Levíi ví 18 - MAWUXÓWÉMA

¹ Mawu Mavɔmavɔ ɖɔ nú Mɔyízi ɖɔ

² é ní ɖɔ nú Izlayɛ́li ví lɛ́ɛ ɖɔ: “Nyɛ wɛ nyí Mawu Mavɔmavɔ, Mawu mitɔn!

³ Mi ma nɔ wa nǔ e è nɔ wa ɖo Ejípu fí e mi nɔ é ó. Mi ma ka wa nǔ e è nɔ wa ɖo Kanáa fí e un kplá mi xwe ɔ́ ó. Mi ma xwedó walɔ yětɔn lɛ́ɛ ó.

⁴ Nǔ e un zɔ́n lɛ́ɛ wɛ mi ná nɔ́ bló. Sɛ́n ce lɛ́ɛ wɛ mi ná nɔ́ nyi. Nyɛ wɛ nyí Mawu Mavɔmavɔ, Mawu mitɔn.

⁵ “Hǔn, mi ná nɔ́ nyi sɛ́n ce lɛ́ɛ; mi ná nɔ́ wa nǔ e un zɔ́n lɛ́ɛ. Mɛ e ná bló mɔ̌ ɔ́ ná nɔ gbɛ. Nyɛ wɛ nyí Mawu Mavɔmavɔ.

⁶ “Izlayɛ́li ví ɖěbǔ ɖó ná ɖó xó xá nyɔ̌nu e nyí mɛ tɔn é ǎ. Nyɛ wɛ nyí Mawu Mavɔmavɔ.

⁷ “Mi ɖó ná ɖó xó xá nɔ mitɔn, bó dó kɔ́n tɔ́ mitɔn wi ǎ. Nú mi bló mɔ̌ ɔ́, mi ná kɔ́n nɔ mitɔn lɔ sín wi, ɖó é wɛ ji mi.

⁸ “Mi ɖó ná ɖó xó xá tɔ́ mitɔn sín asi ǎ; nú mi bló mɔ̌ ɔ́, mi kɔ́n tɔ́ mitɔn sín wi.

⁹ “Mi ɖó ná ɖó xó xá tɔ́ mitɔn, abǐ nɔ mitɔn sín vǐ ǎ. Nú é ná bó má nɔ hɛ̌nnu ɖokpó ɔ́ mɛ xá mi bó su ǎ ɔ́, mi ɖó ná ɖó xó xá ɛ ǎ.

¹⁰ “Mi ɖó ná ɖó xó xá vǐ mitɔn súnnu abǐ nyɔ̌nu sín vǐ ǎ. Nú mi bló mɔ̌ ɔ́, mi kɔ́n miɖée wi.

¹¹ “Mi ɖó ná ɖó xó xá tɔ́ mitɔn sín asi ɖé sín vǐ ǎ; é va dó tɔ́ mitɔn wú; hǔn nɔví mitɔn wɛ é nyí.

¹² “Mi ɖó ná ɖó xó xá daányɔ̌nu ɖé ǎ, ɖó tɔ́ mitɔn nɔví wɛ é nyí.

¹³ “Mi ɖó ná ɖó xó xá nafí abǐ nagán ɖé ǎ, ɖó nɔ mitɔn nɔví wɛ é nyí.

¹⁴ “Mi ɖó ná ɖó xó xá atagán mitɔn abǐ ataví mitɔn sín asi, bó dó kɔ́n tɔ́ mitɔn sín wi ǎ; ɖó tɔ́ mitɔn nɔví sín asi wɛ é nyí.

¹⁵ “Mi ɖó ná ɖó xó xá vǐ mitɔn sín asi ǎ.

¹⁶ “Mi ɖó ná ɖó xó xá nɔví mitɔn sín asi bó dó kɔ́n nɔví mitɔn sín wi ǎ.

¹⁷ “Mi ɖó ná ɖó xó xá nyɔ̌nu ɖé, bó lɛ́ ɖó xó xá vǐ tɔn ǎ; mi ka ɖó ná ɖó xá vǐvú tɔn nyɔ̌nu ǎ. Nú mi blǒ mɔ̌ hǔn, nǔblíblí tawun wɛ mi wa; ɖó mɛ mitɔn tawun wɛ yě nyí.

¹⁸ “Nú asi mitɔn kpo ɖo gbɛ ɔ́, mi ɖó ná da nɔví tɔn ǎ. Nú mi bló mɔ̌ ɔ́, mi ná dɔn hunnyahunnya byɔ́ tɛ́ntin yětɔn.

¹⁹ “Mi ɖó ná ɖó xó xá nyɔ̌nu ɖé hwenu e é jɛ glegbe ɔ́ ǎ; ɖó mɛ blíblí wɛ nyɔ̌nu ɔ́ nyí hwenɛ́nu.

²⁰ “Mi ɖó ná ɖó xó xá gbɛ̌ mitɔn ɖé sín asi ǎ; nú mi bló mɔ̌ ɔ́, é ná hɛn mi blí.

²¹ “Mi ɖó ná zé vǐ mitɔn lɛ́ɛ dó sá vɔ̌ nú vodún Mɔlɛ́ki ǎ. Nú mi bló mɔ̌ ɔ́, mi ná hɛn nyǐkɔ ce blí; nyɛ wɛ nyí Mawu Mavɔmavɔ.

²² “Súnnu súnnu ɖó ná ɖó xó xá yěɖée ǎ; yě nyí súnnu kpó nyɔ̌nu kpó ǎ. Mi bló mɔ̌ hǔn, su wɛ mi ɖu.

²³ “Mi ɖó ná ɖó xó xá kanlin ǎ, ɖó é ná hɛn mi blí. Mɔ̌ ɖokpó ɔ́, nyɔ̌nu ɖěbǔ ɖó ná jó éɖée nú kanlin bɔ é ná ɖó xó xá ɛ ǎ; é bló mɔ̌ hǔn, nǔ e è ma ɖó ná wa gbeɖé ǎ ɔ́ wɛ é wa.

²⁴ “Mi ma zán walɔ énɛ́ lɛ́ɛ ɖěbǔ ó; mi bló mɔ̌ ɔ́, mi ná hɛn miɖée blí; mɔ̌ wɛ togun e nya gbé un ja, bɔ mi ná yí tɛn yětɔn lɛ́ɛ wa nǔ gbɔn, bó húzú mɛ blíblí.

²⁵ To ɔ́ ɖésú húzú to blíblí; un dɔn tó n'i bɔ é slú to ɔ́ mɛ nu lɛ́ɛ.

²⁶ “Hǔn, mi Izlayɛ́li ví lɛ́ɛ, kpódó mi jǒnɔ e ɖo Izlayɛ́li ví lɛ́ɛ mɛ lɛ́ɛ kpó ní nyi sɛ́n ce lɛ́ɛ, bó nɔ́ wa nǔ e un zɔ́n lɛ́ɛ. Mi gbɛ́ walɔ gblégblé énɛ́ lɛ́ɛ bǐ; su wɛ.

²⁷ Nǔ énɛ́ lɛ́ɛ wɛ mɛ e nɔ to ɔ́ mɛ jɛ nukɔn nú mi lɛ́ɛ dó sin, bɔ to ɔ́ húzú to blíblí.

²⁸ Mi ma hɛn to ɔ́ blí, bónú to ɔ́ wá slú mi lě e é slú mɛ e jɛ nukɔn nú mi lɛ́ɛ gbɔn é ó.

²⁹ Nǔgbó ɔ́, mɛ e nɔ wa nǔ e è ma ɖó ná bló gbeɖé ǎ lɛ́ɛ ɔ́, è nǎ ɖe yě bǐ sín Izlayɛ́li togun ɔ́ mɛ.

³⁰ “Mi xwedó nǔ e un ɖɔ nú mi lɛ́ɛ, bó nɔ gbejí ná. Mi ma xwedó walɔ gblégblé e ko ɖo to ɔ́ mɛ ɖ'ayǐ có mi wa ɔ́ ó; mi bló mɔ̌ ɔ́, mi ná hɛn miɖée blí. Nyɛ wɛ nyí Mawu Mavɔmavɔ, Mawu mitɔn.”