔ xó énɛ́ lɛ́ɛ gúdo ɔ́, é wá kanbyɔ́ ahwanvú tɔn lɛ́ɛ ɖɔ: “Mi mɔ nǔ jɛ xó e un ɖɔ lɛ́ɛ bǐ mɛ a?” Yě ká yí gbe n'i ɖɔ: “Ɛɛn, mǐ mɔ nǔ jɛ mɛ.”

⁵² Jezu ka ɖɔ nú yě ɖɔ: “Sɛ́nkplɔ́nmɛtɔ́ e wá húzú axɔ́súɖuto sɛ́xwé tɔn sín ahwanvú ɔ́ cí xwétɔ́ e cyán nǔ yɔ̌yɔ́ kpódó nǔ xóxó kpó sín dɔkun tɔn lɛ́ɛ mɛ ɔ́ ɖɔhun.”

Nazalɛ́tinu lɛ́ɛ ɖi nǔ nú Jezu ǎ

⁵³ Ée Jezu dó lǒ énɛ́ lɛ́ɛ fó ɔ́, é gosín fínɛ́,

⁵⁴ bó yi Nazalɛ́ti fí e é su ɖe ɔ́, bó jɛ nǔ kplɔ́n mɛ lɛ́ɛ jí ɖo kplɔ́ngbasá Jwifu lɛ́ɛ tɔn. Nǔkplɔ́nmɛ tɔn kpácá yě tlala, bɔ yě nɔ́ kanbyɔ́ yěɖée ɖɔ: “Fítɛ́ é ka yi ba nǔnywɛ́ énɛ́ ɔ́ sín? Hlɔ̌nhlɔ́n e é nɔ́ dó ɖo nǔ lɛ́ɛ jlɛ́ ná wɛ ɔ́, fítɛ́ é ka yi ba sín?

⁵⁵ Atínkpatɔ́ví ɔ́ nɛ́ ǎ cé? Mali wɛ nyí nɔ tɔn ǎ cé? Nɔví tɔn lɛ́ɛ wɛ nyí Jaki kpódó Jozɛ́fu kpó, Sinmɔ́ɔ kpó Judi kpán ǎ cé?

⁵⁶ Nɔví tɔn nyɔ̌nu lɛ́ɛ bǐ ma ka ɖo mǐ mɛ fí din a? Fítɛ́ é ka yi ba nǔnywɛ́ énɛ́ kpódó hlɔ̌nhlɔ́n énɛ́ kpó sín?”

⁵⁷ Bɔ nǔ énɛ́ lɛ́ɛ nyí afɔklɛ́nnú nú yě. Jezu ka ɖɔ nú yě ɖɔ: “Mɛ bǐ wɛ nɔ́ sí gbeyíɖɔ Mawu tɔn; to tɔn mɛ nu lɛ́ɛ, kpódó xwé tɔn gbe nu lɛ́ɛ kpán jɛ́n ma nɔ́ sí i ǎ.”

⁵⁸ Jezu ka jlɛ́ nǔ gěgé ɖé ɖo fínɛ́ ǎ, ɖó nǔmaɖi yětɔn wú.