Luki 5 - MAWUXÓWÉMA

Jezu ylɔ́ ahwanvú tɔn nukɔntɔn lɛ́ɛ

¹ Jezu ɖo te ɖo Jenɛzalɛ́ti tɔ tó gbe ɖokpó, bɔ mɛ gěgé nyɛ́sú i, bó ná se Mawuxó.

² É ka mɔ tɔjíhún we ɖo tɔ ɔ́ tó, bɔ ɖɔnyitɔ́ lɛ́ɛ ko jɛ te sín mɛ, bó ɖo ɖɔ yětɔn lɛ́ɛ hú wɛ.

³ Jezu byɔ́ tɔjíhún e nyí Sinmɔ́ɔ tɔn é mɛ, bó byɔ́ ɛ ɖɔ ní sɛ sín tɔ ɔ́ tó kpɛɖé; é ɖésú ka jínjɔ́n ayǐ ɖo tɔjíhún ɔ́ mɛ, bó jɛ nǔ kplɔ́n mɛ lɛ́ɛ jí sɛ́ dó.

⁴ Ée é kplɔ́n nǔ yě vɔ ɔ́, é ɖɔ nú Sinmɔ́ɔ ɖɔ: “Sɛ yi tɔzan mɛ, bónú hwi kpódó hǎgbɛ́ towe lɛ́ɛ kpó ní dó ɖɔ mitɔn lɛ́ɛ tɔ, bó ná wlí hweví.”

⁵ Sinmɔ́ɔ ka yí gbe n'i ɖɔ: “Mɛ̌si, mǐ jɛ tagba zǎn ɔ́ mɛ káká, mǐ ká mɔ nǔɖé wlí ǎ. Lo ɔ́, ée a ka ɖɔ mɔ̌ ɔ́, un ná dó ɖɔ lɛ́ɛ tɔ.”

⁶ Yě ká jɛ tɔzan ɔ́ mɛ, bó dó ɖɔ lɛ́ɛ tɔ nǔgbó, bɔ hweví e yě wlí lɛ́ɛ sukpɔ́ káká, bɔ ɖɔ lɛ́ɛ jɛ kan wɛ́n jí.

⁷ Yě gbɔ bó zé alɔ dó ylɔ́ gbɛ̌ yětɔn e ɖo tɔjíhún wegɔ́ ɔ́ mɛ lɛ́ɛ, ɖɔ yě ní wá dó alɔ émí. Yě ká wá, bó bɛ́ hweví dó tɔjíhún we lɛ́ɛ mɛ, bɔ hun lɛ́ɛ gɔ́ káká bó ɖibla syɔ́.

⁸ Ée Sinmɔ́ɔ Piyɛ́ɛ mɔ mɔ̌ ɔ́, é húzú jɛ kpo ɖo Jezu sá mɛ, bó ɖɔ n'i ɖɔ: “Nɔ zɔ nú mì Aklúnɔ, ɖó hwɛhutɔ́ wɛ nú mì.”

⁹ Lě e hweví e yě wlí ɔ́ sukpɔ́ gbɔn ɔ́ nyí nǔ bó kpácá Piyɛ́ɛ kpódó mɛ e ɖo fínɛ́ xá ɛ lɛ́ɛ bǐ kpán.

¹⁰ Mɔ̌ jɛ́n wɛ é lɛ́ kpácá hǎgbɛ́ tɔn Zebeɖée ví, Jaki kpódó Jǎan kpó ɔ́ nɛ́. Lo ɔ́, Jezu ɖɔ nú Sinmɔ́ɔ ɖɔ: “Ado ma hu we ó; bɛ́ sín din ɔ́, gbɛtɔ́ lɛ́ɛ wɛ a nǎ nɔ́ dɔn wá gɔ̌n ce.”

¹¹ Yě ká kun tɔjíhún yětɔn lɛ́ɛ wá jɛ agě jǐ, bó jó nǔ bǐ dó, lobo xwedó Jezu.

Jezu gbɔ azɔn nú nya gudunɔ ɖé

¹² Jezu ka wá ɖo toxo ɖaxó ɖé mɛ, bɔ nya ɖé wá xwetɔ́n, bɔ gudu kpé wú tɔn bǐ. Ée é mɔ Jezu ɔ́, é xwe agbɔ̌nnusú do, bó jɛ vo sa n'i jí ɖɔ: “Aklúnɔ, nú é jlǒ we ɔ́, a hɛn ɔ́, a nǎ gbɔ azɔn nú mì.”

¹³ Jezu ka dlɛ́n alɔ, bó ɖó wǔ tɔn, bó ɖɔ: “Un jló, azɔn towe ní gbɔ.” Tlóló ɔ́, nya ɔ́ sín azɔn gbɔ.

¹⁴ Jezu ka dó sɛ́n n'i ɖɔ: “Ma ɖɔ nú mɛɖé cáwún ó, lo ɔ́, sɔ́ lě e a ɖe ɔ́ yi xlɛ́ vɔ̌sánú-xwlémawutɔ́ lɛ́ɛ, bó ná wǔsláslá sín agban e xó Mɔyízi ɖɔ é, bó ná dó ɖe xlɛ́ mɛ bǐ ɖɔ azɔn towe gbɔ nǔgbó.”

¹⁵ É ká ɖɔ mɔ̌ có nyǐkɔ Jezu tɔn lɛ́ ɖo gbigba kpé d'é jí wɛ, bɔ mɛ lɛ́ɛ nɔ́ nyi ahwan wá se xó tɔn, bónú é ná gbɔ azɔn nú yě.

¹⁶ Jezu ka nɔ yi cí fí e mɛɖé má ɖe ǎ é, bó nɔ́ ɖo ɖɛ xo wɛ.

Jezu gbɔ azɔn nú ayǐsónɔ ɖé

¹⁷ Jezu ɖo nǔ kplɔ́n mɛ wɛ gbe ɖokpó, bɔ Falizyɛn ɖé lɛ́ɛ kpódó sɛ́nkplɔ́nmɛtɔ́ ɖé lɛ́ɛ kpó wá jínjɔ́n akpá tɔn. Gletoxo Galilée tɔn kpódó Judée tɔn kpó, kpódó Jeluzalɛ́mu tɔn kpó mɛ wɛ yě gosín. Hlɔ̌nhlɔ́n Mawu tɔn ɖo Jezu jí, bɔ é nɔ́ dó gbɔ azɔn.

¹⁸ Mɛ ɖé lɛ́ɛ ká sɔ́ nya ayǐsónɔ ɖé ɖó zan jí, bó wá xwetɔ́n, bó ɖo lě e yě ná wa gbɔn, bó ná sɔ́ ɛ byɔ́ xɔ e mɛ Jezu ɖe é mɛ, bó ná sɔ́ ɛ ɖó nukɔn tɔn ɔ́ ba wɛ.

¹⁹ Ée ahwan e kplé dó Jezu ɔ́ sukpɔ́ káká bɔ yě ma tunwun fí e yě ná zé e gbɔn yi Jezu gɔ́n é ǎ ɔ́, yě gbɔ bó xá xɔ e mɛ Jezu ɖe ɔ́ ta, bó kɔ́n xɔ ɔ́ ɖo akpá ɖokpó, bɔ azinzɔnnɔ ɔ́ ɖo zan jí, bɔ yě zé e gbɔn fínɛ́ yi jɛ Jezu sá mɛ, ɖo mɛ lɛ́ɛ tɛ́ntin.

²⁰ Ée Jezu mɔ lě e yě ɖi nǔ sɔ́ é ɔ́, é ɖɔ nú azinzɔnnɔ ɔ́ ɖɔ: “Xɔ́ntɔn ce, è sɔ́ hwɛ towe lɛ́ɛ kɛ we.”

²¹ Sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpán ka jɛ linlin jí ɖɔ: “Mɛ̌ ka nyí nya élɔ́, bó nɔ́ nylá nu dó Mawu wú mɔ̌? Mɛ̌ ká sixú sɔ́ hwɛ kɛ mɛ zɛ Mawu ɖokpónɔ wú?”

²² Jezu ka mɔ nǔ jɛ linlin yětɔn lɛ́ɛ wú, bó yí xó, lobo kanbyɔ́ yě ɖɔ: “Aniwútu mi ka ɖo nǔ mɔ̌hunkɔtɔn lɛ́ɛ lin dó ayi mɛ wɛ?

²³ Ényí è ɖɔ: ‘È sɔ́ hwɛ towe lɛ́ɛ kɛ we,’ abǐ: ‘Sí te bó ɖi zɔnlin’ ɔ́, ɖě tɛ́ ka bɔ kun hú ɖě?

²⁴ Lo ɔ́, un jló ɖɔ mi ní tunwun ɖɔ nyɛ Gbɛtɔ́ví ɔ́, ɖó acɛ e sɔ́ hwɛ kɛ mɛ ɖo ayǐkúngban jí é.” Ée é ɖɔ mɔ̌ ɔ́, é wá ɖɔ nú ayǐsónɔ ɔ́ ɖɔ: “Un ɖe gbe nú we, sí te, sɔ́ zan towe, bó yi xwé.”

²⁵ Azɔn ɖokpó ɔ́, ayǐsónɔ ɔ́ sí te ɖo yě bǐ nukún mɛ, bó sɔ́ zan e jí è sɔ́ ɛ mlɔ́ ɔ́, bó ɖidó xwé, lobo jɛ susu kpa nú Mawu jí.

²⁶ Ahwi xo yě bǐ, bɔ yě jɛ susu kpa nú Mawu jí. Xɛsi ɖo yě jí, bɔ yě nɔ ɖɔ: “Nǔ e mǐ ma mɔ kpɔ́n gbeɖé ǎ wɛ mǐ mɔ égbé!”

Jezu ylɔ́ Levíi

²⁷ Énɛ́ ɔ́ gúdo ɔ́, Jezu tɔ́n, bó mɔ tokwɛ́yítɔ́ ɖé ɖo ayǐjínjɔ́n ɖo denuzɔ́watɔ́ lɛ́ɛ xɔsá, bɔ è nɔ ylɔ́ ɛ ɖɔ Levíi. Jezu ka ɖɔ n'i ɖɔ: “Xwedó mì.”

²⁸ Bɔ Levíi sí te, bó jó nǔ bǐ dó, lobo xwedó e.

²⁹ Levíi wá ylɔ́ agɔ̌ ɖaxó ɖokpó nú Jezu ɖo xwé tɔn gbe. Tokwɛ́yítɔ́ gěgé kpódó mɛ gěgé ɖěvo lɛ́ɛ kpán wá ɖo nǔ ɖu xá yě wɛ.

³⁰ Bɔ Falizyɛn lɛ́ɛ kpódó sɛ́nkplɔ́nmɛtɔ́ yětɔn lɛ́ɛ kpó ka jɛ nǔ hlún ɖɔ jí, bó nɔ́ kanbyɔ́ ahwanvú Jezu tɔn lɛ́ɛ ɖɔ: “Aniwú mi nɔ ɖu nǔ, bó nɔ́ nu ahan xá tokwɛ́yítɔ́ lɛ́ɛ kpódó gbɛnyanyazántɔ́ lɛ́ɛ kpán?”

³¹ Jezu ka yí gbe nú yě ɖɔ: “Mɛ e ɖo ganjí lɛ́ɛ wɛ azɔngblétɔ́ nú hu dó ǎ, lo ɔ́, mɛ e ɖo azɔn jɛ wɛ lɛ́ɛ wɛ nǔ tɔn hu dó.

³² Hwɛjijɔnɔ lɛ́ɛ ylɔ́ gbé wɛ un wá ǎ, lo ɔ́ hwɛhutɔ́ lɛ́ɛ ylɔ́ gbé wɛ un wá, nú yě ná lɛ́ kɔ sín hwɛ yětɔn lɛ́ɛ gúdo.”

Jezu ɖɔ xó dó nubláblá wú

³³ Mɛ ɖé lɛ́ɛ ɖɔ nú Jezu ɖɔ: “Jǎan sín ahwanvú lɛ́ɛ kpódó Falizyɛn lɛ́ɛ tɔn lɔmɔ̌ kpán nɔ́ blá nu hwɛhwɛ, lobo nɔ xo ɖɛ; lo ɔ́, ahwanvú towe lɛ́ɛ ka nɔ ɖo nǔ ɖu wɛ, bó nɔ́ ɖo ahan nu wɛ.”

³⁴ Jezu ka yí gbe nú yě ɖɔ: “Mi sixú ɖó mɛ e è ylɔ́ wá alɔ wlíwlí gbé lɛ́ɛ xovɛ́, hwenu e asisúnɔ ɔ́ kpó ɖo kpɔ́ xá yě ɔ́ a?

³⁵ Nǔ sixú nyí mɔ̌ ǎ; amɔ̌ hwenu ná wá su, bɔ è nǎ wá zé asisúnɔ ɔ́ gǎnnugǎnnu sín yě gɔ̌n, hwe énɛ́ ɔ́ nu ɔ́, yě ná blá nu.”

³⁶ É ka lɛ́ dó lǒ élɔ́ nú yě ɖɔ: “Mɛ ɖé nɔ́ tlɛ́n awu yɔ̌yɔ́, bó nɔ́ sɔ́ xwɛ tɔn dó ɖɛ́ awu xóxó ná ǎ; ényí è bló mɔ̌ ɔ́, è nǎ hɛn awu yɔ̌yɔ́ ɔ́ vún; bɔ avɔxwɛ yɔ̌yɔ́ ɔ́ ká ná lɛ́ sɔgbe xá awu xóxó ɔ́ ǎ.

³⁷ Mɛ ɖé ka nɔ́ sɔ́ vɛ̌ɛn yɔ̌yɔ́ kɔn dó anyǔglo xóxó mɛ ǎ; ɖó nú è blǒ mɔ̌ ɔ́, vɛ̌ɛn yɔ̌yɔ́ ɔ́ ná hɛn anyǔglo xóxó ɔ́ wú, bɔ vɛ̌ɛn ɔ́ ná kɔn nyi gbě, bɔ anyǔglo lɛ́ɛ ná lá mɛ.

³⁸ Lo ɔ́, vɛ̌ɛn yɔ̌yɔ́ ɔ́, anyǔglo yɔ̌yɔ́ mɛ wɛ è nɔ kɔn dó.

³⁹ Mɛ ɖé nɔ́ nu vɛ̌ɛn xóxó, bó sɔ́ nɔ́ ba ná nu vɛ̌ɛn yɔ̌yɔ́ ǎ, ɖó é nɔ́ ɖɔ: ‘Vɛ̌ɛn xóxó ɔ́ nyɔ́.’ ”