Luki 10 - MAWUXÓWÉMA

¹ Énɛ́ gúdo ɔ́, Aklúnɔ lɛ́ ɖe ahwanvú kanɖé gban-nukún-we (72), bó sɛ́ yě dó webɔ webɔ, bɔ yě jɛ nukɔn n'i yi to e mɛ é ɖésú ɖó ná yi lɛ́ɛ, kpódó fí e é ɖó ná gbɔn lɛ́ɛ bǐ kpán.

² É ɖɔ nú yě ɖɔ: “Nǔkún ɖo kpɔ́ gégé ɖo gle mɛ, nǔkún-yatɔ́ lɛ́ɛ ká nyí kpɛɖé; mi bó sa vo nú jinukúnnɔ ɔ́, nú é sɛ́ azɔ̌watɔ́ dó jinukúngbo tɔn mɛ.

³ Mi yi! Éɖíe un sɛ́ mi dó, bɔ mi ná cí lɛ̌ngbɔ́ ɖɔhun ɖo hla lɛ́ɛ tɛ́ntin e.

⁴ Mi ma hɛn akwɛ́hɛnnú ó, mi ma hɛn nǔbyɔ́ɖutɔ́glo ó, mi ma ka hɛn afɔkpa ó, mi ma nɔ te ɖo ali jí, bó dó gbe mɛ ó.

⁵ Mi byɔ́ xwé ɖé gbe hǔn, mi ɖɔ hwɛ̌ ɖɔ: ‘Fífá ní nɔ xwé élɔ́ jí.’

^6-7 Ényí fífá gbɛtɔ́ ɖé ɖo fínɛ́ ɔ́, fífá mitɔn ní nɔ jǐ tɔn; mi nɔ xwé énɛ́ gbe, bó ɖu nǔ e è nǎ ná mi é bǐ, bó nu nǔ e è nǎ ná mi é bǐ, ɖó azɔ̌watɔ́ ɔ́, è ɖǒ ná sú azɔ̌ e é wa ɔ́ sín axɔ́ ɛ. Ényí fífá gbɛtɔ́ ɖé ma ka ɖo fínɛ́ ǎ hǔn, fífá mitɔn ní lɛ́ kɔ xwedó mi. Mi ma nɔ gosín xwé ɖé gbe yi jɛ xwé ɖě gbe ó.

⁸ Mi byɔ́ toxo ɖěbǔ mɛ bónú è yí mi, bó na nǔ ɖěbǔ mi hǔn, mi ɖu.

⁹ Mi gbɔ azɔn nú azinzɔnnɔ e ɖo fínɛ́ lɛ́ɛ é, bó ɖɔ nú mɛ lɛ́ɛ ɖɔ: ‘Axɔ́súɖuɖu Mawu tɔn ko sɛ yá mi.’

¹⁰ Amɔ̌, nú mi byɔ́ to ɖé mɛ, bónú è ma yí mi ǎ hǔn, mi tɔ́n jɛ toligbó lɛ́ɛ xo, bó ɖɔ:

¹¹ ‘To mitɔn sín afúntúntún e vun dó afɔ mǐtɔn lɛ́ɛ wú ɖésú ɔ́, mǐ xúxú kɔn nyi ayǐ nú mi, bó ná dó ɖe xlɛ́ mi ɖɔ nǔ e mi wa ɔ́ kún nyɔ́ ó. Mi ní ka tunwun ɖɔ axɔ́súɖuɖu Mawu tɔn ko sɛ yá.’

¹² Ma ɖɔ nú mi: hwenu e Mawu ná ɖɔ hwɛ xá gbɛtɔ́ lɛ́ɛ ɔ́, tó e è nǎ dɔn nú Sodɔ́munu lɛ́ɛ ɔ́ ná bɔwǔ hú ée è nǎ dɔn nú to énɛ́ mɛ nu lɛ́ɛ é.”

To e gbɛ́ nǔ ɖi nú Jezu lɛ́ɛ

¹³ “Heelú mi Kolazíinnu lɛ́ɛ! Heelú mi Bɛtisayidanu lɛ́ɛ! Đó nǔ e Mawu jlɛ ɖo to mitɔn lɛ́ɛ mɛ ɔ́, ényí Tíi abǐ Sidɔ́ɔn wɛ è ko jlɛ́ nǔ énɛ́ lɛ́ɛ ɖe ɔ́, to énɛ́ lɛ́ɛ mɛ nu lɛ́ɛ ɔ́, yě ná ko bɛ́ ati kplá, bó kó lɛ afín, bó ná dó ɖe xlɛ́ ɖɔ émí lɛ́ kɔ sín hwɛ émítɔn lɛ́ɛ gúdo.

¹⁴ Énɛ́ ɔ́ wú wɛ hwenu e Mawu ná ɖɔ hwɛ xá gbɛtɔ́ lɛ́ɛ ɔ́, hwɛ e Mawu ná ɖɔ xá Tíinu lɛ́ɛ kpódó Sidɔ́ɔnnu lɛ́ɛ kpán ɔ́ ná syɛ́n sɔ́ ée é ná ɖɔ xá midɛɛ lɛ́ɛ ɔ́ ǎ.

¹⁵ Hwɛ ɔ́ ka lo Kafaanawúmu! A nǎ sɔ́ hwiɖée yi jǐ káká yi sɔ́ jǐnukúnsin wɛ a ka vɛdó a? Gbeɖé kpɔ́n; káká kútomɛ wɛ è nǎ kpíkpé we nyi dó.”

¹⁶ É lɛ́ ɖɔ nú ahwanvú tɔn lɛ́ɛ ɖɔ: “Mɛ e ɖótó mi ɔ́, nyɛ wɛ é ɖótó; mɛ e ka gbɛ́ mi ɔ́, nyɛ wɛ é gbɛ́. Mɛ e ka gbɛ́ mì ɔ́, é gbɛ́ mɛ e sɛ́ mì dó ɔ́.”

Ahwanvú Jezu tɔn kanɖé gban-nukún-we (72) lɛ́ɛ lɛ́ kɔ wá

¹⁷ Ahwanvú lɛ́ɛ lɛ́ kɔ wá kpódó xomɛhunhun kpán, bó ɖɔ nú Jezu ɖɔ: “Aklúnɔ, mǐ ylɔ́ nyǐkɔ towe lě ɔ́, yɛ nyanya lɛ́ɛ ɖésú nɔ jó ta nú mǐ.”

¹⁸ É ka ɖɔ nú yě ɖɔ: “Un mɔ Satáan, bɔ é jɛ ayǐ sín jǐxwé, jǐkɛwun ɖɔhun.

¹⁹ Un ná acɛ mi, bɔ mi ná ɖi zɔnlin gbɔn dan jí, bó ná ɖi zɔnlin gbɔn hɔnkéklě jí, bó ná ɖu ɖo awǒvi sín hlɔ̌nhlɔ́n lɛ́ɛ bǐ jí, lobɔ nǔ ɖěbǔ ná kpé mi wú ǎ.

²⁰ É ɖo mɔ̌ có, yɛ nyanya lɛ́ɛ e jó ta nú mi é wú wɛ xomɛ ná hun mi ǎ; lo ɔ́, xomɛ ní hun mi ɖó nyǐkɔ mitɔn e è wlǎn ɖó sɛ́xwé é wú.”

Xomɛ hun Jezu

²¹ Hwenɛ́nu tlóló ɔ́, Yɛsinsɛn dó xomɛ hunhun ɖaxó ɖé nú Jezu, bɔ é ɖɔ: “Daá! Aklúnɔ jǐnukúnsin kpódó ayǐkúngban kpó tɔn, un dó kú nú we, ɖó a sɔ́ nǔ énɛ́ lɛ́ɛ hwlá dó nukúnnú-mɔjɛ́nǔmɛtɔ́ lɛ́ɛ, kpódó nǔnywɛ́tɔ́ lɛ́ɛ kpó, lobo ka ɖe yě xlɛ́ vǐ ɖo anɔ̌nu lɛ́ɛ. Mɔ̌ wɛ Daá! Đó lě e a jlǒ gbɔn é nɛ́.

²² “Nǔ bǐ wɛ Tɔ́ ce sɔ́ dó alɔ ce mɛ, bɔ mɛ ɖěbǔ tunwun mɛ e Vǐ ɔ́ nyí ɔ́ zɛ Tɔ́ ɔ́ wú ǎ; mɛ ɖěbǔ ká tunwun mɛ e Tɔ́ ɔ́ nyí ɔ́ zɛ Vǐ ɔ́ kpódó mɛ e Vǐ ɔ́ jló ná ɖe e xlɛ́ lɛ́ɛ kpó wú ǎ.”

²³ Jezu lílɛ́ kpan nukɔn ahwanvú tɔn lɛ́ɛ, bó ɖɔ nú yě ɖokpónɔ ɖɔ: “Nǔ nyɔ́ nú mi mɛ e ɖo nǔ élɔ́ lɛ́ɛ mɔ wɛ din é!

²⁴ Đó má ɖɔ nú mi: gbeyíɖɔ Mawu tɔn gěgé kpódó axɔ́sú gěgé kpán jló ná mɔ nǔ e mɔ wɛ mi ɖe é; yě ká mɔ ǎ; yě jló ná se nǔ e se wɛ mi ɖe é, yě ká se ǎ.”

Jezu dó lǒ dó Samalíinu ɖé wú

²⁵ Sɛ́nkplɔ́nmɛtɔ́ ɖé ka sí te, bó jló ná ɖó mɔ nú Jezu, bó ɖɔ n'i ɖɔ: “Mɛ̌si, étɛ́ un ɖó ná wa, bɔ Mawu ná ná mì gbɛ mavɔ mavɔ?”

²⁶ Jezu ka yí gbe n'i ɖɔ: “Étɛ́ è ka wlán dó sɛ́nwéma ɔ́ mɛ? Nǔ e a xa ɔ́, nɛ̌ wɛ a mɔ nukúnnú jɛ mɛ gbɔn?”

²⁷ Nya ɔ́ yí gbe ɖɔ: “A nǎ yí wǎn nú Aklúnɔ Mawu towe kpódó ayi towe bǐ kpó, kpódó lǐndɔ̌n towe bǐ kpó, kpódó hlɔ̌nhlɔ́n towe bǐ kpó, kpódó linlin towe bǐ kpó, lobo yí wǎn nú nɔzo towe hwi ɖésúnɔ ɖɔhun.”

²⁸ Jezu ka ɖɔ n'i ɖɔ: “A yǐ gbe ɖó ganjí. Blǒ gbɔn mɔ̌, énɛ́ ɔ́, a nǎ nɔ gbɛ.”

²⁹ Lo ɔ́, ée nya ɔ́ jló ná ɖe xlɛ́ ɖɔ émí kan nǔ byɔ́ ɖó ganjí ɔ́, é ɖɔ nú Jezu ɖɔ: “Mɛ̌ ká nyí nɔzo ce?”

³⁰ Jezu yí xó, bó ɖɔ: “Nya ɖé gosín Jeluzalɛ́mu wá xwe Jeliko, bó jɛ ajotɔ́ lɛ́ɛ sín alɔ mɛ, bɔ yě zɔn jǐ tɔn, bó ɖe nǔ e é dó lɛ́ɛ bǐ, bó fin nǔ tɔn lɛ́ɛ bǐ, lobo xo e, bó jó e dó nyi beɖebeɖe bó yi.

³¹ Vɔ̌sánú-xwlémawutɔ́ ɖé ka wá ɖo dǐndín gbɔn fínɛ́ wɛ vlafo, bó mɔ ɛ, lobo gbɔn akpá ɖěvo xwé n'i bó yi.

³² Mɔ̌ ɖokpó ɔ́, Levíi ví ɖé wá jɛ fí e é ɖe é, bó mɔ ɛ, lobo gbɔn zɔ n'i bó yi.

³³ Samalíinu ɖé ka wá xwe to mɛ, bó jɛ fí e é ɖe é, bó mɔ ɛ, bɔ nǔ tɔn blá wǔ n'i.

³⁴ É sɛ yá ɛ, bó ɖó ami kpódó vɛ̌ɛn kpó akpa lɛ́ɛ mɛ n'i, lobo blá; énɛ́ ɔ́ gúdo ɔ́, é sɔ́ ɛ ɖó sɔ́ é ɖésúnɔ tɔn jí, lobo kplá ɛ yi xwé e gbe alitanu lɛ́ɛ nɔ́ yi nɔ é, bó kpé nukún wǔ tɔn.

³⁵ Ayǐhɔ́ngbe tɔn ɔ́, é ɖe gankwɛ́ we tɔ́n, bó sɔ́ nú xwénɔ ɔ́, bó ɖɔ: ‘Kpé nukún nya élɔ́ wú; ényí a zǎn akwɛ́ ɖé dó wǔ tɔn hú mɔ̌ ɔ́, un lɛ́ kɔ ɔ́, un ná sú we.’ ”

³⁶ “Đo mɛ atɔn énɛ́ lɛ́ɛ mɛ ɔ́, mɛ̌ ká ɖe xlɛ́ ɖɔ émí nyí nya e jɛ ajotɔ́ lɛ́ɛ sín alɔ mɛ é sín nɔzo, bɔ ayi towe mɔ?”

³⁷ Sɛ́nkplɔ́nmɛtɔ́ ɔ́ ka yí gbe n'i ɖɔ: “Mɛ e kú nǔbláwǔ n'i é wɛ.” Jezu ka ɖɔ n'i ɖɔ: “Hwi lɔ ɔ́, yi bló gbɔn mɔ̌.”

Jezu ba jǒnɔ Maati kpódó Mali kpán

³⁸ Jezu ɖo yiyi wɛ gbe ɖokpó, é kpódó ahwanvú tɔn lɛ́ɛ kpó. É byɔ́ gletoxo ɖé mɛ; nyɔ̌nu ɖé ɖo fínɛ́, bó yí i dó xwé gbe. È nɔ ylɔ́ nyɔ̌nu ɔ́ ɖɔ Maati.

³⁹ Maati ka ɖó nɔví nyɔ̌nu ɖokpó, bɔ é nɔ nyí Mali. Mali ɔ́ wá jínjɔ́n Aklúnɔ kpá, ɖo afɔ tɔn lɛ́ɛ kɔn, bó ɖo tó ɖó nǔkplɔ́nmɛ tɔn lɛ́ɛ wɛ.

⁴⁰ Maati ka ɖo azɔ̌ wa wɛ nukún myámyá, bó ná yí Jezu sín jǒnɔ. É wá mɔ Jezu bó ɖɔ n'i ɖɔ: “Aklúnɔ, lě e nɔví ce jó azɔ̌ bǐ dó nyi kɔ jí nú nyɛ ɖokpónɔ ɔ́ ɖɔ nǔɖé nú we ǎ cé? Đɔ n'i nú é ní wá dó alɔ mì.”

⁴¹ Aklúnɔ ka yí gbe n'i ɖɔ: “Maati, Maati, ado nɔ hu we dín, bɔ a nɔ fɔ nǔ gěgé dó dó tagba nú hwiɖée.

⁴² Nǔ ɖokpó géé jɛ́n ká ɖo tají. Mali wɛ ka sɔ́ akpá ɖagbe ɔ́, bɔ mɛɖé ná yí sín así tɔn ǎ.”