Jozuwée 17 - MAWUXÓWÉMA

Ayǐkúngban e è nǎ akɔta Manasée tɔn é

¹ È nǎ ayǐkúngban ɖě akɔta Manasée tɔn; é wɛ nyí nukɔn ví Jozɛ́fu tɔn. Makíi e nyí nukɔn ví Manasée tɔn, bo nyí Galadi sín tɔ́ ɔ́, è ko ná Galadi yíkúngban ɔ́ kpó Basáni yíkúngban ɔ́ kpó éyɛ́, ɖó ahwanfuntɔ́ wɛ é nyí.

² È lɛ̌ nǎ ayǐkúngban ɖěvo akɔta Manasée tɔn sín hɛ̌nnu ɖě lɛ́ɛ lɔmɔ̌. Hɛ̌nnu énɛ́ lɛ́ɛ ɖíe: hɛ̌nnu Aviɛzɛ́ɛ tɔn, Helɛ́ki tɔn, Asiliɛ́li tɔn, Cɛkɛ́mu tɔn, Hefɛ́ɛ tɔn kpódó Cemida tɔn kpó. Jozɛ́fu ví Manasée ɔ́, vǐ tɔn súnnu lɛ́ɛ sín hɛ̌nnu lɛ́ɛ nɛ́.

³ Selofɛxádi ji vǐ súnnu ɖě ǎ, nyɔ̌nu kɛ́ɖɛ́ wɛ é ji. Hefɛ́ɛ ví wɛ é nyí, bɔ Hefɛ́ɛ nyí Galadi ví, bɔ Galadi nyí Makíi ví, bɔ Makíi nyí Manasée ví. Selofɛxádi sín vǐ nyɔ̌nu lɛ́ɛ sín nyǐkɔ ɖíe: Maxla, Nɔwa, Hogla, Miluka kpó Tíisa kpó.

⁴ Vǐ nyɔ̌nu nɛ́ lɛ́ɛ wá mɔ vɔ̌sánú-xwlémawutɔ́ Eleazáa kpódó Jozuwée Nuni ví ɔ́ kpó, kpódó mɛ e ɖo togun ɔ́ nu lɛ́ɛ kpó, bó ɖɔ nú yě ɖɔ: “Mawu Mavɔmavɔ zɔ́n Mɔyízi ɖɔ é ní ná ayǐkúngban mǐ lɔmɔ̌, lě e è nǎ súnnu e ɖo akɔta mǐtɔn mɛ lɛ́ɛ ɔ́ ɖɔhun.” Ée yě ɖɔ mɔ̌ ɔ́, è xwedó gbeta e Mawu Mavɔmavɔ ɖe tɔ́n ɔ́, bó ná ayǐkúngban yě, lě e è nǎ súnnu e ɖo akɔta yětɔn mɛ lɛ́ɛ é ɖɔhun.

⁵ Ayǐkúngban e akɔta Manasée tɔn yí ɔ́ bló ayǐkúngban ta wǒ, bɔ ayǐkúngban Galadi kpódó Basáni tɔn kpó e ɖo Judɛ́ɛn sín zǎnzǎnhwe jí ɔ́ gɔ́ ná.

⁶ Nǔgbó ɔ́, é nyí súnnu e ɖo akɔta Manasée tɔn mɛ lɛ́ɛ kɛ́ɖɛ́ wɛ è nǎ ayǐkúngban ǎ; è nǎ ayǐkúngban nyɔ̌nu lɛ́ɛ lɔmɔ̌. Manasée sín vǐ ɖě lɛ́ɛ tɔn wɛ nyí ayǐkúngban e ɖo Galadi ɔ́.

⁷ Manasée sín ayǐkúngban ɔ́, dogbó tɔn bɛ́ sín Acɛ́ɛ, bo yi Mikumɛtáti ɖo Sikɛ́mu kpá. É gosín fínɛ́, bó tunta tofɔligbé ɖo Eyinu-Tapuwaxinu lɛ́ɛ sín awa jí.

⁸ Tapuwaxi yíkúngban ɔ́, Manasée tɔn wɛ é nyí; amɔ̌, Tapuwaxi, toxo e ɖo dogbó ɔ́ jí ɔ́, Eflayímu ví lɛ́ɛ wɛ è nǎ.

⁹ Dogbó ɔ́ wá Kana tɔ ɔ́ sín afɔligbé. É ká ɖo mɔ̌ có toxo e ɖo tɔ ɔ́ sín afɔligbé lɛ́ɛ ɔ́, Eflayímu ví lɛ́ɛ tɔn wɛ, có ayǐkúngban Manasée tɔn jí wɛ toxo énɛ́ lɛ́ɛ ɖe. Dogbó ɔ́ gbɔn fínɛ́ bó yi to ɔ́ sín taligbé, cóbó wá yi fó dó Mɛditɛlanɛ́ɛ xu ɔ́ tó.

¹⁰ Énɛ́ ɔ́, akɔta Eflayímu tɔn ɔ́ gba kpé afɔligbé, bɔ Manasée tɔn ɔ́ gba kpé taligbé. Ayǐkúngban e ɖo afɔligbé ɔ́ nyí Eflayímu tɔn, bɔ éé ɖo taligbé ɔ́ nyí Manasée tɔn, bɔ Mɛditɛlanɛ́ɛ xu ɔ́ nyí dogbó nú yě. Yě bɔdó ayǐkúngban Acɛ́ɛ tɔn wú ɖo taligbé-gbadahwe jí, bó bɔdó Isakáa tɔn wú ɖo totaligbé zǎnzǎnhwe jí.

¹¹ È nǎ toxo ɖé lɛ́ɛ akɔta Manasée tɔn ɔ́ ɖo Isakáa kpó Acɛ́ɛ kpó sín ayǐkúngban jí. Toxo e wɛ lɛ́ɛ ɖíe: Bɛti-Ceani kpó gletoxo tɔn lɛ́ɛ kpó, Yivleámu kpó gletoxo tɔn lɛ́ɛ kpó. Dɔ́ɔ kpó gletoxo tɔn lɛ́ɛ kpó, Eyinu-Dɔ́ɔ kpó gletoxo tɔn lɛ́ɛ kpó, Tanaki kpó gletoxo tɔn lɛ́ɛ kpó, Mɛgido kpó toxo tɔn lɛ́ɛ kpó: só atɔn lɛ́ɛ.

¹² É ká ɖo mɔ̌ có akɔta Manasée tɔn kpé wú bó nya Kanáanu lɛ́ɛ sín to énɛ́ lɛ́ɛ mɛ ǎ, yě kpo ɖo to énɛ́ lɛ́ɛ mɛ káká jɛ égbé.

¹³ Izlayɛ́li ví lɛ́ɛ wá syɛ́n ganjí, có yě kpé wú bó nya Kanáanu lɛ́ɛ ǎ; amɔ̌, yě kpa acɛ nú yě bó nɔ́ zɔ́n azɔ̌ syɛ́nsyɛ́n lɛ́ɛ yě.

¹⁴ Jozɛ́fu ví lɛ́ɛ wá ɖɔ nú Jozuwée ɖɔ: “Étɛ́wú wɛ a nǎ ayǐkúngban ta ɖokpó géé mǐ mɛ e jí Mawu Mavɔmavɔ dó acɛ, bɔ mǐ sukpɔ́ sɔ mɔ̌ lɛ́ɛ?”

¹⁵ Jozuwée ka yí gbe nú yě ɖɔ: “Ényí mi sukpɔ́ sɔ mɔ̌ hǔn, mi yi zunkan mɛ ɖo Pɛliziti lɛ́ɛ kpó Hlafa ví lɛ́ɛ kpó sín to mɛ. Mi ná xo zun ɖo fínɛ́, bó ná mɔ tɛnmɛ, ɖó Eflayímu sókan ɔ́ hwe dó mi dín.”

¹⁶ Jozɛ́fu ví lɛ́ɛ ká yí gbe n'i ɖɔ: “Ayǐkúngban e ɖo sókan mɛ ɔ́ kpé mǐ nǔgbó ǎ. Wegɔ́ ɔ́, Kanáanu e ɖo ayǐkúngban wɛnjɛ jí lɛ́ɛ, kpódó éé ɖo Bɛti-Ceani kpó lɛ́ɛ, kpódó éé ɖo toxo e lɛ́ lɛ̌ dó yě lɛ́ɛ kpó mɛ, kpódó éé ɖo tɔdo Izleyɛ́li tɔn ɔ́ mɛ lɛ́ɛ kpó ɔ́, gan sín kɛkɛ́ví wɛ ɖo así yě bǐ tɔn.”

¹⁷ Ée yě ɖɔ mɔ̌ ɔ́, Jozuwée ɖɔ nú Jozɛ́fu ví e ɖo akɔta Eflayímu tɔn mɛ lɛ́ɛ, kpódó éé ɖo akɔta vlɔ́ Manasée tɔn e ɖo gbadahwe jí lɛ́ɛ kpó ɖɔ: “Mi sukpɔ́, bó syɛ́n ɖésú. É nyí ayǐkúngban ta ɖokpó géé wɛ è nǎ ná mi ǎ.

¹⁸ Lo ɔ́, ayǐkúngban e ɖo sókan mɛ ɔ́, zunkan wɛ, có é wɛ è nǎ ná mi, bɔ mi ná xo, bɔ bǐ ná nyí mitɔn. Kanáanu e ɖo ayǐkúngban ɔ́ jí lɛ́ɛ ɖó gankɛkɛ́ví, bó syɛ́n, có mi ka ná nya yě.”