Jozuwée 19 - MAWUXÓWÉMA

Ayǐkúngban e è nǎ akɔta Sinmɛnyɔ́ɔ tɔn é

¹ Ayǐkúngban wegɔ́ ɔ́ e è nyi akɔ dó ɔ́, akɔta Sinmɛnyɔ́ɔ tɔn ɔ́ sín hɛ̌nnu lɛ́ɛ wɛ yí.

² Toxo e ɖo ayǐkúngban yětɔn jí lɛ́ɛ ɖíe: Bɛ̌-Ceva, Cema, Mɔlada,

³ Hasáa-Cuwáli, Bala, Esɛ́mu,

⁴ Ɛlutoladi, Betúli, Hɔ́ɔma,

⁵ Siklági, Bɛti-Maakavɔ́ti, Hasáa-Súsa,

⁶ Bɛti-Levaɔ́ti kpódó Caluxɛ́ni kpó. É bló toxo wǒ-atɔn, kpódó gletoxo e lɛ́ lɛ̌ dó yě lɛ́ɛ kpó.

⁷ Toxo élɔ́ lɛ́ɛ lɔ ɖ'é mɛ: Eyinu-Hlimumɔ́ni, Etɛ́ɛ kpódó Acáni kpó. É bló toxo ɛnɛ, kpódó gletoxo e lɛ́ lɛ̌ dó yě lɛ́ɛ kpó.

⁸ Gletoxo e ɖo toxo énɛ́ lɛ́ɛ kpá káká yi Baaláti-Beɛɛ e nyí Hlamati tofɔligbé tɔn ɔ́ gɔ́ ná. Ayǐkúngban e nyí akɔta Sinmɛnyɔ́ɔ tɔn sín hɛ̌nnu lɛ́ɛ tɔn ɔ́ nɛ́.

⁹ Akɔta Judáa tɔn sín ayǐkúngban mɛ wɛ è kán ayǐkúngban nú akɔta Sinmɛnyɔ́ɔ tɔn ɔ́ ɖe. Đó ayǐkúngban yědɛɛ lɛ́ɛ tɔn ko d'agba dín ɖ'ayǐ. Énɛ́ ɔ́ wɛ zɔ́n bɔ ayǐkúngban yětɔn lɛ́ lɛ̌ dó Sinmɛnyɔ́ɔ sín akɔta ɔ́ tɔn.

Ayǐkúngban e è nǎ akɔta Zabulɔ́ɔn tɔn é

¹⁰ Ayǐkúngban atɔngɔ́ ɔ́ e è nyi akɔ dó ɔ́, akɔta Zabulɔ́ɔn tɔn sín hɛ̌nnu lɛ́ɛ wɛ yí. Ayǐkúngban e è nǎ yě ɔ́ hun káká yi Salidu.

¹¹ É gosín fínɛ́, bó tunta gbadahwe jí, ɖo Maleala, bó gbɔn Dabɛsɛ́ti, bo yi fó dó tɔsisa e gbɔn Yokunɛámu nukɔn ɔ́ tó.

¹² Dogbó ɔ́ gosín Salidu, bó xá dó zǎnzǎnhwe jí, bó yi Kisilɔ́ti-Tabɔ́ɔ sín dogbó ɔ́ kɔn, bó gbɔn Davɛlati, lobo yi Yafia.

¹³ É gosín fínɛ́ bó gbɔn zǎnzǎnhwe jí, ɖo Gati-Hefɛ́ɛ, bó gbɔn Ita-Kacíni, bó dín yi Hlimumɔ́ni, bo xá d'é mɛ káká yi Nɛya.

¹⁴ Dogbó ɔ́ xá ɖo Hannatɔ́ni taligbé, bó yi fó dó tɔdo Yifutáxi-Ɛli tɔn mɛ.

¹⁵ Toxo élɔ́ lɛ́ɛ ɖ'é mɛ: Katáti, Naxalalu, Cimulɔ́ni, Yideala kpódó Bɛteleyɛ́mu kpó. É bló toxo wěwe, kpódó gletoxo yětɔn lɛ́ɛ kpó.

¹⁶ Toxo énɛ́ lɛ́ɛ bǐ wɛ ɖo ayǐkúngban e è nǎ akɔta Zabulɔ́ɔn tɔn ɔ́ sín hɛ̌nnu lɛ́ɛ ɔ́ jí.

Ayǐkúngban e è nǎ akɔta Isakáa tɔn é

¹⁷ Ayǐkúngban ɛnɛgɔ́ ɔ́ e è nyi akɔ dó ɔ́, akɔta Isakáa tɔn ɔ́ sín hɛ̌nnu lɛ́ɛ wɛ yí.

¹⁸ Toxo élɔ́ lɛ́ɛ ɖo ayǐkúngban yětɔn jí: Izleyɛ́li, Kesulɔ́ti, Cunɛ́mu,

¹⁹ Hafalayímu, Ciɔ́ni, Anaxalati,

²⁰ Hlabíti, Kiciɔ́ni, Evɛ́si,

²¹ Hlɛmɛ́ti, Eyinu-Gannimu, Eyinu-Hada kpódó Bɛti-Pasesi kpó.

²² Dogbó ɔ́ yi Tabɔ́ɔ, é yi Caxasíma, é yi Bɛti-Cɛmɛ́ci, bo yi fó dó Judɛ́ɛn tɔ ɔ́ tó. Toxo afɔtɔn-nukún-ɖokpó wɛ ɖo ayǐkúngban ɔ́ jí, kpódó gletoxo e lɛ́ lɛ̌ dó yě lɛ́ɛ kpó.

²³ Ayǐkúngban e è nǎ akɔta Isakáa tɔn sín hɛ̌nnu lɛ́ɛ nɛ́.

Ayǐkúngban e è nǎ akɔta Acɛ́ɛ tɔn é

²⁴ Ayǐkúngban atɔ́ɔ́ngɔ́ ɔ́ e è nyi akɔ dó ɔ́, akɔta Acɛ́ɛ tɔn sín hɛ̌nnu lɛ́ɛ wɛ yí.

²⁵ Ayǐkúngban yětɔn gbɔn Hɛlukáti, Hali, Bɛtɛ́ni, Akisáfu,

²⁶ Alamɛlɛ́ki, Amɛyadi, kpódó Miceali kpó. É sɛ yi Kaamɛ́li só ɔ́ kpó Cixɔ́ɔ-Livunati kpó ɖo gbadahwe jí.

²⁷ É xá gbɔn zǎnzǎnhwe jí ɖo Bɛti-Dagɔ́ni, bo dín yi Zabulɔ́ɔn yíkúngban ɔ́ kpódó tɔdo Yifutáxi-Ɛli tɔn kpó kɔn, ɖo Bɛti-Emɛ́ki kpó Nɛyiɛli kpó sín taligbé, bó dín ɖidó Kavúli ɖo amyɔxwé.

²⁸ É ɖidó Avidɔni, Hlexɔ́vu, Hamumɔ́ni kpódó Kana kpó, bó yi fó dó Sidɔ́ɔn toxo ɖaxó ɔ́ kpá.

^29-30 Dogbó ɔ́ xá gbɔn Hlama kpódó Tíi sín ahohó ɔ́ kpó kpá ɖidó Hosa, bó gbɔn Maxalɛ́vu, Akizívu, Ako, Afɛ́ki kpó Hlexɔ́vu kpó bó yi fó dó Mɛditɛlanɛ́ɛ xu ɔ́ tó. Bǐ bló toxo ko-nukún-we ɖo ayǐkúngban ɔ́ jí, kpódó gletoxo e lɛ́ lɛ̌ dó yě lɛ́ɛ kpó.

³¹ Ayǐkúngban e è nǎ akɔta Acɛ́ɛ tɔn sín hɛ̌nnu lɛ́ɛ ɔ́ nɛ́. Toxo énɛ́ lɛ́ɛ kpódó gletoxo e lɛ́ lɛ̌ dó yě lɛ́ɛ kpó ɖo ayǐkúngban énɛ́ ɔ́ jí.

Ayǐkúngban e è nǎ akɔta Nɛfutali tɔn é

³² Ayǐkúngban ayizɛ́ngɔ́ ɔ́ e è nyi akɔ dó ɔ́, akɔta Nɛfutali tɔn sín hɛ̌nnu lɛ́ɛ wɛ yí.

³³ Dogbó ayǐkúngban ɔ́ tɔn e ɖo afɔligbé ɔ́ bɛ́ sín Helɛ́fu, sín Elɔ́ni, bó gbɔn Saanánimu cɛ́nitín kan mɛ, bó gbɔn Adámi-Nɛgɛ́vu kpódó Yavunɛyɛ́li kpó, bó yi Lakúmu, bó yi fó dó Judɛ́ɛn tɔ ɔ́ tó.

³⁴ Đo gbadahwe jí ɔ́, dogbó ɔ́ xá d'é mɛ ɖidó Azinɔ́ti-Tabɔ́ɔ, bó yi Hukɔ́ki, bó mlɛ́ Zabulɔ́ɔn yíkúngban ɔ́ ɖo afɔligbé, bó wá yi Acɛ́ɛ yíkúngban ɔ́ kpá, ɖo gbadahwe jí. Judɛ́ɛn tɔ ɔ́ wɛ nyí ayǐkúngban ɔ́ sín dogbó ɖo zǎnzǎnhwe jí.

³⁵ Toxo e ɖo ayǐkúngban ɔ́ jí, bɔ è mɛ ahohó lɛ́ lɛ̌ dó lɛ́ɛ ɖíe: Sidímu, Sɛ́ɛ, Hamumáti, Hlakáti, Jenɛzalɛ́ti,

³⁶ Adáma, Hlama, Hasɔ́ɔ,

³⁷ Kedɛ́ci, Edlɛyi, Eyinu-Hasɔ́ɔ,

³⁸ Yileɔ́ni, Migidalu-Ɛlu, Holɛ́mu, Bɛti-Anati kpódó Bɛti-Cɛmɛ́ci kpó. Bǐ bló toxo afɔtɔn-nukún-ɛnɛ, kpódó gletoxo e lɛ́ lɛ̌ dó yě lɛ́ɛ kpó.

³⁹ Ayǐkúngban e è nǎ akɔta Nɛfutali tɔn sín hɛ̌nnu lɛ́ɛ ɔ́ nɛ́. Toxo ɖaxó ɖaxó énɛ́ lɛ́ɛ kpó gletoxo e lɛ́ lɛ̌ dó yě lɛ́ɛ kpó ɖo ayǐkúngban énɛ́ ɔ́ jí.

Ayǐkúngban e è nǎ akɔta Dan tɔn é

⁴⁰ Ayǐkúngban tɛ́nwegɔ́ ɔ́ e è nyi akɔ dó ɔ́, akɔta Dan tɔn sín hɛ̌nnu lɛ́ɛ wɛ yí.

⁴¹ Toxo élɔ́ lɛ́ɛ wɛ ɖo ayǐkúngban yětɔn jí: Soléa, Ɛcitawɔ́lu, Ii-Cɛmɛ́ci,

⁴² Caalabubíni, Ayalɔ́ni, Yitála,

⁴³ Elɔ́ni, Timuna, Eklɔ́ni,

⁴⁴ Ɛluteke, Gibetɔ́ni, Baaláti,

⁴⁵ Yexudi, Benɛ-Belaki, Gati-Hlimumɔ́ni,

⁴⁶ Mɛ-Yaakɔ́ni kpódó Hlakɔni kpó, kpódó ayǐkúngban e ɖo Jafa nukɔn ɔ́ kpó.

⁴⁷ Ayǐkúngban e è nǎ akɔta Dan tɔn ɔ́, yě kpé wú bó yí ǎ. Énɛ́ ɔ́, yě gbɔ bó yi tɔ́n ahwan Lɛcɛ́mu toxo ɔ́. Yě yǐ toxo ɔ́, bó hu toxo ɔ́ mɛ nu lɛ́ɛ bǐ. Yě jɛ ayǐkúngban ɔ́ bǐ jí, bó sá xwé nyi fínɛ́. Tɔ́gbó yětɔn Dan sín nyǐkɔ wɛ yě ɖó nú toxo ɔ́.

⁴⁸ Ayǐkúngban e è nǎ akɔta Dan tɔn sín hɛ̌nnu lɛ́ɛ ɔ́ nɛ́. Toxo énɛ́ lɛ́ɛ kpó gletoxo e lɛ́ lɛ̌ dó yě lɛ́ɛ kpó ɖo ayǐkúngban énɛ́ ɔ́ jí.

⁴⁹ Ée Izlayɛ́li ví lɛ́ɛ má to ɔ́ yětɔn yětɔn ɔ́, yě ná ayǐkúngban ɔ́ ɖě Jozuwée Nuni ví ɔ́ ɖo yětɔn mɛ.

⁵⁰ Toxo e Jozuwée byɔ́ ɔ́ wɛ yě ná ɛ lě e Mawu Mavɔmavɔ ɖɔ nú yě gbɔn é. Toxo ɔ́ wɛ nyí Timunati-Sɛláxi, ɖo sókan Eflayímu tɔn ɔ́ mɛ. Jozuwée vɔ́ toxo ɔ́ blóɖó, bó jɛ mɛ.

⁵¹ Vɔ̌sánú-xwlémawutɔ́ Eleazáa kpó Jozuwée Nuni ví ɔ́ kpó, kpódó hɛ̌nnugán akɔta Izlayɛ́li ví lɛ́ɛ tɔn lɛ́ɛ kpó wɛ nyi akɔ dó ayǐkúngban tɛnmɛ tɛnmɛ nɛ́ lɛ́ɛ, bó má. Silóo wɛ yě bló ɖe ɖo Mawu Mavɔmavɔ nukɔn, ɖo goxɔ e mɛ Mawu Mavɔmavɔ ná nɔ wá kpé yě ɖe ɔ́ sín alihɛ́nnu. Lě e yě mǎ to ɔ́ gbɔn ɔ́ nɛ́.