Kolósinu 3 - MAWUXÓWÉMA

¹ Mawu kó fɔ́n mi sín kú kpó Klísu kpó. Hǔn mi bo ba nǔ e ɖo sɛ́xwé lɛ́ɛ; fínɛ́ wɛ Klísu jínjɔ́n ɖisíxwé nú Mawu ɖe.

² Nǔ e nyí sɛ́xwé tɔn lɛ́ɛ ní nɔ́ myá nukún nú mi; ée nyí ayǐkúngban jí tɔn lɛ́ɛ wɛ ná nɔ myá nukún nú mi ǎ.

³ Đó mi kú, bɔ gbɛ mitɔn kpó Klísu tɔn kpó ɖo hwlǎhwlá ɖo Mawu mɛ.

⁴ Gbɛ jɔ gbɛ mitɔn ɔ́, Klísu wɛ, bɔ hwenu e é ná wá tɔ́n ɔ́, mi lɔmɔ̌ kpó é kpó ná tɔ́n ɖo susu tɔn mɛ.

Gbɛ xóxó ɔ́ kpódó gbɛ yɔ̌yɔ́ ɔ́ kpó

⁵ Hǔn, mi bo sú nǔ e nyí ayǐkúngban jí tɔn ɖo ayi mitɔn mɛ lɛ́ɛ sín kún dó; nǔ énɛ́ lɛ́ɛ wɛ nyí: agalilɛ, nǔblíblíwiwa, jlǒ agbaza tɔn lɛ́ɛ, linlin nyanya lɛ́ɛ kpó nukúnkɛndídó kpó, ɖó nukúnkɛndídó ɔ́ cí bǒcyɔ sinsɛn ɖɔhun.

⁶ Nǔwanyido mɔ̌hunkɔtɔn lɛ́ɛ wútu wɛ xomɛsin Mawu tɔn ná kɔn nyi mɛ e ma nɔ se tónú n'i ǎ lɛ́ɛ jí.

⁷ Hwenu e gbɛ mitɔn ɖo hwɛ énɛ́ lɛ́ɛ sín acɛ mɛ ɖ'ayǐ ɔ́, lě e mi nɔ zán gbɛ gbɔn é nɛ́.

⁸ Amɔ̌ din ɔ́, mi jó nǔ élɔ́ lɛ́ɛ bǐ wiwa dó: mi ma nɔ sin xomɛ ó; mi ma nɔ dó xomɛsin nú mɛ ó; mi ma nɔ nylá hun ó; mi ma nɔ zun mɛ ó, abǐ xó gblégblé ɖé ní ma nɔ tɔ́n sín nu mitɔn mɛ ó.

⁹ Mi ma nɔ ɖó nǔvú nú miɖée ó, ɖó mi ko ɖe gbɛtɔ́ xóxó e mi nyí ɖ'ayǐ ɔ́ kpódó walɔ tɔn lɛ́ɛ bǐ kpán nyi ayǐ;

¹⁰ bɔ mi sɔ́ ninɔmɛ yɔ̌yɔ́ ɔ́ dó; ninɔmɛ gbɛtɔ́ yɔ̌yɔ́ tɔn; gbɛtɔ́ yɔ̌yɔ́ énɛ́ nɔ ɖo hǔzúhúzú wɛ ayǐhɔ́ngbe ayǐhɔ́ngbe, bó ná cí Mawu e ɖó e ɔ́ ɖɔhun, bó ná tunwun i céɖécéɖé.

¹¹ Hǔn, mɛ e ma nyí Jwifu ǎ ɖě sɔ́ ɖo vo ǎ; mɛ e ka nyí Jwifu ɔ́ ɖě sɔ́ ɖo vo ǎ; mɛ e gbo ada é ɖě sɔ́ ɖo vo ǎ; atɔtɔnɔ ɖě ka sɔ́ ɖo vo ǎ; mɛ e ma hun nukún ǎ ɖě sɔ́ ɖo vo ǎ; hwexónu gbɛtɔ́ ɖě sɔ́ ɖo vo ǎ; kannumɔ ɖě sɔ́ ɖo vo ǎ; mɛ e ɖo éɖée sí ɔ́ lɔ ka sɔ́ ɖo vo ǎ; lo ɔ́, Klísu wɛ nyí nǔ bǐ, bó ɖo mɛ énɛ́ lɛ́ɛ bǐ mɛ.

¹² Mɛɖeɖóvo Mawu tɔn wɛ mi nyí. Mɛvívɛ́ná Mawu tɔn wɛ mi nyí, bɔ é sɔ́ mi, bónú mi ná nyí étɔn. Énɛ́ ɔ́ wútu wɛ mi ɖó ná sɔ́ nǔbláwǔkúnúmɛ, xomɛnyínyɔ́, mɛɖéesɔ́hwe, xomɛfífá kpó suúlu kpó dó awu ɖɔhun.

¹³ Mi nɔ mɔ miɖée gbɔ; ényí mɛɖé wa nǔ nyi do nú mɛɖé ɖo mi mɛ hweɖěbǔnu hǔn, mi nɔ sɔ́ kɛ miɖée. Mi ɖó ná nɔ sɔ́ hwɛ kɛ miɖée lě e Aklúnɔ sɔ́ kɛ mi é ɖɔhun.

¹⁴ Mi sɔ́ wǎn yíyí gbá dó nǔ énɛ́ lɛ́ɛ bǐ jí; ɖó wǎn yíyí ɔ́ wɛ nɔ dɔn nǔ énɛ́ lɛ́ɛ bǐ cá, bɔ yě nɔ́ nɔ bǔ ganjí.

¹⁵ Fífá Klísu tɔn ní ɖu gǎn ɖo ayi mitɔn mɛ; nǔgbó ɔ́, fífá énɛ́ ɔ́ wú wɛ Mawu ylɔ́ mi ɖó kpɔ́, bɔ mi nyí wǔjɔnú agbaza ɖokpó géé tɔn. Énɛ́ ɔ́ wú ɔ́, mi tunwun nǔ e Mawu wa nú mi ɔ́ n'i.

¹⁶ Klísu sín xó ɔ́ kpódó dɔkun e ɖ'é mɛ ɔ́ bǐ kpán ní nɔ ayi mitɔn mɛ. Mi nɔ sɔ́ nǔnywɛ́ kpíkpé dó kplɔ́n nǔ miɖée, bó nɔ dó gbɛ́ nǔ nú miɖée. Mi ná nɔ zé kúdónúmɛ sín ayixa dó ji han tɛnmɛ tɛnmɛ lɛ́ɛ nú Mawu.

¹⁷ Mi nɔ wa nǔ e wa wɛ mi ɖe lɛ́ɛ bǐ ɖo Aklúnɔ Jezu sín nyǐkɔ mɛ; mi nɔ ɖɔ xó e ɖɔ wɛ mi lɛ́ɛ bǐ ɖo Aklúnɔ Jezu sín nyǐkɔ mɛ, bó nɔ dó kú nú Mawu Tɔ́ ɔ́ gbɔn jǐ tɔn.

Lě e klísusɛntɔ́ lɛ́ɛ ná zán gbɛ gbɔn ɖo gbɛ yɔ̌yɔ́ ɔ́ mɛ é

¹⁸ Nyɔ̌nu lɛ́ɛ mi, mi ní hwíhwɛ́ miɖée ɖo asú mitɔn lɛ́ɛ glɔ́, lě e é jɛ xá ɖɔ è nǐ bló gbɔn ɖo bǔ e mi ɖe xá Aklúnɔ ɔ́ mɛ é.

¹⁹ Súnnu lɛ́ɛ mi, mi yí wǎn nú asi mitɔn lɛ́ɛ; mi ma nylá hun dó yě ó.

²⁰ Vǐ lɛ́ɛ mi, mi se tónú nú mɛjitɔ́ mitɔn lɛ́ɛ ɖo nǔ bǐ mɛ, ɖó nǔ e nɔ nyɔ́ Aklúnɔ nukún mɛ é nɛ́.

²¹ Vǐtɔ́ lɛ́ɛ mi, mi ma nɔ dó xomɛsin nú vǐ mitɔn lɛ́ɛ ó; é ma nyí mɔ̌ ǎ ɔ́, awakanmɛ ná kú yě.

²² Kannumɔ lɛ́ɛ mi, mi se tónú nú gǎn mitɔn e ɖo ayǐkúngban jí fí lɛ́ɛ ɖo nǔ bǐ mɛ; ní ma nyí hwenu e yě ɖo mi cɔ́ wɛ ɔ́ jɛ́n mi ná nɔ wa nǔ gbɔn mɔ̌, bó ná dó nyí mɛ ɖo yě sí ó; lo ɔ́, mi se tónú nú yě, kpó ayixa ɖagbe kpó, ɖó sísí e mi ɖó nú Aklúnɔ ɔ́ wútu.

²³ É ná bó nyí azɔ̌ ɖěbǔ wa wɛ mi ɖe hǔn, mi wa kpódó ayixa mitɔn bǐ kpán, Aklúnɔ wa azɔ̌ ná wɛ mi ɖe ɖɔhun; é nyí gbɛtɔ́ lɛ́ɛ wa ná wɛ mi ɖe ǎ.

²⁴ Mi tunwun ɖɔ ɖagbe e Aklúnɔ sɔ́ ɖ'ayǐ nú mɛ e nyí étɔn lɛ́ɛ é ɔ́, émí ná ɖó ɖ'é mɛ, bɔ é ná nyí ajɔ mitɔn; ɖó Klísu wɛ nyí gǎn e wa azɔ̌ ná wɛ mi ɖe tawun é.

²⁵ Amɔ̌, mɛ e nɔ wa nǔ nyanya ɔ́, é ná mɔ le e nyí étɔn ɔ́ yí, bɔ é ná sɔgbe xá nǔ nyanya e é wa é, ɖó Mawu nɔ́ ɖe mɛɖé ɖó vo ɖo mɛɖé mɛ ǎ.