Levíi ví 8 - MAWUXÓWÉMA

¹ Mawu Mavɔmavɔ ɖɔ nú Mɔyízi ɖɔ:

² “Kplá Aalɔ́ɔn kpó vǐ tɔn súnnu lɛ́ɛ kpó, bó hɛn awu lɛ́ɛ, ami e è nɔ ɖó ta nú mɛ é, nyibúsú e è nǎ dǒ sá hwɛsɔ́kɛmɛvɔ́ ná é, agbo we lɛ́ɛ, kpódó xasun e mɛ è bɛ̌ wɔ̌xúxú e mɛ è ma dó tɔ́n ǎ é kpó dó é.

³ Kplé togun Izlayɛ́li tɔn ɔ́ bǐ ɖó goxɔ e mɛ un nɔ kpé mi ɖe é nukɔn.”

⁴ Mɔyízi bló nǔ e Mawu Mavɔmavɔ zɔ́n ɛ é, bɔ togun ɔ́ bǐ kplé ɖó goxɔ ɔ́ nukɔn.

⁵ Ée togun ɔ́ kplé ɔ́, Mɔyízi ɖɔ nú yě ɖɔ: “Nǔ e Mawu Mavɔmavɔ zɔ́n mì ɔ́ wa gbé un ja.”

⁶ Ée Mɔyízi ɖɔ mɔ̌ ɔ́, é ylɔ́ Aalɔ́ɔn kpó vǐ tɔn súnnu lɛ́ɛ kpó, bɔ yě sɛkpɔ́ ɛ, bɔ é slá wǔ nú yě.

⁷ É zé awu ɖaxó ɔ́ dó nú Aalɔ́ɔn, bó sin gǒjíblánú n'i; é dó dowu gaga ɔ́ n'i, bó sɔ́ efódu dó n'i d'é jí, lobo sin kan tɔn lɛ́ɛ dó nɛgbé.

⁸ É sɔ́ akɔ́ntakpo ɔ́ dó kɔ n'i, bó sɔ́ Wulímu kpó Tumímu kpó dó akɔ́ntakpo ɔ́ mɛ.

⁹ É sɔ́ tablá ɖó ta n'i, bó sɔ́ sikágan gbajagbaja e ɖe xlɛ́ ɖɔ è ɖe Aalɔ́ɔn ɖó vo nú Mawu Mavɔmavɔ ɔ́ ɖó tablá ɔ́ wú, ɖo nukɔn lě e Mawu Mavɔmavɔ ɖɔ gbɔn é.

¹⁰ Énɛ́ ɔ́ gúdo ɔ́, Mɔyízi zé ami mímɛ́ ɔ́ bó dó ɖe goxɔ ɔ́ kpódó nǔ e ɖ'é mɛ lɛ́ɛ bǐ kpó ɖó vo.

¹¹ É wá mi ami ɔ́ dó vɔ̌sákpe ɔ́ wú azɔn tɛ́nwe, bó sá ɖě dó vɔ̌sákpe ɔ́ wú, bó sá dó nǔ e è nɔ zán ɖ'é jí lɛ́ɛ wú, bó sá dó basya ɔ́ kpódó nǔ e jí è sɔ́ basya ɔ́ ɖó ɔ́ kpó wú, bó dó ɖe yě ɖó vo.

¹² É kɔn ami mímɛ́ ɔ́ dó Aalɔ́ɔn ta, bó dó ɖe e ɖó vo.

¹³ Mɔyízi ylɔ́ Aalɔ́ɔn ví súnnu lɛ́ɛ, bɔ yě sɛkpɔ́ ɛ; é dó awu gaga ɔ́ nú yě, bó sin gǒjíblánú nú yě, bó xwe vɔ̌sánú-xwlémawutɔ́ gbákún nú yě, lě e Mawu Mavɔmavɔ ko ɖɔ gbɔn é.

¹⁴ Énɛ́ ɔ́ gúdo ɔ́, Mɔyízi dɔn nyibúsú e è nǎ dó sá hwɛsɔ́kɛmɛvɔ́ ná ɔ́ wá, bɔ Aalɔ́ɔn kpó vǐ tɔn súnnu lɛ́ɛ kpó fɔ alɔ ɖó nyibúsú ɔ́ ta.

¹⁵ Mɔyízi gbo gbe nyibúsú ɔ́, bó yí hun tɔn bó sɔ́ alɔví tɔn d'é mɛ, bó sá dó vɔ̌sákpe ɔ́ sín zo lɛ́ɛ wú lɛ́ lɛ̌ dó, bó dó slá wǔ nú vɔ̌sákpe ɔ́. É kɔn hun e kpo ɔ́ nyi vɔ̌sákpe ɔ́ sín dodó wú; lě e é slá wǔ nú vɔ̌sákpe ɔ́, bó ɖe ɖó vo bɔ è nǎ nɔ́ sá vɔ̌ e nɔ súnsún hwɛ sín kɔ nú mɛ ɔ́ ɖ'é jí gbɔn ɔ́ nɛ́.

¹⁶ É ɖe jǒ e ɖo xomɛnú lɛ́ɛ wú ɔ́ bǐ, kpó alǐnnuvínu ɔ́ kpó, kpó ayi we lɛ́ɛ kpó, kpó jǒ e ɖo ayi lɛ́ɛ wú é kpó, bó dó zo ɖo vɔ̌sákpe ɔ́ jí.

¹⁷ Lo ɔ́, é bɛ́ nyibúsú ɔ́ sín lan, anyǔ tɔn kpó mǐ tɔn kpó, bó ɖe sín fí e yě ɖó gɔnu ɖó ɔ́, bó dó zo lě e Mawu Mavɔmavɔ ɖɔ gbɔn nú Mɔyízi é.

¹⁸ Énɛ́ ɔ́ gúdo ɔ́, Mɔyízi dɔn agbo e è nǎ dó sá vɔ̌ e è nɔ dó zo ɔ́ wá, bɔ Aalɔ́ɔn kpó vǐ tɔn súnnu lɛ́ɛ kpó fɔ alɔ ɖó agbo ɔ́ ta.

¹⁹ É gbo gbe agbo ɔ́, bó mi hun tɔn gbɔn vɔ̌sákpe ɔ́ wú lɛ́ lɛ̌ dó.

²⁰ Énɛ́ gúdo ɔ́, é já agbo ɔ́, bó ná dó ta tɔn kpó lan e é já ɔ́ kpó, kpó jǒ ɔ́ kpó zo.

²¹ Xomɛnú lɛ́ɛ kpó afɔ lɛ́ɛ kpó ɔ́, é klɔ́ yě, bó dó yě kpó ɖě lɛ́ɛ bǐ kpó zo ɖo vɔ̌sákpe ɔ́ jí: vɔ̌ e è nɔ dó zo ɔ́ wɛ; vɔ̌ e è nɔ fyɔ́ ɔ́ bǐ nú Mawu Mavɔmavɔ, bɔ wǎn tɔn nɔ́ yi gɔ̌n tɔn, bó nɔ́ nyɔ́ se n'i ɔ́ wɛ. Énɛ́ ɔ́, é bló lě e Mawu Mavɔmavɔ ko ɖɔ gbɔn n'i é.

²² Mɔyízi dɔn agbo wegɔ́ ɔ́ wá, agbo e è nǎ dó sá vɔ̌ ná, bɔ é ná nyí wuntun e ɖe xlɛ́ ɖɔ Aalɔ́ɔn kpó vǐ tɔn súnnu lɛ́ɛ kpó bɛ́ azɔ̌ é. Énɛ́ ɔ́, Aalɔ́ɔn kpó vǐ tɔn súnnu lɛ́ɛ kpó fɔ alɔ ɖó agbo ɔ́ ta.

²³ Bɔ Mɔyízi gbo gbe agbo ɔ́, bó yí hun tɔn ɖě bó sá dó Aalɔ́ɔn sín tó ɖisíxwé tɔn ɔ́ sín nuvínu, bó sá dó alɔ tɔn ɖisí ɔ́ sín alɔsú wú, bó sá dó afɔ tɔn ɖisí ɔ́ sín afɔsú wú.

²⁴ Énɛ́ ɔ́ gúdo ɔ́, é ylɔ́ Aalɔ́ɔn ví súnnu lɛ́ɛ, bɔ yě sɛkpɔ́ ɛ, bɔ é sá hun ɔ́ ɖě dó tó yětɔn ɖisíxwé tɔn ɔ́ sín nuvínu, bó sá dó alɔ yětɔn ɖisí ɔ́ sín alɔsú wú, bó sá dó afɔ yětɔn ɖisí ɔ́ sín afɔsú wú, lobo mi hun e kpo ɔ́ gbɔn vɔ̌sákpe ɔ́ wú lɛ́ dó.

²⁵ É zé jǒ ɔ́, sí ɔ́, kpó jǒ e ɖ'é wú ɔ́ kpó, jǒ e ɖo xomɛnú lɛ́ɛ wú ɔ́ bǐ, alǐnnuvínu ɔ́, ayi we lɛ́ɛ, kpó jǒ e ɖo ayi lɛ́ɛ wú ɔ́ kpó, kpódó asá ɖisíxwé tɔn ɔ́ kpó.

²⁶ É zé atá e mɛ tɔ́n má ɖe ǎ é ɖokpó, kpó amitá ɖokpó kpó, kpódó acɔnmɔ ɖokpó kpó ɖo xasun e mɛ wɔ̌xúxú e mɛ è ma dó tɔ́n ǎ é ɖe, bɔ è sɔ́ ɖó Mawu Mavɔmavɔ nukɔn ɔ́ mɛ. É bɛ́ nǔ énɛ́ lɛ́ɛ ɖó jǒ ɔ́ kpó asá ɔ́ kpó jí.

²⁷ Mɔyízi bɛ́ nǔ énɛ́ lɛ́ɛ bǐ dó alɔ mɛ nú Aalɔ́ɔn kpó vǐ tɔn súnnu lɛ́ɛ kpó, bó ɖɔ nú yě ɖɔ yě ní bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, lobo xwlé Mawu Mavɔmavɔ.

²⁸ Énɛ́ ɔ́ gúdo ɔ́, Mɔyízi fɔ nǔ lɛ́ɛ sín alɔ yětɔn mɛ, bó dó zo ɖo vɔ̌sákpe ɔ́ jí, ɖo vɔ̌ zǎnzǎn tɔn e ɖo jiji wɛ ɔ́ jí. Vɔ̌ e nɔ́ ɖe xlɛ́ ɖɔ vɔ̌sánú-xwlémawutɔ́ lɛ́ɛ bɛ́ azɔ̌ ɔ́, lě e è sá gbɔn ɔ́ nɛ́. Vɔ̌ e è nɔ dó zo ɔ́ wɛ; vɔ̌ e è nɔ fyɔ́ bǐ nú Mawu Mavɔmavɔ, bɔ wǎn tɔn nɔ́ yi gɔ̌n tɔn, bó nɔ́ nyɔ́ se n'i ɔ́ wɛ.

²⁹ Mɔyízi zé agbo e è dǒ sá vɔ̌ ɔ́ ná ɔ́ sín akɔ́n, bó bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, lobo xwlé Mawu Mavɔmavɔ: éé nyí kanta Mɔyízi tɔn ɔ́ nɛ́, lě e Mawu Mavɔmavɔ ko ɖɔ n'i gbɔn é.

³⁰ Mɔyízi wún ami mímɛ́ ɔ́ kpódó hun e ɖo vɔ̌sákpe ɔ́ jí é kpɛɖé kpó, bó mi dó Aalɔ́ɔn kpó awu tɔn lɛ́ɛ kpó wú, bó mi dó vǐ tɔn súnnu lɛ́ɛ kpó awu yětɔn lɛ́ɛ kpó wú, bó dó ɖe yě kpó awu yětɔn lɛ́ɛ kpó ɖó vo nú Mawu Mavɔmavɔ.

³¹ É ɖɔ nú Aalɔ́ɔn kpó vǐ tɔn súnnu lɛ́ɛ kpó ɖɔ: “Mi ɖa kanlin ɔ́ sín lan ɖo goxɔ ɔ́ nukɔn; fínɛ́ wɛ mi ná ɖu lan tɔn ɖe kpó wɔ̌xúxú e è dǒ sá vɔ̌ ɔ́ ná lɛ́ɛ kpó, lě e Mawu Mavɔmavɔ ko ɖɔ gbɔn é.

³² Mi ná dó lan e ná kpo ɔ́ kpódó wɔ̌xúxú e ná kpo ɔ́ kpó zo.

³³ Mi ná nɔ goxɔ ɔ́ nukɔn xɔ azǎn tɛ́nwe. Mi ná nɔ fínɛ́ káká bɔ azǎn nabí e è nǎ dó bló nǔwiwa e è nǎ dó sɔ́ azɔ̌ dó así nú mi ɔ́ ná sɔgbe é; ɖó azǎn tɛ́nwe wɛ è nǎ sɔ́ ɖó te dó sɔ́ azɔ̌ dó así nú mi.

³⁴ Nǔ e è blǒ égbé din ɔ́, Mawu Mavɔmavɔ wɛ ná gbe ɖɔ è nǐ bló, bónú é ná súnsún hwɛ e mi hu lɛ́ɛ.

³⁵ Hǔn mi ná nɔ goxɔ ɔ́ nukɔn xɔ azǎn tɛ́nwe; mi ná nɔ fínɛ́ zǎn kpó kéze kpó, bó ná bló nǔ e Mawu Mavɔmavɔ ɖɔ è nǐ bló lɛ́ɛ, bó má wá kú ó; ɖó nǔ e Mawu Mavɔmavɔ ɖɔ nú mì ɔ́ nɛ́.”

³⁶ Aalɔ́ɔn kpó vǐ tɔn súnnu lɛ́ɛ kpó bló nǔ e Mawu Mavɔmavɔ ɖɔ gbɔn Mɔyízi jí lɛ́ɛ bǐ.