Luki 13 - MAWUXÓWÉMA

¹ Hwenɛ́nu ɖokpó ɔ́, mɛɖé lɛ́ɛ ɖo fínɛ́, bó ɖo Galiléenu e ɖo vɔ̌ sá nú Mawu wɛ, bɔ Pilátu zɔ́n bɔ è hu yě lɛ́ɛ sín xó ɖɔ nú Jezu wɛ.

² Jezu ka ɖɔ nú yě ɖɔ: “Mi vɛdó ɖɔ Galiléenu énɛ́ lɛ́ɛ ɔ́, yě hu hwɛ hú Galiléenu ɖě lɛ́ɛ wútu wɛ è hu yě gbɔn mɔ̌ sín a?

³ Éeǒ, yě hu hwɛ hú yě ǎ; lo ɔ́, ényí mi lɔ ma lɛ́ kɔ sín hwɛ mitɔn lɛ́ɛ gúdo ǎ ɔ́, mi bǐ wɛ ná kú yě ɖɔhun.

⁴ Abǐ, mɛ afɔtɔn nukún-atɔn e jí ahohó Silowée tɔn mu jɛ, bɔ yě kú lɛ́ɛ ɔ́, yě hu hwɛ hú Jeluzalɛ́munu ɖě lɛ́ɛ bǐ wɛ mi vɛdó a?

⁵ Éeǒ, yě hu hwɛ hú yě ǎ; lo ɔ́, ényí mi lɔ ma lɛ́ kɔ sín hwɛ mitɔn lɛ́ɛ gúdo ǎ ɔ́, mi bǐ wɛ ná kú yě ɖɔhun.”

Jezu dó lǒ dó fígitín ɖé wú

⁶ Jezu ka lɛ́ dó lǒ élɔ́ nú yě ɖɔ: “Nya ɖé tun fígitín ɖokpó nyi vǐwungbo tɔn mɛ, bó ja sínsɛ́n gbɛ ɖ'é jí gbé, é ka mɔ ɖě ǎ.

⁷ Énɛ́ ɔ́, é ɖɔ nú vǐwunzɔ́watɔ́ ɔ́ ɖɔ: ‘Kpɔ́n, sín xwe atɔn ɖíe ɖokpóó wɛ un nɔ tɔ́n fígi gbɛ gbé ɖo atín élɔ́ jí, bó nɔ́ wá ba kpo. Gbo sín i! Aniwú é ka ná ɖo tɛn hán mɛ wɛ yǎyá kpowun ɖo fí?’

⁸ Vǐwunzɔ́watɔ́ ɔ́ ka yí gbe n'i ɖɔ: ‘Gǎn ce! Lɛ̌ jó e dó xwe élɔ́ mɛ hwɛ̌ nú mǐ ná kpɔ́n. Un ná kun do lɛ́ lɛ̌ dó, bó ná bɛ́ zunkɔ́ d'é mɛ;

⁹ nú é sixú sɛ́n xwe ɖě ɔ́ mɛ ɔ́, é ná nyɔ́; é má nyí mɔ̌ ǎ ɔ́, a nǎ gbo sín i.’ ”

Jezu gbɔ azɔn nú nyɔ̌nu ɖé gbɔjɛzán Jwifu lɛ́ɛ tɔn gbe

¹⁰ Jezu wá ɖo nǔ kplɔ́n mɛ wɛ ɖo kplɔ́ngbasá ɖé ɖo gbɔjɛzán gbe.

¹¹ Nyɔ̌nu ɖé ka ɖo fínɛ́, bɔ yɛ nyanya ɖo jǐ tɔn. Yɛ nyanya ɔ́ zɔ́n bɔ nyɔ̌nu ɔ́ gblé wɔ̌n, sín xwe afɔtɔn nukún-atɔn ɖíe; é nɔ́ zɔn tɔ́tɔ́, bó sɔ́ nɔ́ sixú jlɔ́ ɖěbǔ ǎ.

¹² Ée Jezu mɔ nyɔ̌nu ɔ́ é ɔ́, é ylɔ́ ɛ, bó ɖɔ n'i ɖɔ: “Nyɔ̌nu, azɔn towe gbɔ nú we, bɔ a jɛ te.”

¹³ Ée Jezu ɖɔ mɔ̌ n'i ɔ́, é ɖó alɔ jǐ tɔn, bɔ nyɔ̌nu ɔ́ jlɔ́ tlóló tɛn tɔn mɛ, bó jɛ susu kpa nú Mawu jí.

¹⁴ Lo ɔ́, ée é nyí gbɔjɛzán gbe wɛ Jezu gbɔ azɔn nú mɛ ɔ́, é vɛ́ mɛ e nyí gǎn ɖo kplɔ́ngbasá ɔ́ é wú, bɔ é ɖɔ nú mɛ lɛ́ɛ ɖɔ: “Azǎn ayizɛ́n wɛ nyí azɔ̌wazán ɖo aklúnɔzángbla ɖokpó mɛ. Ényí mi jló nú è nǎ gbɔ azɔn nú mi hǔn, mi bo nɔ wá azǎn énɛ́ lɛ́ɛ gbe; mi ma nɔ wá gbɔjɛzán gbe ó.”

¹⁵ Aklúnɔ yí gbe n'i ɖɔ: “Yɛmɛnúwatɔ́ e mi! Hǔn gbɔjɛzán gbe ɔ́, mi mɛ ɖokpó ɖokpó nɔ́ tún kan nú nyibú mitɔn, abǐ tócí mitɔn, bó nɔ́ ɖe tɔ́n sín kpó mɛ, bó nɔ́ kplá yi sin nu gbé ǎ cé?

¹⁶ Bɔ nyɔ̌nu élɔ́ e nyí Ablaxámu ví, bɔ Satáan blá sín xwe afɔtɔn-nukún-atɔn ɖíe ɖokpóó ɔ́, è ɖo na tún kan n'i gbɔjɛzán gbe ǎ cé?”

¹⁷ Hwenu e Jezu ɖo mɔ̌ ɖɔ wɛ ɔ́, winnyá hu kɛntɔ́ tɔn lɛ́ɛ bǐ. Nǔ ɖaxó ɖaxó e jlɛ́ wɛ é ɖe lɛ́ɛ ká hun xomɛ nú mɛ lɛ́ɛ.

Jezu dó lǒ dó atínkwín e wínní hú atínkwín ɖě lɛ́ɛ bǐ é wú

¹⁸ Jezu wá ɖɔ: “Étɛ́ ɖɔhun wɛ axɔ́súɖuɖu Mawu tɔn cí? Aniwú un ka sixú jlɛ́ dó?

¹⁹ É cí atínkwín wínníwínní ɖé ɖɔhun, bɔ nya ɖé dó nyi jikpá tɔn mɛ; ée atínkwín ɔ́ wá wú bó su ɔ́, é húzú atín, bɔ xɛ lɛ́ɛ nɔ wá xo adɔ̌ nyi ala tɔn lɛ́ɛ mɛ.”

Jezu dó lǒ dó tɔ́n wú

²⁰ Jezu lɛ́ ɖɔ: “Aniwú un ka sixú lɛ́ jlɛ́ axɔ́súɖuɖu Mawu tɔn dó?

²¹ É cí tɔ́n ɖɔhun, bɔ nyɔ̌nu ɖé sɔ́ dó linfín gannú atɔn mɛ, bónú linfín nyinya ɔ́ bǐ ná dó fɔ́n.”

Hɔn kpɛví ɔ́

²² Jezu wlí ali kpan ta Jeluzalɛ́mu, bó nɔ ɖo nǔ kplɔ́n mɛ lɛ́ɛ wɛ gbɔn toxo ɖaxó lɛ́ɛ, kpódó gletoxo lɛ́ɛ kpó mɛ.

²³ Mɛ ɖé ka kanbyɔ́ ɛ ɖɔ: “Aklúnɔ, mɛ kpɛɖé jɛ́n Mawu ná hwlɛ́n gán nǔgbó a?” Jezu ka ɖɔ nú yě ɖɔ:

²⁴ “Mi dó gǎn, bó gbɔn hɔn kpɛví ɔ́ nu; ɖó má ɖɔ nú mi, mɛ gěgé na ba ɖɔ émí ná gbɔn hɔnli énɛ́ nu, bó ka ná kpé wú ǎ.

²⁵ “Hwenu e xwétɔ́ ɔ́ ná sí te, bó ná dó gan hɔn tɔn mɛ, bɔ mi ná kpo ɖo hɛnkɛ́n ɔ́, mi ná jɛ hɔn xúxú jí, bó ná ɖɔ: ‘Daá, hun hɔn nú mǐ!’ Bɔ é ná yí gbe nú mi ɖɔ: ‘Un tunwun mi ǎ.’

²⁶ Énɛ́ ɔ́, mi ná jɛ ɖiɖɔ jí ɖɔ: ‘Mǐ kpódó hwi kpó wɛ ɖu nǔ, bó nu ahan, bɔ a kplɔ́n nǔ mɛ gbɔn ali lɛ́ɛ xo, ali lɛ́ɛ xo ɖo to mitɔn mɛ.’

²⁷ Lo ɔ́, é ná yí gbe nú mi ɖɔ: ‘Má ɖɔ nú mi: Un tunwun fí e nu mi nyí é ǎ; mi bǐ ní sɛ yi zɔ nú mì, nǔnyanyawatɔ́ e mi.’

²⁸ Fínɛ́ ɔ́, mi ná ya avǐ, bó ná ɖu aɖǔkún, hwenu e mi ná mɔ Ablaxámu kpódó Izáki kpó, kpódó Jakɔ́bu kpó, kpódó gbeyíɖɔ Mawu tɔn lɛ́ɛ bǐ kpán, ɖo axɔ́súɖuto Mawu tɔn mɛ, bɔ midɛɛ lɛ́ɛ ka ná ɖo hɛnkɛ́n é.

²⁹ Mɛ lɛ́ɛ ná gosín zǎnzǎnhwe jí, kpódó gbadahwe jí kpán, bó ná gosín totaligbé kpódó tofɔligbé kpán, bó ná wá ɖu agɔ̌ ɖo axɔ́súɖuɖu Mawu tɔn mɛ.

³⁰ Mi ní ka tunwun ɖɔ mɛ e ɖo gǔdo din lɛ́ɛ ɖě ná wá nukɔn, bɔ mɛ e ɖo nukɔn din lɛ́ɛ ɖě ná wá gǔdo.”

Wǎn yíyí e Jezu ɖó nú Jeluzalɛ́mu é

³¹ Gbe énɛ́ ɔ́ gbe ɖokpó ɔ́, Falizyɛn ɖé lɛ́ɛ wá ɖɔ nú Jezu ɖɔ: “Elódu jló ná hu we; énɛ́ wútu ɔ́, gosín to mǐtɔn mɛ, bó yi fí ɖěvo.”

³² Jezu ka yí gbe nú yě ɖɔ: “Mi yi ɖɔ nú nya nǔhɛngblétɔ́ ayǐsájɛ ɖɔhun énɛ́ ɔ́ ɖɔ égbé kpódó sɔ́ kpán ɔ́, un ná ɖo yɛ nyanya lɛ́ɛ nya sín mɛ lɛ́ɛ jí wɛ, bó ná ɖo azɔn gbɔ nú mɛ lɛ́ɛ wɛ, bɔ azǎn atɔngɔ́ ɔ́ gbe ɔ́, un ná wa azɔ̌ ce fó.

³³ Amɔ̌, égbé kpódó sɔ́ kpó, kpódó azǎn e ná bɔ d'é wú ɔ́ kpó ɔ́, un ɖó ná wlí ali ce, bó ɖidó Jeluzalɛ́mu; ɖó gbeyíɖɔ Mawu tɔn ɖě nɔ́ kú ɖo to ɖé mɛ zɛ Jeluzalɛ́mu wú ǎ.

³⁴ “Jeluzalɛ́munu e mi, Jeluzalɛ́munu e mi, mi mɛ e nɔ hu gbeyíɖɔ Mawu tɔn lɛ́ɛ, bó nɔ́ nyi awǐnnyaglo dó hu mɛ e Mawu nɔ́ sɛ́ dó mi lɛ́ɛ é! Azɔn mɔ̌kpán wɛ un ko jló ná kplé mi dó awa ce lɛ́ɛ glɔ́, lě e kokló nɔ́ kplé vǐ tɔn lɛ́ɛ dó awa tɔn lɛ́ɛ glɔ́ gbɔn é, lo ɔ́, mi jló ǎ.

³⁵ Hǔn, Mawu ná ɖe alɔ sín xwé mitɔn wú nú mi. Ma ka ɖɔ nú mi: mi sɔ́ ɖo nǎ mɔ mì wɛ ɖě, káká yi jɛ gbe e gbe mi ná ɖɔ susu nú mɛ e jǎwe ɖo Aklúnɔ nyíkɔ mɛ é ǎ.”