Luki 24 - MAWUXÓWÉMA

¹ Aklúnɔzán gbe ayǐtéhɔ̌nnu ɔ́, nyɔ̌nu lɛ́ɛ wá yɔdo ɔ́ kɔn, bó hɛn nǔsáwǔ wǎnɖagbenɔ e yě ko ba ɖó alɔ jí é.

² Yě mɔ ɖɔ awǐnnya e è dó sú yɔdo ɔ́ ná ɔ́, è ko blí sín i.

³ Énɛ́ ɔ́, yě byɔ́ yɔdo ɔ́ mɛ, yě ká mɔ Aklúnɔ Jezu sín cyɔ ǎ.

⁴ Yě sɔ́ tunwun nǔ e yě ná wa é ǎ, bó ɖo nukún dó gbɛmɛ kpɔ́n dó nǔ énɛ́ wú wɛ, bɔ nya we ɖé lɛ́ɛ wá tɔ́n ɖo akpá yětɔn, bɔ awu yětɔn nɔ́ kɔ́n.

⁵ Xɛsi jɛ nyɔ̌nu lɛ́ɛ jí, bɔ yě dǒ kɔ do; nya we lɛ́ɛ ká ɖɔ nú yě ɖɔ: “Étɛ́wú mi ka ɖo mɛ e ɖo gbɛ é ba wɛ ɖo mɛkúkú lɛ́ɛ mɛ?

⁶ É sɔ́ ɖo fí ǎ, è ko fɔ́n ɛ sín kú. Mi flín xó e é ɖɔ nú mi hwenu e é ɖo Galilée é;

⁷ é ɖɔ: ‘È ɖǒ ná jó Gbɛtɔ́ví ɔ́ nú hwɛhutɔ́ lɛ́ɛ, bɔ yě ná ká ɛ nyi aklúzu jí, bɔ Mawu ná fɔ́n ɛ sín kú azǎn tɔn atɔngɔ́ ɔ́ gbe.’ ”

⁸ Hwenɛ́nu wɛ yě wá flín xó énɛ́ lɛ́ɛ e Jezu ko ɖɔ nú yě ɖ'ayǐ é.

⁹ Ée yě lɛ́ kɔ sín yɔdo ɔ́ kɔn ɔ́, yě wlí nǔ énɛ́ lɛ́ɛ bǐ ɖɔ nú mɛsɛ́dó wǒ-ɖokpó lɛ́ɛ, kpódó mɛ ɖě lɛ́ɛ bǐ kpán.

¹⁰ Nyɔ̌nu e ɖɔ nǔ énɛ́ lɛ́ɛ nú mɛsɛ́dó lɛ́ɛ ɔ́, yě ɖíe: Mali Magidalanu ɔ́, Jani kpódó Mali Jakinɔ ɔ́ kpán, kpódó nyɔ̌nu e kpó yě kpó zɔn lɛ́ɛ kpán.

¹¹ Mɛsɛ́dó lɛ́ɛ ka mɔ xó énɛ́ lɛ́ɛ dó mɔ lɛ̌lo, bó ɖi nǔ nú nyɔ̌nu lɛ́ɛ sín xó ǎ;

¹² có Piyɛ́ɛ ka sí te, bó kán wezun yi yɔdo ɔ́ kɔn. Ée é jɛ dɔ̌n ɔ́, é fɛ, bó kpɔ́n yɔdo ɔ́ mɛ, bó mɔ avɔ e è lɛ́ dó Jezu ɔ́ kɛ́ɖɛ́. Nǔ énɛ́ e jɛ ɔ́ búdo dó e, bɔ é lɛ́ kɔ wá yi xwé.

Jezu sín ahwanvú we e xwe Emawúsi lɛ́ɛ

¹³ Gbe nɛ́ gbe ɖokpó ɔ́, ahwanvú Jezu tɔn we ɖé lɛ́ɛ ɖo ali jí xwe gletoxo e è nɔ ylɔ́ ɖɔ Emawúsi, bɔ é ɖo kilomɛ́tlu wǒ-ɖokpó mɔ̌ dó Jeluzalɛ́mu ɔ́ mɛ.

¹⁴ Yě ɖo xó ɖɔ dó nǔ énɛ́ e jɛ lɛ́ɛ bǐ wú wɛ.

¹⁵ Xó énɛ́ lɛ́ɛ ɖɔ wɛ yě ɖe, bó ɖo nǔ dɔn ɖ'é kɔn wɛ, bɔ Jezu ɖésú wá xwedó yě wú, bó jɛ ali zɔn xá yě jí.

¹⁶ Nǔɖé cyɔ́n nukún yětɔn jí, nú yě ma tunwun i ó.

¹⁷ É kanbyɔ́ yě ɖɔ: “Xó tɛ́ ɖɔ dó ali wɛ mi ka ɖe mɔ̌?” Bɔ yě nɔ te wǔbláwúblá.

¹⁸ Mɛ e è nɔ ylɔ́ ɖɔ Kleopasi ɖo yě mɛ ɔ́ yí gbe n'i ɖɔ jí: “Hǔn hwi ɖokpónɔ jɛ́n wɛ nyí jǒnɔ ɖo Jeluzalɛ́mu bó dán nǔ e jɛ ɖo fínɛ́ azǎnví élɔ́ lɛ́ɛ mɛ é a?”

¹⁹ É ka yí gbe nú yě ɖɔ: “Étɛ́ ka jɛ?” Yě yí gbe n'i ɖɔ: “Nǔ e kpé Jezu Nazalɛ́ti tɔn é wɛ. Gbɔn nǔwiwa tɔn lɛ́ɛ kpódó xó tɔn lɛ́ɛ kpó gbla mɛ ɔ́, é ko ɖe xlɛ́ ɖo Mawu kpódó togun ɔ́ bǐ kpán nukɔn ɖɔ émí nyí gbeyíɖɔ Mawu tɔn, nǔwúkpétɔ́.

²⁰ Vɔ̌sánú-xwlémawutɔ́gán lɛ́ɛ kpódó togán mǐtɔn lɛ́ɛ kpán ka sɔ́ ɛ jó ɖɔ è nǐ ɖó kúhwɛ n'i, bó ká ɛ nyi aklúzu jí.

²¹ Mǐdɛɛ lɛ́ɛ kó ɖo nukún ɖó wɛ ɖɔ é wɛ ná hwlɛ́n Izlayɛ́li togun ɔ́ gán. Lo ɔ́, nǔ cí mɔ̌ din ɔ́, azǎn tɔn atɔngɔ́ ɔ́ ɖíe.

²² Nyɔ̌nu e ɖo ahwan mǐtɔn mɛ lɛ́ɛ ɖěe wá dó adohu nú mǐ; yě fɔ́n zǎn yi yɔ ɔ́ kɔn,

²³ yě ká mɔ cyɔ tɔn ǎ, lobo wá ɖɔ nú mǐ; énɛ́ ɔ́ víví hwe, bɔ yě lɛ́ ɖɔ nú mǐ ɖɔ wɛnsagun ɖé lɛ́ɛ tɔ́n dó émí jí, lobo ɖɔ nú émí ɖɔ Jezu ɖo gbɛ.

²⁴ Mɛ mǐtɔn ɖé lɛ́ɛ yi yɔ ɔ́ kɔn, bó mɔ nǔ énɛ́ lɛ́ɛ, lě e nyɔ̌nu lɛ́ɛ ɖɔ gbɔn é; lo ɔ́, yě mɔ Jezu ɔ́ ǎ.”

²⁵ Jezu ka ɖɔ nú yě ɖɔ: “Gbɛtɔ́ nǔnywɛ́hwedónánɔ lɛ́ɛ mi! Hwetɛ́nu wɛ mi ná wá ɖi nǔ nú nǔ e gbeyíɖɔ Mawu tɔn lɛ́ɛ kó ɖɔ ɔ́ bǐ dó?

²⁶ Klísu ɔ́ má kó ɖó ná ji ya énɛ́ lɛ́ɛ hwɛ̌, cóbó ná dó sixú byɔ́ susu tɔn mɛ ǎ cé?”

²⁷ É ka bɛ́ xó sín Mɔyízi jí, bó gbɔn gbeyíɖɔ Mawu tɔn lɛ́ɛ bǐ jí, bɔ nǔ e è wlǎn dó wǔtu tɔn ɖo Mawuxówéma mɛ ɔ́, é tín bǐ mɛ nú yě.

²⁸ Ée yě ká sɛ yá gletoxo e mɛ yě xwe ɔ́, Jezu bló nǔ mɛ e ná dín yi nukɔn ɖɔhun;

²⁹ lo ɔ́, yě ɖó e te, bó ɖɔ n'i ɖɔ: “Nɔ mǐ gɔ̌n, zǎn kó ɖo nǎ kú wɛ, ɖó hwe kó jɛ do.” É ka byɔ́ xwé gbe, bó nɔ yě gɔ̌n.

³⁰ Hwenu e é ka wá jɛ nǔ ɖu xá yě jí ɔ́, é sɔ́ wɔ̌xúxú, bó dó kú nú Mawu, bó kán, bó ná yě.

³¹ Azɔn ɖokpó ɔ́, nukún yětɔn hun, bɔ yě mɔ nǔ jɛ wǔ tɔn, lobo tunwun ɖɔ Jezu wɛ; éyɛ́ ka bú sín yě tɛ́ntin,

³² bɔ yě nɔ ɖɔ nú yěɖée ɖɔ jí: “Hwenu e é ɖo xó ɖɔ nú mǐ wɛ ɖo alixo, bó ɖo Mawuxó tínmɛ nú mǐ wɛ ɔ́, akpakpa ɖé ma sɔ́ mǐ sín xomɛ a?”

³³ Énɛ́ ɔ́, yě sí te tlóló, bó lɛ́ kɔ yi Jeluzalɛ́mu, bó mɔ mɛsɛ́dó wǒ-ɖokpó lɛ́ɛ kplé, kpódó gbɛ̌ yětɔn lɛ́ɛ kpó.

³⁴ Mɛ wǒ-ɖokpó lɛ́ɛ kpódó gbɛ̌ yětɔn lɛ́ɛ kpán ɖɔ nú yě ɖɔ: “Aklúnɔ fɔ́n sín kú nǔgbó, bó sɔ́ éɖée xlɛ́ Sinmɔ́ɔ.”

³⁵ Yě lɔ yí xó, bó ɖɔ nǔ e jɛ ɖo alixo ɔ́, lě e yě ká wá tunwun i gbɔn hwenu e é kán wɔ̌xúxú é.

Jezu tɔ́n dó ahwanvú tɔn lɛ́ɛ jí

³⁶ Xó énɛ́ lɛ́ɛ ɖɔ wɛ yě ɖe, bɔ Jezu wá tɔ́n ɖo tɛ́ntin yětɔn, bó ɖɔ nú yě ɖɔ: “Fífá ní nɔ kpɔ́ xá mi.”

³⁷ Xɛsi jɛ yě jí, bɔ ayi yětɔn gbadó, bɔ yě vɛdó ɖɔ nǔ mɔ wɛ émí ɖe sín.

³⁸ Lo ɔ́, Jezu ɖɔ: “Ani ka ɖo ayi gbadó nú mi wɛ mɔ̌? Étɛ́ sín nǔ xo kpɔ́n wɛ mi ka ɖe?

³⁹ Mi kpɔ́n alɔ ce lɛ́ɛ, bó kpɔ́n afɔ ce lɛ́ɛ; nyi ɖésúnɔ wɛ. Mi ɖó alɔ wú ce bó kpɔ́n; yɛ ɖé nɔ ɖó agbaza ǎ, é ka nɔ ɖó xú lě e nyɛ ɖó gbɔn bɔ mi mɔ é ǎ.”

⁴⁰ Hwenu e é ɖo mɔ̌ ɖɔ wɛ ɔ́, é zé alɔ tɔn lɛ́ɛ kpódó afɔ tɔn lɛ́ɛ kpó xlɛ́ yě.

⁴¹ Nǔ énɛ́ ɔ́ hun xomɛ nú yě, cóbó ka lɛ́ kpo ɖo yě kpácá wɛ, bɔ ɖěe yě ma yá wǔ ɖi nǔ ǎ ɔ́, Jezu kanbyɔ́ yě ɖɔ: “Mi ɖó nǔɖuɖu ɖé ɖo fí a?”

⁴² Yě ká sɔ́ hweví hihi sínsɛ́n ɖokpó n'i,

⁴³ bɔ é yí, bó ɖu ɖo nukún yětɔn mɛ,

⁴⁴ bó ka ɖɔ nú yě ɖɔ: “Hwenu e un ɖo kpɔ́ xá mi ɔ́, un ko ɖɔ xó élɔ́ lɛ́ɛ nú mi ɖɔ jí: nǔ e è ko wlán dó wú ce ɖo Mɔyízi sín sɛ́n ɔ́ mɛ, bó wlán dó wú ce ɖo gbeyíɖɔ Mawu tɔn lɛ́ɛ sín wěma mɛ, bó lɛ́ wlán dó wú ce ɖo Ɖɛhanwéma lɛ́ɛ mɛ ɔ́ bǐ ɖó ná jɛ.”

⁴⁵ Hwenɛ́nu wɛ é hun ayi yětɔn, bónú yě ná mɔ nǔ jɛ Mawuxówéma ɔ́ mɛ.

⁴⁶ É ɖɔ nú yě ɖɔ: “È ko wlán ɖ'ayǐ ɖɔ: Klísu ɔ́ ɖó ná ji ya, káká bó kú, bɔ Mawu ka na lɛ́ fɔ́n ɛ sín kú azǎn tɔn atɔngɔ́ ɔ́ gbe,

⁴⁷ bɔ, ɖo nyǐkɔ tɔn mɛ ɔ́, è nǎ jlá Wɛn Ɖagbe ɔ́ akɔta lɛ́ɛ bǐ, bɛ́ sín Jeluzalɛ́mu, bó ná ɖɔ nú gbɛtɔ́ lɛ́ɛ bǐ ɖɔ yě ní lɛ́ kɔ sín hwɛ yětɔn lɛ́ɛ gúdo, bónú Mawu ná sɔ́ hwɛ yětɔn lɛ́ɛ kɛ yě.

⁴⁸ Mi nyí kúnnuɖetɔ́ nǔ énɛ́ lɛ́ɛ tɔn.

⁴⁹ Nyɛ ɖésúnɔ ka ná sɛ́ nǔ e sín akpá tɔ́ ce dó ɔ́ dó mi. Mi bó nɔ to ɔ́ mɛ káká yi jɛ hwenu e hlɔ̌nhlɔ́n Mawu tɔn ná jɛ te dó mi jí é.”

Jezu yi jǐxwé

⁵⁰ Jezu wá kplá yě yi káká Betaníi, bó sɔ́ alɔ tɔn lɛ́ɛ yi jǐ, bó xo ɖɛ dó yě jí.

⁵¹ Hwenu e é ɖo ɖɛ xo dó yě jí wɛ ɔ́, é jó yě dó, bɔ Mawu sɔ́ ɛ yi jǐxwé.

⁵² Yědɛɛ lɛ́ɛ ka ɖe kɔ́ n'i, bó lɛ́ kɔ wá yi Jeluzalɛ́mu kpódó awǎjijɛ ɖaxó kpán.

⁵³ Yě nɔ ɖo sinsɛnxɔ mɛ hwebǐnu, bó nɔ ɖo susu kpa nú Mawu wɛ.