Maki 15 - MAWUXÓWÉMA

È kplá Jezu yi tokpɔngán Pilátu nukɔn

¹ É wá su zǎnzǎn tɛɛn, bɔ vɔ̌sánú-xwlémawutɔ́gán lɛ́ɛ, mɛxó lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó toxóɖɔgbɛ́ ɔ́ kpó kplé, bó yi kpá dó Jezu wú. Yě blǎ ɛ, bo kplá ɛ yi jó nú tokpɔngán Pilátu.

² Pilátu ka kanbyɔ́ ɛ ɖɔ: “Hwi wɛ nyí Jwifu lɛ́ɛ sín axɔ́sú ɔ́ a?” Jezu ka yí gbe n'i ɖɔ: “Hwi wɛ ɖɔ.”

³ Vɔ̌sánú-xwlémawutɔ́gán lɛ́ɛ ka ɖo hwɛ tɛnmɛ tɛnmɛ dó e wɛ.

⁴ Pilátu ka lɛ́ kanbyɔ́ ɛ ɖɔ: “A sɔ́ ɖó nu ɖé ná kɛ ǎ cé? Kpɔ́n nǔ tobutóbú e sín hwɛ dó we wɛ yě ɖe é.”

⁵ Lo ɔ́, Jezu sɔ́ kɛ nu ǎ, bɔ é kpácá Pilátu.

È ɖǒ kúhwɛ nú Jezu

⁶ È ko ja Dǐndínwáyi sín xwe ɖu gbé tɛgbɛ ɔ́, Pilátu nɔ ɖe gantɔ́ ɖěe yě kó sixú byɔ́ ɛ ɔ́ ɖokpó nyi te nú yě.

⁷ Nya ɖé ka tíin, bɔ è nɔ ylɔ́ ɛ ɖɔ Balabási. È wlǐ nya énɛ́ dó gankpá mɛ, é kpódó todántɔ́ ɖé lɛ́ɛ kpó, ɖó yě dɔn hunnyahunnya dó to mɛ, bó hu mɛ ɖokpó.

⁸ Agun ɔ́ sɛ yi Pilátu gɔ́n, bo byɔ́ ɛ ɖɔ ní ɖe gantɔ́ ɖokpó nyi te nú émí lě e è ko nɔ bló gbɔn xwewú xwewú tɛgbɛ é.

⁹ Bɔ Pilátu yí gbe nú yě ɖɔ: “Mi jló nú má ɖe Jwifu lɛ́ɛ xɔ́sú ɔ́ nyi te nú mi a?”

¹⁰ Đó é mɔ nǔ jɛ wú ɖɔ mɛnúvɛ́mɛwú wɛ zɔ́n bɔ vɔ̌sánú-xwlémawutɔ́gán lɛ́ɛ wlí Jezu wá jó nú émí.

¹¹ Vɔ̌sánú-xwlémawutɔ́gán lɛ́ɛ ka fɔ́n hun dó jǐ nú mɛ lɛ́ɛ nú yě ní byɔ́ ɖɔ é ní gbɔ bó ɖe Balabási nyi te nú émí.

¹² Pilátu ka yí xó, bó kanbyɔ́ yě ɖɔ: “Nɛ̌ wɛ un ka ná wa mɛ e mi nɔ ylɔ́ ɖɔ Jwifu lɛ́ɛ xɔ́sú ɔ́ sín nǔ gbɔn?”

¹³ Bɔ yě bǐ sú xó, bo ɖɔ: “Ká ɛ nyi aklúzu jí.”

¹⁴ Pilátu lɛ́ vɔ́ kanbyɔ́ yě ɖɔ: “Nǔ nyanya tɛ́ é ka wa?” Bɔ agun ɔ́ lɛ́ sú xó syɛ́nsyɛ́n, bó ɖɔ: “Ká ɛ nyi aklúzu jí.”

¹⁵ Pilátu ka jló ná nyɔ́ ɖo yě sí, bo ɖe Balabási nyi te nú yě; é ka zɔ́n bɔ è xo Jezu, bɔ é jó e nú yě, nú yě na ká ɛ nyi aklúzu jí.

Sɔ́ja lɛ́ɛ cá Jezu ko

¹⁶ Sɔ́ja lɛ́ɛ kplá Jezu yi hɔnmɛ, lobo ylɔ́ ahwankpá ɔ́ bǐ kplé.

¹⁷ Yě sɔ́ awu gaga vɔ́vɔ́ ɖé dó n'i , lobo sɔ́ wun dó lɔn axɔ́súgbákún ɖokpó, bó zé xwe n'i.

¹⁸ Bó jɛ gbe dó e jí ɖɔ: “Mǐ kan xwé byɔ́, Jwifu lɛ́ɛ xɔ́sú!”

¹⁹ Yě nɔ dó fántín ta n'i, bó nɔ́ tún atán kɔn nyi wútu tɔn, bó nɔ́ jɛ kpo nukɔn tɔn, bó nɔ́ ɖe kɔ́ n'i.

²⁰ Ée yě cá ɛ ko mɔ̌ káká ɔ́, yě wǎ ɖe awu vɔ́vɔ́ ɔ́ sín kɔ n'i, lobo fɔ awu é ɖésúnɔ tɔn lɛ́ɛ dó n'i, bó kplá ɛ tɔ́n sín xwé ɔ́ gbe, bó ná yi ká ɛ nyi aklúzu jí.

È ká Jezu nyi aklúzu jí

²¹ Sinmɔ́ɔ Silenɛ́ɛnu ɔ́ gosín gleta wá xweyǐgbe. Alɛsándlu kpódó Hlufúsi kpó sín tɔ́ wɛ. Sɔ́ja lɛ́ɛ zɔ́n ɛ gǎnnugǎnnu, ɖɔ é ní ɖíɖá aklúzu Jezu tɔn.

²² Yě kplá Jezu yi tɛn e mɛ è nɔ ylɔ́ ɖɔ Gɔlugɔta dó Ebléegbe mɛ é. Gɔlugɔta ɔ́ sín tínmɛ wɛ nyí “takágo tɛnmɛ”.

²³ Yě ná ɛ vɛ̌ɛn e è cáká kpódó mǐla kpó é; é ka nu ǎ.

²⁴ Bɔ yě ká ɛ nyi aklúzu jí, bó nyi akɔ dó awu tɔn lɛ́ɛ, bó má yětɔn yětɔn.

²⁵ Zǎnzǎn gan tɛ́nnɛ mɛ mɔ̌ wɛ yě ká ɛ nyi aklúzu jí.

²⁶ Yě wlán nǔ e wú yě ɖó kúhwɛ n'i ɔ́ ɖó ta tɔn nu ɖo aklúzu ɔ́ jí ɖɔ: “Axɔ́sú Jwifu lɛ́ɛ tɔn.”

²⁷ Yě ká ajotɔ́ axánsúnxó we nyi aklúzu jí gɔ́ n'i: mɛ ɖokpó ɖo ɖisí tɔn xwé, mɛ ɖokpó ɖo amyɔ tɔn xwé. [

²⁸ Lě e nǔ e è ko wlán dó Mawuxówéma mɛ ɖ'ayǐ ɔ́ jɛ gbɔn ɔ́ nɛ́; é wɛ nyí ɖɔ: “È lɛ̌n ɛ dó dǎkaxotɔ́ lɛ́ɛ sín ahwan mɛ.”]

²⁹ Aligbɔntɔ́ lɛ́ɛ nɔ́ ɖo zunzun i wɛ, bó nɔ́ húnhún ta, bó nɔ́ ɖɔ: “Wǒóo nú we! Hwi mɛ e ɖo sinsɛnxɔ ná mu wɛ, bó ná sɔ́ azǎn atɔn ɖó te, bó vɔ́ ɖěvo gbá ɔ́ ɖíe a?

³⁰ Hwlɛ̌n hwiɖée gán, bó jɛ te sín aklúzu ɔ́ jí.”

³¹ Mɔ̌ ɖokpó ɔ́, vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpó nɔ́ ɖo cícá ɛ ko wɛ ɖo yěɖée tɛ́ntin, bó nɔ́ ɖɔ: “É hwlɛ́n mɛ ɖě lɛ́ɛ gán; é ka sixú hwlɛ́n éɖée gán ǎ!

³² Klísu Izlayɛ́li ví lɛ́ɛ xɔ́sú ɔ́ ní bó jɛ te nú mǐ nǎ kpɔ́n; énɛ́ ɔ́, mǐ ná ɖi nǔ n'i.” Mɛ e è ká nyi aklúzu jí ɖo akpá tɔn lɛ́ɛ lɔmɔ̌ ɖo zunzun i wɛ.

Jezu kú

³³ Ée gan wěwe xo ɔ́, ablu dó ɖo ayǐkúngban jí káká yi jɛ gan atɔn mɛ.

³⁴ Ée gan atɔn xo ɔ́, Jezu sú xó tlílí, bó ɖɔ: “Elíi Elíi, lama sabakitani?” (Tínmɛ tɔn wɛ nyí: “Mawu ce, Mawu ce, nɛ̌ ká gbɔn bɔ a jǒ mì dó?”)

³⁵ Mɛ e ɖo fínɛ́ lɛ́ɛ ɖě se xó e Jezu ɖɔ nɛ́ ɔ́, bó ɖɔ: “Mi kpɔ́n! É ɖo Elíi ylɔ́ wɛ.”

³⁶ Mɛ ɖokpó ka kán wezun, bó yi sɔ́ xumɛtekan nylɔ́ dó vɛ̌ɛn sinvɛ́sinvɛ́ mɛ, bó zé slɔ́ kpo nu, bó dlɛ́n dó e ɖɔ ní nu, lobo nɔ́ ɖɔ: “Mi gbɔ nú mǐ ná kpɔ́n ɖɔ Elíi ɔ́ ná wá ɖe e jɛ te a jí.”

³⁷ Jezu ka sú xó ɖaxó ɖé, bó bɔnu.

³⁸ Avɔ ɖaxó e è dó gbo sinsɛnxɔ ɔ́ mɛ ná ɔ́ dá ɖó we sín jǐ káká wá do.

³⁹ Ée sɔ́ja kanwekogán Hlɔ̌manu e ɖo te ɖo Jezu nukɔn ɔ́ mɔ lě e é kú gbɔn ɔ́, é ɖɔ: “Nya élɔ́ ɔ́, Mawu ví wɛ é nyí nǔgbó.”

⁴⁰ Nyɔ̌nu ɖé lɛ́ɛ lɔmɔ̌ ɖo te ɖo zɔga, bó ɖo nǔ e ɖo jijɛ wɛ ɔ́ kpɔ́n sɛ́ dó wɛ. Mali Magidalanu ɔ́ kpódó Mali e nyí Jaki kpɛví ɔ́ kpódó Jozée kpó sín nɔ ɔ́ kpó, kpódó Salomɛ́ɛ kpó ɖo nyɔ̌nu énɛ́ lɛ́ɛ mɛ.

⁴¹ Nyɔ̌nu énɛ́ lɛ́ɛ wɛ nɔ́ xwedó Jezu, bó nɔ́ gɔ́ alɔ n'i ɖo nǔ e hudó e lɛ́ɛ mɛ hwenu e é ɖo Galilée ɔ́. Nyɔ̌nu gěgé ɖěvo lɛ́ɛ xwedó e wá Jeluzalɛ́mu, bó ɖo fínɛ́.

È ɖi Jezu

⁴² Ée zǎn jɛ bibɔ jí, bɔ gbe énɛ́ gbe ká lɛ́ nyí gbɔjɛzán Jwifu lɛ́ɛ tɔn kpo sɔ ɔ́,

⁴³ Jozɛ́fu Alimatéenu e nyí mɛ nukúnɖéjí ɖokpó ɖo toxóɖɔgbɛ́ Jwifu lɛ́ɛ tɔn mɛ ɔ́ wá; é lɔmɔ̌ ɖo te kpɔ́n axɔ́súɖuɖu Mawu tɔn. É ɖó akɔ́nkpinkpan, bó yi mɔ Pilátu, bó byɔ́ ɛ Jezu sín cyɔ.

⁴⁴ Lě e Jezu yá wǔ kú gbɔn ɔ́ kpácá Pilátu, bɔ é ylɔ́ sɔ́ja kanwekogán ɔ́, bó kanbyɔ́ ɛ ɖɔ: “É kú ɔ́, é kó lín wɛ a?”

⁴⁵ Bɔ sɔ́ja kanwekogán ɔ́ yí gbe n'i ɖɔ é kó kú xóxó, bɔ é ná gbe Jozɛ́fu ɖɔ ní bó yi zé cyɔ ɔ́.

⁴⁶ Jozɛ́fu xɔ akwɛ́núvɔ ɖé, bó ɖe cyɔ ɔ́ sín aklúzu jí, bó lɛ́ avɔ ɔ́ dó e, lobo sɔ́ ɛ yi ɖi dó yɔdo ɖé mɛ, lobo blí awǐnnya ɖokpó bó dó sú yɔdo ɔ́ ná. Yɔdo énɛ́ ɔ́, sóxo mɛ wɛ è kun dó.

⁴⁷ Mali Magidalanu ɔ́ kpódó Mali Jozée sín nɔ kpó kpɔ́n fí e è ɖi i dó é.