Luki 14 - MAWUXÓWÉMA

¹ Gbɔjɛzán gbe ɖé wá su, bɔ Jezu yi nǔ ɖu gbé ɖo Falizyɛn lɛ́ɛ sín gǎn ɖé xwé; mɛ e ɖo fínɛ́ lɛ́ɛ ka ɖo cicɔ ɛ wɛ.

² Nya ɖé ɖo nukɔn tɔn fínɛ́, bó ɖo jǐjízɔn jɛ wɛ.

³ Jezu ka yí xó, bó kanbyɔ́ sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó ɖɔ: “Đo sɛ́n mǐtɔn mɛ ɔ́, è hɛn ɔ́, è nǎ gbɔ azɔn nú mɛ gbɔjɛzán gbe a, abǐ è nǎ gɔn azɔn gbɔ nú mɛ?”

⁴ Bɔ yě kɛ nu ǎ. Jezu ka ɖó alɔ azinzɔnnɔ ɔ́ wú, bó gbɔ azɔn n'i, lobo nyi i sɛ́ dó xwé.

⁵ Énɛ́ ɔ́ gúdo ɔ́, Jezu kanbyɔ́ yě ɖɔ: “Mɛ̌ wɛ ɖo mi mɛ bɔ vǐ tɔn abǐ nyibú tɔn ná jɛ dotɔ mɛ gbɔjɛzán gbe, bɔ é ma ná yi ɖe e tɔ́n tlóló ǎ?”

⁶ Yě ɖě ká mɔ nǔɖé ɖɔ dó xó énɛ́ ɔ́ wú ǎ.

Jezu kplɔ́n nǔ mɛ ɖɔ e ní sɔ́ mɛɖée hwe ɖo jǒnɔgbé

⁷ Jezu mɔ ɖɔ mɛ e è ylɔ̌ yi jǒnɔgbé lɛ́ɛ ɖo tɛn ɖaxó mɛ ba ná jínjɔ́n wɛ, bó dó lǒ élɔ́ nú yě bǐ ɖɔ:

⁸ “Ényí mɛɖé ylɔ́ we yi agɔ̌ ɖu gbé ɖo asikplákplá tɛnmɛ hǔn, ma yi jínjɔ́n tɛn ɖaxó mɛ ó, ɖó mɛɖé kó sixú nyí mɛjɔmɛ hú we, bɔ è nǎ ylɔ́ é lɔmɔ̌.

⁹ Mɛ e ylɔ́ we, bó ylɔ́ é lɔmɔ̌ ɔ́ táá wá ɖɔ nú we ɖɔ: ‘Sí te, bó ná tɛn nya élɔ́’, hwenɛ́nu ɔ́, tɛnmɛ ba gbé wɛ a xwe ɖo gǔdo bǐ nɛ́, bɔ é ná nyí winnyá nú we.

¹⁰ Nǔ ɖo ganjí ɔ́, a yi jǒnɔ gbé ɔ́, tɛn e ɖo gǔdo bǐ é mɛ wɛ a nǎ jínjɔ́n; énɛ́ ɔ́, mɛ e ylɔ́ we ɔ́ wá mɔ we ɖo fínɛ́ ɔ́, é ná ɖɔ nú we ɖɔ: ‘Xɔ́ntɔn ce, sɛ wá nukɔn’, bɔ é ná nyí susu nú we ɖo mɛ e kpódó hwi kpó ɖo agɔ̌ ɖu ɖo fínɛ́ wɛ lɛ́ɛ bǐ nukún mɛ.

¹¹ Đó mɛ ɖěbǔ sɔ́ éɖée su ɔ́, è nǎ sɔ́ ɛ hwe; mɛ e ka sɔ́ éɖée hwe ɔ́, è nǎ sɔ́ ɛ su.”

¹² Jezu ka wá ɖɔ nú mɛ e ylɔ́ ɛ é ɖɔ: “Ényí a jlǒ ná da mɛ nú è nǎ wá ɖu hwemɛ nǔɖuɖu, abǐ gbada nǔɖuɖu ɖo gɔ̌n towe hǔn, ma ylɔ́ xɔ́ntɔn towe lɛ́ɛ, nɔví towe lɛ́ɛ, hɛ̌nnumɔ towe lɛ́ɛ, kpódó dɔkunnɔ e ɖo xwé towe kpá lɛ́ɛ kpó ó; ɖó yě lɔ hɛn ɔ́, yě ná ylɔ́ we, bó ná sú nǔ e yě ɖu ɔ́ sín axɔ́ we.

¹³ Lo ɔ́, ényí a ylɔ́ agɔ̌ hǔn, ylɔ̌ wamamɔnɔ lɛ́ɛ kpódó sékúnɔ lɛ́ɛ kpó, afɔkponɔ lɛ́ɛ kpódó nukúntíntɔ́nnɔ lɛ́ɛ kpó.

¹⁴ Énɛ́ ɔ́, nǔ ná nyɔ́ nú we, ɖó mɛ énɛ́ lɛ́ɛ sixú wá ja axɔ́ tɔn sú we gbé ǎ; amɔ̌, Mawu ná ná ajɔ tɔn we gbe e gbe é ná fɔ́n hwɛjijɔnɔ lɛ́ɛ sín kú é.”

Jezu dó lǒ dó mɛ e è ylɔ́ yi jǒnɔgbé lɛ́ɛ wú

¹⁵ Mɛ ɖokpó ɖo mɛ e ɖo nǔ ɖu xá Jezu wɛ lɛ́ɛ mɛ, bɔ ée é se xó énɛ́ lɛ́ɛ ɔ́, é ɖɔ nú Jezu ɖɔ: “Nǔ nyɔ́ nú mɛ e na ɖu nǔ ɖo agɔ̌ e Mawu na ylɔ́ hwenu e é ná ɖu axɔ́sú ɖo gbɛtɔ́ lɛ́ɛ nu ɔ́ tɛnmɛ é.”

¹⁶ Jezu ka ɖɔ n'i ɖɔ: “Nya ɖé ylɔ́ agɔ̌ ɖaxó ɖokpó, bó ylɔ́ mɛ gěgé.

¹⁷ Ée nǔɖuɖu hwenu su ɔ́, é sɛ́ mɛsɛntɔ́ tɔn dó, nú é ná yi ɖɔ nú mɛ e è ylɔ́ lɛ́ɛ ɖɔ: ‘Mi wá, nǔ bǐ ko sɔgbe.’

¹⁸ Lo ɔ́, yě bǐ dó gbe ɖokpó ɔ́, bó ɖɔ sɛ́ dó e ɖɔ émí kún sixú wá ó. Mɛ nukɔntɔn ɔ́ ɖɔ sɛ́ dó e ɖɔ: ‘Un xɔ ayǐkúngban ɖokpó, bó jló ná yi kpɔ́n; kɛnklɛ́n ma sin xomɛ ó.’

¹⁹ Mɛ ɖěvo ɖɔ: ‘Un xɔ nyibú wǒ, bó jló ná yi kpɔ́n ɖɔ yě ná sixú wa azɔ̌ ganjí a jí; kɛnklɛ́n ma sin xomɛ ó.’

²⁰ Mɛ ɖěvo lɛ́ ɖɔ: ‘Un kplá asi din zaanɖé; énɛ́ ɔ́ wú ɔ́, un sixú wá ǎ.’

²¹ Mɛsɛntɔ́ ɔ́ lɛ́ kɔ wá, bó ɖó gbe nú gǎn tɔn. Gǎn ɔ́ ka sin xomɛ tlala, bó ɖɔ nú mɛsɛntɔ́ tɔn ɔ́ ɖɔ: ‘Ya wǔ yi tokplétɛn lɛ́ɛ, bó gbɔn ali ɖaxó lɛ́ɛ kpódó ali kpɛví lɛ́ɛ kpó xo, bó kplá wamamɔnɔ lɛ́ɛ kpódó sékúnɔ lɛ́ɛ kpó, nukúntíntɔ́nnɔ lɛ́ɛ kpódó afɔkponɔ lɛ́ɛ kpó wá fí.’

²² Ée mɛsɛntɔ́ ɔ́ yi bó wá ɔ́, é wá ɖɔ n'i ɖɔ: ‘Gǎn ce, nǔ e a zɔ̌n ɔ́, è ko bló, có tɛn lɛ́ kpo.’

²³ Gǎn ɔ́ ka ɖɔ nú mɛsɛntɔ́ tɔn ɔ́ ɖɔ: ‘Lɛ̌ yi gbɔn gletoxo lɛ́ɛ mɛ, bó gbɔn aliswɛ́ɛ́n lɛ́ɛ jí, bó dɔn mɛ e a nǎ mɔ lɛ́ɛ wá dandan nú xwé ce ná gɔ́.’

²⁴ Đó ma ɖɔ nú mi: nya énɛ́ lɛ́ɛ e un ko ylɔ́ ɖ'ayǐ ɔ́, yě mɛ ɖě ná ɖu nǔɖuɖu ce ǎ.”

Nǔ e ɖo ahwanvú Jezu tɔn nyínyí mɛ é

²⁵ Mɛ gěgé nyi ahwan xwedó Jezu, bɔ é lílɛ́ kpan nukɔn yě, bó ɖɔ:

²⁶ “Ényí mɛɖé jló ná xwedó mì, bó má ka yí wǎn nú mì hú tɔ́ tɔn, nɔ tɔn, asi tɔn, vǐ tɔn lɛ́ɛ, nɔví tɔn súnnu lɛ́ɛ kpódó nɔví tɔn nyɔ̌nu lɛ́ɛ kpó, káká jɛ gbɛ é ɖésúnɔ tɔn jí ǎ ɔ́, mɛ énɛ́ sixú nyí ahwanvú ce ǎ.

²⁷ Mɛ e ma ɖíɖá aklúzu tɔn, bó xwedó mì ǎ ɔ́, mɛ énɛ́ sixú nyí ahwanvú ce ǎ.

²⁸ Ényí mɛɖé ɖo mi mɛ, bó ɖo síngbó ná gbá wɛ ɔ́, ayǐ wɛ é ná to jínjɔ́n, bó ná lɛ́n akwɛ́ nabí e é ná zán d'é wú ɔ́ kpɔ́n hwɛ̌, bó ná kpɔ́n ɖɔ émí ɖó akwɛ́ e ná sixú wa azɔ̌ ɔ́ yi fó ɔ́ a jí.

²⁹ É má nyí mɔ̌ ǎ ɔ́, nú é wá dó xɔ ɔ́ do, bó ma ka sɔ́ wá kpé wú, bó gbá yi fó ǎ ɔ́, mɛ e na wá mɔ lɛ́ɛ bǐ na jɛ cícá ɛ ko jí,

³⁰ bó ná nɔ́ ɖɔ: ‘Mi kpɔ́n, nya ɖě ɖíe dó xɔ do, bó ma ka kpé wú bó gbá yi fó ǎ e.’

³¹ Mɔ̌ ɖokpó ɔ́, axɔ́sú e ɖó ahwanfuntɔ́ děgba we afɔwó (10.000), bó ja ahwan fun xá axɔ́sú ɖěvo e ɖó ahwanfuntɔ́ adɔ̌kpo ɖokpó (20.000) gbé ɔ́, é ná to jínjɔ́n ayǐ hwɛ̌, bó ná lin tamɛ kpɔ́n ɖɔ émí ná sixú kpé ahwan xá ɛ a jí.

³² Nú é mɔ ɖɔ émí kún sixú kpé wú ó ɔ́, hwenu e mɛ ɖě ɔ́ kpo ɖo zɔga ɔ́, é ná sɛ́ wɛn dó e ɖɔ nɛ̌ wɛ émí ná bló gbɔn bɔ fífá ná tíin a jí.

³³ Mɔ̌ ɖokpó ɔ́, mɛ e ná ɖo mi mɛ, bó ma ná jó dɔkun tɔn lɛ́ɛ bǐ dó ǎ ɔ́, mɛ énɛ́ sixú nyí ahwanvú ce ǎ.”

Jɛ e ma sɔ́ ɖó tɔ́n ǎ é

³⁴ “Jɛ ɔ́, nǔ ɖagbe wɛ é nyí; ényí é ka gblé ɔ́, nɛ̌ wɛ è nǎ lɛ́ wa gbɔn n'i bɔ é ná lɛ́ nyɔ́?

³⁵ É sɔ́ nyɔ́ nú ayǐkúngban ǎ, é ka sɔ́ lɛ́ nyɔ́ nú gle lɔ ǎ; hǔn gbě wɛ è nǎ sɔ́ kɔn nyi. Mɛ e ɖó tó bó ná dó se nǔ ná ɔ́ ní bó ɖótó bó se.”