Luki 2 - MAWUXÓWÉMA

È ji Jezu

¹ Hwenɛ́nu ɔ́, Dadá Hlɔ̌ma tɔn Ogwísi ɖe gbeta tɔ́n, ɖɔ è nǐ xa mɛ e ɖo gbɛ ɔ́ mɛ é bǐ.

² Nukɔn nukɔntɔn e è xa mɛ hwenu e è Kiliniwúsi ɖo tokpɔngán nyí wɛ ɖo Silíi ɔ́ nɛ́.

³ Mɛ ɖokpó ɖokpó nɔ́ yi ná nyǐkɔ ɖo to é ɖésúnɔ tɔn mɛ.

⁴ Jozɛ́fu lɔ gosín Nazalɛ́ti, ɖo Galilée yíkúngban jí, bó ɖidó Bɛteleyɛ́mu ɖo Judée yíkúngban jí, fí e è ji axɔ́sú Davídi ɖe é, bó ná yi ná nyǐkɔ; ɖó Davídi hɛ́nnu mɛ wɛ é jɔ ɖe.

⁵ É kplá asi tɔn Mali e ɖo xo hwenɛ́nu é, bó ná yi ná nyǐkɔ.

⁶ Fínɛ́ wɛ yě ɖe, bɔ vǐjizán Mali tɔn sɔgbe,

⁷ bɔ é ji nukɔngbéví tɔn, bɔ é nyí súnnu, bɔ é bú avɔ dó e, bó sɔ́ ɛ mlɔ́ nǔ e mɛ kanlin lɛ́ɛ sín nǔɖuɖu nɔ́ nɔ é; ɖó yě mɔ tɛnmɛ ɖo fí e alitanu lɛ́ɛ nɔ yi jɛ é ǎ.

Wɛnsagun Mawu tɔn ɖokpó tɔ́n dó lɛ̌ngbɔ́nyitɔ́ lɛ́ɛ jí

⁸ Lɛ̌ngbɔ́nyitɔ́ ɖé lɛ́ɛ ɖo gbě énɛ́ ɔ́ jí, bó ɖo zǎn cɔ́ wɛ ɖo lɛ̌ngbɔ́ yětɔn lɛ́ɛ kɔn, ɖo gběhan mɛ.

⁹ Wɛnsagun Mawu tɔn ɖokpó ká tɔ́n dó yě jí, bɔ susu Mawu tɔn sín wěziza hɔ́n dó yě jí, bɔ xɛsi ɖaxó ɖé jɛ yě bǐ jí.

¹⁰ Wɛnsagun ɔ́ ka ɖɔ nú yě ɖɔ: “Mi ma ɖi xɛsi ó, Wɛn Ɖagbe ɖé dó mi gbé wɛ un ja, bɔ é ná nyí awǎjijɛnú ɖaxó nú togun ɔ́ bǐ.

¹¹ È ji Mɛhwlɛ́ngántɔ́ ɖokpó nú mi égbé ɖo axɔ́sú Davídi tomɛ; é wɛ nyí Klísu Aklúnɔ.

¹² Nǔ e mi na dó tunwun i ná ɔ́ ɖíe: mi ná mɔ yɛ̌yɛ́ví ɖé, bɔ è bǔ avɔ dó e, bo sɔ́ ɛ mlɔ́ nǔ e mɛ kanlin lɛ́ɛ sín nǔɖuɖu nɔ́ nɔ é.”

¹³ Azɔn ɖokpó ɔ́, Mawu wɛnsagun wɔ̌buwɔ́bú ɖé lɛ́ɛ wá gɔ́ nú ɖěe wá dó wɛn é, bɔ yě jɛ Mawu mlá jí ɖɔ:

¹⁴ “Susu nú Mawu ɖo jǐxwé, fífá ní tíin ɖo ayǐkúngban jí nú gbɛtɔ́ e sín nǔ nyɔ́ Mawu nukún mɛ lɛ́ɛ!”

Lɛ̌ngbɔ́nyitɔ́ lɛ́ɛ yi Bɛteleyɛ́mu

¹⁵ Ée wɛnsagun lɛ́ɛ jó lɛ̌ngbɔ́nyitɔ́ lɛ́ɛ dó, bo lɛ́ kɔ ɖidó jǐxwé ɔ́, lɛ̌ngbɔ́nyitɔ́ lɛ́ɛ ɖɔ nú yěɖée ɖɔ: “Mi nú mi na hun káká yi Bɛteleyɛ́mu, bó ná yi kpɔ́n nǔ e jɛ bɔ Aklúnɔ dó wɛn tɔn sɛ́ dó mǐ é.”

¹⁶ Yě fyá bó yi. Yě mɔ Mali kpódó Jozɛ́fu kpó, bó mɔ yɛ̌yɛ́ví ɔ́ ɖo ayǐmlɔ́mlɔ́ ɖo nǔ e mɛ kanlin lɛ́ɛ sín nǔɖuɖu nɔ́ nɔ é mɛ.

¹⁷ Ée yě mɔ ɛ ɔ́, yě jɛ xó e wɛnsagun ɔ́ ɖɔ dó yɛ̌yɛ́ví ɔ́ wú ɔ́ ɖɔ jí.

¹⁸ Bɔ nǔ e lɛ̌ngbɔ́nyitɔ́ lɛ́ɛ ɖɔ ɔ́ kpácá mɛ e se lɛ́ɛ bǐ.

¹⁹ Mali ka yí xó énɛ́ lɛ́ɛ bǐ hɛn dó ayi mɛ, bó nɔ́ ɖo tamɛ lin d'é wú wɛ.

²⁰ Lɛ̌ngbɔ́nyitɔ́ lɛ́ɛ lɛ́ kɔ, bó ɖo susu kpa nú Mawu wɛ, bó ɖo mlǎmlá ɛ wɛ, ɖó nǔ e yě se, bó mɔ lɛ́ɛ bǐ sɔgbe xá lě e wɛnsagun ɔ́ ɖɔ gbɔn nú yě é.

È sun nyǐ Jezu

²¹ Gbe e gbe vǐ ɔ́ ɖó azǎn tántɔn, bɔ è gbo ada n'i ɔ́, è sun nyǐ i ɖɔ “Jezu”; nyǐkɔ énɛ́ ɔ́ wɛ wɛnsagun ɔ́ ko ɖɔ nú Mali ɖ'ayǐ, cóbɔ é wá mɔ xo tɔn.

È sɔ́ Jezu yi xwlé Mawu ɖo sinsɛnxɔ mɛ, ɖo Jeluzalɛ́mu

²² Hwenu e è ɖǒ ná slá wǔ nú Jozɛ́fu kpódó Mali kpó lě e Mɔyízi sɛ́n ɔ́ zɔ́n gbɔn ɔ́ wá su, bɔ é kplá vǐ ɔ́ yi Jeluzalɛ́mu, bó ná sɔ́ ɛ xwlé Mawu.

²³ Đó è wlǎn dó Aklúnɔ sɛ́n ɔ́ mɛ ɖɔ jí: “Súnnu nukɔngbéví bǐ wɛ è nǎ sɔ́ ɖó vo nú Aklúnɔ.”

²⁴ Yě ká ɖó ná hɛn xwelé we, abǐ ahwannɛ́ví we, bó ná sɔ́ sá vɔ̌ ná ɖo fínɛ́, lě e Aklúnɔ sɛ́n zɔ́n gbɔn é.

²⁵ Nya ɖé ka ɖo Jeluzalɛ́mu hwenɛ́nu, bɔ è nɔ ylɔ́ ɛ ɖɔ Simɛ́nyɔ́ɔ. Nya énɛ́ ɔ́ nɔ́ xwedó Mawusɛ́n lɛ́ɛ, bó nɔ́ jɛ hun dó Mawu sín azɔ̌ lɛ́ɛ jí. É ká ɖo te kpɔ́n mɛ e ná wá hwlɛ́n Izlayɛ́li togun ɔ́ gán é, bɔ Yɛsinsɛn ɖo kpɔ́ xá ɛ.

²⁶ Yɛsinsɛn ka ko ɖe xlɛ́ ɛ ɖɔ é kún ná kú ma mɔ Klísu Aklúnɔ tɔn ɖó nukún wú ó.

²⁷ Yɛsinsɛn ka wá ɖɔ xó dó ayi mɛ n'i, bɔ é wá sinsɛnxɔ mɛ hwenu e Jezu sín mɛ lɛ́ɛ kplá Jezu wá, bó ja yɛsu e Mɔyízisɛ́n zɔ́n ɔ́ fɔ n'i gbé é.

²⁸ Simɛ́nyɔ́ɔ ka yí vǐ ɔ́ dó awa mɛ, bó dó kú nú Mawu ɖɔ:

²⁹ “Din ɔ́, Aklúnɔ, jǒ nyɛ mɛsɛntɔ́ towe dó, lě e a ko ɖɔ gbɔn é, nú ma yi ɖo fífá mɛ;

³⁰ ɖó nukún ce mɔ hwlɛngán towe

³¹ e sín nǔ a sɔ́ ɖ'ayǐ nú gbɛtɔ́ lɛ́ɛ bǐ é:

³² é wɛ nyí wěziza e ná ɖe we xlɛ́ akɔta lɛ́ɛ bǐ, bó ká ná nyí susu nú togun towe Izlayɛ́li é.”

Simɛ́nyɔ́ɔ ɖɔ xó dó vǐ ɔ́ wú

³³ Nǔ e ɖɔ dó vǐ ɔ́ wú wɛ Simɛ́nyɔ́ɔ ɖe ɔ́ ká nɔ́ kpácá vǐtɔ́ ɔ́ kpódó vǐnɔ ɔ́ kpó.

³⁴ Simɛ́nyɔ́ɔ xo ɖɛ dó yě jí, bó ká ɖɔ nú Mali vǐ ɔ́ sín nɔ ɖɔ: “Nywɛ̌ ɖɔ Mawu sɔ́ vǐ élɔ́, bɔ é ná nyí afɔklɛ́nnú nú Izlayɛ́li ví gěgé, bó ká ná lɛ́ sɔ́ yě mɛ gěgé sí te. É ná nyí wuntun Mawu tɔn e gbɛtɔ́ lɛ́ɛ ná gbɛ́ wǎn ná é,

³⁵ bɔ nǔ e lin wɛ mɛ gěgé ɖe ɔ́ ná jɛ wěxo. Hwi ɖésúnɔ ɔ́, a ka ná mɔ wǔvɛ́, bɔ é ná xo ayi towe zlɛ́ hwǐ ɖɔhun.”

Ana gbeyíɖɔ Mawu tɔn nyɔ̌nu ɔ́ kpa susu nú Mawu

³⁶ Nyɔ̌nu gbeyíɖɔ Mawu tɔn ɖé ka ɖo fínɛ́, bɔ è nɔ ylɔ́ ɛ ɖɔ Ana; Fanuwɛli ví wɛ, bɔ é jɔ ɖo akɔta Acɛ́ɛ tɔn mɛ; xwe tɔn ko sɛ yi tlala. Đyɔ̌vǐ mɛ wɛ é ɖe, bó yi asúxwé. Xwe tɔn tɛ́nwe gúdo wɛ asú tɔn kú jó e dó.

³⁷ É ka sɔ́ da asú ɖě ǎ, káká bó ɖó xwe kanwe-nukún-ɛnɛ (84); é nɔ́ cí sinsɛnxɔ mɛ, bɔ zǎn kpódó kéze kpó ɔ́, é nɔ́ ɖo Mawu sɛn wɛ, ɖo nubláblá kpó ɖɛxixo kpó mɛ.

³⁸ Hwenɛ́nu ɔ́, é wá yě gɔ̌n, bó jɛ Mawu kpa jí, bó jɛ vǐ ɔ́ xó ɖɔ nú mɛ e ɖo te kpɔ́n hwlɛngán Jeluzalɛ́mu tɔn lɛ́ɛ é bǐ jǐ.

Yě lɛ́ kɔ wá yi Nazalɛ́ti

³⁹ Ée Mali kpódó Jozɛ́fu kpó bló nǔ e Aklúnɔ sɛ́n zɔ́n lɛ́ɛ bǐ fó ɔ́, yě kpó vǐ ɔ́ kpó lɛ́ kɔ wá yi to yětɔn Nazalɛ́ti ɔ́ mɛ, ɖo Galilée yíkúngban jí.

⁴⁰ Vǐ ɔ́ ka ɖo susu wɛ, bɔ hlɔ̌nhlɔ́n ɖo wǔ tɔn wá wɛ; nǔnywɛ́ kpé e; bɔ nyɔ̌ná Mawu tɔn ɖo kpɔ́ xá ɛ.

Jezu yi sinsɛnxɔ mɛ ɖo xwe tɔn wěwegɔ́ ɔ́ mɛ

⁴¹ Xwewú xwewú ɔ́, Jezu sín tɔ́ kpódó nɔ tɔn kpó nɔ́ yi ɖu Dǐndínwáyixwe ɖo Jeluzalɛ́mu.

⁴² Hwenu e Jezu ka wá ɖó xwe wěwe ɔ́, yě yi xwe ɔ́ ɖu gbé ɖo Jeluzalɛ́mu lě e yě kó nɔ́ bló gbɔn é.

⁴³ Ée yě ɖu xwe ɔ́ fó ɔ́, yě wlí xwé sín ali; lo ɔ́, Jezu cí Jeluzalɛ́mu, bɔ mɛ tɔn lɛ́ɛ ká tunwun ǎ.

⁴⁴ Yě vɛdó ɖɔ é kpó émí kpó ɖo yiyi wɛ sín, bó ɖi zɔnlin kéze ɖokpó, cóbó wá jɛ biba ɛ jí gbɔn mɛ yětɔn lɛ́ɛ kpódó mɛtunwunmɛ yětɔn lɛ́ɛ kpán mɛ.

⁴⁵ Ée yě má mɔ ɛ ǎ ɔ́, yě lɛ́ kɔ wá Jeluzalɛ́mu, bó kpo ɖo biba ɛ wɛ.

⁴⁶ Azǎn tɔn atɔn gbe wɛ yě wá yi mɔ ɛ ɖo sinsɛnxɔ mɛ, bɔ é ɖo ayǐjínjɔ́n, ɖo sɛ́nkplɔ́nmɛtɔ́ lɛ́ɛ tɛ́ntin, bó ɖo tó ɖó yě wɛ, bó ɖo nǔ kanbyɔ́ yě wɛ,

⁴⁷ bɔ nǔnywɛ́ tɔn kpódó xósin e ná wɛ é ɖe lɛ́ɛ kpán nɔ́ kpácá mɛ e ɖo tó ɖó e wɛ lɛ́ɛ bǐ.

⁴⁸ Ée yě wá mɔ ɛ ɔ́, é kpácá yě bǐ, bɔ nɔ tɔn kanbyɔ́ ɛ ɖɔ: “Vǐ ce, nɛ̌ ká gbɔn bɔ a blǒ mɔ̌ xá mǐ, bɔ nyɛ kpódó tɔ́ towe kpo ɖo biba we wɛ adohu adohu?”

⁴⁹ É yí gbe nú yě ɖɔ: “Étɛ́wú mi ɖo biba mì wɛ? Mi tunwun ɖɔ un ɖó ná ɖo tɔ́ ce sín xɔ mɛ ǎ cé?”

⁵⁰ Yědɛɛ lɛ́ɛ ka mɔ nǔ jɛ nǔ e ɖɔ nú yě wɛ é ɖe ɔ́ mɛ ǎ.

⁵¹ É ka sí te, bó xwedó yě, bɔ yě wá yi Nazalɛ́ti; é nɔ́ se tónú nú yě. Nɔ tɔn ka hɛn nǔ e jɛ nɛ́ lɛ́ɛ bǐ ayi mɛ.

⁵² Jezu ɖo susu wɛ, bɔ nǔnywɛ́ tɔn ɖo jijɛ jí wɛ. Mawu yí wǎn n'i, bɔ gbɛtɔ́ lɛ́ɛ lɔ yí wǎn n'i.