Jozuwée 7 - MAWUXÓWÉMA

Akáni wa nǔ nyi do bɔ Mawu dɔn tó n'i

¹ Izlayɛ́li ví lɛ́ɛ bló nǔ e Mawu Mavɔmavɔ gbɛ́ nú yě ɖɔ yě ní má bló ó é; ɖó nya ɖé ɖo yě mɛ, bó nɔ́ nyí Akáni, bó jɔ ɖo akɔta Judáa tɔn mɛ. Akáni ɔ́, Kaamíi ví wɛ, bɔ Kaamíi nyí Zavúdi ví, bɔ Zavúdi nyí Zeláxi ví. Dɔkun e Mawu Mavɔmavɔ gbɛ́ ɖɔ yě ní má bɛ́ ó lɛ́ɛ ɔ́, Akáni fɔ nǔɖé lɛ́ɛ ɖ'é mɛ. Nǔ énɛ́ ɔ́ wɛ zɔ́n bɔ Mawu Mavɔmavɔ sin xomɛ dó Izlayɛ́li ví lɛ́ɛ.

² Jozuwée sɛ́ mɛ dó sín Jeliko ɖɔ yě ní yi Ayíi. Toxo énɛ́ ɔ́ ɖo zǎnzǎnhwe jí nú Betɛ́li ɖo Bɛti-Awɛni kpá. É ɖɔ nú yě ɖɔ yě ní yi kpɔ́n lě e toxo ɔ́ ɖe gbɔn ɔ́. Ée yě yi kpɔ́n toxo ɔ́,

³ yě lɛ́ kɔ wá ɖɔ nú Jozuwée ɖɔ: “É byɔ́ ɖɔ è nǐ sɛ́ ahwangɔnu ɔ́ bǐ dó ahwan fun xá toxo énɛ́ ɔ́ gbé ǎ. Gbɛtɔ́ afɔwó (2.000) abǐ afɔwó-afatɔ́n (3.000) yi ɔ́, é kó kpé, ɖó mɛ e ɖo toxo ɔ́ mɛ lɛ́ɛ sukpɔ́ ɖěbǔ ǎ. È nǎ xaji dó tagba nú ahwangɔnu mǐtɔn ɔ́ bǐ ǎ.”

⁴ Gbɛtɔ́ afɔwó-afatɔ́n (3.000) mɔ̌ yi tɔ́n ahwan Ayíi toxo ɔ́. É ká kpa yě ǎ, yě bǐ wɛ hɔn ɖo Ayíinu lɛ́ɛ nukɔn.

⁵ Ayíinu lɛ́ɛ hu gbɛtɔ́ gbantɔ́n-nukún-ɖokpó (36) mɔ̌ ɖo yě mɛ. Mɛ e kpo lɛ́ɛ ɔ́, Ayíinu lɛ́ɛ nya yě sín hɔntogbó toxo ɔ́ tɔn nukɔn, káká wá Cevalímu, bó wá xwedó yě wú ɖo dodo ɔ́ mɛ, bó hu yě ɖo fínɛ́. Énɛ́ ɔ́, ahwi xo togun ɔ́ bǐ, bɔ xɛsi jɛ yě jí.

⁶ Ée nǔ cí mɔ̌ ɔ́, Jozuwée kpódó mɛxó lɛ́ɛ kpó vún awu dó kɔ nú yěɖée, bó vun afúntúntún dó ta, lobo xwe agbɔ̌nnusú do ɖo akɔjijɛgbá Mawu Mavɔmavɔ tɔn nukɔn, lobo nɔ mɔ̌ káká jɛ gbadanu.

⁷ Bɔ Jozuwée sú xó bó ɖɔ: “Óo! Aklúnɔ, Mawu Mavɔmavɔ! Aniwú a kplá mǐ d'asá Judɛ́ɛn tɔ ɔ́? A blǒ mɔ̌ bó ná jó mǐ nú Amɔliti lɛ́ɛ, bó ná tin bɔ mǐ ná kú wɛ a? Ényí mǐ kó tunwun ɔ́, mǐ ná kó gbɔ bó nɔ tɔ ɔ́ gúdo dɔ̌n.

⁸ Aklúnɔ, din e Izlayɛ́li ví lɛ́ɛ hɔn ɖo kɛntɔ́ nukɔn ɔ́, nu tɛ́ un sixú kɛ?

⁹ Kanáanu lɛ́ɛ kpó mɛ e ɖo to ɔ́ mɛ lɛ́ɛ bǐ kpó ná se xó énɛ́ ɔ́, bó ná wá xá mǐ, lobo ná sú kún mǐtɔn dó. Ényí nǔ ká cí mɔ̌ ɔ́, nɛ̌ wɛ a nǎ ɖe susu towe xlɛ́ gbɔn lo?”

¹⁰ Ée Jozuwée ɖɔ xó énɛ́ lɛ́ɛ fó ɔ́, Mawu Mavɔmavɔ yí gbe n'i ɖɔ: “Sí te! Étɛ́wú a ɖo agbɔ̌nnusú xwe do mɔ̌?

¹¹ Hwɛ wɛ Izlayɛ́li ví lɛ́ɛ hu. Yě nɔ gbejí nú akɔ e un jɛ xá yě ɔ́ ǎ. Yě bɛ́ dɔkun e un gbɛ́ nú yě ɖɔ yě ní má bɛ́ ɖo to ɔ́ mɛ ó lɛ́ɛ. Yě fin dɔkun lɛ́ɛ bó bɛ́ hwlá dó nǔ yětɔn lɛ́ɛ mɛ.

¹² Ée yě wa nǔ gbɔn mɔ̌ ɔ́, yě sɔ́ sixú nɔ te ɖo kɛntɔ́ yětɔn lɛ́ɛ nukɔn ǎ. Hɔn jɛ́n wɛ yě ná nɔ́ hɔn ɖo kɛntɔ́ nukɔn, ɖó yě ɖésúnɔ ɔ́, nǔ dindɔn wɛ yě kó nyí; è nǎ sú kún yětɔn dó. Mi Izlayɛ́li ví lɛ́ɛ ɔ́, dɔkun e un gbɛ́ ɖɔ mi ma bɛ́ ó bɔ mi bɛ́ lɛ́ɛ ɔ́, ényí mi ma hɛn gblé ǎ ɔ́, un sɔ́ sixú nɔ jǐ mitɔn ǎ.

¹³ Din ɔ́, yi ɖɔ nú togun ɔ́ ɖɔ é ní sɔ́ nǔ, bó wá kpé mì. Đe gbe n'i bónú é ní slá wǔ nú sɔ, ɖó nyɛ Mawu Mavɔmavɔ, Mawu Izlayɛ́li tɔn ɔ́, nǔ e ɖɔ nú Izlayɛ́li ví lɛ́ɛ wɛ un ɖe ɔ́ ɖíe: Dɔkun e un gbɛ́ ɖɔ mi ní ma bɛ́ ó lɛ́ɛ ɔ́, nǔ lɛ́ɛ ɖo así mitɔn. Ényí mi ma bɛ́ yě tɔ́n sín tɛ́ntin mitɔn ǎ ɔ́, mi ná sixú nɔ te ɖo kɛntɔ́ mitɔn lɛ́ɛ nukɔn ǎ.

¹⁴ Sɔ zǎnzǎn ɔ́, mi ná wá gɔ̌n ce ɖě jɛ ɖě gúdo. Nú un ɖe akɔta ɖé ɔ́, hɛ̌nnu e ɖo akɔta énɛ́ ɔ́ mɛ lɛ́ɛ bǐ ná wá gɔ̌n ce ɖě jɛ ɖě gúdo. Nú un ɖe hɛ̌nnu ɖé ɔ́, xwédo e ɖo hɛ̌nnu énɛ́ ɔ́ mɛ lɛ́ɛ ná wá gɔ̌n ce ɖě jɛ ɖě gúdo. Nú un ɖe xwédo ɖé ɔ́, súnnu e ɖo xwédo énɛ́ ɔ́ mɛ lɛ́ɛ ná wá gɔ̌n ce ɖě jɛ ɖě gúdo.

¹⁵ Énɛ́ ɔ́, un ná ɖe mɛ e sí dɔkun e un gbɛ́ ɖɔ è nǐ má bɛ́ lɛ́ɛ ó ɖe ɔ́ ɖo yě mɛ, bɔ è nǎ zé é kpódó nǔ e é ɖó lɛ́ɛ bǐ kpó nyi zo mɛ, ɖó é nɔ gbejí nú akɔ e un jɛ xá ɛ ɔ́ ǎ, bó wa wunhínhɔ́n nú ɖo Izlayɛ́li ví lɛ́ɛ tɛ́ntin.”

¹⁶ Ayǐhɔ́ngbe tɔn zǎnzǎn tɛɛn ɔ́, Jozuwée kplá Izlayɛ́li ví lɛ́ɛ yi Mawu nukɔn: akɔta ɖě bɔ dó ɖě wú, bɔ Mawu ɖe akɔta Judáa tɔn.

¹⁷ É kplá akɔta Judáa tɔn wá Mawu nukɔn: hɛ̌nnu ɖě jɛ ɖě gúdo, bɔ Mawu ɖe hɛ̌nnu Zeláxi tɔn, bɔ Jozuwée kplá hɛ̌nnu Zeláxi tɔn wá Mawu nukɔn xwédo ɖě jɛ ɖě gúdo, bɔ Mawu ɖe xwédo Zavúdi tɔn.

¹⁸ É kplá súnnu e ɖo xwédo Zavúdi tɔn mɛ lɛ́ɛ ɖokpó ɖokpó wá Mawu nukɔn, bɔ Mawu ɖe Akáni. Akáni ɔ́, akɔta Judáa tɔn ɔ́ mɛ wɛ é jɔ ɖe, bó nyí Kaamíi ví, bɔ Kaamíi nyí Zavúdi ví, bɔ Zavúdi nyí Zeláxi ví.

¹⁹ Jozuwée ɖɔ nú Akáni ɖɔ: “Vǐ ce, tunwun ɖɔ Mawu Mavɔmavɔ, Mawu Izlayɛ́li tɔn kló, ɖɔ nǔgbó nú mì. Đɔ nǔ e a wa ɔ́ nú mì; ma hwlá nǔ ɖěbǔ dó mì ó.”

²⁰ Bɔ Akáni yí gbe nú Jozuwée ɖɔ: “Nǔgbó wɛ, nyɛ wɛ hu hwɛ dó Mawu Mavɔmavɔ, Mawu Izlayɛ́li tɔn. Nǔ e un wa ɔ́ ɖíe:

²¹ Un mɔ awu ɖaxó ɖagbe ɖagbe e Mɛzopotamíinu lɛ́ɛ nɔ́ dó ɔ́ ɖokpó ɖo dɔkun lɛ́ɛ mɛ, bó mɔ kpatágan kilóo we jɛjí, bó mɔ sikágó ɖokpó, bɔ é ná yi kilóo vlɔ̌ bɔ kpɛɖé ɖ'é jí. Ée un mɔ nǔ énɛ́ lɛ́ɛ ɔ́, yě jló mì káká bɔ un bɛ́. Un kun do ɖó goxɔ ce tɛ́ntin bó bɛ́ hwlá d'é mɛ, kpatágan ɔ́ ɖo do.”

²² Ée Jozuwée se mɔ̌ ɔ́, é sɛ́ mɛ dó Akáni sín goxɔ mɛ ɖɔ yě ní yi bɛ́ nǔ lɛ́ɛ wá, bɔ mɛ lɛ́ɛ hwlɛ́n dó bó yi, lobo mɔ nǔ lɛ́ɛ ɖo do mɛ ɖo goxɔ ɔ́ tɛ́ntin, bɔ kpatágan ɔ́ ɖo do.

²³ Yě bɛ̌ nǔ lɛ́ɛ wá nú Jozuwée kpódó Izlayɛ́li ví lɛ́ɛ kpó. È bɛ̌ nǔ lɛ́ɛ ɖó akɔjijɛgbá ɔ́ nukɔn.

²⁴ Énɛ́ ɔ́ gúdo ɔ́, Jozuwée kpó Izlayɛ́li ví lɛ́ɛ bǐ kpó zɔn Akáni jí. Yě bɛ̌ kpatágan ɔ́ kpódó awu ɔ́ kpó, kpódó sikágó ɔ́ kpó, lobo kplá vǐ tɔn súnnu lɛ́ɛ kpódó nyɔ̌nu lɛ́ɛ kpó, bó kplá nyibú tɔn lɛ́ɛ, tócí tɔn lɛ́ɛ, gbɔ̌ tɔn lɛ́ɛ, bó bɛ́ goxɔ tɔn kpódó dɔkun tɔn ɖě lɛ́ɛ bǐ kpó. Yě bɛ̌ nǔ énɛ́ lɛ́ɛ bǐ hɛn yi tɔdo Akɔ́ɔ tɔn mɛ.

²⁵ Bɔ Jozuwée ɖɔ nú Akáni ɖɔ: “Hwi wɛ dɔn mǐ dó nǔ nyanya élɔ́ mɛ. Din ɔ́, Mawu Mavɔmavɔ ná dɔn hwi lɔmɔ̌ dó nǔ nyanya mɛ.” Ée Jozuwée ɖɔ mɔ̌ ɔ́, Izlayɛ́li ví lɛ́ɛ nyi awǐnnyaglo dó Akáni káká bɔ é kú. Yě nyi hwǎn dó hu mɛ tɔn lɛ́ɛ bǐ ná, bó dó dɔkun tɔn lɛ́ɛ bǐ zo.

²⁶ Énɛ́ ɔ́ gúdo ɔ́, yě kplé awǐnnya ɖó jǐ tɔn gédégédé, bɔ é kpo ɖo mɔ̌ káká jɛ din. Énɛ́ ɔ́ wú wɛ è nɔ ylɔ́ tɛn énɛ́ ɔ́ mɛ ɖɔ: “Tɔdo Akɔ́ɔ tɔn”. Ée yě bló mɔ̌ lo ɔ́, xomɛ Mawu Mavɔmavɔ tɔn fá.