Levíi ví 21 - MAWUXÓWÉMA

¹ Mawu Mavɔmavɔ ɖɔ nú Mɔyízi ɖɔ é ní ɖɔ nú Aalɔ́ɔn ví súnnu vɔ̌sánú-xwlémawutɔ́ lɛ́ɛ ɖɔ: “Vɔ̌sánú-xwlémawutɔ́ ɖó ná sɛkpɔ́ mɛ tɔn ɖé sín cyɔ ǎ; é táá hɛn éɖée blí.

² Afi nú mɛ e kú ɔ́ nyí mɛ tɔn jɔnwun; é sixú nyí nɔ tɔn, abǐ tɔ́ tɔn, abǐ vǐ tɔn, abǐ nɔví tɔn súnnu.

³ É ká nyí nɔví tɔn nyɔ̌nu wɛ, bó kpo ɖo alɔ jí ɔ́, é sixú ɖ'alɔ cyɔ tɔn wú, ɖó éyɛ́ kó yi asú ɖé xwé ǎ.

⁴ Gǎn wɛ vɔ̌sánú-xwlémawutɔ́ nyí ɖo mɛ tɔn lɛ́ɛ mɛ; é ɖó ná hɛn éɖée blí ǎ; é táá sɔ́ éɖée xo kɔ́.

⁵ “Nú cyɔ kú ɔ́, vɔ̌sánú-xwlémawutɔ́ lɛ́ɛ ɖó ná xwlɛ́ ahɔnxlomɛ ǎ; yě ɖó ná xwlɛ́ gekplá yětɔn ǎ; yě ká ɖó ná já wǔtu ǎ.

⁶ Yě ɖó ná sɔ́ yěɖée ɖó vo nú azɔ̌ ce, bó ná lɔn bɔ nyǐkɔ ce ná xo kɔ́ ǎ. Yě wɛ nɔ́ xwlé vɔ̌ e è dó zo ɔ́ nyɛ Mawu Mavɔmavɔ, Mawu yětɔn; nǔɖuɖu ce wɛ. Énɛ́ wútu wɛ yě ɖó ná sɔ́ yěɖée ɖó vo nú mì.

⁷ “Vɔ̌sánú-xwlémawutɔ́ ɖó ná da nyɔ̌nu agalɛtɔ́, abǐ nyɔ̌nu e súnnu ɖěvo ko ɖó xó xá é ǎ; é ká ɖó ná da nyɔ̌nu e asú tɔn kó gbɛ́ é ǎ, ɖó mɛɖeɖóvo wɛ vɔ̌sánú-xwlémawutɔ́ bǐ nyí nú Mawu Mavɔmavɔ tɔn.

⁸ Izlayɛ́li ví ɖokpó ɖokpó ɖó ná tunwun mɛɖeɖóvo Mawu tɔn e vɔ̌sánú-xwlémawutɔ́ lɛ́ɛ nyí ɔ́ sín tɛnmɛ nú yě, ɖó yě wɛ nɔ xwlé nǔɖuɖu e mi nɔ ná nyɛ Mawu mitɔn ɔ́ mì. Mɛ ɖěbǔ ní bó má hɛn mɛ mímɛ́ e yě nyí ɔ́ gblé ó. Nyɛ Mawu Mavɔmavɔ e sɔ́ mi Izlayɛ́li ví lɛ́ɛ, bónú mi ná nyí togun ɖe ɖó vo ɔ́, mǐmɛ́ wɛ un nyí.

⁹ “Nú vɔ̌sánú-xwlémawutɔ́ ɖé sín vǐ nyɔ̌nu sɔ́ aga dó kɔ́n wi nú éɖée ɔ́, tɔ́ tɔn ɖésú wɛ é kɔ́n wi ná; è ɖǒ ná dó e zo gbɛɖe gbɛɖe.

¹⁰ “Vɔ̌sánú-xwlémawutɔ́ ɖaxó ɔ́ wɛ kpa acɛ nú vɔ̌sánú-xwlémawutɔ́ lɛ́ɛ; ami wɛ è ɖǒ ta n'i, bó dó ɖe e ɖó vo nú Mawu, gbe e gbe é yí azɔ̌, bó dó vɔ̌sánú-xwlémawutɔ́ sín awu lɛ́ɛ é. Énɛ́ ɔ́ wú ɔ́, é ná ɖe tablá sín ta ǎ; é ná vún awu dó kɔ nú éɖée, dó ɖe xlɛ́ ɖɔ émí ɖo aluwɛ mɛ ǎ;

¹¹ é ká ɖó ná sɛkpɔ́ mɛkúkú ɖěbǔ ǎ; é táá hɛn éɖée blí. É ná bó nyí tɔ́ tɔn abǐ nɔ tɔn wɛ kú ɔ́, é ná sɛkpɔ́ ǎ.

¹² É ɖo goxɔ énɛ́ ɔ́ mɛ, bónú cyɔ ɖé kú ɔ́, é ɖó ná tɔ́n, bó yi wa cyɔnú ǎ; é táá wá ɖu su nú nyɛ Mawu tɔn sín goxɔ, ɖó ami mímɛ́ wɛ è kɔn dó ta n'i, bó dó ɖe e ɖó vo nú azɔ̌ ce. Nyɛ wɛ nyí Mawu Mavɔmavɔ.

¹³ “Nyɔ̌nu e kpo ɖo alɔ jí é jɛ́n vɔ̌sánú-xwlémawutɔ́ ɔ́ ná da.

¹⁴ É ɖó ná da asúkúsi ǎ; é ɖó ná da nyɔ̌nu e asú tɔn gbɛ́ ɔ́ ǎ; é ɖó ná da agalɛtɔ́ abǐ mɛ e hɛn éɖée blí é ǎ; ɖyɔ̌vǐ e ɖo alɔ jí é ɖokpó wɛ é ná da ɖo mɛ tɔn lɛ́ɛ mɛ,

¹⁵ bó má wá dɔn kún ɖěvo byɔ́ mɛ tɔn lɛ́ɛ mɛ ó. Nyɛ wɛ nyí Mawu Mavɔmavɔ e ɖe e ɖó vo nú azɔ̌ ce é.”

Nǔ e ná zɔ́n bɔ vɔ̌sánú-xwlémawutɔ́ má ná wa azɔ̌ ǎ é

¹⁶ Mawu Mavɔmavɔ ɖɔ nú Mɔyízi ɖɔ

¹⁷ é ní ɖɔ nú Aalɔ́ɔn ɖɔ: “Mɛ ɖěbǔ ɖo vǐ towe lɛ́ɛ mɛ, bó ɖó blɔ̌ ɖo wǔ ɔ́, mɛ ɔ́ ná sɛkpɔ́ vɔ̌sákpe ɔ́, bó ná xwlé nǔɖuɖu nyɛ Mawu tɔn ǎ.

¹⁸ Hǔn, mɛ e ɖó blɔ̌ ɖo wǔ ɔ́ ɖěbǔ sixú wa azɔ̌ énɛ́ ǎ; mɛ ɔ́ sixú nyí nukúntíntɔ́nnɔ, é sixú nyí afɔkponɔ, é sixú nyí awɔngbonɔ, abǐ wǔjɔnú tɔn ɖě ná kó cí alɔkpa ɖé.

¹⁹ Mɛ e lɔ́ afɔ abǐ awa ɔ́ sixú wa azɔ̌ énɛ́ ǎ.

²⁰ Mɛ e nyí kpótɔ́nɔ abǐ mɛ e xú gǒ ɔ́, mɛ e ɖó sí nukún jí é, mɛ e jɛ akli, abǐ mɛ e jɛ gun é, abǐ mɛ e nǔɖé hwe ɖo súnnuxwé tɔn ɔ́ ná sixú wa azɔ̌ énɛ́ ɔ́ ǎ.

²¹ Hǔn mɛ e ɖo vǐ towe lɛ́ɛ mɛ, bó ɖó blɔ̌ ɖo wǔ ɔ́ ɖěbǔ ná sixú sɛkpɔ́ vɔ̌sákpe ɔ́, bó xwlé vɔ̌ e è nɔ dó zo ɔ́ mì ǎ; nǔɖuɖu ce wɛ. Blɔ̌ e ɖo wǔ tɔn ɔ́ ná zɔ́n bɔ é ná wa vɔ̌sánú-xwlémawutɔ́ zɔ́ ǎ.

²² É sixú ɖu nǔɖuɖu e è ɖe ɖó vo nú mì lɛ́ɛ; é wɛ nyí nǔɖuɖu mímɛ́ titewungbe lɛ́ɛ, kpódó nǔɖuɖu mímɛ́ lɛ́ɛ kpó.

²³ Amɔ̌, é sixú sɛkpɔ́ avɔ e è dǒ goxɔ ɔ́ nu ɔ́ ǎ; é ka ná sɛkpɔ́ vɔ̌sákpe e ɖo goxɔ ɔ́ nukɔn ɔ́ ǎ, ɖó wɔ̌n e é gblé ɔ́ wú. É ɖó ná ɖu su nú goxɔ ce ǎ, ɖó nyɛ wɛ nyí Mawu Mavɔmavɔ. Nyɛ wɛ nɔ ɖe vɔ̌sánú-xwlémawutɔ́ lɛ́ɛ ɖó vo nú azɔ̌ ce.”

²⁴ Lě e Mɔyízi dó sɛ́n énɛ́ lɛ́ɛ nú Aalɔ́ɔn kpó vǐ tɔn lɛ́ɛ kpó, kpódó Izlayɛ́li ví lɛ́ɛ bǐ kpó gbɔn ɔ́ nɛ́.