Jozuwée 23 - MAWUXÓWÉMA

Jozuwée ɖɔ lě e Izlayɛ́li ví lɛ́ɛ ná wa nǔ gbɔn ɖo kú tɔn gúdo ɔ́ nú yě

¹ Mawu Mavɔmavɔ hwlɛ́n Izlayɛ́li ví lɛ́ɛ sín kɛntɔ́ e lɛ́ lɛ̌ dó yě lɛ́ɛ bǐ sí, bɔ yě mɔ agbɔ̌n; nǔ énɛ́ ɔ́ jɛ ɔ́, é kó lín tawun, káká bɔ Jozuwée ko kpo bǐ.

² Ée Jozuwée mɔ ɖɔ émí kó kpo bǐ ɔ́, é ylɔ́ Izlayɛ́li ví lɛ́ɛ bǐ, tomɛxó yětɔn lɛ́ɛ, gǎn yětɔn lɛ́ɛ, hwɛɖɔtɔ́ yětɔn lɛ́ɛ, ahwangán yětɔn lɛ́ɛ, bó ɖɔ nú yě ɖɔ: “Nyɛ ɖíe kó kpo bǐ e.

³ Mi ka mɔ lě e Mawu Mavɔmavɔ, Mawu mitɔn wa nǔ xá togun e ɖo ayǐkúngban énɛ́ lɛ́ɛ jí gbɔn ɖó mi wútu é. É ɖésúnɔ fun ahwan nú mi.

⁴ Mi kpɔ́n, ayǐkúngban e un ko yí ɔ́ kpó éé kpo bɔ un ma ko yí ǎ é kpó ɔ́, un ko nyi akɔ dó bó ko má nú akɔta mitɔn lɛ́ɛ bɛ́ sín Judɛ́ɛn tɔ ɔ́ tó ɖo zǎnzǎnhwe jí káká yi Mɛditɛlanɛ́ɛ xu ɔ́ tó ɖo gbadahwe jí.

⁵ Mawu Mavɔmavɔ, Mawu mitɔn ɖésú ná nya togun e kpo lɛ́ɛ ɖo nukɔn mitɔn. Ényí mi sɛkpɔ́ yě ɔ́, é ná bló bɔ yě ná hɔn, bɔ mi ná yí to yětɔn, lě e é kó dó akpá tɔn nú mi gbɔn é.

⁶ Amɔ̌, mi hɛn dó ayi mitɔn mɛ syɛ́nsyɛ́n ɖɔ nǔ e è wlǎn dó sɛ́nwéma Mɔyízi tɔn mɛ lɛ́ɛ ɔ́, mi ná xwedó bǐ, bó ná wa nǔ lě e sɛ́n ɔ́ zɔ́n gbɔn é, ma yi ɖisí ma yi amyɔ.

⁷ Mi ma kpé nǔɖé xá togun e kpó mi kpó kpo ɖo kpɔ́ lɛ́ɛ ó, mi ma ka ylɔ́ vodún yětɔn lɛ́ɛ ɖě sín nyǐkɔ ó, mi ma ka xwlé vodún yětɔn lɛ́ɛ ɖě sín nyǐkɔ dó nǔɖé jí ó, mi ma sɛn yě ɖě ó, mi ma ka jɛ kpo nú yě ɖě ó.

⁸ Mawu Mavɔmavɔ, Mawu mitɔn kɛ́ɖɛ́ wú wɛ mi ná tɛ́ dó lě e mi ko bló gbɔn káká jɛ din é.

⁹ Đó Mawu Mavɔmavɔ nya togun nukúnɖéjí hlɔ̌nhlɔ́nnɔ lɛ́ɛ ɖo nukɔn mitɔn, bɔ káká wá jɛ din ɔ́, yě ɖě kó sixú nɔ te ɖo nukɔn mitɔn ǎ.

¹⁰ Mɛ ɖokpó géé sí te ɖo mi mɛ ɔ́, é nɔ nya kɛntɔ́ afatɔ́n dó wezun nu, ɖó Mawu Mavɔmavɔ, Mawu mitɔn wɛ fun ahwan nú mi lě e é dó akpá tɔn nú mi gbɔn é.

¹¹ Mi bo cɔ́ miɖée ganjí, bó yí wǎn nú Mawu Mavɔmavɔ, Mawu mitɔn.

¹² Ényí mi lɛ́ kɔ sín gǔdo tɔn, bó yi ɖó kɔnɖókpɔ́ xá togun e kpó mi kpó kpo ɖo kpɔ́ lɛ́ɛ ɔ́, ényí mi da vǐ yětɔn lɛ́ɛ ɔ́, ényí mi byɔ́ yě mɛ ɔ́,

¹³ mi bo tunwun ganjí ɖɔ Mawu Mavɔmavɔ, Mawu mitɔn kún sɔ́ ná nɔ nya yě ɖo nukɔn mitɔn ɖě ó. Hwenɛ́nu ɔ́, yě ná húzú mɔ, bó ná húzú fɛ́ca nú mi. Yě ná bló bɔ mi ná mɔ wǔvɛ́ ɖi bǎ sɛ́n dó nɛgbé nú mi wɛ è ɖe ɖɔhun, abǐ wun wɛ ɖo nukún tɔ́n mi wɛ ɖɔhun. Nǔ ná ɖo mi xá wɛ mɔ̌ káká bɔ mi bǐ ná vɔ sín ayǐkúngban ɖagbe ɖagbe élɔ́ e Mawu Mavɔmavɔ, Mawu mitɔn ná mi ɔ́ jí.

¹⁴ Nyɛ ɔ́, zaanɖé din ɔ́, un ná yi fí e nǔ e mɔ hwe lɛ́ɛ bǐ ná yi é. Mi ní ka tunwun kpó ayi mitɔn bǐ kpó, kpódó lǐndɔ̌n mitɔn bǐ kpó ɖɔ Mawu Mavɔmavɔ, Mawu mitɔn kún gɔn akpá e é dó nú mi lɛ́ɛ ɖěbǔ ɖe ó; bǐ wɛ é ɖe káká yi fó.

¹⁵ Lě e Mawu Mavɔmavɔ, Mawu mitɔn ɖe akpá e é dó nú mi lɛ́ɛ gbɔn ɔ́, mɔ̌ ɖokpó ɔ́ jɛ́n wɛ é ná wa nǔ nyanya bǐ xá mi gbɔn, káká bó ná hu mi bǐ sín ayǐkúngban ɖagbe ɖagbe élɔ́ e é ná mi ɔ́ jí.

¹⁶ Ényí mi gba akɔ e é jɛ xá mi, bo ɖɔ mi ní ɖó sísí ná ɔ́, ényí mi ɖe kɔ́ nú vodún lɛ́ɛ, bó sɛn yě ɔ́, Mawu Mavɔmavɔ ná sin xomɛ dó mi, bó ná vɔ mi cɛ́jú mɛ sín ayǐkúngban ɖagbe ɖagbe élɔ́ e é nǎ mi ɔ́ jí.”