Kolósinu 1 - MAWUXÓWÉMA

Gbedómɛ

¹ Nyɛ Pɔ́lu e nyí mɛsɛ́dó Klísu Jezu tɔn, gbɔn jlǒ Mawu tɔn gbla mɛ ɔ́, kpódó nɔví mǐtɔn Timɔtée kpán wɛ sɛ́ wěma élɔ́ dó.

² Mǐ wɛ sɛ́ dó nɔví mǐtɔn gbejínɔtɔ́ ɖo Klísu mɛ e nyí mɛɖeɖóvo Mawu tɔn bó ɖo Kolósi lɛ́ɛ. Mawu Tɔ́ mǐtɔn ní ná fɛ́nú kpó fífá kpó mi.

Pɔ́lu dó kú nú Mawu

³ Ényí mǐ ɖo ɖɛ xo dó ta mitɔn mɛ wɛ hweɖěbǔnu ɔ́, mǐ nɔ́ dó kú nú Mawu Aklúnɔ mǐtɔn Jezu Klísu sín Tɔ́.

⁴ Đó, mǐ se nǔɖiɖi e mi ɖó nú Klísu Jezu ɔ́, kpódó wǎn yíyí e mi ɖó nú mɛɖeɖóvo Mawu tɔn lɛ́ɛ kpán.

⁵ Hwenu e è hɛn xó nǔgbó e nyí Wɛn Ɖagbe ɔ́ wá mi gɔn azɔn nukɔn nukɔntɔn ɔ́, è ɖe nukúnɖíɖó e é nɔ ná mɛ ɔ́ xlɛ́ mi. Énɛ́ ɔ́, nǔɖiɖi mitɔn kpódó wǎn yíyí mitɔn kpán jínjɔ́n nǔ e ɖó nukún wɛ mi ɖe, bɔ Mawu sɔ́ ɖ'ayǐ nú mi ɖo sɛ́xwé ɔ́ jí.

⁶ Wɛn Ɖagbe ɔ́ ɖo gbigba kpé wɛ, bó ɖo azɔ̌ wa ɖo klísusɛntɔ́ lɛ́ɛ sín gbɛzán mɛ wɛ gbɔn gbɛ ɔ́ bǐ mɛ, lě e é bló gbɔn ɖo tɛ́ntin mitɔn sín gbe e gbe mi se fɛ́nú Mawu tɔn ɔ́ sín xó azɔn nukɔn tɔn, lobo kplɔ́n nǔ e é nyí tawun ɔ́, bó tunwun é.

⁷ Azɔ̌gbɛ́ mǐtɔn wǎnyínámɔ mǐtɔn Epaflasi wɛ kplɔ́n nǔ énɛ́ mi; mɛsɛntɔ́ Klísu tɔn gbejínɔtɔ́ wɛ é nyí, bó ɖo azɔ̌ wa ɖó tɛn mǐtɔn mɛ wɛ.

⁸ Wǎn yíyí e Yɛsinsɛn ná mi ɔ́, é ɖɔ xó tɔn nú mǐ.

⁹ Énɛ́ ɔ́ wú wɛ sín gbe e gbe mǐ se xó mitɔn ɔ́, mǐ nɔ́ gɔn ɖɛ xó nú mi ǎ. Mǐ nɔ́ byɔ́ Mawu ɖɔ ní ná nǔnywɛ́ kpódó nukúnnú-mɔjɛnǔmɛ e Yɛsinsɛn nɔ ná mɛ ɔ́ kpán bǐ mi, bónú mi ná tunwun jlǒ tɔn titewungbe.

¹⁰ Énɛ́ ɔ́, mi ná sixú nɔ zán gbɛ mitɔn lě e Aklúnɔ jló gbɔn é, bó ná nɔ wa nǔ e nɔ́ nyɔ́ nukún tɔn mɛ ɔ́ hwebǐnu. Mi ná nɔ́ wa nǔ ɖagbe tɛnmɛ tɛnmɛ lɛ́ɛ, bó ná nɔ́ ɖo Mawu tunwun d'é jí wɛ.

¹¹ Mǐ nɔ byɔ́ Mawu ɖɔ ní zé hlɔ̌nhlɔ́n tɔn susunɔ ɔ́ dó ná hlɔ̌nhlɔ́n kpíkpé mi, bónú mi ná sixú kú hǔn bó ɖó akɔ́n nǔ lɛ́ɛ bǐ nu kpó xomɛhunhun kpó.

¹² Mi dó kú nú Mawu Tɔ́ ɔ́ kpódó awǎjijɛ kpán, ɖó é bló bɔ mi lɔ ɖó mǐmá ɖo ɖagbe e é sɔ́ ɖ'ayǐ ɖo axɔ́súɖuto wězizanɔ ɔ́ mɛ, nú mɛ e nyí étɔn lɛ́ɛ é mɛ.

¹³ Nǔgbó ɔ́, é yí mǐ sín zǐnflú sín hlɔ̌nhlɔ́n sí, bó sɔ́ mǐ ɖó Vǐ tɔn vívɛ́ná ɔ́ sín axɔ́súɖuto mɛ.

¹⁴ Vǐ vívɛ́ná énɛ́ wɛ zɔ́n, bɔ Mawu xɔ mǐ sín kannumɔgbénu, bó sɔ́ hwɛ mǐtɔn lɛ́ɛ kɛ mǐ.

Klísu kpó nǔ e é nyí ɔ́ kpó

¹⁵ Klísu ɔ́, akpajlɛ́ Mawu e è ma nɔ mɔ ǎ ɔ́ tɔn wɛ é nyí. Nukɔngbéví wɛ é nyí, bó hú gǎn nǔ e Mawu bló lɛ́ɛ bǐ.

¹⁶ Đó jǐ tɔn wɛ Mawu bló nǔ e ɖo jǐnukúnsin lɛ́ɛ kpódó ée ɖo ayǐkúngban jí lɛ́ɛ bǐ kpán gbɔn: nǔ e mɔ wɛ è ɖe lɛ́ɛ kpódó ée è ma ɖo mimɔ wɛ ǎ lɛ́ɛ kpó, hlɔ̌nhlɔ́n nǔɖoyɛswímɛ tɔn lɛ́ɛ, gǎnhúnǔtɔ́ lɛ́ɛ, gǎn lɛ́ɛ kpódó acɛkpikpa lɛ́ɛ kpán; jǐ tɔn wɛ Mawu bló nǔ lɛ́ɛ bǐ gbɔn, bɔ nǔ lɛ́ɛ bǐ nyí étɔn.

¹⁷ É ko tíin cóbɔ nǔ lɛ́ɛ bǐ wá tíin; é wɛ hɛn nǔ lɛ́ɛ bǐ ɖó tɛn yětɔn yětɔn mɛ, ɖo bǔ e yě ɖe xá ɛ ɔ́ mɛ.

¹⁸ É wɛ nyí ta nú agbaza ɔ́: agbaza ɔ́ wɛ ɖo agun ɔ́ nyí wɛ; é mɛ wɛ gbɛ yɔ̌yɔ́ ɔ́ bɛ́ ɖe; é wɛ nyí mɛ nukɔn tɔn e Mawu fɔ́n sín kú é, bónú é ná dó nɔ nukɔn ɖo nǔ bǐ mɛ.

¹⁹ Đó é nyɔ́ Mawu nukún mɛ ɖɔ émí ní nɔ Vǐ émítɔn mɛ bǐ dégbédégbé.

²⁰ Mɔ̌ ɖokpó ɔ́, é ɖɔ émí ná bló bɔ gbɛ ɔ́ bǐ ná dó hwɛ gbɔ xá émí; é ɖó fífá ayǐ gbɔn kú e Vǐ tɔn kú ɖo aklúzu jí é gbla mɛ, bɔ nǔ e ɖo ayǐkúngban jí lɛ́ɛ, kpódó ée ɖo sɛ́xwé lɛ́ɛ bǐ kpó dó hwɛ gbɔ xá ɛ.

²¹ Đ'ayǐ ɔ́, mi lɔmɔ̌ mi lín dó Mawu; kɛntɔ́ tɔn wɛ mi nyí ɖ'ayǐ, ɖó nǔ nyanya e mi nɔ lin, bó nɔ wa lɛ́ɛ bǐ wú.

²² Amɔ̌ din ɔ́, Vǐ tɔn húzú gbɛtɔ́ lobo kú, bɔ é bló bɔ mǐ dó hwɛ gbɔ xá ɛ gbɔn Vǐ tɔn sín kú gbla mɛ, bónú mi ná sixú nyí mɛɖeɖóvo, bó nyí mɛ mímɛ́, mɛ ma ɖó blɔ̌ ɖo wǔ ɖo nukɔn tɔn.

²³ É ɖo mɔ̌ có, mi ka ɖó ná nɔ nǔɖiɖi mɛ, bó ná syɛ́nlǐn ɖo dodó syɛ́nsyɛ́n jí; mi ma jó miɖée dó bónú mɛɖé ní sɛ tɛn nú mi sín nǔ e ɖó nukún wɛ mi ɖe sín hwenu e mi ko se Wɛn Ɖagbe ɔ́ dó ɔ́ kɔn ó. Wɛn Ɖagbe énɛ́ wɛ è dǒ nǔ e Mawu bló ɖo gbɛ ɔ́ mɛ lɛ́ɛ é; é wɛ nyí ɖěe nyɛ Pɔ́lu, un húzú mɛsɛntɔ́ ná é.

Azɔ̌ e Mawu sɔ́ dó alɔ mɛ nú Pɔ́lu é

²⁴ Din ɔ́, wǔvɛ́ e mɔ wɛ un ɖe ɖó mi wú ɔ́ nɔ ná xomɛhunhun mì. Đó, gbɔn wǔvɛ́ e mɔ wɛ un ɖe ɖo agbaza mɛ lɛ́ɛ gbla mɛ ɔ́, nǔ e hwe ɖo wǔvɛ́ e Klísu mɔ lɛ́ɛ mɛ ɔ́ bló kpé wɛ un ɖe nú agbaza tɔn e nyí klísusɛntɔ́ lɛ́ɛ sín agun é.

²⁵ Un húzú mɛsɛntɔ́ nú agun Klísu tɔn, bɔ é sɔgbe xá azɔ̌ e Mawu sɔ́ dó así nú mì, ɖɔ ma wa nú mi é: azɔ̌ e é sɔ́ dó así nú mì ɔ́ wɛ nyí ɖɔ ma jlá xó tɔn fó.

²⁶ É wɛ nyí nǔbúdo e é zé hwlá dó gbɛtɔ́ lɛ́ɛ bǐ sín hwe lɛ́ɛ bǐ nu é; amɔ̌ din ɔ́, é ɖe xlɛ́ mɛ e nyí étɔn lɛ́ɛ é.

²⁷ Đó Mawu jló ná ɖe tito tɔn e ɖo wi mɛ ɔ́ xlɛ́ yě; tito énɛ́ e nyí é ɖésúnɔ tɔn, bɔ dɔkun ɖ'é mɛ sɔ mɔ̌, bó nyí tito ɖagbe ɖagbe ɔ́, é sɔ́ ɖ'ayǐ nú nyɔ̌ná togun lɛ́ɛ bǐ tɔn. Nǔbúdo ɔ́ ɖíe: Klísu ɖo mi mɛ, bó nɔ́ ná gǎnjɛwú mi ɖɔ mi ná ɖó mǐmá ɖo susu Mawu tɔn mɛ.

²⁸ Énɛ́ ɔ́, mǐ nɔ jlá Klísuxó ɔ́ mɛ bǐ; mǐ nɔ́ zé nǔnywɛ́ e Mawu ná mǐ ɔ́ bǐ dó ɖó afɔ afɔ jí nú mɛ bǐ, dó kplɔ́n nǔ mɛ bǐ, bónú mɛ bǐ ná sixú zin ɖo nǔɖiɖi mɛ, ɖo bǔ e yě ɖe xá Klísu ɔ́ mɛ, ɖo Mawu nukɔn.

²⁹ Bónú un ná dó sixú wa azɔ̌ énɛ́ ɔ́, hlɔ̌nhlɔ́n ɖaxó e Klísu nɔ ná mɛ ɔ́ wɛ é ná mì, bɔ un dó ɖo azɔ̌ wa ná wɛ, bó dó ɖo gǎn dó wɛ; hlɔ̌nhlɔ́n énɛ́ ɔ́ wɛ ɖo azɔ̌ wa wɛ ɖo gbɛzán ce mɛ.