Levíi ví 1 - MAWUXÓWÉMA

LĚ E È NƆ SÁ VƆ̌ LƐ́Ɛ GBƆN É ( 1—10 ) Vɔ̌ e è nǎ nɔ dó zo é

¹ Mawu Mavɔmavɔ nɔ goxɔ e mɛ é nɔ́ kpé togun tɔn ɖe ɔ́ mɛ, bó ylɔ́ Mɔyízi, bó ɖɔ n'i ɖɔ

² é ní ɖɔ nú Izlayɛ́li ví lɛ́ɛ ɖɔ: “Ényí mɛɖé ɖo mi mɛ, bó jló ná zé kanlin ɖé dó sá vɔ̌ ná nú Mawu Mavɔmavɔ ɔ́, é ná zé nyibú ɖokpó abǐ gbɔ̌ ɖokpó dó sá ná.

³ “Nú nyibú wɛ mɛ ɔ́ jló ná zé dó sá vɔ̌ e è nɔ dó zo ɔ́ ná ɔ́, nyibúsú e má ɖó blɔ̌ ɖěbǔ ǎ ɔ́ wɛ mɛ ɔ́ ná dó sá vɔ̌ ɔ́; é ná kplá wá goxɔ ɔ́ sín alihɛ́nnu, bónú Mawu Mavɔmavɔ ná wa ɖagbe nú mɛ ɔ́.

⁴ Mɛ ɔ́ ná sɔ́ alɔ ɖó kanlin ɔ́ ta; énɛ́ ɔ́, Mawu Mavɔmavɔ ná yí kanlin ɔ́, bó ná súnsún hwɛ e é hu lɛ́ɛ.

⁵ Énɛ́ ɔ́ gúdo ɔ́, é ná gbo gbe kanlin ɔ́ ɖo nyɛ Mawu Mavɔmavɔ nukɔn, bɔ Aalɔ́ɔn sín vǐ súnnu vɔ̌sánú-xwlémawutɔ́ lɛ́ɛ ná xwlé hun tɔn nyɛ Mawu Mavɔmavɔ. Yě ná mi hun ɔ́ gbɔn vɔ̌sákpe e ɖo goxɔ ɔ́ sín ali nu ɔ́ wú lɛ́ lɛ̌ dó.

⁶ Yě bló mɔ̌ fó ɔ́, mɛ ɔ́ ná kɔ́n kanlin ɔ́ sín anyǔ, bó ná já lan tɔn,

⁷ bɔ vɔ̌sánú-xwlémawutɔ́ lɛ́ɛ ná flɔ́ myɔ ɖó vɔ̌sákpe ɔ́ jí, bó ná to nakí d'é mɛ,

⁸ bó ná bɛ́ lan e è jǎ lɛ́ɛ kpó ta ɔ́ kpó, kpódó jǒ ɔ́ kpó ɖó nakí lɛ́ɛ jí.

⁹ È nǎ klɔ́ xomɛnú lɛ́ɛ kpó afɔ lɛ́ɛ kpó bɔ vɔ̌sánú-xwlémawutɔ́ lɛ́ɛ ɖokpó ná dó bǐ zo ɖo vɔ̌sákpe ɔ́ jí. Énɛ́ wɛ nyí vɔ̌ e è nɔ́ dó zo bɔ é nɔ́ fyɔ́ bǐ, bɔ wǎn tɔn nɔ́ yi Mawu Mavɔmavɔ gɔ́n, bó nɔ́ nyɔ́ se n'i é.

¹⁰ “Nú é ká nyí gbɔ̌ wɛ mɛ ɔ́ jló ná zé dó sá vɔ̌ e è nɔ dó zo ɔ́ ná ɔ́, gbɔ̌sú e má ɖó blɔ̌ ɖěbǔ ǎ é wɛ é ná dó sá vɔ̌ ɔ́ ná. É sixú nyí agbo abǐ gbǎgbá.

¹¹ Mɛ ɔ́ ná gbo gbe kanlin ɔ́ ɖo vɔ̌sákpe ɔ́ sín taligbé, ɖo Mawu Mavɔmavɔ nukɔn, bɔ Aalɔ́ɔn sín vǐ súnnu vɔ̌sánú-xwlémawutɔ́ lɛ́ɛ ná mi hun tɔn gbɔn vɔ̌sákpe ɔ́ wú lɛ́ lɛ̌ dó.

¹² È nǎ jǎ kanlin ɔ́ bǐ, bɔ vɔ̌sánú-xwlémawutɔ́ lɛ́ɛ ɖokpó ná to lan e è jǎ lɛ́ɛ kpó ta ɔ́ kpó, kpódó jǒ ɔ́ kpó ɖó nakí e ɖo myɔ mɛ ɖo vɔ̌sákpe ɔ́ jí lɛ́ɛ jí.

¹³ È nǎ klɔ́ xomɛnú lɛ́ɛ kpó afɔ lɛ́ɛ kpó, bɔ vɔ̌sánú-xwlémawutɔ́ ɔ́ ná bɛ́ bǐ xwlé Mawu Mavɔmavɔ, bó ná dó yě zo ɖo vɔ̌sákpe ɔ́ jí. Énɛ́ wɛ nyí vɔ̌ e è nɔ dó zo bɔ é nɔ́ fyɔ́ bǐ, bɔ wǎn tɔn nɔ yi Mawu Mavɔmavɔ gɔ́n, bó nɔ́ nyɔ́ se n'i é.

¹⁴ “Nú é ká nyí xɛ wɛ mɛ ɔ́ jló ná zé dó sá vɔ̌ e è nɔ dó zo ɔ́ ná nú Mawu Mavɔmavɔ ɔ́, xwelé, abǐ ahwannɛ́ví wɛ é ná dó sá vɔ̌ ɔ́ ná.

¹⁵ Vɔ̌sánú-xwlémawutɔ́ ɔ́ ná zé xɛ ɔ́ xwlé Mawu Mavɔmavɔ, ɖo vɔ̌sákpe ɔ́ jí; é ná zé fɛn dó sun ta tɔn, bó ná fyɔ́n xɛ ɔ́, bɔ hun tɔn ná kun dó vɔ̌sákpe ɔ́ wú ɖo akpá ɖokpó, bɔ é ná dó zo ɖo vɔ̌sákpe ɔ́ jí.

¹⁶ É ná ɖe funfúngwe ɔ́, bó ná zé é kpódó nǔ e ɖ'é mɛ ɔ́ kpó bǐ nyi gbě, ɖo zǎnzǎnhwe jí, ɖo fí e è nɔ bɛ́ afín ɖó é.

¹⁷ È nǎ hɛn awa lɛ́ɛ, bó ná kɛ́ xɛ ɔ́, bɔ vɔ̌sánú-xwlémawutɔ́ ɔ́ ná dó zo ɖo vɔ̌sákpe ɔ́ jí, ɖo nakí e ɖo myɔ ɔ́ mɛ lɛ́ɛ jí. Énɛ́ wɛ nyí vɔ̌ e è nɔ dó zo bɔ é nɔ́ fyɔ́ bǐ, bɔ wǎn tɔn nɔ́ yi Mawu Mavɔmavɔ gɔ́n, bó nɔ́ nyɔ́ se n'i é.”