Levíi ví 10 - MAWUXÓWÉMA

¹ Aalɔ́ɔn ví súnnu we, Nadavu kpó Avihu kpó zé zǎlínkpɔ́nfyɔ́nú ɖokpó ɖokpó, bó bɛ́ myɔkán d'é mɛ, bó zé zǎlínkpɔ́n ɖ'é jí. Yě hɛn myɔ yi Mawu Mavɔmavɔ nukɔn; Mawu Mavɔmavɔ ka ɖɔ gbɔn mɔ̌ nú yě ǎ.

² Énɛ́ ɔ́, myɔ tɔ́n ɖo Mawu Mavɔmavɔ nukɔn, bó fyɔ́ yě, bɔ yě bǐ kú ɖo Mawu Mavɔmavɔ nukɔn.

³ Énɛ́ ɔ́, Mɔyízi ɖɔ nú Aalɔ́ɔn ɖɔ: “Nǔ e Mawu Mavɔmavɔ kó ɖɔ ɖ'ayǐ gbɔn xógbe élɔ́ lɛ́ɛ jí ɔ́ nɛ́. É ɖɔ: ‘Un jló ɖɔ mɛ e nɔ wa azɔ̌ nú mì lɛ́ɛ ní nɔ́ ɖó sísí nú mǐmɛ́ e un nyí ɔ́; énɛ́ ɔ́, togun ɔ́ bǐ ná nɔ́ kpa susu nú mì.’ ” Aalɔ́ɔn ka kɛ nu ǎ.

⁴ Mɔyízi ylɔ́ Micaɛ́li kpó Ɛlisafáni kpó, bó ɖɔ nú yě ɖɔ: “Mi sɛ wá fí! Mi zé nɔví mitɔn lɛ́ɛ sín cyɔ sín goxɔ ɔ́ nukɔn. Mi ɖe cyɔ yětɔn sín fí e mǐ ɖó gɔnu ɖó ɔ́!” Micaɛ́li kpó Ɛlisafáni kpó ɔ́, Wuziyɛ́li ví wɛ yě nyǐ; Wuziyɛ́li ka nyí Aalɔ́ɔn sín tɔ́ nɔví súnnu.

⁵ Énɛ́ ɔ́, yě sɛ wá, bó bɛ́ cyɔ lɛ́ɛ síin, lě e Mɔyízi ko ɖɔ gbɔn é. Mɛ e kú lɛ́ɛ ká ɖo azɔ̌wu yětɔn mɛ.

⁶ Énɛ́ ɔ́ gúdo ɔ́, Mɔyízi ɖɔ nú Aalɔ́ɔn kpó vǐ súnnu tɔn Eleazáa kpó Itamáa kpó ɖɔ: “Mi ma jó ɖa mitɔn dó nyi kannyaa ó, mi ma vún awu mitɔn lɛ́ɛ ó. É má nyí mɔ̌ ǎ ɔ́, mi táá kú, Mawu Mavɔmavɔ táá wá sin xomɛ dó togun ɔ́ bǐ. Mi jó Izlayɛ́li ví nɔví súnnu mitɔn lɛ́ɛ bǐ dó nú yě ní ví mɛ e Mawu Mavɔmavɔ zé myɔ dó hu lɛ́ɛ.

⁷ Mi lɔmɔ̌ ɖó ná gosín goxɔ ɔ́ nukɔn ǎ, é má nyí mɔ̌ ǎ ɔ́, mi táá kú; ɖó è ko kɔn ami dó ta nú mi, bɔ mi ná wa azɔ̌ nú Mawu Mavɔmavɔ.” Énɛ́ ɔ́, Aalɔ́ɔn kpó vǐ tɔn súnnu lɛ́ɛ kpó bló nǔ e Mɔyízi ɖɔ é.

Sɛ́n e ɖɔ xó dó ahan syɛ́nsyɛ́n lɛ́ɛ wú é

⁸ Mawu Mavɔmavɔ ɖɔ nú Aalɔ́ɔn ɖɔ:

⁹ “Hwi kpó vǐ towe súnnu lɛ́ɛ kpó ɔ́, nú mi ná yi Mawu Mavɔmavɔ xwé gbe hǔn, mi ma nu vɛ̌ɛn ó, mi ma nu ahan syɛ́nsyɛ́n ɖěbǔ ó. É má nyí mɔ̌ ǎ ɔ́, mi táá kú. Sɛ́n tɛgbɛ tɔn ɖé wɛ é ná nyí nú kúnkan mitɔn lɛ́ɛ,

¹⁰ bónú mi ná sixú tunwun vogbingbɔn e ɖo nǔ e è ɖe ɖó vo nú Mawu Mavɔmavɔ é kpó nǔ e è ma ɖe ɖó vo nú Mawu Mavɔmavɔ ǎ é kpó mɛ é, bó ná tunwun vogbingbɔn e ɖo nǔ e nyí nǔ mímɛ́ é, kpó nǔ e nyí nǔblíblí é kpó mɛ é.

¹¹ Énɛ́ ɔ́, mi ná sixú kplɔ́n sɛ́n e Mawu Mavɔmavɔ dó nú Izlayɛ́li ví lɛ́ɛ gbɔn Mɔyízi jí lɛ́ɛ bǐ yě.”

Sɛ́n e ɖɔ xó dó kanlin e è sá vɔ̌ ná lɛ́ɛ sín lan wú é

¹² Mɔyízi ɖɔ nú Aalɔ́ɔn kpó vǐ súnnu tɔn Eleazáa kpó Itamáa kpó ɖɔ: “Mi ná nɔ́ zé nǔníná linfín tɔn e kpo hwenu e è ɖe éé è fyɔ́ bó xwlé Mawu Mavɔmavɔ ɔ́ síin ɔ́; mi zé dó ɖa wɔ̌xúxú e mɛ è ma dó tɔ́n ǎ é ná, bó ɖu ɖo vɔ̌sákpe ɔ́ kpá: ɖó nǔɖuɖu mímɛ́ titewungbe ɖokpó wɛ.

¹³ Tɛn mímɛ́ ɖé mɛ wɛ mi ná ɖu wɔ̌xúxú énɛ́ ɔ́ ɖe: énɛ́ ɔ́ wɛ nyí hwi Aalɔ́ɔn kpó vǐ towe súnnu lɛ́ɛ kpó sín kanta, ɖo vɔ̌sánú e è fyɔ́, bó xwlé Mawu Mavɔmavɔ lɛ́ɛ é mɛ. Mɔ̌ wɛ Mawu Mavɔmavɔ ko ɖɔ nú mì gbɔn.

¹⁴ Kanlin e Izlayɛ́li ví lɛ́ɛ zé dó wá sá kɔnɖókpɔ́ vɔ́ ɔ́ ná ɔ́, hwi kpó vǐ towe súnnu kpó nyɔ̌nu kpó ná ɖu akɔ́n tɔn kpó asá tɔn kpó. Mi ná nɔ tɛn mímɛ́ mɛ, bó ná ɖu. Kanta mitɔn wɛ nyí akpáxwé énɛ́ lɛ́ɛ. Lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́ wɛ yě bló d'é jí.

¹⁵ Izlayɛ́li ví lɛ́ɛ ná bɛ́ akpáxwé énɛ́ lɛ́ɛ wá dó jǒ e è nɔ dó zo lɛ́ɛ jí, bɔ è nǎ bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bɔ bǐ ná húzú hwi kpó vǐ towe súnnu lɛ́ɛ kpó tɔn káká sɔ́yi lě e Mawu Mavɔmavɔ ɖɔ gbɔn é.”

¹⁶ Mɔyízi ba do nú gbɔ̌sú e è nǎ dó sá hwɛsɔ́kɛmɛvɔ́ ná é, bó se ɖɔ è ko fyɔ́ ɛ. Énɛ́ ɔ́, xomɛ sin i dó Eleazáa kpó Itamáa kpó wú, bɔ é kanbyɔ́ yě ɖɔ:

¹⁷ “Étɛ́wú wɛ mi ma ɖu kanlin e è dǒ sá hwɛsɔ́kɛmɛvɔ́ ná ɔ́ sín lan ɖo tɛn mímɛ́ ɖé mɛ ǎ? Nǔ mímɛ́ titewungbe ɖokpó wɛ é nyí, bɔ Mawu Mavɔmavɔ ná mi, bónú mi ná dó ɖe hwɛ e togun ɔ́ hu lɛ́ɛ sín kɔ n'i, bónú mi ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó hwɛsɔ́kɛmɛvɔ́ ɔ́ jí ɖo Mawu Mavɔmavɔ nukɔn é.

¹⁸ Mi tunwun ɖɔ è kún nɔ́ hɛn kanlin ɔ́ sín hun yi goxɔ ɔ́ mɛ ó. Hǔn tɛn mímɛ́ ɖé mɛ wɛ mi ɖó ná ɖu lan tɔn ɖe, lě e un ɖɔ nú mi gbɔn é.”

¹⁹ Lo ɔ́, Aalɔ́ɔn ɖɔ nú Mɔyízi ɖɔ: “Đǒtó mì; égbé din e Izlayɛ́li ví lɛ́ɛ wá xwlé hwɛsɔ́kɛmɛvɔ́ yětɔn lɛ́ɛ kpódó vɔ̌ e è nɔ dó zo lɛ́ɛ kpó Mawu Mavɔmavɔ ɔ́, a tunwun nǔ e gbo mì ɔ́ ganjí. Ényí un ɖu kanlin e è dǒ sá hwɛsɔ́kɛmɛvɔ́ ná ɔ́ sín lan égbé ɔ́, é ná nyɔ́ Mawu Mavɔmavɔ nukún mɛ a?”

²⁰ Xó énɛ́ ɔ́ e Aalɔ́ɔn ɖɔ ɔ́ fá xomɛ nú Mɔyízi.