Levíi ví 19 - MAWUXÓWÉMA

¹ Mawu Mavɔmavɔ ɖɔ nú Mɔyízi ɖɔ

² é ní ɖɔ nú Izlayɛ́li ví lɛ́ɛ bǐ ɖɔ: “Mi nyí mɛ mímɛ́, ɖó nyɛ Mawu Mavɔmavɔ, Mawu mitɔn ɔ́, mǐmɛ́ wɛ un nyí.

³ “Mi ɖokpó ɖokpó ɖó ná nɔ́ sí tɔ́ mitɔn kpódó nɔ mitɔn kpó, bó ná nɔ́ nyi gbɔjɛzán ɔ́; nyɛ wɛ nyí Mawu Mavɔmavɔ, Mawu mitɔn.

⁴ “Mi ma lɛ́ kɔ yi vodún lɛ́ɛ kɔn ó; mi ma ka sínsín gan dó kɔn bǒcyɔ ná ó. Nyɛ wɛ nyí Mawu Mavɔmavɔ, Mawu mitɔn.

⁵ “Mi ɖo kɔnɖókpɔ́ vɔ́ ná sá nú nyɛ Mawu Mavɔmavɔ wɛ hǔn, mi sá lě e mi ná sá gbɔn bɔ un ná yí é.

⁶ Kanlin e mi ná dó sá vɔ̌ ɔ́ ná ɔ́, mi ná ɖu lan tɔn gbe énɛ́ gbe, bó ɖu ayǐhɔ́ngbe. É lɛ́ kpo jɛ azǎn atɔn gbe ɔ́, mi ná dó zo.

⁷ Ényí mɛɖé ɖu lan énɛ́ ɔ́ azǎn tɔn atɔngɔ́ ɔ́ gbe ɔ́, un ná yí mɛ énɛ́ ɔ́ sín vɔ̌ ǎ, ɖó lan énɛ́ ɔ́ húzú suɖunú.

⁸ Mɛ e ná ɖu ɔ́, hwɛ tɔn ná nɔ kɔ n'i, ɖó é ɖu su nú nǔ e nyí nyɛ Mawu Mavɔmavɔ ɔ́ tɔn é. È nǎ ɖe mɛ énɛ́ ɔ́ sín togun ɔ́ mɛ.

⁹ “Nú mi ɖo nǔkún ya wɛ hǔn, mi ma ya éé wú gbɔn gle mitɔn lɛ́ɛ tó é ó. Mi ka ya nǔkún ɔ́, mi ná lɛ́ kɔ wá cyán nǔkún e mi blɛ́ lɛ́ɛ ǎ.

¹⁰ Mɔ̌ ɖokpó ɔ́, mi ma lɛ́ kɔ yi gbɛ vǐwun e mi blɛ́ gbɔn vǐwungbo mitɔn lɛ́ɛ mɛ lɛ́ɛ ó; mi ma ka cyán éé kɔn nyi kɔ́ mɛ lɛ́ɛ ó; mi ná jó dó nú wamamɔnɔ lɛ́ɛ, kpódó jǒnɔ lɛ́ɛ kpó. Nyɛ wɛ nyí Mawu Mavɔmavɔ, Mawu mitɔn.

¹¹ “Mi ma jɛ ajo dó miɖée ó; mi ma hízí miɖée ó; mi ma ka ɖó adingban nú miɖée ó.

¹² Mi ma ɖó adingban bó xwlé nyǐkɔ ce d'é jí ó, ɖó nú mi bló mɔ̌ ɔ́, mi ná sɔ́ nyɛ Mawu mitɔn sín nyǐkɔ xo kɔ́. Nyɛ wɛ nyí Mawu Mavɔmavɔ.

¹³ “Mi ma táfú nɔzo mitɔn ó; mi ma ka fin mɛɖé nú ó; mi ma gɔn axɔ́ sú mɛ e wa azɔ̌ nú mi é, bónú ayǐ hɔ́n dó ó.

¹⁴ Mi ma zun tókúnɔ ó, mi ma ka sɔ́ nǔ ɖó alixo nú nukúntíntɔ́nnɔ bónú é wá klɛ́n afɔ d'é wú ó. Mi ná ɖi xɛsi nú nyɛ Mawu mitɔn. Nyɛ wɛ nyí Mawu Mavɔmavɔ.

¹⁵ “Mi ma dó hwɛ agɔ ó. Mi ɖo hwɛ ɖɔ wɛ hǔn, mi ma kpɔ́n wamamɔnɔ nukún ta dó ɖɔ hwɛ ó, mi ma ka kpɔ́n dɔkunnɔ nukún ta dó ɖɔ hwɛ ó. Mi xwedó hwɛjijɔ dó ɖɔ hwɛ.

¹⁶ Mi ma ɖo hɛ̌n dó nɔzo mitɔn kpé wɛ ó; mi ma ka dó hwɛ nɔzo mitɔn dó acɛ jí, bónú é sín énɛ́ wú, bɔ è ɖǒ kúhwɛ n'i ó. Nyɛ wɛ nyí Mawu Mavɔmavɔ.

¹⁷ “Mi ma gbɛ́ wǎn nú nɔzo mitɔn ó; é wa nǔ nyi do hǔn, mi gbɛ́ n'i; amɔ̌, mi ma hɛn ɛ dó xomɛ, bó wá hu hwɛ ó.

¹⁸ Mi ma ba hlɔn ó; mi ma ka hɛn to mitɔn mɛ nu lɛ́ɛ dó xomɛ ó. Lo ɔ́, mɛ ɖokpó ɖokpó ɖó ná yí wǎn nú nɔzo tɔn é ɖésúnɔ ɖɔhun. Nyɛ wɛ nyí Mawu Mavɔmavɔ.

¹⁹ “Mi ná nyi sɛ́n ce lɛ́ɛ. Mi ma dɔn kanlin alɔkpa vovo we kplé, bónú yě dó ava nú yěɖée ó. Mi ma dó nǔkún alɔkpa vovo we dó gle ɖokpó ɔ́ mɛ ó; mi ma dó avɔ e è sɔ́ kan alɔkpa vovo we dó lɔn ná ɔ́ sín awu ó.

²⁰ “Nú nyɔ̌nu ɖé nyí kannumɔ bó má ko jɛ éɖée sí ǎ, bɔ è ma ko vɔ́ ɛ xɔ ǎ, bɔ é ká kó ɖó asú xɔ́ntɔn, bónú súnnu ɖé ɖó xó xá ɛ ɔ́, è nǎ dɔn tó nú yě mɛ we lɛ́ɛ bǐ; amɔ̌, è nǎ hu yě, ɖó nyɔ̌nu ɔ́ kpo ɖo mɛ kannu wú ǎ.

²¹ Súnnu ɔ́ ná hɛn agbo e é ná dó sú hwɛ xɔ́ é ɖokpó wá nú Mawu Mavɔmavɔ ɖo goxɔ ɔ́ nukɔn, bɔ è nǎ dó sá hwɛxɔ́súsú vɔ́.

²² Vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó sá hwɛxɔ́súsú vɔ́ ɔ́, bó ná súnsún hwɛ sín kɔ n'i, ɖo Mawu Mavɔmavɔ nukɔn, bɔ Mawu Mavɔmavɔ ná sɔ́ hwɛ tɔn kɛ ɛ.

²³ “Nú mi yi Kanáa, bó dó atínsínsɛ́n tɛnmɛ tɛnmɛ lɛ́ɛ bǐ ɔ́, mi ná mɔ sínsɛ́n lɛ́ɛ dó mɔ nǔ vɛ́ mɛ káká nú xwe atɔn; mi ná ɖu ǎ.

²⁴ Xwe ɛnɛgɔ́ ɔ́ mɛ ɔ́, sínsɛ́n e yě ná ná lɛ́ɛ ɔ́, mi ná sɔ́ ɖó vo dó kpa susu nú nyɛ Mawu Mavɔmavɔ.

²⁵ Xwe atɔ́ɔ́ngɔ́ ɔ́ mɛ ɔ́, sínsɛ́n e mi ná gbɛ lɛ́ɛ ná nyí mi ɖésúnɔ tɔn. Mi bló mɔ̌ ɔ́, ji ná nɔ́ ɖo jijɛ nú mi d'é jí wɛ. Nyɛ wɛ nyí Mawu Mavɔmavɔ, Mawu mitɔn.

²⁶ “Mi ma ɖu lan hunmú ɖo nu ó. Mi ma bló majíki ó; mi ma kan nǔ ó.

²⁷ Mi ma sín ɖa ɖó ta toboo ó; mi ma xwlɛ́ gekplá mitɔn lɛ́ɛ ó.

²⁸ Mi ma já wǔtu miɖée tɔn ó; mi ma ka gbo hwɛ ó; mi ma wa nǔ énɛ́ lɛ́ɛ dó ɖe xlɛ́ ɖɔ émí ɖo aluwɛ mɛ ó. Nyɛ wɛ nyí Mawu Mavɔmavɔ.

²⁹ “Mi ma jó nyɔ̌nuví mitɔn lɛ́ɛ dó, bónú yě ní lɛ aga dó sɛn hun, bɔ wi ná kɔ́n sín ta nú yě ó; é má nyí mɔ̌ ǎ ɔ́, to ɔ́ bǐ táá bɛ́ aga, bɔ hɛ̌nnú ná kpé to ɔ́ mɛ.

³⁰ Mi nyi gbɔjɛzán ɔ́, bó ɖó sísí nú goxɔ ce. Nyɛ wɛ nyí Mawu Mavɔmavɔ.

³¹ “Mi ma kan bo ó; mi ma ka kan nǔ ó; é má nyí mɔ̌ ǎ ɔ́, mi táá hɛn miɖée blí. Nyɛ wɛ nyí Mawu Mavɔmavɔ, Mawu mitɔn.

³² “Mi mɔ mɛxó, hwa ɖo ta ɔ́, mi ná nɔ́ sí te kpó sísí kpó. Mi ná ɖó sísí nú nyɛ Mawu mitɔn. Nyɛ wɛ nyí Mawu Mavɔmavɔ.

³³ “Nú jǒnɔ ɖé wá jɛ to mitɔn mɛ hǔn, mi ma blɛ́ ɛ ɖu ó.

³⁴ É nyɔ́ wa ɔ́, mi ní hɛn ɛ ɖi to mitɔn mɛ nu wɛ é nyí ɖɔhun; mi ɖó ná yí wǎn n'i mi ɖésúnɔ ɖɔhun; mi ní flín ɖɔ émí ɖésúnɔ kó nyí jǒnɔ ɖo Ejípu tomɛ kpɔ́n. Nyɛ wɛ nyí Mawu Mavɔmavɔ, Mawu mitɔn.

³⁵ “Mi ɖo hwɛ ɖɔ wɛ hǔn, mi má dó hwɛ agɔ ó. Mi ma zé nǔjlɛ́kpo e má sɔgbe é ǎ dó jlɛ́ nǔ ó; mi ma zé nǔdagan e ma sɔgbe ǎ é dó da nǔ ó; mi ma ka zé nǔjlɛ́ká e ma sɔgbe ǎ é dó jlɛ́ nǔ ó.

³⁶ É nyɔ́ wa ɔ́, nǔdagan e sɔgbe ɔ́ wɛ mi ná nɔ́ zán; kilóo e sɔgbe ɔ́ wɛ mi ná nɔ́ zán, nǔjlɛ́nú e sɔgbe ɔ́ wɛ mi ná nɔ́ zán. Nyɛ wɛ nyí Mawu Mavɔmavɔ, Mawu mitɔn e ɖe mi tɔ́n sín Ejípu é.

³⁷ “Mi ná nyi sɛ́n ce lɛ́ɛ bǐ, bó ná xwedó nǔ e un ɖɔ lɛ́ɛ bǐ. Mi ná nɔ xwedó yě dó wa nǔ. Nyɛ wɛ nyí Mawu Mavɔmavɔ.”