Levíi ví 23 - MAWUXÓWÉMA

¹ Mawu Mavɔmavɔ ɖɔ nú Mɔyízi ɖɔ

² é ní ɖɔ nú Izlayɛ́li ví lɛ́ɛ ɖɔ: “Hwenu e mi ná nɔ́ kplé bó ɖu xwe dó kpa susu nú mì lɛ́ɛ su ɔ́, mi ná nɔ́ sɛn mì. Hwenu e un ɖó bɔ mi ná nɔ́ xwedó lɛ́ɛ ɖíe:

³ “Azǎn ayizɛ́n wɛ mi ná nɔ́ dó wa azɔ̌ ná aklúnɔzángbla ɖokpó mɛ. Amɔ̌, azǎn tɛ́nwegɔ́ ɔ́, gbɔjɛzán wɛ; mi ná wa azɔ̌ ǎ; mi ná nɔ́ kplé bó sɛn mì; mi ná wa azɔ̌ ɖěbǔ gbe énɛ́ ɔ́ gbe ǎ. Gbɔjɛzán wɛ é nyí, bó ɖo vo nú nyɛ Mawu Mavɔmavɔ, bɔ mi ná nɔ́ nyi gbɔn fí e mi ná nɔ lɛ́ɛ bǐ.

⁴ “Hǔn, xwe ɖěvo e nyɛ Mawu Mavɔmavɔ ɖó, bɔ hwe yětɔn nu su ɔ́, mi ná nɔ́ kplé bó ɖu lɛ́ɛ ɖíe:

Dǐndínwáyixwe kpó wɔ̌xúxú e mɛ è ma dó tɔ́n ǎ é kpó sín xwe

⁵ “Đo sun nukɔntɔn e ɖo xwe ɔ́ mɛ ɔ́ sín azǎn wǒ-ɛnɛgɔ́ ɔ́ gbe ɔ́, gbadanu cawun ɔ́, mi ná nɔ́ ɖu Dǐndínwáyixwe ɔ́ dó kpa susu nú nyɛ Mawu Mavɔmavɔ.

⁶ “Sun ɖokpó énɛ́ ɔ́ sín azǎn afɔtɔngɔ́ ɔ́ gbe ɔ́, wɔ̌xúxú e mɛ è ma dó tɔ́n ǎ é sín xwe ɔ́ ná bɛ́. Aklúnɔzángbla ɖokpó wɛ mi ná ɖu xwe ɔ́ xɔ; mi ná ɖu wɔ̌xúxú e mɛ è ma dó tɔ́n ǎ é sín xwe ɔ́ dó kpa susu nú nyɛ Mawu Mavɔmavɔ.

⁷ Đo azǎn nukɔntɔn e ɖo aklúnɔzángbla énɛ́ ɔ́ mɛ ɔ́ gbe ɔ́, mi ná nɔ́ kplé miɖée, bó ná nɔ́ sɛn mì. Mi ná nɔ́ wa azɔ̌ e mi ko nɔ wa lɛ́ɛ ɖě azǎn énɛ́ ɔ́ gbe ǎ.

⁸ Đo aklúnɔzángbla énɛ́ ɔ́ bǐ mɛ ɔ́, mi ná nɔ́ sá vɔ̌ e è nɔ dó zo ɔ́ nú mì ayǐhɔ́ngbe ayǐhɔ́ngbe. Azǎn tɛ́nwegɔ́ ɔ́ gbe ɔ́, mi ná lɛ́ kplé, bó ná sɛn mì. Azǎn énɛ́ ɔ́ lɔ ɔ́, mi ná nɔ́ wa azɔ̌ e mi ko nɔ wa lɛ́ɛ ɖěbǔ ǎ.”

Jinukún nukɔntɔn ɔ́ sín xwe

⁹ Mawu Mavɔmavɔ lɛ́ ɖɔ nú Mɔyízi ɖɔ

¹⁰ é ní ɖɔ nú Izlayɛ́li ví lɛ́ɛ ɖɔ: “Hwenu e mi ná yi to e ná mi wɛ un ɖe ɔ́ mɛ, bó ná lɛ gle ɔ́, jinukún e nyɔ́ dó nukɔn ɔ́, kɔ nukɔntɔn e mi ná blá ɔ́, mi ná zé yi jó nú vɔ̌sánú-xwlémawutɔ́ ɔ́.

¹¹ Bɔ é ná bló lě e è nɔ bló gbɔn bó nɔ́ xwlé jinukún nyɛ Mawu Mavɔmavɔ é. Énɛ́ ɔ́, un ná yí jinukún mitɔn. È ɖu gbɔjɛzán ɔ́ nú ayǐ hɔ́n ɔ́ wɛ vɔ̌sánú-xwlémawutɔ́ ɔ́ ná xwlé mì.

¹² Azǎn ɖokpó énɛ́ ɔ́ gbe ɔ́, mi ná zé lɛ̌ngbɔ́ví e ɖó xwe ɖokpó, bɔ blɔ̌ ɖěbǔ má ɖo wǔ tɔn ǎ dó sá vɔ̌ e è nɔ dó zo ɔ́ nú mì.

¹³ Mi ná zé ami dó nya linfín kilóo ayizɛ́n ná, bó dó sá vɔ̌ e è nɔ dó zo ɔ́ gɔ́ ná, bɔ azizɔ tɔn sín wǎn ná nyɔ́ se nú mì, bɔ vɛ̌ɛn lǐtli ɖokpó adaɖé ná jɛ jí.

¹⁴ Jinukúnkɔ nukɔntɔn énɛ́ ɔ́, mi ná dó nu ǎ, mi ná ɖu wɔ̌xúxú tɔn ǎ; mi ná ɖu mimɛ tɔn ǎ, mi ná ɖu fɔ́ tɔn ǎ, mi ná ɖu nǔ tɔn ɖě cóbónú gbe e gbe è nǎ sɔ́ wá dó sá vɔ̌ ɔ́ nú nyɛ Mawu mitɔn ɔ́ ná su ǎ. Sɛ́n énɛ́ ɔ́ ɖ'ayǐ káká sɔ́yi nú kúnkan mitɔn lɛ́ɛ, ɖo fí ɖěbǔ e mi ná ɖe é.”

Nǔkún-yiyaxwe

¹⁵ Mawu Mavɔmavɔ ɖɔ: “Gbɔjɛzán jɛ nú ayǐ hɔ́n ɔ́, gbe énɛ́ gbe e mi ná bló lě e è nɔ bló gbɔn dó xwlé jinukúnkɔ nukɔntɔn ɔ́ mì ɔ́, mi ná xa aklúnɔzángbla tɛ́nwe kpíkpé.

¹⁶ Azǎn kanɖé wǒ (50) wɛ mi ná xa, bɔ é ná nyí gbɔjɛzán tɛ́nwegɔ́ ɔ́ sín ayǐhɔ́ngbe. Gbe énɛ́ gbe ɔ́, mi ná xwlé jinukún yɔ̌yɔ́ mì.

¹⁷ Mi ná hɛn wɔ̌xúxú we sín xwé mitɔn lɛ́ɛ gbe, bó ná xwlé mì, lě e è nɔ xwlé vɔ̌ mì gbɔn é. Linfín kilóo atɔn wɛ è nǎ dó ɖa wɔ̌xúxú ɔ́ ɖokpó ná, bó ná dó tɔ́n mɛ. Nǔkún nukɔntɔn e è ya ɔ́ mɛ wɛ è nǎ ɖe ɖe, bó dó xwlé vɔ̌sánú énɛ́ ɔ́ mì.

¹⁸ Mi ná hɛn lɛ̌ngbɔ́ví e ɖó xwe ɖokpó, bó má ɖó blɔ̌ ɖo wǔ ǎ ɔ́ tɛ́nwe, nyibúsú wínnyáwínnyá ɖokpó, agbo we, bɔ linfín kpódó vɛ̌ɛn kpó e ná sɔgbe xá ɔ́ ná jɛ jí, bɔ mi ná dó sá vɔ̌ e è nɔ dó zo ɔ́ nú mì gɔ́ ná, bɔ wǎn tɔn ná nyɔ́ se nú nyɛ Mawu Mavɔmavɔ.

¹⁹ Énɛ́ ɔ́ gúdo ɔ́, mi ná zé gbǎgbá ɖokpó dó sá hwɛsɔ́kɛmɛvɔ́ ná, bó ná zé lɛ̌ngbɔ́ví e ɖó xwe ɖokpó ɔ́ we dó sá kɔnɖókpɔ́ vɔ́ ná.

²⁰ Vɔ̌sánú-xwlémawutɔ́ ɔ́ ná bló lě e è nɔ bló gbɔn bó nɔ́ xwlé vɔ̌sánú mì ɔ́, bó xwlé yě mì. É ná xwlé yě mì gɔ́ nú wɔ̌xúxú e è zě jinukún nukɔntɔn ɔ́ dó ɖa ná, bó xwlé mì é kpó lɛ̌ngbɔ́ví we e è xwlé mì lɛ́ɛ kpó. È nǎ fɔ yě ɖó vo nú nyɛ Mawu Mavɔmavɔ, bɔ yě ná nyí vɔ̌sánú-xwlémawutɔ́ ɔ́ tɔn.

²¹ Azǎn énɛ́ ɔ́ gbe ɔ́, mi ná kplé, bó ná sɛn mì. Mi ná wa azɔ̌ e mi ko nɔ wa lɛ́ɛ ɖě gbe énɛ́ ɔ́ gbe ǎ. Mi ná nɔ́ nyi sɛ́n énɛ́ ɔ́ hwebǐnu, ɖo fí ɖěbǔ e mi ná ɖe é.

²² “Nú mi ɖo nǔkún ya wɛ hǔn, mi ma ya éé wú gbɔn gle mitɔn lɛ́ɛ tó é ó. Mi ka ya nǔkún ɔ́, mi ná lɛ́ kɔ wá cyán nǔkún e mi blɛ́ lɛ́ɛ ǎ. Mi ná jó dó nú wamamɔnɔ lɛ́ɛ kpódó jǒnɔ lɛ́ɛ kpó. Nyɛ wɛ nyí Mawu Mavɔmavɔ, Mawu mitɔn.”

Flǐn kpódó lanzo kúnkún kpó sín azǎn

²³ Mawu Mavɔmavɔ ɖɔ nú Mɔyízi ɖɔ

²⁴ é ní ɖɔ nú Izlayɛ́li ví lɛ́ɛ ɖɔ: “Sun tɛ́nwegɔ́ ɔ́ sín azǎn nukɔntɔn ɔ́ ná nyí gbɔjɛzán nú mi. Flǐn kpódó lanzo kúnkún kpó sín azǎn wɛ azǎn énɛ́ ɔ́ ná nyí nú mi; mi ná kplé bó sɛn mì.

²⁵ Mi ná wa azɔ̌ e mi ko nɔ wa lɛ́ɛ ɖě gbe énɛ́ ɔ́ gbe ǎ; mi ná sá vɔ̌ e è nɔ dó zɔ ɔ́ nú mì.”

Hwɛ súnsún sín kɔ nú mɛ zán ɖaxó ɔ́

²⁶ Mawu Mavɔmavɔ ɖɔ nú Mɔyízi ɖɔ:

²⁷ “Sun tɛ́nwegɔ́ ɔ́ sín azǎn wǒgɔ́ ɔ́ ná nyí azǎn ɖaxó e gbe è nɔ súnsún hwɛ sín kɔ nú mɛ ɔ́. Azǎn énɛ́ ɔ́ gbe ɔ́, mi ná kplé bó sɛn mì. Mi ná blá nu, bó ná sá vɔ̌ e è nɔ dó zo ɔ́.

²⁸ Mi ɖó ná wa azɔ̌ ɖěbǔ gbe énɛ́ ɔ́ gbe ǎ, ɖó azǎn e gbe è nɔ bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ, bó nɔ́ dó súnsún hwɛ sín kɔ nú mɛ é wɛ, bɔ è nǎ súnsún hwɛ mitɔn lɛ́ɛ sín kɔ nú mi, ɖo Mawu Mavɔmavɔ, Mawu mitɔn nukɔn.

²⁹ Mɛ e ma ná blá nu gbe énɛ́ ɔ́ gbe ǎ ɔ́, è nǎ ɖe e sín Izlayɛ́li togun ɔ́ mɛ.

³⁰ Mɛ e ná wa azɔ̌ ɖěbǔ gbe énɛ́ ɔ́ gbe ɔ́, nyɛ Mawu Mavɔmavɔ ɔ́ ɖésú ná hu i sín Izlayɛ́li togun ɔ́ mɛ.

³¹ Mi ná wa azɔ̌ ɖěbǔ gbe énɛ́ ɔ́ gbe ǎ; mi ná nyi sɛ́n énɛ́ ɔ́ káká sɔ́yi, ɖo fí ɖěbǔ e mi ná ɖe ɔ́.

³² Azǎn énɛ́ ɔ́ ná nyí gbɔjɛzán nú mi; mi ná wa azɔ̌ ǎ; mi ná blá nu. Mi ná nyi gbɔjɛzánsɛ́n énɛ́ ɔ́ bɛ́ sín azǎn tɛ́nnɛgɔ́ ɔ́ gbe gbadanu, sɔ́yi ayǐhɔ́ngbe tɔn gbadanu.”

Azavaxwe

³³ Mawu Mavɔmavɔ ɖɔ nú Mɔyízi ɖɔ

³⁴ é ní ɖɔ nú Izlayɛ́li ví lɛ́ɛ ɖɔ: “Bɛ́ sín sun tɛ́nwegɔ́ ɔ́ sín azǎn afɔtɔngɔ́ ɔ́ gbe ɔ́, mi ná ɖu azavaxwe dó kpa susu nú nyɛ Mawu Mavɔmavɔ. Azǎn tɛ́nwe wɛ mi ná ɖu xwe ɔ́ xɔ.

³⁵ Azǎn nukɔntɔn ɔ́ gbe ɔ́, mi ná kplé bó sɛn mì. Mi ná wa azɔ̌ e mi ko nɔ wa lɛ́ɛ ɖě gbe nɛ́ gbe ǎ.

³⁶ Mi ná nɔ́ sá vɔ̌ e è nɔ dó zo ɔ́ nú nyɛ Mawu Mavɔmavɔ xɔ azǎn tɛ́nwe. Azǎn tántɔngɔ́ ɔ́ gbe ɔ́, mi ná kplé bó sɛn mì, bó ná lɛ́ sá vɔ̌ e è nɔ dó zo ɔ́ nú mì. Xwe ɔ́ sín azǎn gǔdo gúdo tɔn ɔ́ wɛ. Mi ná wa azɔ̌ e mi ko nɔ wa lɛ́ɛ ɖě gbe énɛ́ gbe ǎ.

³⁷ “Xwe gɛnnyigɛnnyi e è nɔ ɖu nú nyɛ Mawu Mavɔmavɔ lɛ́ɛ nɛ́. Mi ná nɔ́ kplé, bó ná nɔ́ bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́, bó ná nɔ́ xwlé vɔ̌ e è nɔ fyɔ́ bǐ ɔ́ nyɛ Mawu Mavɔmavɔ: é sixú nyí vɔ̌ è nɔ dó zo ɔ́, é sixú nyí jinukún vɔ́, é sixú nyí kɔnɖókpɔ́ vɔ́, é ka sixú nyí ahan biba, bɔ mi ná bló lě e xwe ɖokpó ɖokpó byɔ́ gbɔn é.

³⁸ Vɔ̌ énɛ́ lɛ́ɛ ná gɔ́ nú éé mi nɔ sá nú mì gbɔjɛzán gbe lɛ́ɛ, nǔ e mi nɔ ná mì lɛ́ɛ, nǔ e mi nɔ dó akpá bó nɔ́ ná mì lɛ́ɛ, kpódó éé mi ɖésú nɔ́ jló bó nɔ́ ná mì lɛ́ɛ kpó.

³⁹ “Azavaxwe ɔ́, azǎn afɔtɔngɔ́ e ɖo sun tɛ́nwegɔ́ énɛ́ ɔ́ mɛ ɔ́ wɛ mi ná ɖu dó kpa susu nú mì; mi ka ná kó ya jinukún mitɔn lɛ́ɛ fó, có bó ɖu; mi ná ɖu xwe ɔ́ xɔ azǎn tɛ́nwe. Azǎn nukɔntɔn ɔ́ kpódó tántɔngɔ́ ɔ́ kpó ná nyí gbɔjɛzán.

⁴⁰ Azǎn nukɔntɔn ɔ́ gbe ɔ́, mi ná hɛn atínsínsɛ́n ɖagbe ɖagbe lɛ́ɛ, bó ná ba děma, bó ná ba atín e dó ama ganjí lɛ́ɛ, kpó atín e wú ɖo tɔ tó lɛ́ɛ kpó sín ama hɛn, bó ná j'awǎ ɖo nyɛ Mawu Mavɔmavɔ, Mawu mitɔn nukɔn xɔ azǎn tɛ́nwe.

⁴¹ Xwe wú xwe wú ɔ́, mi ná nɔ́ ɖu xwe énɛ́ ɔ́ dó kpa susu nú mì xɔ azǎn tɛ́nwe ɖo sun tɛ́nwegɔ́ ɔ́ mɛ; mi ná nɔ́ nyi sɛ́n énɛ́ káká sɔ́yi.

⁴² Xwe énɛ́ ɔ́ hwenu ɔ́, mi Izlayɛ́li ví jiji lɛ́ɛ ɔ́, azava glɔ́ wɛ mi bǐ ɖó ná nɔ xɔ azǎn tɛ́nwe,

⁴³ bónú kúnkan mitɔn lɛ́ɛ ná tunwun ɖɔ nyɛ wɛ nyí Mawu Mavɔmavɔ ɔ́. Un ɖó tɛnmɛ nú tɔ́gbó tɔgbo yětɔn lɛ́ɛ ɖó azava sá hwenu e è kplá yě sín Ejípu ɔ́. Nyɛ wɛ nyí Mawu Mavɔmavɔ, Mawu mitɔn.”

⁴⁴ Xwe tɛnmɛ tɛnmɛ e è nǎ nɔ́ ɖu dó kpa susu nú Mawu Mavɔmavɔ ɔ́ lě e Mɔyízi xa nú Izlayɛ́li ví lɛ́ɛ gbɔn ɔ́ nɛ́.