Levíi ví 20 - MAWUXÓWÉMA

Nǔ e è ma ɖó ná sɛn ǎ lɛ́ɛ

¹ Mawu Mavɔmavɔ ɖɔ nú Mɔyízi ɖɔ

² é ní ɖɔ nú Izlayɛ́li ví lɛ́ɛ ɖɔ: “Nú Izlayɛ́li ví abǐ jǒnɔ e ɖo Izlayɛ́li lɛ́ɛ ɖě sɔ́ vǐ tɔn lɛ́ɛ ɖě dó sá vɔ̌ nú vodún Mɔlɛ́ki ɔ́, è nǎ ɖó kúhwɛ n'i; togun ɔ́ ná nyi hwǎn dó hu i.

³ Nyɛ ɖésú ná húzú kpan nukɔn ɛ; un ná ɖe e sín Izlayɛ́li togun ɔ́ mɛ, ɖó é ná vǐ tɔn lɛ́ɛ ɖě vodún Mɔlɛ́ki. Nǔ énɛ́ ɔ́ hɛn goxɔ ce blí, bó zé nyǐkɔ ce xo kɔ́.

⁴ Nú Izlayɛ́li ví lɛ́ɛ myɔ́ nukún dó nǔ énɛ́ lɛ́ɛ, bó má hu mɛ ɔ́ ǎ ɔ́,

⁵ nyɛ Mawu Mavɔmavɔ ɔ́ ɖésú ná sí te dó mɛ ɔ́ jí, bó ná sí te dó xwédo tɔn jí. Un ná ɖe e sín Izlayɛ́li togun ɔ́ mɛ; un ná ɖe mɛ e kpó é kpó nɔ́ sɛn vodún Mɔlɛ́ki lɛ́ɛ bǐ sín Izlayɛ́li togun ɔ́ mɛ.

⁶ “Nú mɛɖé nɔ́ kan bo, abǐ nɔ́ kan nǔ ɔ́, nyɛ Mawu Mavɔmavɔ ɔ́, un ná húzú kpan nukɔn mɛ ɔ́; un ná ɖe e sín Izlayɛ́li togun ɔ́ mɛ; ɖó mɛ e nɔ wa nǔ gbɔn mɔ̌ ɔ́, ɖo gbejí nú mì ǎ.

⁷ “Mi sɔ́ miɖée ɖó vo bó ná nyí ce, ɖó Mawu Mavɔmavɔ, Mawu mitɔn wɛ un nyí.”

Lě e è nǎ dɔn tó nú mɛ e wa nǔ nyi do lɛ́ɛ gbɔn é

⁸ “Mi kpé nukún dó sɛ́n ce lɛ́ɛ wú bó nyi ganjí. Nyɛ wɛ nyí Mawu Mavɔmavɔ e sɔ́ mi ɖó vo, bɔ mi ná nyí togun ce é.

⁹ “Nú mɛɖé dó nu tɔ́ tɔn abǐ nɔ tɔn ɔ́, è ɖǒ ná hu i dandan. É ɖésúnɔ wɛ kú tɔn kan, ɖó é dó nu mɛjitɔ́ tɔn lɛ́ɛ.

¹⁰ “Nú súnnu ɖé ba mɛsi ɔ́, nú súnnu ɖé ba nɔzo tɔn sín asi mɔ̌ ɔ́, è nǎ hu súnnu e ba mɛsi ɔ́ kpódó nyɔ̌nu e dó afɔ gbě ɔ́ kpó dandan.

¹¹ “Nú súnnu ɖé ba tɔ́ tɔn sín asi ɔ́, wi wɛ é kɔ́n nú tɔ́ tɔn. È ɖǒ ná hu súnnu ɔ́ kpó nyɔ̌nu ɔ́ kpó dandan. Yě ɖésúnɔ kɔ wɛ kú yětɔn ná nɔ.

¹² “Nú súnnu ɖé ba vǐ tɔn sín asi ɔ́, è nǎ hu súnnu ɔ́ kpódó nyɔ̌nu ɔ́ kpó dandan, ɖó hɛ̌nnú wɛ yě wa. Yě ɖésúnɔ kɔ wɛ kú yětɔn ná nɔ.

¹³ “Nú súnnu súnnu ɖó xó xá yěɖée ɔ́, su wɛ yě ɖu. È nǎ hu yě mɛ we lɛ́ɛ dandan. Yě nyí súnnu kpó nyɔ̌nu kpó ǎ. Yě ɖésúnɔ kɔ wɛ kú yětɔn ná nɔ.

¹⁴ “Nú súnnu ɖé da vǐ kpódó nɔ kpó ɔ́, hɛ̌nnú wɛ yě wa; è ɖǒ ná dó súnnu ɔ́ kpó nyɔ̌nu we lɛ́ɛ bǐ kpó zo gbɛɖe gbɛɖe, bónú walɔ énɛ́ ɖě má sɔ́ tíin ɖo tɛ́ntin mitɔn ó.

¹⁵ “Nú súnnu ɖé ɖó xó xá kanlin ɔ́, è ɖǒ ná hu i dandan, bó ná hu kanlin ɔ́ lɔmɔ̌ dandan.

¹⁶ “Nú nyɔ̌nu ɖé jó éɖée nú kanlin bɔ é ɖó xó xá ɛ ɔ́, è nǎ hu nyɔ̌nu ɔ́ kpódó kanlin ɔ́ kpó. È ɖǒ ná hu yě dandan; yě ɖésúnɔ kɔ wɛ kú yětɔn ná nɔ.

¹⁷ “Nú súnnu ɖé da tɔ́ ví, abǐ nɔ tɔn ví, bó ɖó xó xá ɛ ɔ́, wunhínhɔ́nnú wɛ yě wa. È nǎ ɖe yě sín togun ɔ́ mɛ, ɖo mɛ bǐ nukún mɛ; xó wɛ é ɖó xá nɔví tɔn, hwɛ tɔn ná nɔ kɔ n'i.

¹⁸ “Nú súnnu ɖé ɖó xó xá nyɔ̌nu e jɛ glegbe ɔ́, è nǎ ɖe yě mɛ we lɛ́ɛ bǐ tɔ́n sín Izlayɛ́li togun ɔ́ mɛ; ɖó yě ɖó gbe kpɔ́, bó mɔ fí e hun nɔ tɔ́n sín é.

¹⁹ “Mi ɖó ná ɖó xó xá daányɔ̌nu mitɔn ǎ, mi ka ɖó ná ɖó xó xá nafí abǐ nagán mitɔn ǎ. Nú súnnu ɖé ɖó xó xá hɛ̌nnumɔ tɔn e sɛkpɔ́ ɛ mɔ̌ ɔ́, hwɛ yě mɛ we lɛ́ɛ tɔn ná nɔ kɔ nú yě.

²⁰ “Nú súnnu ɖé ɖó xó xá atagán tɔn, ataví tɔn, abǐ nylɔ tɔn sín asi ɔ́, wi wɛ é kɔ́n nú mɛ e sín asi é ɖó xó xá é; hwɛ súnnu ɔ́ tɔn kpó nyɔ̌nu ɔ́ tɔn kpó ná nɔ kɔ nú yě, bɔ yě ná kú ma ɖó vǐ.

²¹ “Nú súnnu ɖé yí nɔví tɔn sín asi ɔ́, winnyánú wɛ yě mɛ we lɛ́ɛ wa; yě ná ɖó vǐ ǎ, ɖó súnnu ɔ́ kɔ́n nɔví tɔn sín wi.

²² “Mi kpé nukún dó sɛ́n ce lɛ́ɛ wú bó nyi ganjí, bó kpé nukún dó nǔ e un zɔ́n lɛ́ɛ wú, bó bló gbɔn jí, bónú to e mɛ ná kplá mi yi wɛ un ɖe ɔ́ má wá slú mi sín kɔ ó.

²³ Mi ma xwedó togun e nya sín to lɛ́ɛ mɛ gbé wɛ un ja lɛ́ɛ sín walɔ lɛ́ɛ ó. Nǔ énɛ́ e yě wa nyi do ɔ́ wú wɛ un gbɛ́ wǎn nú yě.

²⁴ Bó ɖɔ nú yě ɖɔ: ‘Mitɔn wɛ ayǐkúngban yětɔn ná nyí; to énɛ́ e mɛ anɔ̌sin kpódó wǐin kpó gɔ́ ɔ́, nyɛ wɛ ná mi.’ Nyɛ wɛ nyí Mawu Mavɔmavɔ, Mawu mitɔn e ɖe mi ɖó vo nú togun ɖě lɛ́ɛ é.

²⁵ Énɛ́ ɔ́ wú wɛ mi ɖó ná tunwun kanlin e vɛ́ mi lɛ́ɛ kpódó éé má vɛ́ mi ǎ lɛ́ɛ kpó; mi ɖó ná tunwun xɛ e vɛ́ mi lɛ́ɛ, kpódó éé má vɛ́ mi ǎ lɛ́ɛ kpó; mi ɖó ná ɖ'alɔ kanlin énɛ́ lɛ́ɛ, xɛ énɛ́ lɛ́ɛ, abǐ nǔvínúví énɛ́ lɛ́ɛ e vɛ́ mi lɛ́ɛ wú, bó dó hɛn miɖée blí ǎ. Un ɖe ɖě ɖó vo nú ɖě bónú mi ná tunwun éé vɛ́ mi lɛ́ɛ.

²⁶ “Mi nyí nyɛ ɖokpónɔ géé tɔn, bó ná nyí mɛ mímɛ́, ɖó nyɛ Mawu Mavɔmavɔ ɔ́, mǐmɛ́ wɛ un nyí. Un ɖe mi ɖó vo nú akɔta ɖě lɛ́ɛ, bónú mi ná nyí ce.

²⁷ “Nú súnnu ɖé, abǐ nyɔ̌nu ɖé, nɔ́ kan bo, bó nɔ́ kan nǔ byɔ́ mɛkúkú lɛ́ɛ nú mɛ ɔ́, è ɖǒ ná hu yě; hwǎn wɛ è nǎ nyi dó hu yě ná. Yě ɖésúnɔ kɔ wɛ kú yětɔn ná nɔ.”