Levíi ví 4 - MAWUXÓWÉMA

¹ Mawu Mavɔmavɔ ɖɔ nú Mɔyízi ɖɔ

² é ní ɖɔ nú Izlayɛ́li ví lɛ́ɛ ɖɔ: “Ényí mɛɖé má tunwun ǎ, bó gba sɛ́n e Mawu Mavɔmavɔ dó lɛ́ɛ ɖě, bó dó hu hwɛ ɔ́, nǔ e è nǎ wa ɔ́ ɖíe:

³ “Ényí vɔ̌sánú-xwlémawutɔ́ ɖaxó ɔ́ wɛ hu hwɛ, bɔ é sín éyɛ́ wú, bɔ togun ɔ́ bǐ nyí nǔwanyidotɔ́ ɔ́, é ní zé nyibúsú wínnyáwínnyá e má ɖó blɔ̌ ɖěbǔ ǎ é ɖokpó dó sá vɔ̌ ná nú Mawu Mavɔmavɔ, bónú Mawu Mavɔmavɔ ná sɔ́ hwɛ e é hu lɛ́ɛ kɛ ɛ.

⁴ É ná zé nyibúsú ɔ́ wá goxɔ e mɛ Mawu Mavɔmavɔ nɔ́ kpé togun tɔn ɖe ɔ́ sín alihɛ́nnu, ɖo Mawu Mavɔmavɔ nukɔn. É ná sɔ́ alɔ ɖó kanlin ɔ́ ta, bó ná gbo gbe e ɖo Mawu Mavɔmavɔ nukɔn.

⁵ Bó ná yí kanlin ɔ́ sín hun ɔ́ ɖě, bó ná zé wá goxɔ ɔ́ mɛ.

⁶ É ná zé alɔví dó hun ɔ́ mɛ, bó ná mi azɔn tɛ́nwe dó tɛn mímɛ́ bǐ ɔ́ sín xɔmɛgbovɔ ɔ́ wú, ɖo Mawu Mavɔmavɔ nukɔn.

⁷ É ná sá hun ɔ́ dó vɔ̌sákpe e jí è nɔ dó zǎlínkpɔ́n zo ɖe, bɔ é ɖo Mawu Mavɔmavɔ nukɔn, ɖo goxɔ ɔ́ mɛ fínɛ́ ɔ́ sín zo lɛ́ɛ wú. Énɛ́ ɔ́ gúdo ɔ́, é ná tɔ́n, bó ná kɔn nyibúsú ɔ́ sín hun e kpo ɔ́ bǐ nyi vɔ̌sákpe e jí è nɔ dó vɔ̌ lɛ́ɛ zo ɖe, bɔ é ɖo goxɔ ɔ́ sín alihɛ́nnu ɔ́ sín dodó wú.

⁸ É ná ɖe nyibúsú e é dó ɖo hwɛsɔ́kɛmɛvɔ́ sá ná wɛ ɔ́ sín jǒ ɔ́ bǐ: jǒ e ɖo xomɛnú lɛ́ɛ wú é bǐ.

⁹ Ayi we lɛ́ɛ kpó jǒ e ɖo yě wú lɛ́ɛ kpó, kpódó jǒ e gbɔn ajaja mɛ é bǐ kpó alǐnnuvínu ɔ́ kpó, bɔ é ná ɖe kpó ayi lɛ́ɛ kpó ɖó kpɔ́.

¹⁰ Vɔ̌sánú-xwlémawutɔ́ ɔ́ ná ɖe nǔ énɛ́ lɛ́ɛ ɖo kanlin ɔ́ wú, lě e è ko nɔ bló gbɔn ɖo nyibúsú e è dǒ sá kɔnɖókpɔ́ vɔ́ ná ɔ́ wú gbɔn é, bó ná dó zo ɖo vɔ̌sákpe e jí è nɔ dó vɔ̌ zo ɖe é jí.

¹¹ Lo ɔ́, nyibúsú ɔ́ sín anyǔ ɔ́ kpó lan tɔn bǐ kpó, kpó ta tɔn kpó, kpó afɔ tɔn lɛ́ɛ kpó, xomɛnú tɔn lɛ́ɛ kpódó mǐ tɔn lɛ́ɛ kpó ɔ́,

¹² nyibúsú ɔ́ sín nǔ e kpo lɛ́ɛ ɔ́, é ná ɖe sín fí e yě ɖó gɔnu ɖó ɔ́, bó ná zé yi tɛn mímɛ́ e mɛ è nɔ kɔn afín nyi é, bó ná dó zo ɖo nakí myɔ jí. Fínɛ́ wɛ é ná dó zo ɖe.”

Vɔ̌ e togun ɔ́ bǐ ná nɔ́ sá dó mɔ hwɛsɔ́kɛ yí é

¹³ Mawu Mavɔmavɔ ɖɔ: “Ényí Izlayɛ́li togun ɔ́ bǐ wɛ má tunwun ǎ, bó gba sɛ́n e Mawu Mavɔmavɔ dó lɛ́ɛ ɖě ɔ́, hwɛ wɛ yě hu; yě tunwun bo bló ǎ, có hwɛ wɛ é nyí bɔ yě hu.

¹⁴ Hwenu e è nǎ wá mɔ nǔ jɛ wú ɖɔ togun ɔ́ hu hwɛ ɔ́, agun ɔ́ ná ná nyibúsú wínnyáwínnyá ɖokpó, bɔ è nǎ dó sá hwɛsɔ́kɛmɛvɔ́ ná; è nǎ zé nyibúsú ɔ́ wá goxɔ e mɛ Mawu nɔ́ kpé yě ɖe ɔ́ sín alihɛ́nnu.

¹⁵ Tomɛxó Izlayɛ́li tɔn lɛ́ɛ ná zé alɔ yětɔn ɖó nyibúsú ɔ́ ta, bɔ è nǎ gbo gbe e ɖo Mawu Mavɔmavɔ nukɔn.

¹⁶ Vɔ̌sánú-xwlémawutɔ́ ɖaxó ɔ́ ná hɛn nyibúsú ɔ́ sín hun ɖě wá goxɔ ɔ́ mɛ.

¹⁷ É ná sɔ́ alɔví tɔn dó hun ɔ́ mɛ, bó ná mi azɔn tɛ́nwe dó xɔmɛgbovɔ ɔ́ wú, ɖo Mawu Mavɔmavɔ nukɔn.

¹⁸ É ná sá hun ɔ́ ɖě dó vɔ̌sákpe e ɖo Mawu Mavɔmavɔ nukɔn, ɖo goxɔ ɔ́ mɛ fínɛ́ ɔ́ sín zo lɛ́ɛ wú. Énɛ́ ɔ́ gúdo ɔ́, é ná tɔ́n, bó ná kɔn hun e kpo ɔ́ bǐ nyi vɔ̌sákpe e jí è nɔ dó vɔ lɛ́ɛ zo ɖe, bɔ é ɖo goxɔ ɔ́ nukɔn ɔ́ sín dodó wú.

¹⁹ É ná ɖe nyibúsú ɔ́ sín jǒ lɛ́ɛ bǐ, bó ná dó zo ɖo vɔ̌sákpe ɔ́ jí.

²⁰ Lě e é ná wa nyibúsú e é sɔ́ dó sá hwɛsɔ́kɛmɛvɔ́ nú é ɖésúnɔ ɔ́ sín nǔ gbɔn ɔ́ wɛ é ná wa nyibúsú énɛ́ sín nǔ gbɔn. Nú é bló lě e è nɔ bló gbɔn bó nɔ́ xwlé vɔ̌sánú mì ɔ́, bó sá vɔ̌ e nɔ́ súnsún hwɛ sín kɔ nú mɛ ɔ́ nú yě ɔ́ gbɔn mɔ̌ ɔ́, Mawu Mavɔmavɔ ná sɔ́ hwɛ e yě hu lɛ́ɛ kɛ yě.

²¹ Énɛ́ ɔ́ gúdo ɔ́, é ná ɖe nyibúsú ɔ́ sín fí e yě ɖǒ gɔnu ɖó ɔ́, bó ná dó zo lě e é dó nyibúsú e é dó sá hwɛsɔ́kɛmɛvɔ́ nú é ɖésúnɔ ɔ́ zo gbɔn ɔ́. Hwɛsɔ́kɛmɛ vɔ́ e è nǎ nɔ́ sá dó togun ɔ́ tamɛ é wɛ.”

Vɔ̌ e togun ɔ́ bǐ ná nɔ́ sá dó mɔ hwɛsɔ́kɛ yí é

²² Mawu Mavɔmavɔ ɖɔ: “Ényí togun ɔ́ sín gǎn lɛ́ɛ ɖě má tunwun ǎ, bó gba sɛ́n e Mawu Mavɔmavɔ, Mawu tɔn dó lɛ́ɛ ɖě, bó dó hu hwɛ ɔ́,

²³ nú é wá mɔ nǔ jɛ hwɛ e é hu ɔ́ wú ɔ́, é ná zé gbɔ̌sú e má ɖó blɔ̌ ɖěbǔ ǎ é dó sá vɔ̌ ná.

²⁴ É ná sɔ́ alɔ ɖó kanlin ɔ́ ta, bó ná gbo gbe e ɖo fí e è nɔ gbo gbe kanlin e è nɔ dó sá vɔ̌ e è nɔ dó zo lɛ́ɛ ɖe é, ɖo Mawu Mavɔmavɔ nukɔn, bónú Mawu Mavɔmavɔ ná sɔ́ hwɛ e é hu ɔ́ kɛ ɛ.

²⁵ Vɔ̌sánú-xwlémawutɔ́ ɔ́ ná sɔ́ alɔví tɔn dó kanlin ɔ́ sín hun mɛ, bó ná sá ɖě dó vɔ̌sákpe e jí è nɔ dó vɔ̌ lɛ́ɛ zo ɖe ɔ́ sín zo lɛ́ɛ wú, bó ná kɔn hun e kpo ɔ́ nyi vɔ̌sákpe ɔ́ sín dodó wú.

²⁶ É ná dó kanlin jó ɔ́ bǐ zo ɖo vɔ̌sákpe ɔ́ jí, lě e è nɔ dó kanlin e è nɔ dó sá kɔnɖókpɔ́ vɔ́ ná ɔ́ sín jǒ zo gbɔn é. Nú vɔ̌sánú-xwlémawutɔ́ ɔ́ bló lě e è nɔ bló gbɔn bó nɔ́ xwlé vɔ̌sánú mì ɔ́, bó sá vɔ̌ e nɔ́ súnsún hwɛ sín kɔ nú mɛ ɔ́ gbɔn mɔ̌ ɔ́, Mawu Mavɔmavɔ ná sɔ́ hwɛ e é hu lɛ́ɛ kɛ ɛ.”

Vɔ̌ e toví kpaa lɛ́ɛ ná nɔ́ sá dó mɔ hwɛsɔ́kɛ yí é

²⁷ Mawu Mavɔmavɔ ɖɔ: “Ényí toví ɖé má tunwun ǎ, bó gba sɛ́n e Mawu Mavɔmavɔ dó lɛ́ɛ ɖě, bó dó hu hwɛ ɔ́,

²⁸ nú é wá mɔ nǔ jɛ hwɛ e é hu ɔ́ wú ɔ́, é ná ná gbɔ̌ asi e ma ɖó blɔ̌ ɖěbǔ ǎ é ɖokpó, bó ná dó sá vɔ̌ ná dó hwɛ e é hu ɔ́ tamɛ.

²⁹ É ná sɔ́ alɔ ɖó kanlin ɔ́ ta, bó ná gbo gbe e ɖo fí e è nɔ gbo gbe kanlin e è nɔ dó sá vɔ̌ e è nɔ dó zo lɛ́ɛ ɖe é.

³⁰ Vɔ̌sánú-xwlémawutɔ́ ɔ́ ná zé alɔví tɔn dó kanlin ɔ́ sín hun mɛ, bó ná sá dó vɔ̌sákpe e jí è nɔ dó vɔ̌ lɛ́ɛ zo ɖe ɔ́ sín zo lɛ́ɛ wú, bó ná kɔn hun e kpo ɔ́ bǐ nyi vɔ̌sákpe ɔ́ sín dodó wú.

³¹ Vɔ̌sánú-xwlémawutɔ́ ɔ́ ná ɖe kanlin ɔ́ sín jǒ lɛ́ɛ bǐ, lě e è nɔ ɖe kanlin e è dǒ sá kɔnɖókpɔ́ vɔ́ lɛ́ɛ sín jǒ gbɔn é, bó ná dó zo ɖo vɔ̌sákpe ɔ́ jí, bɔ wǎn tɔn nɔ́ yi Mawu Mavɔmavɔ gɔ́n, bó nɔ́ nyɔ́ se n'i. Nú vɔ̌sánú-xwlémawutɔ́ ɔ́ bló lě e è nɔ bló gbɔn, bó nɔ́ xwlé vɔ̌sánú mì ɔ́, bó sá vɔ̌ e nɔ́ súnsún hwɛ sín kɔ nú mɛ ɔ́ gbɔn mɔ̌ ɔ́, Mawu Mavɔmavɔ ná sɔ́ hwɛ e é hu lɛ́ɛ kɛ ɛ.

³² “Nú é ká nyí lɛ̌ngbɔ́ ná dó sá hwɛsɔ́kɛmɛvɔ́ ɔ́ ná wɛ é ɖe hǔn, é ní nyí lɛ̌ngbɔ́ asi e ma ɖó blɔ̌ ɖěbǔ ǎ é.

³³ É ná sɔ́ alɔ ɖó kanlin ɔ́ ta, bó ná gbo gbe e, ɖo fí e è nɔ gbo gbe kanlin e è nɔ dó sá vɔ̌ e è nɔ dó zo lɛ́ɛ ɖe é.

³⁴ Vɔ̌sánú-xwlémawutɔ́ ɔ́ ná zé alɔví tɔn dó kanlin ɔ́ sín hun mɛ, bó ná sá dó vɔ̌sákpe e jí è nɔ dó vɔ̌ lɛ́ɛ zo ɖe ɔ́ sín zo lɛ́ɛ wú, bó ná kɔn hun e kpo ɔ́ bǐ nyi vɔ̌sákpe ɔ́ sín dodó wú.

³⁵ É ná ɖe kanlin ɔ́ sín jǒ lɛ́ɛ bǐ lě e è nɔ ɖe kanlin e è nɔ dó sá kɔnɖókpɔ́ vɔ́ ná ɔ́ sín jǒ gbɔn é, bó ná dó zo ɖo vɔ̌sákpe ɔ́ jí, ɖo vɔ̌ ɖě lɛ́ɛ e dó zo wɛ è ɖe lɛ́ɛ jí, bɔ é ná nyí vɔ̌ e è nɔ dó zo ɖo Mawu Mavɔmavɔ nukɔn é. Nú vɔ̌sánú-xwlémawutɔ́ ɔ́ bló lě e è nɔ bló gbɔn, bó nɔ́ xwlé vɔ̌sánú mì ɔ́, bó sá vɔ̌ e nɔ́ súnsún hwɛ sín kɔ nú mɛ ɔ́ gbɔn mɔ̌ ɔ́, Mawu Mavɔmavɔ ná sɔ́ hwɛ e é hu lɛ́ɛ kɛ ɛ.”