Levíi ví 3 - MAWUXÓWÉMA

¹ Mawu Mavɔmavɔ ɖɔ: “Ényí mɛ ɖé jló ná sá kɔnɖókpɔ́ vɔ́ ɔ́, ényí nyibúsú abǐ asi wɛ é jló ná zé dó sá vɔ̌ ɔ́ ná ɔ́, kanlin e ma ɖó blɔ̌ ɖěbǔ ǎ ɔ́ wɛ é ná zé dó sá ɖo Mawu Mavɔmavɔ nukɔn.

² Mɛ ɔ́ ná sɔ́ alɔ ɖó kanlin ɔ́ ta, bó ná gbo gbe e ɖo goxɔ e mɛ Mawu Mavɔmavɔ nɔ kpé togun tɔn ɖe ɔ́ sín alihɛ́nnu, bɔ Aalɔ́ɔn sín vǐ súnnu vɔ̌sánú-xwlémawutɔ́ lɛ́ɛ ná mi hun tɔn gbɔn vɔ̌sákpe ɔ́ wú lɛ́ lɛ̌ dó.

³ Kanlin e è dǒ sá kɔnɖókpɔ́ vɔ́ ɔ́, nǔ e è nǎ ɖe ɖ'é wú nú Mawu Mavɔmavɔ, bó ná dó zo ɖo nukɔn tɔn ɔ́ ɖíe: jǒ e lɛ́ dó xomɛnú lɛ́ɛ kpó éé ɖo xomɛnú lɛ́ɛ wú é kpó.

⁴ Ayi we lɛ́ɛ, kpó jǒ e lɛ́ dó ayi lɛ́ɛ kpó, kpó jǒ e ɖo ajaja mɛ é kpó, kpódó alǐnnuvínu ɔ́ kpó, bɔ è nǎ ɖe kpó ayi we lɛ́ɛ kpó ɖó kpɔ́.

⁵ Vɔ̌sánú-xwlémawutɔ́ lɛ́ɛ ná dó nǔ énɛ́ lɛ́ɛ bǐ zo ɖo vɔ̌sákpe ɔ́ jí, ɖo vɔ̌ zǎnzǎn tɔn e ɖo jiji wɛ ɔ́ jí. Vɔ̌ ɖé wɛ, bɔ wǎn tɔn nɔ yi Mawu Mavɔmavɔ gɔ́n, bó nɔ́ nyɔ́ se n'i.

⁶ “Nú é ká nyí mɛɖé wɛ jló ná zé gbɔ̌ asú abǐ asi dó sá kɔnɖókpɔ́ vɔ́ ná ɔ́, kanlin e ma ɖó blɔ̌ ɖěbǔ ǎ é wɛ mɛ ɔ́ ná zé dó sá.

⁷ Ényí lɛ̌ngbɔ́ wɛ é ná dó sá vɔ̌ ɔ́ ná ɔ́, ní zé wá Mawu Mavɔmavɔ nukɔn.

⁸ É ná sɔ́ alɔ ɖó lɛ̌ngbɔ́ ɔ́ ta, bó ná gbo gbe e ɖo goxɔ ɔ́ nukɔn, bɔ vɔ̌sánú-xwlémawutɔ́ lɛ́ɛ ná mi hun tɔn gbɔn vɔ̌sákpe ɔ́ wú lɛ́ dó.

⁹ Kanlin e é dó sá kɔnɖókpɔ́ vɔ́ ɔ́, nǔ e é ná ɖe ɖ'é wú nú Mawu Mavɔmavɔ, bó ná dó zo ɖo nukɔn tɔn ɔ́ ɖíe: sí ɔ́ kpó jǒ e ɖ'é wú ɔ́ kpó, bɔ è nǎ sɛ́n sín nɛgbé xú ɔ́ wú, jǒ e ɖo xomɛnú lɛ́ɛ wú é bǐ.

¹⁰ Ayi we lɛ́ɛ kpó jǒ e ɖo yě wú lɛ́ɛ kpó, kpó jǒ e gbɔn ajaja mɛ lɛ́ɛ kpó, kpódó alǐnnuvínu ɔ́ kpó, bɔ é ná ɖe kpó ayi we lɛ́ɛ kpó ɖó kpɔ́.

¹¹ Vɔ̌sánú-xwlémawutɔ́ ɔ́ ná dó nǔ énɛ́ lɛ́ɛ bǐ zo ɖo vɔ̌sákpe ɔ́ jí. Nǔɖuɖu ɖé wɛ, bɔ è nɔ dó zo nú Mawu Mavɔmavɔ.

¹² “Nú é ká nyí gbɔ̌ wɛ mɛ ɔ́ ná dó sá vɔ̌ ɔ́, é ná zé wá Mawu Mavɔmavɔ nukɔn.

¹³ É ná sɔ́ alɔ ɖó kanlin ɔ́ ta, bó ná gbo gbe e ɖo goxɔ ɔ́ nukɔn. Bɔ vɔ̌sánú-xwlémawutɔ́ lɛ́ɛ ná mi hun tɔn gbɔn vɔ̌sákpe ɔ́ wú lɛ́ dó.

¹⁴ É ná ɖe nǔ élɔ́ lɛ́ɛ ɖo kanlin ɔ́ wú nú Mawu Mavɔmavɔ, bó dó zo ɖo nukɔn tɔn: jǒ e ɖo xomɛnú lɛ́ɛ wú é bǐ.

¹⁵ Ayi we lɛ́ɛ kpó jǒ e ɖo yě wú lɛ́ɛ kpó, kpó jǒ e ɖo ajaja mɛ lɛ́ɛ kpó, kpódó alǐnnuvínu ɔ́ kpó, bɔ é ná ɖe kpó ayi we lɛ́ɛ kpó ɖó kpɔ́.

¹⁶ Vɔ̌sánú-xwlémawutɔ́ ɔ́ ná dó nǔ énɛ́ lɛ́ɛ bǐ zo ɖo vɔ̌sákpe ɔ́ jí. Nǔɖuɖu ɖé wɛ, bɔ è nɔ dó zo nú Mawu Mavɔmavɔ, bɔ wǎn tɔn nɔ nyɔ́ se n'i. “Jǒ ɔ́ bǐ wɛ nyí Mawu Mavɔmavɔ tɔn.

¹⁷ Sɛ́n ɖé wɛ é nyí nú kúnkan mitɔn lɛ́ɛ káká sɔ́yi, gbɔn fí e mi ná nɔ lɛ́ɛ bǐ: mi ná ɖu jǒ ǎ, mi ná ɖu hun ǎ.”