Jozuwée 22 - MAWUXÓWÉMA

Akɔta e ɖo Judɛ́ɛn sín zǎnzǎnhwe jí lɛ́ɛ

¹ Hwenɛ́nu ɔ́, Jozuwée ylɔ́ akɔta Hwlibɛ́ni tɔn ɔ́ kpódó Gadi tɔn kpó, bó ylɔ́ akɔta vlɔ́ Manasée tɔn e ɖo zǎnzǎnhwe jí ɔ́ lɔmɔ̌,

² bó ɖɔ nú yě ɖɔ: “Mi bló nǔ e mɛsɛntɔ́ Mawu Mavɔmavɔ tɔn Mɔyízi zɔ́n mi lɛ́ɛ bǐ, bó lɛ́ se gbe nú mì, bó bló nǔ e un zɔ́n mi lɛ́ɛ bǐ.

³ Mi jó nɔví mitɔn lɛ́ɛ dó sín hwenɛ́nu káká wá jɛ égbé ǎ. Nǔ e Mawu Mavɔmavɔ, Mawu mitɔn zɔ́n mi ɔ́ wɛ mi bló.

⁴ Din e Mawu Mavɔmavɔ, Mawu mitɔn bló, bɔ nɔví mitɔn lɛ́ɛ jɛ ayǐkúngban yětɔn jí, lě e é kó ɖɔ gbɔn nú yě ɔ́, mi lɛ́ kɔ yi to mitɔn mɛ. Mi ná yi nɔ ayǐkúngban e mɛsɛntɔ́ Mawu Mavɔmavɔ tɔn Mɔyízi ko ná mi ɔ́ jí ɖo Judɛ́ɛn tɔ ɔ́ sín zǎnzǎnhwe jí.

⁵ Amɔ̌, mi nyi sɛ́n e mɛsɛntɔ́ Mawu Mavɔmavɔ tɔn Mɔyízi dó nú mi lɛ́ɛ bǐ sésé: mi yí wǎn nú Mawu Mavɔmavɔ, Mawu mitɔn, mi xwedó nǔ e é ɖɔ lɛ́ɛ bǐ, mi bló nǔ e é zɔ́n mi lɛ́ɛ bǐ, mi tɛ́ dó wǔ tɔn, bó sɛn ɛ, kpódó ayixa mitɔn bǐ kpó, kpódó lǐndɔ̌n mitɔn bǐ kpó.”

⁶ Énɛ́ ɔ́ gúdo ɔ́, Jozuwée xo ɖɛ dó yě jí, bó ɖɔ nú yě ɖɔ yě ní lɛ́ kɔ yi xwé, bɔ yě yi.

⁷ Mɔyízi ko ná ayǐkúngban akɔta vlɔ́ Manasée tɔn we lɛ́ɛ ɖokpó ɖo Basáni, bɔ Jozuwée wá ná ayǐkúngban akɔta vlɔ́ Manasée tɔn ɔ́ wegɔ́ ɔ́, ɖo Izlayɛ́li ví ɖě lɛ́ɛ kpá, ɖo Judɛ́ɛn tɔ ɔ́ gúdo, ɖo gbadahwe jí. Hwenu e Jozuwée nyi yě sɛ́ dó xwé ɔ́, é xo ɖɛ nú yě.

⁸ É ɖɔ nú yě ɖɔ: “Mi lɛ́ kɔ yi xwé kpó dɔkun mitɔn lɛ́ɛ kpó; mi lɛ́ kɔ kpó kanlin mitɔn lɛ́ɛ kpó, kpatágan mitɔn lɛ́ɛ, siká mitɔn lɛ́ɛ, ganvɔ mitɔn lɛ́ɛ, gan mitɔn lɛ́ɛ kpódó nǔzínzán mitɔn lɛ́ɛ kpó; yě ná sukpɔ́ ɖésú. Mi má kɛntɔ́ mitɔn lɛ́ɛ sín dɔkun énɛ́ lɛ́ɛ e mi bɛ́ lɛ́ɛ xá nɔví mitɔn lɛ́ɛ.”

È mɛ vɔ̌sákpe nyi Judɛ́ɛn tɔ ɔ́ tó

⁹ Hwlibɛ́ni kpódó Gadi kpó sín akɔta lɛ́ɛ, kpódó akɔta vlɔ́ Manasée tɔn kpó lɛ́ kɔ yi to yětɔn mɛ. Yě gosín Izlayɛ́li ví ɖě lɛ́ɛ gɔ́n ɖo Silóo, ɖo Kanáa tomɛ, bó yi Galadi. Ayǐkúngban énɛ́ ɔ́ wɛ è nǎ yě, lě e Mawu Mavɔmavɔ kó ɖɔ gbɔn, gbɔn Mɔyízi jí é.

¹⁰ Ée yě kpo ɖo Kanáa to ɔ́ mɛ, bo ɖo yiyi wɛ káká lobo wá jɛ Judɛ́ɛn tɔ ɔ́ tó ɔ́, yě mɛ vɔ̌sákpe ɖokpó nyi fínɛ́, bɔ é d'agba ɖésú.

¹¹ È yi ɖɔ nú Izlayɛ́li ví ɖě lɛ́ɛ ɖɔ: “Mi ɖótó! Hwlibɛ́ni kpó Gadi kpó sín akɔta lɛ́ɛ, kpódó akɔta vlɔ́ Manasée tɔn kpó mɛ vɔ̌sákpe ɖokpó ɖó Judɛ́ɛn tɔ ɔ́ tó, ɖo akpá mǐtɔn ɖo Kanáa.”

¹² Ée Izlayɛ́li ví lɛ́ɛ se mɔ̌ ɔ́, yě bǐ kplé ɖo Silóo, bó ná yi tɔ́n ahwan akɔta e ɖo zǎnzǎnhwe jí lɛ́ɛ.

¹³ Yě sɛ́ Pínxási vɔ̌sánú-xwlémawutɔ́ Eleazáa ví ɔ́ dó Galadi, bɔ é ná ɖɔ xó nú Hwlibɛ́ni kpódó Gadi kpó sín akɔta lɛ́ɛ bó ná ɖɔ nú akɔta vlɔ́ Manasée tɔn e ɖo zǎnzǎnhwe jí ɔ́ kpó.

¹⁴ Gǎn togun ɔ́ tɔn wǒ xwedó e. È ɖe mɛ ɖokpó ɖokpó ɖo akɔta ɖokpó ɖokpó mɛ. Hɛ̌nnugán wɛ yě bǐ nyí ɖo xwédo Izlayɛ́li tɔn lɛ́ɛ nu.

¹⁵ Yě yi Hwlibɛ́ni kpó Gadi kpó sín akɔta lɛ́ɛ gɔ́n, bó yi akɔta vlɔ́ Manasée tɔn ɔ́ gɔ́n, ɖo Galadi, bo ɖɔ nú yě ɖɔ:

¹⁶ “Xó e togun Mawu Mavɔmavɔ tɔn ɔ́ bǐ kplé bó ɖɔ ɔ́ ɖíe: Agɔ tɛ́ ká nyí énɛ́ ɔ́ bɔ mi jɛ dó Mawu Izlayɛ́li tɔn ɔ́? Égbé din ɔ́, mi lɛ́ kɔ sín Mawu Izlayɛ́li tɔn ɔ́ gǔdo; mi mɛ vɔ̌sákpe, mi fɔ́n gǔ dó jǐ tɔn.

¹⁷ Mi sɔ́ flín nǔ e mi dó sin ɖo Peɔ́ɔ é ǎ cé? Mawu Mavɔmavɔ dɔn tó tɔn nú mǐ hwenɛ́nu, có mǐ kpo ɖo sin tɔn sún wɛ káká wá jɛ égbé. Bɔ din ɔ́, é kpé mɔ̌ lo ǎ cé?

¹⁸ Éɖíe mi lɛ́ kɔ sín Mawu Mavɔmavɔ gúdo égbé din e! Ényí mi fɔ́n gǔ dó jǐ tɔn égbé ɔ́, sɔ wá su ɔ́, Izlayɛ́li togun ɔ́ bǐ wɛ é nǎ zé xomɛsin tɔn dó wa nǔ xá.

¹⁹ Ényí mi mɔ ɖɔ ayǐkúngban émítɔn ɔ́ kún jɛ xá Mawu Mavɔmavɔ ó hǔn, mi bǐ ní wá to e nyí étɔn ɔ́ mɛ, ɖo fí e nɔtɛn tɔn ɖe é, bó kán ayǐkúngban ɖo fínɛ́. Amɔ̌, ɖo tají ɔ́, mi má mɛ vɔ̌sákpe ɖěvo zɛ Mawu Mavɔmavɔ, Mawu mǐtɔn tɔn ɔ́ wú, bó dó fɔ́n gǔ dó é kpó mǐ kpó jí ó.

²⁰ Hwenu e Akáni Zeláxi ví ɔ́ hu hwɛ ɖaxó, ɖó é bɛ́ dɔkun e è gbɛ̌ ɖɔ è nǐ má bɛ́ ó lɛ́ɛ wútu ɔ́, Izlayɛ́li togun ɔ́ bǐ wɛ Mawu Mavɔmavɔ zé xomɛsin tɔn dó wa nǔ xá, mi tunwun ganjí. Ényí Akáni ɖokpónɔ wɛ kú ɖó hwɛ énɛ́ ɔ́ e é hu ɔ́ wútu ǎ.”

²¹ Ée yě ɖɔ xó énɛ́ lɛ́ɛ fó ɔ́, Hwlibɛ́ni kpó Gadi kpó sín akɔta lɛ́ɛ, kpódó akɔta vlɔ́ Manasée tɔn e ɖo zǎnzǎnhwe jí ɔ́ kpó yí gbe nú xwédo akɔta ɖě lɛ́ɛ tɔn sín hɛ̌nnugán lɛ́ɛ ɖɔ:

²² “Mawu Mavɔmavɔ wɛ nyí Mawu gǎnhúnǔtɔ́. Ɛɛn, é wɛ nyí Mawu gǎnhúnǔtɔ́ e tunwun nǔ e wútu mǐ wa nǔ gbɔn mɔ̌ é. Izlayɛ́li ví lɛ́ɛ lɔ bǐ ná wá tunwun. Ényí gǔ wɛ mǐ fɔ́n dó Mawu Mavɔmavɔ jí, abǐ hwɛ ɖaxó ɖé wɛ mǐ hu dó e ɔ́, ní má jó mǐ dó nyi gbɛ égbé ó.

²³ Ényí vɔ̌sákpe mǐ ɖésúnɔ tɔn wɛ mǐ mɛ, bó ná nɔ sá vɔ̌ e è nɔ dó zo ɔ́ ɖ'é ji, bó ná nɔ xwlé nǔníná lɛ́ɛ ɖ'é jí, lobo ná nɔ sá kɔnɖókpɔ́ vɔ́ ɔ́ ɖ'é jí, bó dó gbɛ́ gbe nú Mawu Mavɔmavɔ ɔ́, Mawu Mavɔmavɔ ɖésú ní kanbyɔ́ mǐ!

²⁴ Mɔ̌ wɛ é ká nyí gbɔn ǎ. É nyɔ́ wa ɔ́, ado wɛ ɖo mǐ hu wɛ, bɔ mǐ wa nǔ gbɔn mɔ̌, bónú vǐ mitɔn lɛ́ɛ ní má wá kanbyɔ́ vǐ mǐdɛɛ tɔn lɛ́ɛ sɔ gúdo ɖɔ: ‘Étɛ́ mi kpó Mawu Mavɔmavɔ, Mawu Izlayɛ́li tɔn ɔ́ kpó ká kpé dó?

²⁵ Mawu Mavɔmavɔ ɖésú kó sɔ́ Judɛ́ɛn tɔ ɔ́ dó ɖó dogbó ɖo mǐ kpó mi Hwlibɛ́ni kpó Gadi kpó sín mɛ lɛ́ɛ kpó tɛ́ntin. Nǔɖé kan mi ɖo Mawu Mavɔmavɔ sinsɛn xó mɛ ǎ.’ Énɛ́ ɔ́, nú vǐ mitɔn lɛ́ɛ ɖɔ mɔ̌ ɔ́, yě ná ná ta syɛ́nsyɛ́n kúnkan mǐdɛɛ tɔn lɛ́ɛ, bɔ yě ná gbɛ́ Mawu Mavɔmavɔ sɛn.

²⁶ Nǔ má nyí gbɔn mɔ̌ ó wɛ zɔ́n bɔ mǐ ɖɔ mǐ ná mɛ vɔ̌sákpe ɖokpó, é ká nyí ɖɔ mǐ ná wá sá vɔ̌ e è nɔ dó zo ɔ́, abǐ vɔ̌ ɖě lɛ́ɛ ɖ'é jí wú wɛ ǎ.

²⁷ Nǔ e mǐ jló kpowun ɔ́ wɛ nyí ɖɔ vɔ̌sákpe élɔ́ ní nyí kúnnuɖenú nú mǐ kpó mi kpó, bó nyí kúnnuɖenú nú vǐ mitɔn lɛ́ɛ kpó vǐ mǐtɔn e ná wá jɔ lɛ́ɛ kpó; ɖó mǐ nɔ́ sá vɔ̌ e è nɔ dó zo lɛ́ɛ, kpódó kɔnɖókpɔ́ vɔ́ lɛ́ɛ kpó, kpódó vɔ̌ ɖěvo lɛ́ɛ kpó nú Mawu Mavɔmavɔ, bó ná dó sɛn ɛ ɖo goxɔ tɔn mɛ. Énɛ́ ɔ́, vǐ mitɔn lɛ́ɛ sɔ́ ná wá ɖɔ nú mǐdɛɛ tɔn lɛ́ɛ ɖɔ nǔɖé kún kan yě ɖo Mawu Mavɔmavɔ sín xó mɛ ó ǎ.

²⁸ Mǐ ɖɔ ényí yě wá ɖɔ mɔ̌ nú mǐ, abǐ nú vǐ mǐtɔn lɛ́ɛ ɖo nukɔn mɛ jɛ́n wɛ ɔ́, mǐ ná sixú yí gbe nú yě ɖɔ: ‘Mi kpɔ́n vɔ̌sákpe élɔ́ e tɔ́gbó mǐtɔn lɛ́ɛ mɛ é; nǔ ɖokpó ɔ́ wɛ é nyí xá vɔ̌sákpe Mawu Mavɔmavɔ tɔn. É ká ɖo mɔ̌ có, ényí ɖɔ yě mɛ vɔ̌sákpe élɔ́ bó ná nɔ́ sá vɔ̌ e è nɔ dó zo ɔ́ kpó vɔ̌sísá ɖěvo lɛ́ɛ kpó ɖ'é jí wɛ ǎ; lo ɔ́, yě mɛ bɔ é ná nyí kúnnuɖenú ɖo mi kpó mǐ kpó tɛ́ntin.’

²⁹ Énɛ́ ɔ́, mǐ lin gbeɖé ɖɔ mǐ ná gbɛ́ gbe n'i wú wɛ mǐ mɛ vɔ̌sákpe élɔ́ ǎ; é ká nyí ɖɔ mǐ ná sá vɔ̌ e è nɔ dó zo lɛ́ɛ, bó ná xwlé nǔníná lɛ́ɛ, bó ná sá vɔ̌ ɖěvo lɛ́ɛ wú wɛ ǎ. Mǐ jló ná nɔ́ sá vɔ̌ tɛnmɛ tɛnmɛ énɛ́ lɛ́ɛ ɖo fí ɖěvo zɛ vɔ̌sákpe Mawu Mavɔmavɔ, Mawu mǐtɔn tɔn e ɖo goxɔ tɔn sín nukɔn ɔ́ wú ǎ.”

³⁰ Ée vɔ̌sánú-xwlémawutɔ́ Pínxási kpódó nukɔntɔ́ togun ɔ́ tɔn lɛ́ɛ kpó, kpódó hɛ̌nnugán xwédo Izlayɛ́li ví lɛ́ɛ tɔn kpó se xó e Hwlibɛ́ni ví lɛ́ɛ, Gadi ví lɛ́ɛ, kpódó Manasée ví lɛ́ɛ kpó ɖɔ ɔ́, é víví nú yě.

³¹ Pínxási vɔ̌sánú-xwlémawutɔ́ Eleazáa ví ɔ́ ɖɔ nú Hwlibɛ́ni ví lɛ́ɛ kpódó Gadi ví lɛ́ɛ kpó, kpódó Manasée ví lɛ́ɛ kpó ɖɔ: “Mǐ tunwun din ɖɔ Mawu Mavɔmavɔ ɖo kpɔ́ xá mǐ, ɖó mi hu hwɛ ɖaxó ɖé dó Mawu Mavɔmavɔ lě e mǐ vɛdó bó ɖo xɛsi ɖi wɛ ɔ́ ǎ. Hǔn é nyí ɖɔ tó dɔn nú mɛ Mawu Mavɔmavɔ tɔn dɔn dó Izlayɛ́li ví lɛ́ɛ jí wɛ mi ɖe ǎ.”

³² Pínxási vɔ̌sánú-xwlémawutɔ́ Eleazáa ví ɔ́ kpódó nukɔntɔ́ togun ɔ́ tɔn lɛ́ɛ kpó jó Hwlibɛ́ni kpódó Gadi kpó sín akɔta lɛ́ɛ dó bó yi. Yě gosín Galadi bo yi Kanáa, bó ɖó gbe nú Izlayɛ́li ví ɖě lɛ́ɛ.

³³ Ée mɛ e yě sɛ́ dó lɛ́ɛ wá ɖó gbe nú yě ɔ́, é víví nú yě, bɔ yě dó kú nú Mawu. Linlin e yě kó ɖó ɖ'ayǐ ɖɔ émí ná yi tɔ́n ahwan Hwlibɛ́ni kpódó Gadi kpó sín akɔta lɛ́ɛ, bo ná hɛn nǔ e ɖo ayǐkúngban yětɔn jí lɛ́ɛ bǐ gblé ɔ́, yě jó dó.

³⁴ Hwenɛ́nu ɔ́, Hwlibɛ́ni kpó Gadi kpó sín mɛ lɛ́ɛ sú xó bó ɖɔ: “Vɔ̌sákpe élɔ́ ɖo kúnnu ɖe nú mǐ bǐ wɛ ɖɔ Mawu Mavɔmavɔ nyí Mawu!” Bɔ yě sun nyǐ vɔ̌sákpe ɔ́ ɖɔ “Kúnnuɖetɔ́”.