Levíi ví 7 - MAWUXÓWÉMA

Sɛ́n e ɖɔ xó dó hwɛxɔ́súsú vɔ́ wú é

¹ Mawu Mavɔmavɔ ɖɔ: “Sɛ́n e ɖɔ xó dó hwɛxɔ́súsú vɔ́ wú ɔ́ ɖíe: nǔ mímɛ́ titewungbe ɖokpó wɛ é nyí.

² Fí e è nɔ gbo gbe kanlin e è nɔ dó sá vɔ̌ e è nɔ dó zo ɔ́ ɖe ɔ́ wɛ è nǎ gbo gbe kanlin e è nɔ dó sá hwɛxɔ́súsú vɔ́ ná ɔ́ ɖe. È nǎ mi hun tɔn gbɔn vɔ̌sákpe ɔ́ wú lɛ́ lɛ̌ dó.

³ Nǔ e è nǎ ɖe ɖo kanlin ɔ́ wú bó xwlé Mawu Mavɔmavɔ ɔ́ lɛ́ɛ ɖíe: sí ɔ́ kpó jǒ e ɖ'é wú ɔ́ kpó; jǒ e ɖo xomɛnú lɛ́ɛ wú é bǐ.

⁴ Ayi we lɛ́ɛ kpó jǒ e ɖo yě wú lɛ́ɛ kpó, kpó jǒ e gbɔn ajaja mɛ é bǐ kpó, kpó alǐnnuvínu ɔ́ kpó, bɔ è nǎ ɖe kpó ayi we lɛ́ɛ kpó ɖó kpɔ́.

⁵ Énɛ́ ɔ́, vɔ̌sánú-xwlémawutɔ́ ɔ́ ná fyɔ́ nǔ énɛ́ lɛ́ɛ bǐ ɖo vɔ̌sákpe ɔ́ jí, bɔ é ná nyí vɔ̌ e è nɔ dó zo nú Mawu Mavɔmavɔ é. Hwɛxɔ́súsú vɔ́ wɛ.

⁶ Mɛ e nyí súnnu ɖo hɛ̌nnu e nɔ wa vɔ̌sánú-xwlémawutɔ́ sín azɔ̌ lɛ́ɛ mɛ lɛ́ɛ kɛ́ɖɛ́ wɛ ná ɖu kanlin ɔ́ sín lan. Tɛn mímɛ́ ɖé mɛ wɛ yě ná ɖu ɖe; nǔ mímɛ́ titewungbe ɖokpó wɛ é nyí.

⁷ Lě e è nǎ sá hwɛxɔ́súsú vɔ́ ɔ́ gbɔn ɔ́ ɖokpó ɔ́ jɛ́n è nǎ sá hwɛsɔ́kɛmɛvɔ́ ɔ́ lɔ gbɔn: sɛ́n ɖokpó ɔ́ wɛ ɖɔ xó dó vɔ̌sísá we énɛ́ lɛ́ɛ wú; kanlin e è dǒ sá vɔ̌ ɔ́ ná ɔ́, ná nyí vɔ̌sánú-xwlémawutɔ́ e nɔ hwɛsɔ́kɛmɛvɔ́ ɔ́ nu, bó sá ɔ́ tɔn.”

Nǔ e nyí vɔ̌sánú-xwlémawutɔ́ lɛ́ɛ tɔn é

⁸ Mawu Mavɔmavɔ ɖɔ: “Ényí mɛɖé hɛn kanlin e è nǎ dó sá vɔ̌ e è nɔ dó zo ɔ́ wá nú Mawu Mavɔmavɔ ɔ́, vɔ̌sánú-xwlémawutɔ́ e ná xwlé vɔ̌ ɔ́ Mawu Mavɔmavɔ ɔ́ tɔn wɛ kanlin ɔ́ sín anyǔ ná nyí.

⁹ Nǔníná jinukún tɔn ɖěbǔ e è nǎ ɖa ɖo myɔkpó mɛ, ɖo ganzɛ́n mɛ, abǐ ganzɛ́n wɛnjɛ mɛ ɔ́, ná nyí vɔ̌sánú-xwlémawutɔ́ e xwlé vɔ̌ ɔ́ Mawu Mavɔmavɔ ɔ́ tɔn.

¹⁰ Nǔníná jinukún tɔn ɖěbǔ e è nǎ zé ami dó nya, abǐ éé è ma zé ami dó nya ǎ ɔ́, ná nyí Aalɔ́ɔn sín vǐ súnnu lɛ́ɛ bǐ tɔn, bɔ yě ná yí ɖó zɛ̌nzɛ̌n.”

Kɔnɖókpɔ́ vɔ́

¹¹ Mawu Mavɔmavɔ ɖɔ: “Kɔnɖókpɔ́ vɔ́ e è nǎ nɔ́ xwlé Mawu Mavɔmavɔ ɔ́, sɛ́n e ɖɔ xó d'é wú ɔ́ ɖíe:

¹² Nú mɛ ɖé ná sá kɔnɖókpɔ́ vɔ́, bó ná dó kpa susu nú Mawu Mavɔmavɔ ɔ́, mɛ ɔ́ ná hɛn wɔ̌xúxú e mɛ è ma dó tɔ́n ǎ, bɔ è zě ami dó nya é, acɔnmɔ e mɛ è ma dó tɔ́n ǎ, bɔ è sá ami dó é, kpódó wɔ̌xúxú e è sɔ́ ami dó nya linfín ná ganjí bó ɖa ɔ́ kpó gɔ́ nú kanlin e ná dó sá kɔnɖókpɔ́ vɔ́ ɔ́ ná wɛ è ɖe é.

¹³ É ná ná wɔ̌xúxú e mɛ tɔ́n ɖe ɔ́ gɔ́ nú nǔɖuɖu e é hɛn wá, bɔ tɔ́n ma ɖ'é mɛ ǎ é; é ná bló mɔ̌ dó kpa susu nú Mawu Mavɔmavɔ.

¹⁴ Nǔ énɛ́ lɛ́ɛ e é ná ɔ́, è nǎ ɖe ɖokpó ɖokpó, bó ná xwlé Mawu Mavɔmavɔ, bɔ é ná nyí vɔ̌sánú-xwlémawutɔ́ e mi kanlin e è dǒ sá kɔnɖókpɔ́ vɔ́ sín hun gbɔn vɔ̌sákpe ɔ́ wú é tɔn.

¹⁵ Kanlin e è nǎ dó sá kɔnɖókpɔ́ vɔ́ ná dó kpa susu nú Mawu Mavɔmavɔ gbɔn mɔ̌ ɔ́, è nǎ ɖu lan tɔn bǐ gbe e gbe è sá vɔ̌ ɔ́ é; ayǐ ná hɔ́n dó ɖěbǔ ǎ.

¹⁶ “Nú é ka nyí ɖɔ mɛɖé wɛ jló bó sá kɔnɖókpɔ́ vɔ́ ɔ́, abǐ é sá bó ná dó ɖe akpá e é dó ɔ́ ná ɔ́, è nǎ ɖu kanlin e è dǒ sá vɔ̌ ɔ́ ná ɔ́ sín lan gbe e gbe é sá vɔ̌ ɔ́ é. Ényí è ɖu bɔ é kpo ɔ́, è nǎ ɖu éé kpo ɔ́ ayǐhɔ́ngbe.

¹⁷ Ényí è ɖu kanlin ɔ́ sín lan e kpo ɔ́ ayǐhɔ́ngbe, bónú é lɛ́ kpo jɛ azǎn atɔngɔ́ ɔ́ gbe ɔ́, è nǎ dó zo.

¹⁸ Ényí kanlin e è dǒ sá vɔ̌ ná ɔ́ kpo jɛ azǎn tɔn atɔngɔ́ ɔ́ gbe, bɔ mɛɖé ɖu ɔ́, Mawu Mavɔmavɔ ná yí vɔ̌ tɔn ǎ; vɔ̌ énɛ́ e è sá dó ta tɔn mɛ ɔ́ húzú suɖunú. Mɛ ɖěbǔ ɖu azǎn tɔn atɔngbe tɔn ɔ́, hwɛ tɔn ná nɔ kɔ n'i.

¹⁹ È ɖǒ ná ɖu lan e wú nǔblíblí ɖé ná jɛ é ǎ; zo wɛ è nǎ dó. “Mǐmɛ́ jí wɛ è nǎ ɖe, bó ná sixú ɖu kanlin e è nǎ dó sá vɔ̌ ná ɔ́ sín lan.

²⁰ Amɔ̌, mɛ e ma ná ɖo mǐmɛ́ jí ǎ, bó ná ɖu kanlin e è dǒ sá kɔnɖókpɔ́ vɔ́ ná nú Mawu Mavɔmavɔ ɔ́ sín lan ɔ́, è nǎ ɖe mɛ ɔ́ sín togun Izlayɛ́li tɔn mɛ.

²¹ Mɔ̌ ɖokpó ɔ́, mɛ e ná ɖó alɔ nǔblíblí ɖé wú: gbɛtɔ́ wɛ a, kanlin wɛ a, abǐ nǔ ɖěbǔ e nyí nǔblíblí é wú, bó ná ɖu kanlin e è dǒ sá kɔnɖókpɔ́ vɔ́ ná nú Mawu Mavɔmavɔ ɔ́ sín lan ɔ́, è nǎ ɖe mɛ énɛ́ sín togun Izlayɛ́li tɔn mɛ.”

Nǔ e sɛ́n ɔ́ gbɛ́ ɖɔ togun ɔ́ kún ná ɖu ó lɛ́ɛ

²² Mawu Mavɔmavɔ ɖɔ nú Mɔyízi ɖɔ

²³ é ní ɖɔ nú Izlayɛ́li ví lɛ́ɛ ɖɔ: “Mi ma ɖu nyibú sín jǒ ó. Mi ma ɖu gbɔ̌ abǐ lɛ̌ngbɔ́ sín jǒ ó.

²⁴ Mi ma ɖu kanlin e kú é, abǐ kanlin e gběkanlin wlí ɖu é sín jǒ ó; mi sixú zé dó bló nǔ alɔkpa bǐ ná; amɔ̌, mi ma ɖu ó.

²⁵ Hǔn nú mɛɖé ɖu kanlin e è xwlé Mawu Mavɔmavɔ dó sá vɔ̌ e è nɔ dó zo ɔ́ sín jǒ ɔ́, è nǎ ɖe mɛ énɛ́ sín togun Izlayɛ́li tɔn mɛ.

²⁶ Mɔ̌ ɖokpó ɔ́, mi ɖó ná ɖu xɛ abǐ kanlin sín hun ɖo fí ɖěbǔ e mi ná ɖe é ǎ.

²⁷ Mɛ e ná ɖu kanlin alɔkpa ɖěbǔ sín hun ɔ́, è nǎ ɖe mɛ énɛ́ sín togun Izlayɛ́li tɔn mɛ.”

Vɔ̌ ɔ́ sín akpáxwé e ná nyí vɔ̌sánú-xwlémawutɔ́ ɔ́ tɔn é

²⁸ Mawu Mavɔmavɔ ɖɔ nú Mɔyízi ɖɔ,

²⁹ ní ɖɔ nú Izlayɛ́li ví lɛ́ɛ ɖɔ: “Nú mɛɖé xwlé kɔnɖókpɔ́ vɔ́ Mawu Mavɔmavɔ hǔn, mɛ ɔ́ ní hɛn akpáxwé e nyí Mawu Mavɔmavɔ tɔn ɔ́ wá.

³⁰ Mɛ ɔ́ ɖésú wɛ ná hɛn nǔ e è ɖe ɖó vo nú Mawu Mavɔmavɔ, bó ná dó zo ɔ́ wá; hǔn é ná hɛn kanlin ɔ́ sín jǒ kpó akɔ́n tɔn kpó wá, lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ wɛ è nǎ bló ɖo Mawu Mavɔmavɔ nukɔn.

³¹ Vɔ̌sánú-xwlémawutɔ́ ɔ́ ná dó jǒ ɔ́ zo ɖo vɔ̌sákpe ɔ́ jí, bɔ akɔ́n ɔ́ ná nyí Aalɔ́ɔn kpó vǐ tɔn súnnu lɛ́ɛ kpó tɔn.

³² Ényí mi sá kɔnɖókpɔ́ vɔ́ mɔ̌ ɔ́, mi ná ná kanlin e è dǒ sá vɔ̌ ɔ́ ná ɔ́ sín asá ɖisí ɔ́ vɔ̌sánú-xwlémawutɔ́ ɔ́.

³³ Vɔ̌sánú-xwlémawutɔ́ e ná xwlé kanlin e è dǒ sá kɔnɖókpɔ́ vɔ́ ná ɔ́ sín hun kpó jǒ kpó Mawu Mavɔmavɔ ɔ́ sín kanta wɛ asá énɛ́ nyí.

³⁴ Đó kɔnɖókpɔ́ vɔ́ e Izlayɛ́li ví lɛ́ɛ ná nɔ́ xwlé mì lɛ́ɛ ɔ́, un ná nɔ́ ɖe kanlin e yě dǒ sá vɔ̌ ná ɔ́ sín akɔ́n kpó asá ɔ́ kpó, bó ná vɔ̌sánú-xwlémawutɔ́ Aalɔ́ɔn kpódó vǐ tɔn súnnu lɛ́ɛ kpó, bɔ é nyí sɛ́n tɛgbɛ tɔn ɖé bɔ Izlayɛ́li ví lɛ́ɛ ná nɔ́ nyi.”

³⁵ Ée ná nyí Aalɔ́ɔn kpó vǐ tɔn súnnu lɛ́ɛ kpó sín kanta ɖo vɔ̌sánú e è nǎ dó zo ɖo Mawu Mavɔmavɔ nukɔn lɛ́ɛ mɛ é nɛ́, bɛ́ sín gbe e gbe è nǎ kɔn ami dó ta nú yě bɔ yě ná bɛ́ vɔ̌sánú-xwlémawutɔ́ sín azɔ̌ é.

³⁶ Nǔ e Mawu Mavɔmavɔ ná gbe Izlayɛ́li ví lɛ́ɛ ɖɔ è ní ná yě bɛ́ sín gbe e gbe è kɔn ami dó ta nú yě ɔ́ nɛ́. Sɛ́n ɖé wɛ é nyí, bó ná nɔ ayǐ káká sɔ́yi nú vǐ yětɔn lɛ́ɛ.

³⁷ Sɛ́n e ɖɔ xó dó vɔ̌ e è nɔ dó zo ɔ́ wú, bó ɖɔ xó dó nǔníná jinukún tɔn wú, bó ɖɔ dó hwɛsɔ́kɛmɛvɔ́ wú, bó ɖɔ dó hwɛxɔ́súsú vɔ́ wú, bó ɖɔ dó ami ɖó ta nú mɛ wú, lobo ɖɔ dó kɔnɖókpɔ́ vɔ́ wú ɔ́ nɛ́.

³⁸ Mawu Mavɔmavɔ wɛ ná sɛ́n énɛ́ ɔ́ Mɔyízi ɖo Sinayíi só jí, ɖo gbětótló mɛ gbe e gbe é ná gbe Izlayɛ́li ví lɛ́ɛ ɖɔ yě ní xwlé vɔ̌sánú yětɔn lɛ́ɛ émí é.