Jozuwée 3 - MAWUXÓWÉMA

Izlayɛ́li ví lɛ́ɛ dó asá Judɛ́ɛn tɔ ɔ́

¹ Jozuwée fɔ́n zǎn bó gosín Citímu é kpó Izlayɛ́li ví lɛ́ɛ kpó. Yě yi Judɛ́ɛn tɔ ɔ́ tó, bó ɖó gɔnu ɖó fínɛ́ hwɛ̌ cóbó dó asá tɔ ɔ́.

² Azǎn tɔn atɔngɔ́ ɔ́ gbe ɔ́, gǎn e ɖo togun ɔ́ nu lɛ́ɛ gbɔn mɛ lɛ́ɛ jí.

³ Yě ɖɔ nú togun ɔ́ ɖɔ: “Hwenu e mi ná mɔ Levíi ví vɔ̌sánú-xwlémawutɔ́ lɛ́ɛ hɛn akɔjijɛgbá Mawu Mavɔmavɔ, Mawu mitɔn tɔn ɔ́ wá xweyǐgbe ɔ́, mi na gosín fí e mi ɖe ɔ́, bó ná jɛ gǔdo tɔn.

⁴ Énɛ́ ɔ́, é ná xlɛ́ ali e mi ná gbɔn ɔ́ mi, ɖó mi ko gbɔn fínɛ́ kpɔ́n gbeɖé ǎ. Mi ma ka sɛkpɔ́ ɛ dín ó, mi nɔ zɔ n'i nú kilomɛ́tlu ɖokpó mɔ̌.”

⁵ Jozuwée ɖɔ nú togun ɔ́ ɖɔ: “Mi slá wǔ, ɖó sɔ ɔ́, Mawu Mavɔmavɔ ná jlɛ́ nǔ ɖo tɛ́ntin mitɔn.”

⁶ Ée ayǐ hɔ́n ɔ́, é ɖɔ nú vɔ̌sánú-xwlémawutɔ́ lɛ́ɛ ɖɔ yě ní zé akɔjijɛgbá ɔ́, bó jɛ nukɔn nú togun ɔ́. Yě ká zé akɔjijɛgbá ɔ́, bó jɛ nukɔn nú togun ɔ́ ɖidó.

⁷ Mawu Mavɔmavɔ ɖɔ nú Jozuwée ɖɔ: “Bɛ́ sín égbé ɔ́, un ná sɔ́ acɛkpikpa towe jínjɔ́n ayǐ ɖo Izlayɛ́li ví lɛ́ɛ bǐ tɛ́ntin, bɔ yě ná tunwun ɖɔ un ɖo kpɔ́ xá we lě e un nɔ kpɔ́ xá Mɔyízi gbɔn é.”

⁸ A nǎ ɖɔ nú vɔ̌sánú-xwlémawutɔ́ e hɛn akɔjijɛgbá ɔ́ lɛ́ɛ ɖɔ yě byɔ́ Judɛ́ɛn tɔ ɔ́ mɛ tlóló hǔn, yě ní nɔ te.

⁹ Énɛ́ ɔ́ gúdo ɔ́, é ɖɔ nú Izlayɛ́li ví lɛ́ɛ ɖɔ: “Mi sɛ wá, bó se xó e Mawu Mavɔmavɔ, Mawu mitɔn ɖɔ é.”

¹⁰ Ée yě sɛ wá ɔ́, é ɖɔ nú yě ɖɔ: “Nǔ e Mavɔmavɔ ná jlɛ́ ɔ́ ná zɔ́n bɔ mi ná tunwun ɖɔ Mawu gbɛɖe ɔ́ ɖo tɛ́ntin mitɔn, bó ná nya Kanáanu lɛ́ɛ, Hitíti lɛ́ɛ, Hivíti lɛ́ɛ, Pɛliziti lɛ́ɛ, Giigacíti lɛ́ɛ, Amɔliti lɛ́ɛ kpódó Jebuzinu lɛ́ɛ kpán sín nukɔn mitɔn.

¹¹ Aklúnɔ ayǐkúngban ɔ́ bǐ tɔn sín akɔjijɛgbá ná nɔ nukɔn nú mi dó asá Judɛ́ɛn tɔ ɔ́.

¹² Mi cyán súnnu wěwe gbɔn akɔta Izlayɛ́li tɔn lɛ́ɛ mɛ. Mi sɔ́ súnnu ɖokpó ɖokpó gbɔn akɔta ɖokpó ɖokpó mɛ.

¹³ Hwenu e vɔ̌sánú-xwlémawutɔ́ e hɛn akɔjijɛgbá Mawu Mavɔmavɔ tɔn, Aklúnɔ e ɖó ayǐkúngban ɔ́ bǐ é tɔn ɔ́ lɛ́ɛ ná tɛ afɔ tɔ ɔ́ mɛ lě tlóló ɔ́, tɔ ɔ́ ná gbo bɔ sin ɔ́ ná kplé cí fí ɖokpó nǔɖé wɛ hɛn ɛ ɖó te ɖɔhun.”

¹⁴ Ée togun ɔ́ se mɔ̌ ɔ́, é gosín fí e é ɖe ɔ́, bó ná dó asá Judɛ́ɛn tɔ ɔ́. Vɔ̌sánú-xwlémawutɔ́ e hɛn akɔjijɛgbá Aklúnɔ tɔn lɛ́ɛ jɛ nukɔn nú yě.

¹⁵ Nǔkún-yiyahwenu, hwenu e Judɛ́ɛn tɔ ɔ́ nɔ ɖi sin, bo nɔ gba kpé fí bǐ ɔ́ wɛ mɛ e hɛn akɔjijɛgbá ɔ́ lɛ́ɛ wá tɔ ɔ́ tó. Ée vɔ̌sánú-xwlémawutɔ́ lɛ́ɛ tɛ afɔ sín ɔ́ mɛ lě tlóló ɔ́,

¹⁶ tɔ ɔ́ gbo, bɔ sin e sa jǎwe ɔ́ kplé cí fí ɖokpó nǔɖé wɛ hɛn ɛ ɖó te ɖɔhun. Sin ɔ́ nɔ te ɖo zɔ vóéé ɖo Adámu, toxo e ɖo Saatáni kpá ɔ́ mɛ. Bɔ sin e ɖo sisa yi Xu Kúkú ɔ́ mɛ wɛ ɔ́ gbo bǐ. Ée tɔ ɔ́ gbo mɔ̌ ɔ́, togun ɔ́ gbɔn ayǐkúngban xúxú jí, bó dó asá tɔ ɔ́ yi jɛ Jeliko nukɔn.

¹⁷ Vɔ̌sánú-xwlémawutɔ́ e hɛn akɔjijɛgbá Mawu Mavɔmavɔ tɔn lɛ́ɛ nɔ te ɖo ayǐkúngban xúxú jí, ɖo tɔ ɔ́ tɛ́ntin. Yě nɔ te fínɛ́ káká bɔ togun ɔ́ bǐ zɔn afɔ gbɔn ayǐkúngban xúxú jí yi jɛ tɔ ɔ́ gúdo.