Jozuwée 20 - MAWUXÓWÉMA

Toxo e mɛ Izlayɛ́li ví lɛ́ɛ ná nɔ́ hɔn yi cí lɛ́ɛ

¹ Mawu Mavɔmavɔ ɖɔ nú Jozuwée ɖɔ:

² Đɔ nú Izlayɛ́li ví lɛ́ɛ ɖɔ: “Toxo e mɛ mi hɛn ɔ́, mi ná nɔ hɔn hwlá cí, bɔ un ko ɖɔ xó tɔn nú mi gbɔn Mɔyízi jí lɛ́ɛ ɔ́, mi cyán yě.

³ É sixú wá yá bɔ mɛɖé ná ɖo mi mɛ, bó ná tunwun ǎ, lobo ná hu mɛ. Ényí nǔ wá nyí mɔ̌ ɔ́, mɛ énɛ́ ɔ́ hɛn ɔ́, é ná hɔn hwlá cí toxo énɛ́ lɛ́ɛ ɖě mɛ, bó ná gló mɛ e ɖo mɛ e kú ɔ́ sín hlɔn ba wɛ é.

⁴ Nú mɛ e hu mɛ ɔ́ hɔn yi toxo e mɛ è nɔ hɔn hwlá cí ɔ́ ɖě mɛ ɔ́, é ná nɔ te ɖo toxo ɔ́ sín hɔntogbó ta, fí e è nɔ ɖɔ to ɔ́ sín xó ɖe é, bó ná tín nǔ e é wa ɔ́ mɛ nú tomɛxó fínɛ́ tɔn lɛ́ɛ. Énɛ́ ɔ́, yě ná jó e dó bɔ é ná byɔ́ toxo ɔ́ mɛ, bɔ yě ná ná ɛ fí e é ná nɔ é.

⁵ Ényí mɛ e ɖo mɛ e kú ɔ́ sín hlɔn ba wɛ ɔ́ jɛ gǔdo tɔn káká wá jɛ fínɛ́ ɔ́, toxo ɔ́ mɛ nu lɛ́ɛ ná jó mɛ e hɔn wá su yě ɔ́ n'i ǎ, ɖó awǒvi nú wɛ jɛ. É tunwun có bó bló ǎ; mɛ e é hu ɔ́, é kpó é kpó ká kó kpé nǔɖé ɖ'ayǐ ǎ.

⁶ É ná nɔ toxo énɛ́ ɔ́ mɛ káká bɔ togun ɔ́ ná ɖɔ hwɛ tɔn, bɔ é ná ɖo fínɛ́ káká jɛ hwenu e mɛ e nyí vɔ̌sánú-xwlémawutɔ́ ɖaxó hwenɛ́nu ɔ́ ná kú dó é. Hwenɛ́nu ɔ́, mɛ e hu mɛ ɔ́ ná lɛ́ kɔ yi to tɔn mɛ fí e é hɔn sín é.”

⁷ Ée Izlayɛ́li ví lɛ́ɛ se mɔ̌ ɔ́, yě cyán toxo élɔ́ lɛ́ɛ: Kedɛ́ci ɖo Galilée, ɖo sókan Nɛfutali tɔn mɛ, Sikɛ́mu, ɖo sókan Eflayímu tɔn mɛ, kpódó Kiliyati-Aaba e è nɔ lɛ́ ylɔ́ ɖɔ Eblɔ́n ɔ́ kpó, ɖo sókan Judáa tɔn mɛ.

⁸ Yě cyán toxo élɔ́ lɛ́ɛ ɖo Judɛ́ɛn tɔ ɔ́ sín zǎnzǎnhwe jí, ɖo Jeliko sín zǎnzǎnhwe jí: Bɛsɛ́ɛ ɖo ayǐkúngban wɛnjɛ akɔta Hwlibɛ́ni tɔn ɔ́ jí, ɖo gbětótló mɛ. Hlamɔti ɖo Galadi, ɖo akɔta Gadi tɔn ɔ́ sín ayǐkúngban jí, kpódó Goláni kpó ɖo Basáni, ɖo akɔta Manasée tɔn ɔ́ sín ayǐkúngban jí.

⁹ Toxo e è cyán bɔ Izlayɛ́li ví lɛ́ɛ kpódó jǒnɔ e ɖo yě mɛ lɛ́ɛ kpó ná nɔ́ yi hɔn hwlá cí lɛ́ɛ nɛ́. Nú mɛɖé má tunwun ǎ bó hu mɛɖé ɔ́, mɛ énɛ́ ɔ́ ná hɔn hwlá cí toxo énɛ́ lɛ́ɛ ɖě mɛ, bó ná gló mɛ e ɖo mɛ e è hu ɔ́ sín hlɔn ba wɛ é. Énɛ́ ɔ́, mɛ e ɖo mɛ e è hu ɔ́ sín hlɔn ba wɛ ɔ́ ná hu mɛ e hu mɛ ɔ́ cóbɔ è nǎ ɖɔ hwɛ tɔn ǎ.