Levíi ví 13 - MAWUXÓWÉMA

¹ Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ:

² “Hwenu e nǔtitɛ ɖé abǐ gun, abǐ nǔ alɔkpa ɖé ná tɔ́n ɖo mɛ ɖé wú, bɔ è nǎ mɔ ɖɔ gudu wɛ ɔ́, è nǎ kplá mɛ énɛ́ ɔ́ yi vɔ̌sánú-xwlémawutɔ́ Aalɔ́ɔn, abǐ vǐ tɔn súnnu lɛ́ɛ ɖokpó gɔ́n.

³ Vɔ̌sánú-xwlémawutɔ́ ɔ́ ná kpɔ́n fí e nǔ ɔ́ ɖe ɖo wǔ tɔn ɔ́. Nú fún e ɖo fí ɔ́ é wé, bɔ fí ɔ́ jɛ do wán jí hǔn, gudu wɛ. Énɛ́ ɔ́, vɔ̌sánú-xwlémawutɔ́ ɔ́ ná ɖɔ ɖɔ mɛ blíblí wɛ.

⁴ Nú é ká nyí ɖɔ nǔ wěwé ɖé wɛ tɔ́n ɖo wǔ tɔn, bɔ fí ɔ́ má wán do ǎ, bɔ fún lɛ́ɛ má wé ǎ ɔ́, vɔ̌sánú-xwlémawutɔ́ ɔ́ ná ɖe mɛ e wú nǔ ɔ́ tɔ́n ɖe ɔ́ ɖó vo xɔ azǎn tɛ́nwe.

⁵ Azǎn tɛ́nwegɔ́ ɔ́ gbe ɔ́, é ná wá, bɔ vɔ̌sánú-xwlémawutɔ́ ɔ́ ná lɛ́ kpɔ́n ɛ. Nú é mɔ ɖɔ lě e nǔ ɔ́ ɖe ɔ́ jɛ́n é ɖe, bó má sɔ́ gbló d'é jí ǎ ɔ́, é ná lɛ́ kɔ nú azunzɔnnɔ ɔ́ yi fí e é ɖe ɔ́ bɔ é ná lɛ́ nɔ fínɛ́ xɔ azǎn tɛ́nwe ɖěvo.

⁶ Azǎn tɛ́nwegɔ́ ɔ́ gbe ɔ́, vɔ̌sánú-xwlémawutɔ́ ɔ́ ná lɛ́ vɔ́ kpɔ́n ɛ. Nú nǔ e tɔ́n ɖo wǔ tɔn ɔ́ sín nukún mɛ xú, bó má sɔ́ gbló d'é jí ǎ ɔ́, vɔ̌sánú-xwlémawutɔ́ ɔ́ ná ɖɔ mɛ mímɛ́ wɛ mɛ ɔ́ nyí; é ná ɖɔ gun kpowun wɛ ɖo wǔ tɔn. Nǔ e mɛ ɔ́ ná wa kpowun ɔ́ wɛ nyí ɖɔ é ná nya avɔ tɔn lɛ́ɛ, bó ná nyí mɛ mímɛ́.

⁷ Lo ɔ́, éé vɔ̌sánú-xwlémawutɔ́ ɔ́ kpɔ́n mɛ ɔ́, bó ɖɔ é nyí mɛ mímɛ́, bɔ énɛ́ ɔ́ gúdo ɔ́ gun e ɖo wǔ tɔn ɔ́ jɛ gblǒgbló jí ɔ́, mɛ ɔ́ ná lɛ́ lɛ́ kɔ wá vɔ̌sánú-xwlémawutɔ́ ɔ́ gɔ́n,

⁸ bɔ vɔ̌sánú-xwlémawutɔ́ ɔ́ ná lɛ́ vɔ́ kpɔ́n ɛ. Nú é mɔ ɖɔ gun ɔ́ lɛ́ vɔ́ gbló d'é jí ɔ́, é ná ɖɔ mɛ blíblí wɛ. Nǔ e ɖo wǔ tɔn ɔ́ gudu wɛ.

⁹ “Hǔn, nú gudu tɔ́n ɖo mɛɖé wú ɔ́, è nǎ kplá mɛ ɔ́ yi vɔ̌sánú-xwlémawutɔ́ ɔ́ gɔ́n.

¹⁰ Bɔ vɔ̌sánú-xwlémawutɔ́ ɔ́ ná kpɔ́n ɛ. Nú nǔtitɛ wěwé ɖé wɛ ɖo wǔ tɔn, bɔ fún lɛ́ɛ wé, bɔ lanti tɔ́n ɖ'é mɛ ɔ́,

¹¹ hǔn gudu ɔ́ kó dó ve nɛ́. Vɔ̌sánú-xwlémawutɔ́ ɔ́ ná ɖɔ mɛ blíblí wɛ. É sɔ́ byɔ́ ɖɔ è nǎ ɖe e ɖó vo, bɔ è nǎ ɖo kpínkpɔ́n wɛ ǎ, ɖó é kó ɖo gaan ɖɔ mɛ blíblí wɛ.

¹² É ká ɖo mɔ̌ có, nú vɔ̌sánú-xwlémawutɔ́ ɔ́ mɔ ɖɔ gudu kpé mɛ ɔ́ wú bǐ sín ta káká wá yi afɔ ɔ́,

¹³ hǔn, é ná lɛ́ vɔ́ mɛ ɔ́ kpɔ́n xéɖéxéɖé. Nú é mɔ ɖɔ gudu ɔ́ kpé wǔ tɔn bǐ nǔgbó ɔ́, é ná ɖɔ ɖɔ mɛ ɔ́, mɛ mímɛ́ wɛ, ɖó wǔtu tɔn bǐ wɛ wé.

¹⁴ Amɔ̌, gbe e gbe lanti ɖé ná tɔ́n ɖo mɛ ɔ́ wú ɔ́, mɛ ɔ́ húzú mɛ blíblí.

¹⁵ Vɔ̌sánú-xwlémawutɔ́ ɔ́ ná kpɔ́n mɛ ɔ́; nú é mɔ ɖɔ lanti tɔ́n ɔ́, é ná ɖɔ ɖɔ mɛ ɔ́ mɛ blíblí wɛ. Lanti e tɔ́n ɔ́, nǔblíblí wɛ, gudu wɛ.

¹⁶ Nú fí e lanti ɔ́ tɔ́n ɖe ɔ́ lɛ́ wé ɔ́, mɛ ɔ́ ná lɛ́ kɔ yi vɔ̌sánú-xwlémawutɔ́ ɔ́ gɔ́n.

¹⁷ Vɔ̌sánú-xwlémawutɔ́ ɔ́ ná kpɔ́n ɛ. Nú é kpɔ́n ɛ bó mɔ ɖɔ akpa ɔ́ wé nǔgbó ɔ́, é ná ɖɔ ɖɔ mɛ ɔ́ mɛ mímɛ́ wɛ.

¹⁸ “Nú akpa ɖo mɛɖé wú bó kó kú,

¹⁹ bɔ nǔtitɛ wěwé abǐ nǔ tɔ́n ɖo wǔ wěwé ɖé tɔ́n ɖo akpa do ɔ́ mɛ, bó myá d'é mɛ ɔ́, mɛ ɔ́ ná yi mɔ vɔ̌sánú-xwlémawutɔ́.

²⁰ Bɔ vɔ̌sánú-xwlémawutɔ́ ɔ́ ná kpɔ́n fí e nǔ ɔ́ ɖe ɔ́. Nú é mɔ ɖɔ nǔ tɔ́n ɖo wǔ e tɔ́n ɖo akpa do ɔ́ mɛ ɔ́ wán do, bɔ fún e ɖ'é mɛ ɔ́ wé ɔ́, vɔ̌sánú-xwlémawutɔ́ ɔ́ ná ɖɔ ɖɔ mɛ blíblí wɛ mɛ ɔ́ nyí, ɖó gudu sín akpa wɛ tɔ́n ɖo akpa do ɔ́ mɛ.

²¹ Amɔ̌, nú vɔ̌sánú-xwlémawutɔ́ ɔ́ má mɔ fún wěwé ɖé ɖ'é mɛ ǎ, nú nǔ tɔ́n ɖo wǔ ɔ́ má wán do ǎ, bónú nukún mɛ tɔn kó xú ɔ́, vɔ̌sánú-xwlémawutɔ́ ɔ́ ná ɖe azinzɔnnɔ ɔ́ ɖó vo xɔ azǎn tɛ́nwe.

²² Énɛ́ ɔ́ gúdo ɔ́, ényí ɖɔ nǔ tɔ́n ɖo wǔ ɔ́ gbló ɔ́, vɔ̌sánú-xwlémawutɔ́ ɔ́ ná ɖɔ ɖɔ mɛ blíblí wɛ mɛ ɔ́ nyí, ɖó gudu wɛ.

²³ Lo ɔ́, nú fí e nǔ tɔ́n ɖo wǔ ɔ́ ɖe ɔ́ jɛ́n é ɖe, bɔ é má sɔ́ gbló d'é jí ǎ ɔ́, hǔn gudu sín akpado kpowun wɛ. Énɛ́ ɔ́, vɔ̌sánú-xwlémawutɔ́ ɔ́ ná ɖɔ ɖɔ mɛ ɔ́, mɛ mímɛ́ wɛ.

²⁴ “Mǐ ní ɖɔ myɔkpa ɖo mɛɖé wú, bɔ nǔ tɔ́n ɖo wǔ wěwé ɖé tɔ́n ɖ'é mɛ, abǐ nú nǔ tɔ́n ɖo wǔ ɔ́ wé, bó myá d'é mɛ ɔ́, vɔ̌sánú-xwlémawutɔ́ ɔ́ ná kpɔ́n ɛ.

²⁵ Nú é mɔ ɖɔ fún e ɖo nǔ tɔ́n ɖo wǔ ɔ́ mɛ ɔ́ wé, bɔ nǔ tɔ́n ɖo wǔ ɔ́ wán do ɔ́, hǔn gudu wɛ tɔ́n ɖo myɔkpa ɔ́ mɛ. Vɔ̌sánú-xwlémawutɔ́ ɔ́ ná ɖɔ ɖɔ mɛ ɔ́ mɛ blíblí wɛ, ɖó gudu wɛ.

²⁶ Nú vɔ̌sánú-xwlémawutɔ́ ɔ́ mɔ ɖɔ fún wěwé kún tɔ́n ɖo nǔ tɔ́n ɖo wǔ ɔ́ mɛ ó, bɔ nǔ tɔ́n ɖo wǔ ɔ́ má wán do ǎ, bɔ nukún mɛ tɔn kó fyɔ́ ɔ́, vɔ̌sánú-xwlémawutɔ́ ɔ́ ná ɖe mɛ ɔ́ ɖó vo xɔ azǎn tɛ́nwe.

²⁷ Azǎn tɛ́nwegɔ́ ɔ́ gbe ɔ́, vɔ̌sánú-xwlémawutɔ́ ɔ́ ná kpɔ́n ɛ. Nú é mɔ ɖɔ nǔ tɔ́n ɖo wǔ ɔ́ gbló ɔ́, é ná ɖɔ ɖɔ mɛ ɔ́, mɛ blíblí wɛ, ɖó gudu wɛ.

²⁸ Lo ɔ́, nú nǔ tɔ́n ɖo wǔ ɔ́ nɔ tɛn ɖokpó ɔ́ mɛ, bó má gbló ǎ, bɔ nukún mɛ tɔn fyɔ́ hǔn, myɔkpa kpowun wɛ. Vɔ̌sánú-xwlémawutɔ́ ɔ́ ná ɖɔ ɖɔ mɛ mímɛ́ wɛ mɛ ɔ́ nyí, ɖó myɔ sín akpado wɛ.

²⁹ “Nú akpa ɖo ta abǐ gbakɔ nú súnnu ɖé, abǐ nyɔ̌nu ɖé ɔ́,

³⁰ vɔ̌sánú-xwlémawutɔ́ ɔ́ ná kpɔ́n akpa ɔ́. Nú é mɔ ɖɔ akpa ɔ́ wán do, bɔ fún wínníwínní koklójónɔ ɖé ɖ'é mɛ ɔ́, vɔ̌sánú-xwlémawutɔ́ ɔ́ ná ɖɔ mɛ blíblí wɛ mɛ ɔ́ nyí, ɖó lakpálakpá wɛ ɖo ta abǐ gbakɔ n'i.

³¹ Nú é ká mɔ ɖɔ lakpálakpá sín akpa ɔ́ kún wán do ó, bɔ fún wiwi kún ɖ'é mɛ ó ɔ́, é ná ɖe mɛ ɔ́ ɖó vo xɔ azǎn tɛ́nwe.

³² Azǎn tɛ́nwegɔ́ ɔ́ gbe ɔ́, vɔ̌sánú-xwlémawutɔ́ ɔ́ ná lɛ́ kpɔ́n ɛ. Nú é mɔ ɖɔ lakpálakpá ɔ́ kún gbló d'é jí ó, bɔ fún koklójónɔ kún tɔ́n ɖ'é mɛ ó, bɔ é kún wán do ó ɔ́,

³³ mɛ e wú lakpálakpá ɔ́ ɖe ɔ́ ná xwlɛ́ ta; é ká ná xwlɛ́ fí e lakpálakpá ɔ́ ɖe ɔ́ ǎ, bɔ vɔ̌sánú-xwlémawutɔ́ ɔ́ ná lɛ́ ɖe e ɖó vo azɔn wegɔ́ ɔ́ xɔ azǎn tɛ́nwe.

³⁴ Azǎn tɛ́nwegɔ́ ɔ́ gbe ɔ́, vɔ̌sánú-xwlémawutɔ́ ɔ́ ná lɛ́ kpɔ́n ɛ. Nú é mɔ ɖɔ lakpálakpá ɔ́ kún sɔ́ gbló d'é jí ó, é kún ká sɔ́ wán do ó ɔ́, vɔ̌sánú-xwlémawutɔ́ ɔ́ ná ɖɔ ɖɔ mɛ mímɛ́ wɛ mɛ ɔ́ nyí. É ná nya avɔ tɔn lɛ́ɛ, bó ná nyí mɛ mímɛ́.

³⁵ Amɔ̌, nú vɔ̌sánú-xwlémawutɔ́ ɔ́ ɖɔ é nyí mɛ mímɛ́ bɔ énɛ́ ɔ́ gúdo ɔ́, lakpálakpá ɔ́ lɛ́ wá gbló d'é jí ɔ́, vɔ̌sánú-xwlémawutɔ́ ɔ́ ná lɛ́ kpɔ́n ɛ.

³⁶ Nú é mɔ ɖɔ lakpálakpá ɔ́ gbló d'é jí ɔ́, énɛ́ ɔ́, é sɔ́ ná xa ji bo kpɔ́n ɖɔ fún koklójónɔ tɔ́n ɖ'é mɛ a jí ǎ; mɛ blíblí wɛ mɛ ɔ́ nyí.

³⁷ Nú é ká cí n'i ɖɔ lakpálakpá ɔ́ kún gbló ó, bɔ fún wiwi tɔ́n ɖ'é mɛ ɔ́, hǔn lakpálakpá ɔ́ kó fyɔ́; mɛ mímɛ́ wɛ mɛ ɔ́ nyí; vɔ̌sánú-xwlémawutɔ́ ɔ́ ná ɖɔ ɖɔ é nyí mɛ mímɛ́.

³⁸ “Nú nǔ tɔ́n ɖo wǔ wěwé ɖé lɛ́ɛ tɔ́n ɖo súnnu ɖé abǐ nyɔ̌nu ɖé wú ɔ́,

³⁹ vɔ̌sánú-xwlémawutɔ́ ɔ́ ná kpɔ́n ɛ. Nú é mɔ ɖɔ nǔ tɔ́n ɖo wǔ wěwé ɖo mɛ ɔ́ wú, bɔ nukún mɛ tɔn ká kó ɖo fyɔ́fyɔ́ wɛ ɔ́, hǔn nǔ tɔ́n ɖo wǔ ɖé lɛ́ɛ wɛ tɔ́n ɖo wǔ tɔn kpowun; mɛ mímɛ́ wɛ é nyí.

⁴⁰ “Nú ɖa vɔ sín ta nú mɛ ɖé ɔ́, ta tɔn wɛ ɖo mɔ̌ kpowun; mɛ mímɛ́ wɛ é nyí.

⁴¹ Nú é nyí ɖɔ nukɔn wɛ ɖa vɔ ɖe n'i ɔ́, ɖa ma ɖo nukɔn kpowun wɛ é nyí; mɛ mímɛ́ wɛ é nyí.

⁴² Amɔ̌, nú akpa ɖé tɔ́n ɖo fí e ɖa ma ɖe ɖo nukɔn abǐ zogúdo ɔ́, bɔ akpa ɔ́ wé, bó myá d'é mɛ ɔ́, hǔn gudu wɛ tɔ́n ɖo fí e ɖa ma ɖe ɖo zogúdo, abǐ nukɔn ǎ é.

⁴³ Vɔ̌sánú-xwlémawutɔ́ ɔ́ ná kpɔ́n ɛ. Nú é mɔ akpa ɔ́ ɖo fí e ɖa ma ɖe ɖo zogúdo abǐ nukɔn ǎ é, bɔ é wé, bó myá d'é mɛ, bó cí gudu ɖɔhun ɔ́,

⁴⁴ hǔn gudunɔ wɛ mɛ ɔ́ nyí; vɔ̌sánú-xwlémawutɔ́ ɔ́ ná ɖɔ ɖɔ mɛ blíblí wɛ é nyí, ɖó akpa e tɔ́n ɖo ta n'i ɔ́ wú.

⁴⁵ “Mɛ e wú gudu ɖe mɔ̌ ɔ́, ɖó ná dó awu vúnvún. É ná vún ɖa ǎ; é ná cyɔ́n alɔ nu, bó ná nɔ́ sú xó ɖɔ: ‘Un nyí mɛ blíblí! Un nyí mɛ blíblí.’

⁴⁶ Nú azɔn ɔ́ kpo ɖo wǔtu tɔn jɛ́n wɛ ɔ́, mɛ blíblí nyí wɛ jɛ́n é ná ɖe; énɛ́ ɔ́ wú ɔ́, é ná nɔ vo; é ná nɔ fí e è ɖǒ gɔnu ɖó é ǎ.”

Avɔ e fun hwa é

⁴⁷ Mawu Mavɔmavɔ ɖɔ: “Mǐ ní ɖɔ nǔzínzán ɖé fun hwa: é sixú nyí gbɔ̌fúnvɔ, abǐ lɛ̌ɛnkanvɔ,

⁴⁸ abǐ avɔ, abǐ awu e è sɔ́ gbɔ̌fúnvɔ abǐ lɛ̌ɛnkanvɔ dó tɔ ná ɔ́, é sixú nyí anyǔ, abǐ nǔ e è sɔ́ anyǔ dó bló ná lɛ́ɛ ɖě wɛ fun hwa.

⁴⁹ Nú nǔ e tɔ́n ɖ'é mɛ lɛ́ɛ vlɛ́ amamú abǐ vɔvɔ ɔ́, hǔn hwa wɛ nǔ ɔ́ fun; è ɖǒ ná zé yi xlɛ́ vɔ̌sánú-xwlémawutɔ́, bɔ é ná kpɔ́n.

⁵⁰ Nú vɔ̌sánú-xwlémawutɔ́ ɔ́ kpɔ́n gúdo ɔ́, é ná sú hɔn dó nǔ e fun hwa ɔ́ xɔ azǎn tɛ́nwe.

⁵¹ Azǎn tɛ́nwegɔ́ ɔ́ gbe ɔ́, é ná vɔ́ kpɔ́n. Nú é mɔ ɖɔ nǔ e tɔ́n ɖ'é wú ɔ́ gbló d'é jí ɔ́, hǔn, hwafunfun baɖabaɖa ɖé wɛ, bɔ è nɔ sixú ɖe síin ǎ; nǔ ɔ́ nyí nǔblíblí.

⁵² Énɛ́ ɔ́, vɔ̌sánú-xwlémawutɔ́ ɔ́ ná dó nǔ e fun hwa ɔ́ zo. É sixú nyí avɔ, é sixú nyí awu e è zě gbɔ̌fúnvɔ abǐ lɛ̌ɛnkanvɔ dó tɔ é, abǐ nǔ e è sɔ́ anyǔ dó bló ná lɛ́ɛ ɖě, é ná dó zo; ɖó è sixú ɖe nǔ e tɔ́n ɖ'é mɛ ɔ́ síin ǎ. Hǔn è ɖǒ ná dó nǔ e fun hwa ɔ́ zo.

⁵³ Amɔ̌, nú vɔ̌sánú-xwlémawutɔ́ ɔ́ mɔ ɖɔ nǔ e tɔ́n ɖo nǔ ɔ́ mɛ ɔ́ kún gbló d'é jí ó ɔ́,

⁵⁴ é ná ná gbe bɔ è nǎ nya nǔ e fun hwa ɔ́, bɔ è nǎ lɛ́ sú hɔn dó xɔ azǎn tɛ́nwe ɖěvo.

⁵⁵ Énɛ́ ɔ́ gúdo ɔ́, vɔ̌sánú-xwlémawutɔ́ ɔ́ ná vɔ́ nǔ énɛ́ ɔ́ e è ko nya ɔ́ kpɔ́n. Nú é mɔ ɖɔ nǔ e tɔ́n ɖ'é mɛ ɔ́ kún húzú ó ɔ́, é ná bó má gbló d'é jí ǎ ɔ́, nǔ e fun hwa ɔ́ ná nyí nǔblíblí. È ɖǒ ná dó zo. Nú fí e nǔ ɔ́ tɔ́n ɖe ɔ́ ɖu ɖo wěxo, abǐ gǔdo ɔ́, è ɖǒ ná dó zo.

⁵⁶ Amɔ̌, nú é mɔ ɖɔ nǔ e tɔ́n ɖo nǔ énɛ́ lɛ́ɛ mɛ ɔ́ ko nylɔ́ wi ɔ́, é ná sɛ́n fí e fun hwa ɔ́ síin; é ná sɛ́n sín nǔzínzán ɔ́ wú, abǐ anyǔ ɔ́ wú, abǐ avɔ ɔ́ wú, abǐ awu ɔ́ wú.

⁵⁷ Nú é lín xóó, bónú nǔ ɔ́ lɛ́ tɔ́n ɖo nǔ énɛ́ lɛ́ɛ mɛ ɔ́, hǔn é lɛ́ jɛ gblǒgbló d'é jí jí nɛ́. Hwe énɛ́ ɔ́ nu ɔ́, è ɖǒ ná dó nǔ e fun hwa ɔ́ zo.

⁵⁸ “Nú è nya nǔ énɛ́ lɛ́ɛ e fun hwa ɔ́, nú nǔ e tɔ́n ɖ'é mɛ ɔ́ wá yi ɔ́, è nǎ vɔ́ nǔ e mɛ nǔ tɔ́n ɖe ɔ́ nya azɔn wegɔ́ ɔ́, bɔ é ná húzú nǔ mímɛ́.”

⁵⁹ Sɛ́n e ɖɔ xó dó nǔ tɔ́n ɖo nǔzínzán mɛ, gbɔ̌fúnvɔ mɛ, abǐ lɛ̌ɛnkanvɔ mɛ, abǐ avɔ mɛ, abǐ awu mɛ, abǐ nǔ e è sɔ́ anyǔ dó bló ná lɛ́ɛ mɛ ɔ́ wú ɔ́ nɛ́. Sɛ́n énɛ́ lɛ́ɛ ná zɔ́n bɔ è nǎ ɖɔ nǔ e fun hwa ɔ́ nyí nǔ mímɛ́, abǐ é nyí nǔblíblí.