Levíi ví 24 - MAWUXÓWÉMA

¹ Mawu Mavɔmavɔ ɖɔ nú Mɔyízi ɖɔ:

² “Đɔ nú Izlayɛ́li ví lɛ́ɛ ɖɔ yě ní nɔ́ hɛn olívu sín ami e nyɔ́ ganjí ɔ́ wá nú we, bónú è nǎ nɔ́ dó zogbɛ́n lɛ́ɛ mɛ, bɔ yě ná nɔ́ ɖo títá gbadanu lɛ́ɛ bǐ.

³ Aalɔ́ɔn ná sɔ́ zogbɛ́nhɛnnú ɔ́ dó goxɔ e mɛ un nɔ kpé mi ɖe ɔ́ mɛ, ɖo xɔmɛgbovɔ e gúdo akɔjijɛgbá ɔ́ ɖe ɔ́ nukɔn. Zogbɛ́n lɛ́ɛ ná ɖo jiji wɛ ɖo nukɔn ce dɔ̌n sín gbadanu káká bɔ ayǐ ná hɔ́n. Mi ɖó ná nɔ́ xwedó tito énɛ́ ɔ́ káká sɔ́yi, jijimɛ ɖě jɛ ɖě gúdo.

⁴ Aalɔ́ɔn ná fɔ zogbɛ́n lɛ́ɛ ɖó zogbɛ́nhɛnnú e è sɔ́ siká akú dó bló ná ɔ́ jí, bɔ yě ná nɔ́ ɖo jiji wɛ zǎn mɛ tɛgbɛ ɖo nyɛ Mawu Mavɔmavɔ nukɔn.”

Wɔ̌xúxú e è nɔ ná Mawu lɛ́ɛ

⁵ Mawu Mavɔmavɔ ɖɔ nú Mɔyízi ɖɔ: “Zě linfín dó ɖa wɔ̌xúxú gbajagbaja wěwe ná. Wɔ̌xúxú ɖokpó ɖokpó ní da kilóo ayizɛ́n.

⁶ A nǎ to yě ɖó nukɔn ce, ɖo távo e è sɔ́ siká akú dó bló ná ɔ́ jí dɔ̌n. Hǎ we jí wɛ a nǎ to yě ɖó, a nǎ to ayizɛ́n ayizɛ́n, ɖě ɖo ɖě jí.

⁷ A nǎ zé zǎlínkpɔ́n akú ɖó hǎ ɖokpó ɖokpó jí, bó ná dó zo ɖó wɔ̌xúxú tɛnmɛ, dó kpa susu nú mì, bɔ é ná nyí flǐn ɖé nú nyɛ Mawu Mavɔmavɔ.

⁸ “Gbɔjɛzán gbe tɛgbɛ káká sɔ́yi ɔ́, è ɖǒ ná nɔ́ to wɔ̌xúxú mɔ̌hunkɔtɔn wěwe ɖó nukɔn ce; Izlayɛ́li ví lɛ́ɛ ɖó ná nɔ́ bló mɔ̌ hwebǐnu dandan.

⁹ Wɔ̌xúxú lɛ́ɛ ná húzú Aalɔ́ɔn kpó vǐ tɔn lɛ́ɛ kpó tɔn. Yě ná nɔ́ nɔ fí mímɛ́ ɖé bó ná nɔ́ ɖu, ɖó nǔ mímɛ́ titewungbe wɛ wɔ̌xúxú nɛ́ lɛ́ɛ nyí, ɖó nyɛ wɛ è nǎ, bɔ kanta énɛ́ lɛ́ɛ ná nyí Aalɔ́ɔn kpó vǐ tɔn lɛ́ɛ kpó tɔn káká sɔ́yi.”

Tó e è nǎ dɔn nú mɛ e nylá nu dó Mawu wú é

¹⁰ Nyɔ̌nu Izlayɛ́li ví ɖé kpó nya Ejípunu ɖé kpó ɖó vǐ súnnu ɖokpó. É wá su gbe ɖokpó, bɔ vǐ énɛ́ kpó Izlayɛ́li ví ɖé kpó bɛ́ jlɛ ɖo fí e Izlayɛ́li togun ɔ́ ɖó gɔnu ɖó ɔ́.

¹¹ Vǐ ɔ́ sín nɔ nɔ nyí Celomíti, bó nyí Divli sín vǐ, bó jɔ ɖo Dan sín akɔta mɛ. Nyɔ̌nu nɛ́ ɔ́ sín vǐ nylá nu dó Mawu Mavɔmavɔ sín nyǐkɔ wú; é zun Mawu Mavɔmavɔ, bɔ è kplá ɛ yi Mɔyízi gɔ́n,

¹² bó sɔ́ ɛ dó gankpá mɛ, bó nɔ te kpɔ́n hwɛ e Mawu Mavɔmavɔ ná ɖó n'i é.

¹³ Mawu Mavɔmavɔ wá ɖɔ nú Mɔyízi ɖɔ:

¹⁴ “Mi kplá nyaví élɔ́ tɔ́n sín fí e mi ɖó gɔnu ɖó ɔ́. Mɛ e se bɔ é nylá nu dó nyɛ Mawu Mavɔmavɔ sín nyǐkɔ wú lɛ́ɛ bǐ ní fɔ alɔ yětɔn lɛ́ɛ ɖó ta tɔn; Izlayɛ́li ví lɛ́ɛ bǐ ní nyi hwǎn dó hu i.

¹⁵ Énɛ́ ɔ́ gúdo ɔ́, a nǎ ɖɔ nú Izlayɛ́li ví lɛ́ɛ ɖɔ: “Mɛ ɖěbǔ zun nyɛ mɛ e nyí Mawu tɔn ɔ́, hwɛ tɔn ná nɔ kɔ n'i.

¹⁶ Mɛ ɖěbǔ e ná nylá nu dó nyɛ Mawu Mavɔmavɔ sín nyǐkɔ wú ɔ́, è nǎ ɖó kúhwɛ nú mɛ ɔ́. Togun ɔ́ bǐ ná nyi hwǎn dó hu i dandan; é sixú nyí jǒnɔ abǐ toví, é ná kú; ɖó é nylá nu dó nyɛ Mawu Mavɔmavɔ sín nyǐkɔ wú.

¹⁷ “Ényí mɛɖé hu mɛ ɔ́, è nǎ hu é lɔmɔ̌ dandan.

¹⁸ Amɔ̌, mɛ e ná xo mɛ ɖěvo sín kanlin bɔ é ná kú ɔ́, mɛ ɔ́ ná zé kanlin gbɛɖe ɖěvo dó ɖyɔ́ ná.

¹⁹ “Nú mɛɖé gblé wǔ nɔzo tɔn ɔ́, nǔ e é wa nú mɛ ɖě ɔ́, è nǎ wa nú é lɔmɔ̌.

²⁰ Nú xú wɛ é wɛ́n n'i ɔ́, è nǎ wɛ́n xú nú é lɔmɔ̌. Nú nukún wɛ é tɔ́n ɛ ɔ́, è nǎ tɔ́n nukún é lɔmɔ̌. Nú aɖǔ wɛ é lɔ́ ɛ ɔ́, è nǎ lɔ́ aɖǔ é lɔmɔ̌. Wǔ e é gblé nɔzo tɔn ɔ́ wɛ è nǎ gblé é lɔmɔ̌.

²¹ “Mɛ e ná hu kanlin ɔ́ ná zé kanlin ɖěvo dó ɖyɔ́ ná, mɛ e ka ná hu gbɛtɔ́ ɔ́, è nǎ hu é lɔmɔ̌.

²² “Sɛ́n ɖokpó ɔ́ wɛ mɛ bǐ ná nyi; jǒnɔ kpó toví kpó ɔ́, sɛ́n ɖokpó ɔ́ wɛ yě bǐ ná nyi; ɖó nyɛ wɛ nyí Mawu Mavɔmavɔ, Mawu mitɔn.”

²³ Mɔyízi ɖɔ xó lɛ́ɛ nú Izlayɛ́li ví lɛ́ɛ, bɔ yě kplá nyaví e zun Mawu Mavɔmavɔ ɔ́ tɔ́n sín fí e yě ɖó gɔnu ɖó ɔ́, bó nyi hwǎn dó hu i. Yě bló lě e Mawu Mavɔmavɔ ɖɔ nú Mɔyízi gbɔn é.