Kolósinu 2 - MAWUXÓWÉMA

¹ Tagba e jɛ dó ta mitɔn mɛ wɛ un ɖe, bó ɖo jijɛ dó Lawodiséenu lɛ́ɛ kpódó mɛ e ma tunwun mì titewungbe lě ǎ lɛ́ɛ bǐ kpán tamɛ wɛ ɔ́, un jló ɖɔ mi ní tunwun lě e é syɛ́n gbɔn é.

² Un ɖo ahwan fun wɛ, bónú yě ní ɖó akɔ́nkpinkpan nǔjɔnǔ tɔn, bónú yě ní nyí ɖokpó ɖo wǎn yíyí mɛ, bónú gǎnjɛwú e nǔnywɛ́ titewungbe ɔ́ nɔ ná mɛ ɔ́ ní gɔ́ ayi mɛ nú yě ganjí; énɛ́ ɔ́, yě ná sixú tunwun nǔbúdo Mawu tɔn; Klísu ɖésú wɛ nyí nǔbúdo énɛ́.

³ Éyɛ́ mɛ wɛ è nɔ mɔ dɔkun e ɖo nǔnywɛ́ mɛ lɛ́ɛ kpódó ée ɖo nukúnnú-mɔjɛnǔmɛ lɛ́ɛ bǐ kpán ɖo hwlǎhwlá ɖe.

⁴ Un ɖɔ xó nú mi gbɔn mɔ̌, bónú mɛɖé ma ɖɔ xó víví dó blɛ́ mi ná ó.

⁵ Ényí un tlɛ lín dó mi ɖo agbaza mɛ ɔ́, un ɖo kpɔ́ xá mi ɖo ayi mɛ, bɔ lě e un mɔ bɔ mi nɔ wa nǔ dó tito jí ganjí gbɔn, bó lí dǒ ɖo nǔɖiɖi e mi ɖó nú Klísu ɔ́ mɛ gbɔn ɔ́, víví nú mì.

Gbɛ e Klísu nɔ ná mɛ é

⁶ Énɛ́ ɔ́, ée mi yí Klísu Jezu dó yí Aklúnɔ mitɔn ná ɔ́, mi bo nɔ bǔ xá ɛ ɖo gbɛzán mitɔn mɛ.

⁷ Mi dó ɖɔ do ɖo Klísu mɛ; gbɛ mitɔn bǐ ní nɔ alɔ tɔn mɛ; mi ní nɔ syɛ́nlǐn ɖo nǔɖiɖi mɛ hwebǐnu lě e è kplɔ́n mi gbɔn é, bó nɔ tunwun nǔ e Mawu nɔ wa nú mi ɔ́ n'i.

⁸ Mi cɔ́ miɖée, bónú mɛɖé ma zé mɛblɛ́blɛ́xó, xómaɖixó, nǔnywɛ́ gbɛtɔ́ tɔn dó dó gɛdɛ mi ó; nǔnywɛ́ énɛ́ ɔ́, nǔkplɔ́nmɛ gbɛtɔ́ lɛ́ɛ tɔn jí wɛ é jínjɔ́n, bó jínjɔ́n nǔɖoyɛswímɛ e ɖo gbɛ ɔ́ mɛ lɛ́ɛ sín hlɔ̌nhlɔ́n jí; é jínjɔ́n Klísu jí ǎ. Mi ma ɖótó yě ó;

⁹ ɖó nǔ e Mawu nyí ɔ́ bǐ ko yí agbaza ɖo Klísu mɛ, bónú Mawu ná nɔ Klísu mɛ bǐ sésé,

¹⁰ bɔ mi yí nǔ bǐ sésé ɖo bǔ e mi ɖe xá Klísu ɔ́ mɛ. Éyɛ́ wɛ ɖo ta nú gǎn lɛ́ɛ bǐ, kpódó acɛkpikpa lɛ́ɛ bǐ kpán.

¹¹ È ko gbo ada nú mi ɖo bǔ e mi ɖe xá Klísu é mɛ; é ka nyí ada e gbɛtɔ́ lɛ́ɛ nɔ gbo nú mɛ ɔ́ wɛ ǎ; lo ɔ́, ada e Klísu nɔ gbo nú mɛ ɔ́ wɛ, bɔ é ɖe mi sín agbaza mitɔn hwɛhutɔ́ ɔ́ sín acɛ mɛ.

¹² Nǔgbó ɔ́, ée è lɛ yɛhwesin nú mi ɔ́, è ɖi mi kpódó Klísu kpán, bó lɛ́ fɔ́n mi kpó e kpó sín kú, ɖó mi ɖi nǔ nú Mawu e fɔ́n ɛ sín kú é sín hlɔ̌nhlɔ́n.

¹³ Đ'ayǐ ɔ́, mɛkúkú wɛ mi nyí, ɖó hwɛ mitɔn lɛ́ɛ wútu; ɖó mi nyí Jwifu ǎ; mi tunwun Mawusɛ́n ɔ́ ǎ; amɔ̌ din ɔ́, Mawu bló, bɔ mi lɛ́ wá gbɛ kpódó Klísu kpó, bɔ é sɔ́ hwɛ e mǐ hu lɛ́ɛ bǐ kɛ mǐ.

¹⁴ Wěma e jí è wlǎn hwɛ mǐtɔn lɛ́ɛ dó, bɔ è ɖo hwɛ dó mǐ wɛ, bɔ tito tɔn lɛ́ɛ ma sɔgbe xá mǐ ǎ ɔ́, Mawu ká wěma ɔ́ nyi aklúzu jí, bó súnsún hwɛ mǐtɔn e ɖ'é jí lɛ́ɛ bǐ.

¹⁵ Klísu yí hlɔ̌nhlɔ́n sín gǎn lɛ́ɛ kpódó acɛkpikpa lɛ́ɛ kpó sí, gbɔn kú e é kú ɖo aklúzu jí ɔ́ gbla mɛ; é ɖu ɖo yě jí, bó bɛ́ yě kɔn nyi togun mɛ agbawungba, bɔ yě húzú nǔkpínkpɔ́n.

¹⁶ Ényí mɔ̌ hǔn, mi ma lɔn nú mɛɖé ní ɖɔ nú mi ɖɔ nǔ lě wɛ nyɔ́ bɔ mi ná ɖu, abǐ nǔ lě wɛ nyɔ́ bɔ mi ná nu, abǐ xwezán lě wɛ mi ná nyi, sun wá jǐ sín azǎn lě wɛ mi ná nyi, abǐ gbɔjɛzán Jwifu lɛ́ɛ tɔn lě wɛ mi ná nyi ó.

¹⁷ Nǔ énɛ́ lɛ́ɛ bǐ ɔ́, nǔ ɖagbe e jǎwe ɔ́ sín yɛ kpowun wɛ yě nyǐ; lo ɔ́, Klísu wɛ nyí nǔjɔnǔ ɔ́.

¹⁸ Mi ma lɔn nú mɛ e nɔ hun xomɛ ɖo mɛɖéesɔ́hwe ɖo wějí sín nǔwiwa lɛ́ɛ kpódó wɛnsagun lɛ́ɛ sinsɛn kpán mɛ ɔ́, ɖě ní ɖó hwɛ nú mi ó; mɛ mɔ̌hun ɔ́, nǔmimɔ e é nɔ mɔ lɛ́ɛ wú wɛ é nɔ gán jɛ, bɔ linlin gbɛtɔ́ tɔn e é nɔ ɖó lɛ́ɛ nɔ zɔ́n bɔ goyíyí dó wǔvɔ́ nɔ gbɛ́ dó e.

¹⁹ Mɛ énɛ́ nɔ tɛ́ dó Klísu e nyí ta ɔ́ wú ǎ. Klísu ɔ́ wɛ ka zɔ́n bɔ agbaza ɔ́ bǐ ɖo nǔ ɖu wɛ, bɔ gǒflɛ́mɛ lɛ́ɛ kpódó kan lɛ́ɛ kpán nɔ hɛn ɛ ɖó bǔ ganjí, bɔ é nɔ su lě e Mawu jló gbɔn é.

Mi kú xá Klísu, bó fɔ́n xá Klísu

²⁰ Mi kpó Klísu kpó kó kú, bɔ è ko hwlɛ́n mi sín yɛ e kpa acɛ ɖo gbɛ ɔ́ mɛ lɛ́ɛ sín hlɔ̌nhlɔ́n sí. Ée nǔ nyí mɔ̌ ɔ́, aniwú mi ka lɛ́ ɖo gbɛ zán wɛ gbɛ ɔ́ tɔn wɛ mi lɛ́ nyí ɖɔhun? Aniwútu mi ka yí gbe, bɔ è nɔ lɛ́ ɖo sɛ́n dó nú mi wɛ ɖɔ:

²¹ “Ma zé nǔ lě ó! Ma dó nǔ lě nu ó! Ma ɖó alɔ nǔ lě wú ó!”

²² Nǔ e è zǎn tlóló ɔ́, é nɔ vɔ ɔ́ wɛ sɛ́n énɛ́ lɛ́ɛ kan; gbɛtɔ́ lɛ́ɛ sín sɛ́n kpódó nǔ e yě nɔ́ kplɔ́n mɛ lɛ́ɛ kpán wɛ nyí nǔ énɛ́ lɛ́ɛ.

²³ Nǔgbó ɔ́, è kpɔ́n sɛ́n énɛ́ lɛ́ɛ mɛ ɔ́, è nɔ mɔ ɖɔ nǔnywɛ́ ɖ'é mɛ, ɖó yě nɔ́ ɖɔ sinsɛn mɛ ɖésúnɔ tɔn, mɛɖéesɔ́hwe kpó ya dó nú agbaza mɛ ɖésúnɔ tɔn kpó sín xó. Lo ɔ́, sɛ́n énɛ́ lɛ́ɛ ɖó hlɔ̌nhlɔ́n ɖěbǔ bó ná dó alɔ mɛ, bɔ è nǎ ɖu ɖo agbaza mɛɖée tɔn jí ǎ.