Luki 19 - MAWUXÓWÉMA

¹ Jezu wá jɛ Jeliko, bó ɖo toxo ɔ́ xo zlɛ́ wɛ.

² Nya ɖé ka ɖo fínɛ́, bɔ è nɔ ylɔ́ ɛ ɖɔ Zacée: tokwɛ́yítɔ́ lɛ́ɛ sín gǎn wɛ n'i, bɔ é jɛ dɔkun.

³ É ɖo mɛ e nyí Jezu é ba ná mɔ wɛ; lo ɔ́, é kpé wú ǎ, ɖó mɛ e kplé ɖo fínɛ́ lɛ́ɛ sukpɔ́, é ka lɛ́ nyí mɛ gli.

⁴ Énɛ́ ɔ́, é gbɔ bó kán wezun jɛ nukɔn, bó yi xá atín ɖé jí, bó na dó sixú mɔ Jezu, ɖó atín ɔ́ sá wɛ Jezu ná dín gbɔn.

⁵ Ée Jezu jɛ fínɛ́ ɔ́, é kpɔ́n jǐ, bó ɖɔ n'i ɖɔ: “Zacée, yǎ wǔ jɛ te; ɖó éhɔ́nmɛ ɔ́, xwé towe gbe wɛ un ɖó ná jɛ.”

⁶ Ée Jezu ɖɔ mɔ̌ ɔ́, Zacée jɛ te bléwún, bó kplá Jezu yi xwé gbe, bó yí jǒnɔ tɔn kpódó xomɛhunhun kpó.

⁷ Ée mɛ lɛ́ɛ mɔ mɔ̌ ɔ́, yě bǐ jɛ nǔ hlún ɖɔ dó Jezu wú jí; yě nɔ́ ɖɔ: “É yi jɛ hwɛhutɔ́ xwé!”

⁸ Zacée ka sí te ɖo Aklúnɔ nukɔn, bó ɖɔ n'i ɖɔ: “Aklúnɔ! Un ná ná dɔkun ce sín vlɔ̌ɖówe wamamɔnɔ lɛ́ɛ, bónú un ka hízí mɛɖé ɔ́, un ná sú mɔ̌hunkɔtɔn donu ɛnɛ mɛ ɔ́.”

⁹ Jezu ka ɖɔ n'i ɖɔ: “Égbé ɔ́, Mawu hwlɛ́n mɛ e ɖo xwé élɔ́ gbe lɛ́ɛ gán, ɖó nya élɔ́ lɔmɔ̌ ɔ́, Ablaxámu ví wɛ.”

¹⁰ Đó Mawu sɛ́ nyɛ Gbɛtɔ́ví ɔ́ dó, bónú má wá ba mɛ e bú lɛ́ɛ, bó hwlɛ́n yě gán.

Jezu dó lǒ dó sikágankwɛ́ wú

¹¹ Ée mɛ lɛ́ɛ ɖo xó énɛ́ lɛ́ɛ ɖótó wɛ ɔ́, Jezu lɛ́ dó lǒ ɖěvo nú yě, ɖó é ko sɛ yá Jeluzalɛ́mu, bɔ mɛ lɛ́ɛ ka vɛdó ɖɔ tlóló din wɛ axɔ́súɖuɖu Mawu tɔn ná bɛ́ sín.

¹² Bɔ é ɖɔ: “Nya nukúnɖéjí ɖé wɛ sɔ́nǔ xwe to línlín ɖé mɛ, nú è nǎ yi sɔ́ ɛ axɔ́sú, bɔ é ná lɛ́ kɔ wá xwé.

¹³ Cóbónú é ná yi ɔ́, é ylɔ́ mɛ wǒ ɖo mɛsɛntɔ́ tɔn lɛ́ɛ mɛ, bó sɔ́ sikágankwɛ́ wǒ dó así nú yě, bó ɖɔ yě ní dó ɖo ajɔ̌ wa ná wɛ, káká nú émí na lɛ́ kɔ wá.

¹⁴ To tɔn mɛ nu lɛ́ɛ ka gbɛ́ wǎn n'i, bɔ yě ɖe mɛ, bɔ wɛn jɛ gǔdo tɔn nú yě ní yi ɖɔ nú mɛ e jló ná sɔ́ ɛ axɔ́sú ɔ́ ɖɔ: ‘Mǐ ba nú mɛ énɛ́ ní ɖu axɔ́sú ɖo mǐ nu ǎ!’

¹⁵ “Ée è sɔ́ ɛ axɔ́sú, bɔ é lɛ́ kɔ wá xwé ɔ́, é ylɔ́ mɛsɛntɔ́ e é má akwɛ́ ná lɛ́ɛ, bó ná tunwun lě e mɛ ɖokpó ɖokpó mɔ é.

¹⁶ Mɛ nukɔntɔn ɔ́ wá, bó ɖɔ: ‘Gǎn ce, sikágankwɛ́ towe ɔ́ ji sikágankwɛ́ wǒ.’

¹⁷ Gǎn ɔ́ ka yí gbe n'i ɖɔ jí: ‘A wa nǔ ɖó ganjí; mɛsɛntɔ́ ɖagbe wɛ nú we; ɖó lě e a nɔ gbejí gbɔn, ɖo nǔ kpɛví mɛ é wú ɔ́, un ná sɔ́ we ɖó toxo wǒ nu.’

¹⁸ Mɛ wegɔ́ ɔ́ lɔ wá, bó ɖɔ: ‘Gǎn ce, sikágankwɛ́ towe ɔ́ ji atɔ́ɔ́n ɖěvo.’

¹⁹ Gǎn ɔ́ ka yí gbe nú élɔ́ ɖɔ: ‘Hwi lɔ ɔ́, nɔ toxo atɔ́ɔ́n nu.’

²⁰ Mɛ ɖěvo ɖɔ: ‘Gǎn ce, sikágankwɛ́ towe ɖíe; avɔtó wɛ un sin dó, bó sɔ́ sɛxwe;

²¹ ɖó xɛsi wɛ un ɖi nú we, ɖó a nylá hun tlala; nǔ e a ma sɔ́ ɖó ayǐ ǎ ɔ́ wɛ a nɔ yi zé; nǔ e a ma dó ǎ ɔ́ wɛ a nɔ ya.’

²² Gǎn ɔ́ ka yí gbe n'i ɖɔ: ‘Hwi mɛsɛntɔ́ nyanya élɔ́ ɔ́, xó e tɔ́n sín hwi ɖésú nu mɛ ɔ́ wɛ un ná sɔ́ dó ɖɔ hwɛ xá we. Ée a tunwun ɖɔ un nylá hun, bɔ nǔ e un ma sɔ́ ɖ'ayǐ ǎ ɔ́ wɛ un nɔ yi zé, bó ka nɔ ya nǔ e un ma dó ǎ ɔ́,

²³ nɛ́ ka gbɔn bɔ a ma ka sɔ́ akwɛ́ ce yi ɖó akwɛ́xwé, bónú un lɛ́ kɔ wá ɔ́, ma yí kpódó akwɛ́ví tɔn kpo ǎ?’

²⁴ É ka ɖɔ nú mɛ e ɖo fínɛ́ lɛ́ɛ ɖɔ: ‘Mi yí sikágankwɛ́ ɔ́ sín así tɔn, bó zé nú mɛ e ɖó wǒ é!’

²⁵ Yě ká yí gbe n'i ɖɔ: ‘Gǎn! Éyɛ́ ko ɖó sikágankwɛ́ wǒ hǔn!’

²⁶ É ka yí gbe nú yě ɖɔ: ‘Má ɖɔ nú mi, mɛ e ɖó nǔ ɔ́, è nǎ lɛ́ ná nǔ i d'é jí. Mɛ e ma ka ɖó nǔɖé ǎ ɔ́, è nǎ lɛ́ yí kpɛ e é ɖó ɔ́ sín así tɔn.

²⁷ Kɛntɔ́ ce e ka ɖɔ nyɛ kún ná ɖu axɔ́sú ɖo émí nu ó lɛ́ɛ ɔ́, mi dɔn yě bǐ wá fí, bó hu yě ɖo nukún ce mɛ.’ ”

Jezu byɔ́ Jeluzalɛ́mu

²⁸ Ée Jezu ɖɔ xó énɛ́ lɛ́ɛ vɔ ɔ́, é jɛ mɛ lɛ́ɛ sín nukɔn, bó ɖidó Jeluzalɛ́mu.

²⁹ Ée é sɛ yá Bɛtifajée kpódó Betaníi kpan, ɖo só e è nɔ ylɔ́ ɖɔ olívutín só ɔ́ kpá ɔ́, é ɖe ahwanvú tɔn we sɛ́ dó, bó ɖɔ nú yě ɖɔ:

³⁰ “Mi yi gletoxo e ɖo nukɔn nɛ́ é mɛ; mi byɔ́ toxo ɔ́ mɛ tlóló ɔ́, mi ná mɔ tócíví ɖé ɖo kan mɛ, bɔ mɛɖé ko xá jí kpɔ́n gbeɖé ǎ. Mi tún i, bó kplá ɛ wá.

³¹ Ényí mɛɖé ka kanbyɔ́ mi ɖɔ: ‘Étɛ́wú mi ka ɖo túntún i wɛ’ hǔn, mi yí gbe n'i ɖɔ: ‘Nǔ tɔn wɛ hu dó Aklúnɔ.’ ”

³² Ée yě ká yi ɔ́, yě mɔ nǔ lɛ́ɛ lě Jezu ɖɔ gbɔn nú yě ɔ́.

³³ Hwenu e yě ɖo tócíví ɔ́ tún wɛ ɔ́, nǔnɔ lɛ́ɛ kanbyɔ́ yě ɖɔ: “Aniwú mi ka ɖo tócíví ɔ́ tún wɛ?”

³⁴ Yě ká yí gbe ɖɔ: “Nǔ tɔn wɛ hu dó Aklúnɔ!”

³⁵ Bɔ yě kplá tócíví ɔ́ wá nú Jezu, bó tɛ́ avɔ yětɔn lɛ́ɛ nyi jǐ tɔn, bó sɔ́ Jezu jínjɔ́n jí.

³⁶ Ée Jezu ɖo yiyi wɛ ɔ́, mɛ lɛ́ɛ nɔ sɔ́ avɔ yětɔn tɛ́ ɖó ali ɔ́ jí.

³⁷ Hwenu e é sɛkpɔ́ Jeluzalɛ́mu, bó ɖo te jɛ sín olívutín só ɔ́ jí byɔ́ dodomɛ wɛ xweyǐgbe ɔ́, xomɛ ɖaxó ɖé hun ahwanvú wɔ̌buwɔ́bú e xwedó e lɛ́ɛ, bɔ yě jɛ susu kpa nú Mawu jí kpódó xósúsú kpó, ɖó nǔ e Mawu jlɛ́, bɔ yě mɔ lɛ́ɛ bǐ wú.

³⁸ Yě nɔ́ ɖɔ: “Mawu ní xo ɖɛ dó axɔ́sú e jǎwe ɖo Aklúnɔ nyíkɔ mɛ é jí. Fífá ní tíin ɖo sɛ́xwé, susu nú Mawu.”

³⁹ Falizyɛn e ɖo agun ɔ́ mɛ lɛ́ɛ ɖě ɖɔ n'i ɖɔ: “Mɛ̌si, ɖɔ nú ahwanvú towe lɛ́ɛ nú yě ní xwɛ!”

⁴⁰ Jezu ka yí gbe nú yě ɖɔ: “Má ɖɔ nú mi: yědɛɛ lɛ́ɛ na bó xwɛ ɔ́, awǐnnya lɛ́ɛ ná sú xó.”

Jezu ya avǐ dó Jeluzalɛ́munu lɛ́ɛ tamɛ

⁴¹ Ée Jezu sɛ yá Jeluzalɛ́mu, bó mɔ to ɔ́ sɛ́ dó ɔ́, é ya avǐ ɖó ta tɔn mɛ,

⁴² bó ɖɔ: “Ké, Jeluzalɛ́munu lɛ́ɛ mi! Égbé din ɔ́, ényí ɖɔ nǔ e ná hɛn fífá wá nú mi ɔ́ wú wɛ mi ko mɔ nukúnnú jɛ vɔ́vɔ́ ɔ́, nyɔ̌ wɛ é lo ko nyɔ́. Lo ɔ́, éɖíe é búdo dó mi e.

⁴³ Ayǐ ɖé lɛ́ɛ ka ná wá hɔ́n nú mi, bɔ kɛntɔ́ mitɔn lɛ́ɛ ná tɔ́n ahwan mi; yě ná xá toxo ɔ́, lobo ná ján mi gbɔn fí bǐ.

⁴⁴ Yě ná vɔ mi bǐ, bó ná gba toxo ɔ́, bɔ awǐnnya e è dǒ mɛ xɔ lɛ́ɛ ná ɔ́, ɖě sɔ́ ná kpo ɖo ɖě jí ǎ; ɖó hwenu e Mawu wá ba jǒnɔ mi ɔ́, mi tunwun ǎ.”

Jezu nya nǔsatɔ́ lɛ́ɛ sín sinsɛnxɔ mɛ

⁴⁵ Jezu byɔ́ sinsɛnxɔ mɛ, bó jɛ nǔsatɔ́ lɛ́ɛ nya jí;

⁴⁶ é ɖɔ nú yě ɖɔ: “Mawuxó ɔ́ ɖɔ jí: ‘Xwé ce ɔ́, ɖɛxwé wɛ é ná nyí; lo ɔ́, midɛɛ lɛ́ɛ mi ka sɔ́ dó ɖó ajotɔ́ lɛ́ɛ sín avatɛn.’ ”

⁴⁷ Ayǐhɔ́ngbe ayǐhɔ́ngbe ɔ́, Jezu nɔ kplɔ́n nǔ mɛ lɛ́ɛ ɖo sinsɛnxɔ mɛ; vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó tomɛxó lɛ́ɛ kpó ɖo biba ná hu i wɛ.

⁴⁸ Lo ɔ́, yě tunwun lě e yě ná kpé wǔ tɔn gbɔn é ǎ, ɖó togun ɔ́ bǐ wɛ bɔ nukún nyi wǔ tɔn, bó nɔ ɖo tó ɖó e wɛ kpó ayi yětɔn bǐ kpó.