Maki 3 - MAWUXÓWÉMA

Jezu gbɔ azɔn nú dǎwe alɔkúnánɔ ɖé

¹ Jezu lɛ́ wá yi kplɔ́ngbasá ɔ́, bɔ nya ɖé ɖo fínɛ́, bɔ alɔ tɔn kú.

² Mɛ e ɖo fínɛ́ lɛ́ɛ ká jɛ Jezu cɔ́ jí, bó ná kpɔ́n ɖɔ é ná gbɔ azɔn nú nya énɛ́ gbɔjɛzán gbe wɛ a jí, bó ná dó sixú ɖó hwɛ nú nya énɛ́.

³ Jezu ka ɖɔ nú nya e sín alɔ kú ɔ́ ɖɔ: “Sí te bó wá jɛ tɛ́ntin fí.”

⁴ Énɛ́ ɔ́ gúdo ɔ́, é kanbyɔ́ mɛ lɛ́ɛ ɖɔ: “Sɛ́n mǐtɔn ná gbe ɖɔ è nǐ wa ɖagbe abǐ nyanya gbɔjɛzán gbe a? Mɛ wɛ sɛ́n ɔ́ ɖɔ è nǐ hwlɛ́n a, abǐ mɛ wɛ é ɖɔ è nǐ hu?” Lo ɔ́, yě kɛ nu ǎ.

⁵ Énɛ́ ɔ́, akpɔ ɖó e dó tótlítlí yětɔn wú, bɔ é kpɔ́n yě xaan lɛ́ dó kpódó xomɛsin kpó, bó ɖɔ nú nya ɔ́ ɖɔ: “Dlɛ̌n alɔ towe”, bɔ é dlɛ́n alɔ, bɔ alɔ tɔn jɛ tɛn tɔn mɛ.

⁶ Falizyɛn lɛ́ɛ tɔ́n sín kplɔ́ngbasá ɔ́, bɔ tlóló ɔ́, yě yi mɔ toxóɖɔgbɛ́ axɔ́sú Elódu tɔn, bɔ yě kplé, bó ɖe wě dó lě e yě nǎ bló gbɔn, bó hu Jezu ɔ́ wú.

Mɛ gěgé nyi ahwan jɛ Jezu gúdo

^7-8 Jezu kpódó ahwanvú lɛ́ɛ kpó sɛ́ jɛ Judɛ́ɛn tɔ ɔ́ tó; mɛ gěgé nyi ahwan sín Galilée, sín Judée, sín Jeluzalɛ́mu, kpódó Idumɛ́ɛ kpan; sín Tíi kpódó Sidɔ́ɔn kpán gbé jí, bó jɛ gǔdo tɔn, ɖó yě se nǔ e wa wɛ é ɖe lɛ́ɛ.

⁹ É ká zɔ́n ahwanvú tɔn lɛ́ɛ ɖɔ yě ní sɔ́ tɔjíhún ɖokpó ɖó te nú émí, bónú mɛ lɛ́ɛ ma wá nyɛ́sú émí ó.

¹⁰ Đó, azɔn e gbɔ nú mɛ lɛ́ɛ wɛ é ɖe ɔ́ zɔ́n, bɔ azinzɔnnɔ lɛ́ɛ nɔ ba ná ɖó alɔ wǔtu tɔn, bónú azɔn yětɔn ná gbɔ.

¹¹ Yɛ nyanya lɛ́ɛ mɔ ɛ hweɖěbǔnu ɔ́, yě nɔ́ ɖe kɔ́ n'i, bó nɔ́ sú xó ɖɔ: “Mawu ví wɛ a nyǐ!”

¹² Lo ɔ́, Jezu nɔ gbɛ́ nú yě kpódó adǎn kpó ɖɔ yě ma ɖɔ mɛ e émí nyí ɔ́ nú mɛɖé se ó.

Jezu cyán mɛsɛ́dó wěwe lɛ́ɛ

¹³ Jezu ka xá só jí, bó ylɔ́ mɛ e jló e lɛ́ɛ, bɔ yě yi gɔ̌n tɔn;

¹⁴ bɔ é cyán mɛ wěwe ɖo yě mɛ bónú yě ná nɔ kpɔ́ xá ɛ, nú é ná nɔ sɛ́ yě dó Mawuxó jlá gbé,

¹⁵ bó ná ná acɛ yě, nú yě ná dó nya yɛ nyanya lɛ́ɛ ná.

¹⁶ Mɛ wěwe e Jezu cyán lɛ́ɛ ɖíe: Sinmɔ́ɔ e é sun nyǐ ɖɔ Piyɛ́ɛ é,

¹⁷ Jaki kpódó nɔví tɔn Jǎan kpó, Zebeɖée ví wɛ yě nyǐ, bɔ (Jezu sun nyǐ yě ɖɔ Boanɛɛgɛ́si, tínmɛ tɔn wɛ nyí “xɛbyosoví.”)

¹⁸ Andlé, Filípu, Baatelemíi, Matíe, Tɔmáa, Jaki Alufée ví ɔ́, Tadée, Sinmɔ́ɔ hunjɛdótojítɔ́ ɔ́ ,

¹⁹ kpódó Judási Isikaliɔ́ti e wá jó Jezu ɔ́ kpó.

Jezu sín mɛ lɛ́ɛ ja kplákplá ɛ gbé

²⁰ Jezu ka wá xwé gbe, bɔ mɛ gěgé lɛ́ wá kplé ɖo fínɛ́, káká bɔ é kpódó ahwanvú tɔn lɛ́ɛ kpán sɔ́ mɔ tɛn ná ɖu nǔ ǎ.

²¹ Ée mɛ tɔn lɛ́ɛ se mɔ̌ ɔ́, yě wá bó ná kplá ɛ, ɖó yě ɖo ɖiɖɔ wɛ ɖɔ ta tɔn mɛ kún sɔ́ sɔgbe ó.

Jezu ɖɔ xó dó hwɛ e è dǒ e ɔ́ wú

²² Sɛ́nkplɔ́nmɛtɔ́ e gosín Jeluzalɛ́mu wá lɛ́ɛ nɔ́ ɖo ɖiɖɔ wɛ ɖɔ: “Bɛluzebúlu (yɛ nyanya lɛ́ɛ xɔ́sú) wɛ ɖo jǐ tɔn; yɛ nyanya lɛ́ɛ xɔ́sú énɛ́ ɔ́ sín hlɔ̌nhlɔ́n wɛ é nɔ́ dó nya yɛ nyanya lɛ́ɛ ná.”

²³ Jezu ka ylɔ́ yě wá, bó dó lǒ dó ɖɔ xó nú yě ɖɔ: “Nɛ̌ Satáan ka sixú nya é ɖésúnɔ gbɔn?

²⁴ Axɔ́súɖuto ɖé ma ɖó gbe kpɔ́ ǎ ɔ́, to énɛ́ ɔ́ sixú jínjɔ́n ayǐ ǎ.

²⁵ Ényí xwé ɖé tíin, bónú mɛ e ɖ'é mɛ lɛ́ɛ sín gbe ma ɖo kpɔ́ ǎ ɔ́, xwé énɛ́ ɔ́, gba wɛ é nɔ gba.

²⁶ Ényí Satáan gbɛ́ wǎn nú éɖée ɔ́, axɔ́súɖuto tɔn ná klán, bó ná sixú nɔ te ǎ, bɔ acɛkpikpa tɔn vɔ nɛ́.

²⁷ “Mɛ ɖé sixú yi súnnu glegbenu ɖé xwé, bó fɔ nǔ tɔn lɛ́ɛ ma tó blá ɛ hwɛ̌ ǎ; lo ɔ́, ényí é blá ɛ ɔ́, é ná fɔ nǔ e ɖo xwé tɔn gbe lɛ́ɛ é bǐ.

²⁸ “Ma ɖɔ nǔgbó nú mi: hwɛ e gbɛtɔ́ lɛ́ɛ kó sixú hu ɔ́ kpódó nu e yě kó sixú nylá dó Mawu wú ɔ́ kpó bǐ wɛ Mawu ná sɔ́ kɛ yě.

²⁹ Mɛ ɖěbǔ ka nylá nu dó Yɛsinsɛn wú ɔ́, è ɖo hwɛ ɖé ná sɔ́ kɛ ɛ wɛ ǎ; ɖó hwɛ e è ma ná sɔ́ kɛ mɛ gbeɖé ǎ ɔ́ wɛ é hu.”

³⁰ Jezu ɖɔ mɔ̌ ɖó yě ɖɔ n'i ɖɔ yɛ nyanya wɛ ɖo jǐ tɔn.

Jezu sín nɔ kpódó Jezu sín nɔví lɛ́ɛ kpó

³¹ Jezu sín nɔví lɛ́ɛ kpódó nɔ yětɔn kpán cí hɔnto, lobo sɛ́ mɛ dó ɖɔ yě ní yi ylɔ́ Jezu wá nú émí.

³² Mɛ gěgé ka ɖo ayǐjínjɔ́n lɛ́ lɛ̌ dó e, bɔ è wá ɖɔ n'i ɖɔ: “Kpɔ́n! Nɔ towe kpódó nɔví towe lɛ́ɛ kpó ɖo hɔnto, bó ɖo biba we wɛ.”

³³ É ka yí gbe nú yě ɖɔ: “Mɛ̌ ká nyí nɔ ce? Mɛ̌ ká nyí nɔví ce lɛ́ɛ?”

³⁴ Bɔ é nyi nukún kpɔ́n mɛ e ɖo ayǐjínjɔ́n lɛ́ lɛ̌ dó e lɛ́ɛ, bó ɖɔ: “Nɔ ce kpódó nɔví ce lɛ́ɛ kpán ɖíe.

³⁵ Mɛ ɖěbǔ e ko sixú bló jlǒ Mawu tɔn ɔ́, mɛ énɛ́ ɔ́ wɛ nyí nɔví ce súnnu, bó nyí nɔví ce nyɔ̌nu, bó nyí nɔ ce.”