Levíi ví 5 - MAWUXÓWÉMA

¹ Mawu Mavɔmavɔ ɖɔ: “Ényí nǔɖé jɛ bɔ mɛɖé ɖo tɛn tɔn mɛ, abǐ é se, bónú hwɛɖɔtɔ́ lɛ́ɛ ylɔ́ mɛ ɔ́ ɖɔ é ní wá ɖɔ lě e nǔ ɔ́ jɛ gbɔn ɔ́, bónú é má ɖɔ nǔ e é mɔ ɔ́, abǐ nǔ e é se ɔ́ ǎ ɔ́, hwɛ wɛ é hu, bɔ é ji nǔɖé ɔ́, é ná kpan.

² “Kpɔ́ndéwú ɖěvo: Ényí mɛɖé ɖó alɔ nǔ blíblí ɖěbǔ wú: kanlin blíblí ɖé sín kúkú wú, é sixú nyí gběkanlin, abǐ xwé gbe kanlin, abǐ nǔvínúví ɖěbǔ wú ɔ́, é húzú mɛ blíblí; é ná bó má tunwun ǎ bó ɖó alɔ wú ɔ́, mɛ blíblí wɛ é húzú, bɔ é ji nǔɖé ɔ́, é ná kpan.

³ “Kpɔ́ndéwú ɖěvo: Ényí mɛɖé ɖó alɔ mɛ e ɖu su alɔkpa ɖěbǔ ɔ́ wú ɔ́, mɛ ɔ́ má tunwun tɛn tɔn mɛ ǎ, bó ka wá tunwun hweɖénu ɔ́, é ji nǔɖé ɔ́, é ná kpan.

⁴ “Kpɔ́ndéwú ɖěvo: Ényí mɛɖé ɖo alisá ɖó wɛ, bó xwlé nǔ ɖɔ émí ná wa nǔ ɖagbe abǐ nǔ nyanya ɔ́, nú é ná bó má tunwun cóbó ɖɔ ǎ, bó ká wá tunwun hweɖénu ɔ́, é ji nǔɖé ɔ́, é ná kpan.

⁵ “Hǔn mɛ e ná jɛ sɛ́n mɛ ɖo nǔ énɛ́ lɛ́ɛ ɖě sín alixo ɔ́, mɛ ɔ́ ɖó ná ɖɔ hwɛ e é hu ɔ́.

⁶ Énɛ́ ɔ́ gúdo ɔ́, é ná zé lɛ̌ngbɔ́ asi ɖokpó, abǐ gbɔ̌ asi ɖokpó dó sá hwɛsɔ́kɛmɛvɔ́ ná nú Mawu Mavɔmavɔ, bɔ é ná nyí hwɛ e é hu ɔ́ sín vɔ̌. Énɛ́ ɔ́, vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú mì ɔ́, bó sá vɔ̌ e nɔ súnsún hwɛ sín kɔ nú mɛ ɔ́ n'i.”

Vɔ̌sísá wamamɔnɔ lɛ́ɛ tɔn

⁷ Mawu Mavɔmavɔ ɖɔ: “Ényí mɛɖé má ɖó akwɛ́ e é ná dó xɔ gbɔ̌ ná ɔ́ ǎ ɔ́, é ná zé xwelé we abǐ ahwannɛ́ wínnyáwínnyá we dó sá vɔ̌ ná nú Mawu Mavɔmavɔ, bɔ é ná nyí hwɛ e é hu ɔ́ sín vɔ̌. É ná zé ɖokpó dó sá hwɛsɔ́kɛmɛvɔ́, bó ná zé wegɔ́ ɔ́ dó sá vɔ̌ e è nɔ dó zo ɔ́.

⁸ É ná bɛ́ xɛ we lɛ́ɛ wá nú vɔ̌sánú-xwlémawutɔ́ ɔ́, bɔ é ná to xwlé éé ná sá hwɛsɔ́kɛmɛvɔ́ ná wɛ è ɖe ɔ́ Mawu Mavɔmavɔ hwɛ̌. Vɔ̌sánú-xwlémawutɔ́ ɔ́ ná zé fɛn dó hun ahɔn xɛ ɔ́. É ká ná ɖe ta ɔ́ sín kɔ ɔ́ nu ǎ.

⁹ É ná mi xɛ ɔ́ sín hun ɖě ɖó vɔ̌sákpe ɔ́ wú ɖo akpá ɖokpó, bó ná fyɔ́n xɛ ɔ́ bɔ hun e kpo ɔ́ ná kun dó vɔ̌sákpe ɔ́ sín dodó wú: hwɛsɔ́kɛmɛvɔ́ wɛ.

¹⁰ É ná zé xɛ wegɔ́ ɔ́ dó sá vɔ̌ e è nɔ dó zo ɔ́ ná lě e é jɛ xá gbɔn é. Lě e vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú mì ɔ́, bó sá hwɛsɔ́kɛmɛvɔ́ ɔ́ gbɔn nú nya énɛ́ ɔ́, bɔ Mawu Mavɔmavɔ ná súnsún hwɛ e é hu ɔ́ nɛ́.

¹¹ “Ényí mɛ ɔ́ má ká lɛ́ ɖó akwɛ́ e é ná dó xɔ xwelé we lɛ́ɛ, abǐ ahwannɛ́ wínnyáwínnyá we lɛ́ɛ ná ǎ ɔ́, é ná hɛn linfín kilóo ɛnɛ wá ɖó hwɛ e é hu ɔ́ wú, bɔ é ná nyí nǔníná hwɛsɔ́kɛmɛ tɔn. É ná zé ami d'é jí ǎ, é ká ná zé zǎlínkpɔ́n d'é jí ǎ, ɖó nǔníná hwɛsɔ́kɛmɛ tɔn wɛ.

¹² É ná zé linfín ɔ́ wá nú vɔ̌sánú-xwlémawutɔ́ ɔ́, bɔ é ná wún alɔgogo ɖokpó, bɔ é ná nyí flǐnnú ɖé nú Mawu Mavɔmavɔ, bɔ vɔ̌sánú-xwlémawutɔ́ ɔ́ ná dó zo ɖo vɔ̌sákpe ɔ́ jí ɖo vɔ̌ ɖě lɛ́ɛ e dó zo wɛ è ɖe lɛ́ɛ jí: hwɛ e é hu ɔ́ sín vɔ̌ wɛ.

¹³ Nú vɔ̌sánú-xwlémawutɔ́ ɔ́ bló lě e è nɔ bló gbɔn, bó nɔ́ xwlé vɔ̌sánú mì ɔ́, bó sá vɔ̌ e nɔ́ súnsún hwɛ sín kɔ nú mɛ ɔ́ gbɔn mɔ̌ ɔ́, Mawu Mavɔmavɔ ná sɔ́ hwɛ e é hu lɛ́ɛ kɛ ɛ. “Ée kpo ɔ́ ná nyí vɔ̌sánú-xwlémawutɔ́ ɔ́ tɔn, nǔníná jinukún tɔn lɛ́ɛ ɖɔhun.”

Hwɛxɔ́súsú vɔ́

¹⁴ Mawu Mavɔmavɔ ɖɔ nú Mɔyízi ɖɔ:

¹⁵ “Ényí mɛɖé má tunwun ǎ, bó hu hwɛ ɖaxó ɖé, ɖó é ɖe nǔ ɖo nǔ e è sɔ́ ɖó vo nú Mawu Mavɔmavɔ lɛ́ɛ ɔ́ mɛ ɔ́, nǔ e mɛ ɔ́ ɖó ná wa ɔ́ ɖíe: é ná kpɔ́n kanlin tɔn lɛ́ɛ mɛ, bó ná zé agbo e ma ɖó blɔ̌ ɖěbǔ ǎ é ɖokpó wá, bó ná dó sá hwɛxɔ́súsú vɔ́ ɔ́ ná nú Mawu Mavɔmavɔ. Agbo ɔ́ ɖó ná xɔ kpatágan nabí ɖé, bɔ kpatágan ɔ́ sín kpinkpɛn ɖó ná sɔgbe xá kpatágan e è nɔ zán ɖo sinsɛnxɔ mɛ ɔ́.

¹⁶ Mɛ ɔ́ ná ná agbo kɛ́ɖɛ́ ǎ; é ná sú nǔ e é ɖe ɖo nǔ e é sɔ́ ɖó vo nú Mawu Mavɔmavɔ lɛ́ɛ mɛ ɔ́ sín axɔ́, bó ná lɛ́ sú atɔ́ɔ́nvlɔ́ɖó tɔn d'é jí, bó ná zé nú vɔ̌sánú-xwlémawutɔ́ ɔ́, bɔ é ná zé agbo e é ná nú hwɛxɔ́súsú vɔ́ ɔ́, bó ná bló lě e è nɔ bló gbɔn dó xwlé vɔ̌sánú mì ɔ́ dó sá hwɛsɔ́kɛmɛvɔ́ ná dó ta tɔn mɛ, bɔ Mawu Mavɔmavɔ ná súnsún hwɛ tɔn lɛ́ɛ.

¹⁷ “Ényí mɛɖé má tunwun ǎ, bó gba sɛ́n e Mawu Mavɔmavɔ dó lɛ́ɛ ɖě, bó dó hu hwɛ ɔ́, mɛ ɔ́ ná húzú nǔwanyidotɔ́, bɔ nǔ e é wa nyi do ɔ́ sín agban ná nɔ kɔ n'i.

¹⁸ É ná zé agbo e ma ɖó blɔ̌ ɖěbǔ ǎ, bɔ è nɔ dó sá hwɛxɔ́súsú vɔ́ ná ɔ́ ɖokpó wá nú vɔ̌sánú-xwlémawutɔ́ ɔ́. Agbo ɔ́ ɖó ná xɔ akwɛ́ nabí e è ɖɔ é. Vɔ̌sánú-xwlémawutɔ́ ɔ́ ná bló lě e è nɔ bló gbɔn bó nɔ́ xwlé vɔ̌sánú mì ɔ́ dó sá hwɛxɔ́súsú vɔ́ ná dó ta tɔn mɛ, bɔ Mawu Mavɔmavɔ ná sɔ́ nǔ e é má tunwun ǎ bó wa ɔ́ kɛ ɛ.

¹⁹ Hwɛxɔ́súsú vɔ́ wɛ. Nǔ wɛ nya énɛ́ ɔ́ wa nyi do nú Mawu Mavɔmavɔ nǔgbó.”

²⁰ Mawu Mavɔmavɔ ɖɔ nú Mɔyízi ɖɔ:

²¹ “Mǐ ní ɖɔ mɛɖé hu hwɛ ɖaxó ɖé dó Mawu Mavɔmavɔ: é ɖó adingban nú nɔzo tɔn, ɖó nǔ e è zě ɖó gɔ̌n tɔn ɔ́ wú, abǐ ɖó nǔ e è hwě n'i ɔ́ wú, abǐ ɖó nǔ e é fin ɔ́ wú, abǐ ɖó nǔ e é hízí,

²² abǐ é mɔ nǔɖé sɔ́ bó mɔ́, abǐ é wa nǔ alɔkpa mɔ̌hunkɔtɔn ɖěvo bó mɔ́, bó xwlé nǔ d'é jí;

²³ mɛ e wa nǔ gbɔn mɔ̌ ɔ́, hwɛ wɛ é hu, bɔ hwɛ tɔn ɖo kɔ n'i. Énɛ́ ɔ́ wú ɔ́, mɛ ɔ́ ɖó ná zé nǔ e é fin ɔ́, abǐ nǔ e é hízí ɔ́, abǐ nǔ e è zě ɖó gɔ̌n tɔn ɔ́, abǐ nǔ e é mɔ sɔ́ ɔ́ jó.

²⁴ É ná zé nǔ e wú é ɖe kúnnu agɔ bó xwlé nǔ d'é jí ɔ́ jó. É ná zé jó kpowun bɔ xó fó wɛ ǎ; é ná lɛ́ zé akwɛ́ e nǔ ɔ́ xɔ ɔ́ sín mǎ ɖó atɔ́ɔ́n d'é jí, bó ná zé nú mɛ e tɔn wɛ ɔ́, ɖo gbe e gbe è nǎ mɔ nǔ jɛ wú ɖɔ hwɛ ɖo kɔ n'i é.

²⁵ É ná kpɔ́n kanlin tɔn lɛ́ɛ mɛ, bó ná zé agbo e ma ɖó blɔ̌ ɖěbǔ ǎ, bɔ è nɔ́ dó sá hwɛxɔ́súsú vɔ́ ɔ́ wá nú vɔ̌sánú-xwlémawutɔ́ ɔ́, bɔ é ná dó sá hwɛxɔ́súsú vɔ́ ɔ́ ná nú hwɛ e é hu lɛ́ɛ. Agbo ɔ́ ɖó ná xɔ akwɛ́ nabí e è ɖɔ é.

²⁶ Bɔ vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú mì ɔ́ dó sá vɔ̌ e nɔ́ súnsún hwɛ sín kɔ nú mɛ ɔ́ dó ta tɔn mɛ, ɖo Mawu Mavɔmavɔ nukɔn, bɔ Mawu Mavɔmavɔ ná sɔ́ hwɛ tɔn kɛ ɛ. É ná bó nyí nǔ ɖěbǔ wɛ é wa nyi do ɔ́, Mawu Mavɔmavɔ ná sɔ́ kɛ ɛ.”