Jozuwée 8 - MAWUXÓWÉMA

Izlayɛ́li ví lɛ́ɛ yí Ayíi toxo ɔ́

¹ Mawu Mavɔmavɔ ɖɔ nú Jozuwée ɖɔ: “Ma ɖi xɛsi ó, ado ní má hu we ó. Kplá ahwangɔnu towe bǐ bónú mi yi tɔ́n ahwan Ayíi toxo ɔ́. Éɖíe, un jó axɔ́sú Ayíi tɔn ɔ́ kpó togun tɔn kpó nú we; un jó toxo tɔn kpó ayǐkúngban tɔn kpó nú we.

² A nǎ wa nǔ xá toxo énɛ́ ɔ́ kpódó axɔ́sú tɔn kpó lě e a wa nǔ xá Jeliko kpódó axɔ́sú tɔn kpó gbɔn é. Amɔ̌, dɔkun e mi ná mɔ ɖo toxo ɔ́ mɛ lɛ́ɛ kpódó kanlin e mi ná mɔ ɖ'é mɛ lɛ́ɛ kpó ɔ́, mi ná bɛ́ yě. Toxo ɔ́ gúdo wɛ mi ka ná tɔ́n ahwan yě sín ɖo ajijimɛ.”

³ Ée Mawu Mavɔmavɔ ɖɔ xó énɛ́ lɛ́ɛ nú Jozuwée ɔ́, Jozuwée sɔ́ nǔ é kpódó ahwangɔnu tɔn ɔ́ bǐ kpó, bó ná yi tɔ́n ahwan Ayíi toxo ɔ́. É cyán ahwanfuntɔ́ syɛ́nsyɛ́n adɔ̌kpo ɖě děgba we afɔwó (30.000), bo sɛ́ yě dó zǎn mɛ,

⁴ bó ɖɔ nú yě ɖɔ: “Mi tɔwu ɖo toxo ɔ́ gúdo, mi ma lín dó toxo ɔ́ dín ó, mi nɔ acéjí bó ná tɔ́n ahwan yě.

⁵ Nyɛ kpó mɛ e xwedó mì lɛ́ɛ kpó ná ɖidó toxo ɔ́ mɛ. Hwenu e to ɔ́ mɛ nu lɛ́ɛ ná tɔ́n sín toxo ɔ́ mɛ bó ná ja mǐ gɔ́n ɔ́, mǐ ná hɔn lě e mǐ hɔn gbɔn ayisɔnmɔ é.

⁶ Énɛ́ ɔ́, yě ná jɛ gǔdo mǐtɔn, bó ná ɖo nyinya mǐ wɛ, bɔ mǐ ná ɖo hinhɔn wɛ, bó ná dó dɔn yě káká bɔ yě ná yi zɔ nú toxo ɔ́. Yě ná vɛdó ɖɔ hinhɔn wɛ mǐ ɖe lě e mǐ hɔn gbɔn ayisɔnmɔ ɔ́ sín.

⁷ Hwe énɛ́ ɔ́ nu ɔ́, mi ná tɔ́n sín fí e mi tɔwu ɖó ɔ́, bó ná yí toxo ɔ́, ɖó Mawu Mavɔmavɔ, Mawu mitɔn ná jó toxo ɔ́ nú mi.

⁸ Mi yí toxo ɔ́ lě tlóló hǔn, mi dó zo lě e Mawu Mavɔmavɔ ɖɔ gbɔn é. Mi xwedó nǔ e un ɖɔ nú mi lɛ́ɛ ganjí.”

⁹ Jozuwée nyi ahwanfuntɔ́ lɛ́ɛ sɛ́ dó fí e yě ná yi tɔwu ɖe, bó ná tɔ́n ahwan mɛ lɛ́ɛ ajijimɛ é. Ayíi sín gbadahwe jí wɛ yě yi tɔwu ɖó, ɖo Betɛ́li kpó Ayíi kpó tɛ́ntin. Jozuwée ka dɔ́ fí e ahwanfuntɔ́ e kpo lɛ́ɛ ɖe ɔ́ ɖo zǎn énɛ́ ɔ́ mɛ.

¹⁰ Jozuwée fɔ́n zǎn bó kpɔ́n ahwanfuntɔ́ tɔn lɛ́ɛ ɖɔ yě ɖo gbesisɔ mɛ ají. Énɛ́ ɔ́ gúdo ɔ́, é kpó tomɛxó Izlayɛ́li tɔn lɛ́ɛ kpó zɔn togun ɔ́ nu bɔ yě ɖidó ahwan tɔ́n Ayíinu lɛ́ɛ gbé.

¹¹ É kpódó ahwanfuntɔ́ lɛ́ɛ bǐ kpó sɛ yi hɔntogbó toxo ɔ́ tɔn sín nukɔn. Yě ɖǒ gɔnu ɖó toxo ɔ́ sín taligbé, bɔ tɔdo ɖé ɖo yě kpó toxo ɔ́ kpó tɛ́ntin.

¹² Jozuwée cyán súnnu děgba ɖě afatɔ́n (5.000) mɔ̌, bó ɖɔ nú yě ɖɔ yě ní yi tɔwu ɖo toxo ɔ́ sín gbadahwe jí, ɖo Betɛ́li kpó Ayíi kpó tɛ́ntin.

¹³ Ahwanfuntɔ́ lɛ́ɛ ɖó gɔnu ɖó toxo ɔ́ sín taligbé. Mɛ hǎbǔ ká kó tɔwu ɖo gbadahwe jí. Jozuwée ka yi tɔdo ɔ́ mɛ zǎn énɛ́ ɔ́ mɛ.

¹⁴ Ée axɔ́sú Ayíi tɔn mɔ mɔ̌ ɔ́, é fɔ́n zǎn, bó yá wǔ tɔ́n sín toxo ɔ́ mɛ, é kpó ahwanfuntɔ́ tɔn lɛ́ɛ bǐ kpó, bó ná yi fun ahwan xá Izlayɛ́li ví lɛ́ɛ ɖo fí e yě fun ahwan xá yě ɖe ɖ'ayǐ ɔ́, ɖo Judɛ́ɛn tɔdo ɔ́ sín awa jí. É ká tunwun ɖɔ mɛ hǎbǔ kó tɔwu nú émí ɖo toxo ɔ́ gúdo ǎ.

¹⁵ Jozuwée kpó mɛ tɔn lɛ́ɛ kpó bló nǔ ɖi ɖu wɛ yě ko ɖu ɖo émí jí ɖɔhun, lobo hɔn bo wlí gbětótló mɛ sín ali.

¹⁶ Énɛ́ ɔ́, è kplé mɛ e ɖo toxo ɔ́ mɛ lɛ́ɛ bǐ, bó ná nya Izlayɛ́li ví lɛ́ɛ. Yě jɛ Jozuwée gúdo, bɔ é dɔn yě yi zɔ nú toxo ɔ́.

¹⁷ É sɔ́ kpo súnnu ɖěbǔ ɖo Ayíi kpó Betɛ́li kpó ǎ. Yě bǐ wɛ tɔ́n bó jɛ Izlayɛ́li ví lɛ́ɛ gúdo, bó jó toxo ɔ́ sín hɔntogbó nyi nuvo.

¹⁸ Énɛ́ ɔ́, Mawu Mavɔmavɔ ɖɔ nú Jozuwée ɖɔ: “Dlɛ̌n hwǎn towe dó toxo ɔ́, ɖó nǎ jó toxo ɔ́ nú we.” Bɔ Jozuwée dlɛ́n hwǎn tɔn dó Ayíi toxo ɔ́.

¹⁹ Ée Jozuwée dlɛ́n alɔ tlóló ɔ́, Izlayɛ́li ví e tɔwu lɛ́ɛ yá wǔ tɔ́n sín fí e yě tɔwu ɖe é, bó kán wezun yi byɔ́ toxo ɔ́ mɛ, bó yí toxo ɔ́, bó yá wǔ dó zo.

²⁰ Ayíinu lɛ́ɛ lɛ́ kɔ kpɔ́n gǔdo, bó mɔ ɖɔ toxo émítɔn ɖo myɔ ji wɛ azizɔ tiii. Yě sɔ́ mɔ fí e yě ná hɔn gbɔn ɔ́ ǎ, ɖó Izlayɛ́li ví e hɔn kpan ta gbětótló mɛ lɛ́ɛ húzú kpan nukɔn yě mɛ e ɖo yě nya wɛ lɛ́ɛ.

²¹ Ée Jozuwée kpódó mɛ tɔn lɛ́ɛ kpó mɔ ɖɔ ahwanfuntɔ́ e tɔwu ɖo toxo ɔ́ gúdo dɔ̌n lɛ́ɛ yí toxo ɔ́, bɔ toxo ɔ́ kó ɖo zo ji wɛ ɔ́, yě lɛ́ kɔ bo jɛ Ayíinu lɛ́ɛ hu jí.

²² Izlayɛ́li ví ɖě lɛ́ɛ gosín toxo ɔ́ mɛ, bó wá kpé yě, bɔ Ayíinu lɛ́ɛ wá mɔ yěɖée ɖo Izlayɛ́li ví lɛ́ɛ tɛ́ntin, bó mɔ ɖɔ yě ján émí gbɔn fí bǐ. Izlayɛ́li ví lɛ́ɛ hu yě bǐ; yě jǒ mɛ ɖokpó lě dó nyi gbɛ ǎ. Yě ká lɔn bɔ mɛɖé hɔn yi ǎ.

²³ Yě wlí axɔ́sú Ayíi tɔn ɔ́ gbɛɖe, bó dɔn ɛ yi jó nú Jozuwée.

²⁴ Izlayɛ́li ví lɛ́ɛ hu Ayíinu e ma ɖo toxo ɔ́ mɛ ǎ lɛ́ɛ bǐ ɖo gbětótló mɛ, fí e Ayíinu lɛ́ɛ kó nya yě gbɔn ɖ'ayǐ é. Ée Izlayɛ́li ví lɛ́ɛ hu yě bǐ fó ɔ́, yě lɛ́ kɔ byɔ́ toxo ɔ́ mɛ, bó hu to ɔ́ mɛ nu e kpo lɛ́ɛ bǐ.

²⁵ Ayíinu súnnu kpó nyɔ̌nu kpó děgba atɔn (12.000) wɛ yě hu gbe énɛ́ ɔ́ gbe.

²⁶ Hwǎn e Jozuwée dlɛ́n sɛ́ dó Ayíi toxo ɔ́ ɖo mɔ̌, alɔ tɔn yi do ǎ; alɔ tɔn ɖo dlɛ̌ndlɛ́n mɔ̌ káká bɔ è hu to ɔ́ mɛ nu lɛ́ɛ bǐ sésé.

²⁷ Izlayɛ́li ví lɛ́ɛ bɛ́ dɔkun e ɖo toxo ɔ́ mɛ lɛ́ɛ, bó bɛ́ kanlin lɛ́ɛ lě e Mawu Mavɔmavɔ ɖɔ gbɔn nú Jozuwée é.

²⁸ Jozuwée dó Ayíi toxo ɔ́ zo, bɔ é húzú to gbigba, bɔ mɛɖé sɔ́ ɖo toxo ɔ́ mɛ ǎ. Toxo ɔ́ kpo ɖo mɔ̌ káká jɛ égbé.

²⁹ È hu axɔ́sú ɔ́, bó dó kan cyɔ tɔn ɖó gblɛlɛ mɛ ɖó atín ɖé wú, bɔ é nɔ mɔ̌ káká jɛ gbadanu. Ée hwe yi xɔ ɔ́, Jozuwée ná gbe bɔ è ɖe cyɔ ɔ́ jɛ te, bó zé e nyi hɔntogbó toxo ɔ́ tɔn nukɔn, lobo bɛ́ awǐnnya kplé ɖó jǐ tɔn gédégédé, bɔ é ɖo mɔ̌ káká jɛ égbé.

Jozuwée xa Mawusɛ́n ɔ́ ɖo Ebalu só jí

³⁰ Jozuwée mɛ vɔ̌sákpe ɖokpó nú Mawu Mavɔmavɔ, Mawu Izlayɛ́li tɔn ɔ́ ɖo Ebalu só jí.

³¹ É mɛ vɔ̌sákpe ɔ́ lě e mɛsɛntɔ́ Mawu Mavɔmavɔ tɔn Mɔyízi ko ɖɔ gbɔn nú yě ɖɔ yě ná mɛ gbɔn é; lě e è ɖɔ è nǎ mɛ vɔ̌sákpe ɔ́ gbɔn ɔ́, è wlǎn dó Sɛ́nwéma Mɔyízi tɔn ɔ́ mɛ. Awǐnnya makpamakpa wɛ è dǒ mɛ vɔ̌sákpe ɔ́ ná, alǐnnyánú ɖěbǔ jɛ wú ǎ. Vɔ̌ e è nɔ dó zo ɔ́ kpódó kɔnɖókpɔ́ vɔ́ kpó wɛ è nɔ sá nú Mawu Mavɔmavɔ ɖo vɔ̌sákpe ɔ́ jí.

³² Jozuwée wlán sɛ́n e Mɔyízi ko wlán ɖ'ayǐ ɔ́ dó awǐnnya lɛ́ɛ wú ɖo fínɛ́, ɖo Izlayɛ́li ví lɛ́ɛ nukún mɛ.

³³ Izlayɛ́li ví lɛ́ɛ bǐ, tomɛxó yětɔn lɛ́ɛ, gǎn yětɔn lɛ́ɛ, kpódó hwɛɖɔtɔ́ yětɔn lɛ́ɛ kpó, kpódó jǒnɔ yětɔn lɛ́ɛ kpó ɖo ɖisí amyɔ nú akɔjijɛgbá ɔ́, ɖo vɔ̌sánú-xwlémawutɔ́ e hɛn akɔjijɛgbá Mawu Mavɔmavɔ tɔn lɛ́ɛ nukɔn. Yě mɛ vlɔ̌ɖówe ɖo Galizímu só ɔ́ kpáxwé, bɔ vlɔ̌ɖówe ɖo Ebalu só ɔ́ kpáxwé. Mɔyízi wɛ ko ɖɔ ɖ'ayǐ ɖɔ è nǐ bló gbɔn mɔ̌, bó xo ɖɛ dó Izlayɛ́li togun ɔ́ jí dó nukɔn.

³⁴ Jozuwée wá xa nǔ e è wlán dó Sɛ́nwéma ɔ́ mɛ ɔ́ bǐ nú yě. É xa lě e è nɔ xo ɖɛ dó mɛ jí gbɔn ɔ́ kpó lě e è nɔ dó nu mɛ gbɔn ɔ́ kpó nú yě.

³⁵ É xa Mɔyízisɛ́n lɛ́ɛ bǐ sésé nú yě; é wɔn ɖokpó géé ǎ. Togun ɔ́ bǐ nukɔn wɛ é xa ɖe; nyɔ̌nu lɛ́ɛ, yɔkpɔ́vú lɛ́ɛ kpódó jǒnɔ e ɖo yě mɛ lɛ́ɛ bǐ kpó lɔ ɖo fínɛ́.