Jozuwée 1 - MAWUXÓWÉMA

Jozuwée jɛ Mɔyízi tɛnmɛ

¹ Mɛsɛntɔ́ Mawu Mavɔmavɔ tɔn Mɔyízi kú. Ée é kú ɔ́, Mawu Mavɔmavɔ ɖɔ nú Jozuwée Nuni ví e nɔ dó alɔ Mɔyízi ɔ́ ɖɔ:

² “Mɛsɛntɔ́ ce Mɔyízi kú. Din ɔ́, hwi wɛ ná kplá togun ɔ́ bǐ, bɔ hwi kpó yě kpó ná dó asá Judɛ́ɛn tɔ ɔ́, bó ná yi to e un ná yě ɔ́ mɛ.

³ Mi tɛ afɔ fí ɖěbǔ ɔ́, un ná ná fí ɔ́ mi, lě e un ko ɖɔ gbɔn nú Mɔyízi é.

⁴ Ayǐkúngban mitɔn ná gosín gbětótló ɔ́ mɛ, ɖo tofɔligbé káká yi Libáan sókan ɔ́ mɛ ɖo totaligbé, bó ná lɛ́ gosín tɔ ɖaxó e è nɔ ylɔ́ ɖɔ Efláti ɔ́ kɔn, ɖo zǎnzǎnhwe jí, bó ná gbɔn Hitíti lɛ́ɛ sín to mɛ káká yi Mɛditɛlanɛ́ɛ xu ɔ́ tó, ɖo gbadahwe jí.

⁵ Đo gbɛzán towe bǐ mɛ ɔ́, mɛ ɖěbǔ ná sixú nɔ te nukɔn towe ǎ, ɖó un ɖo kpɔ́ xá we lě e un nɔ kpɔ́ xá Mɔyízi gbɔn é. Un ná ɖe kɔ sín wǔtu towe gbeɖé ǎ, un ka ná jó we dó gbeɖé ǎ.

⁶ Kpan akɔ́n bó dó gǎn, ɖó to e sín akpá un dó nú tɔ́gbó mitɔn lɛ́ɛ ɔ́, hwi wɛ ná kplá Izlayɛ́li ví lɛ́ɛ, bɔ yě ná yí.

⁷ Vɛ̌ ko kpan akɔ́n bó dó gǎn kpowun bo bló nǔ e mɛsɛntɔ́ ce Mɔyízi ɖɔ nú we ɔ́ bǐ, ma yi ɖisí ó, ma yi amyɔ ó. Nú a blǒ gbɔn mɔ̌ ɔ́, a sɔ́ nǔɖé bó ná wa ɔ́, a nǎ mɔ nu tɔn.

⁸ Ma nɔ gɔn sɛ́nwéma élɔ́ xa gbeɖé ó. Nɔ lin tamɛ d'é wú zǎn kpó kéze kpó, bó nɔ́ bló nǔ e è ɖɔ d'é mɛ ɔ́ bǐ ɖ'é jí. Énɛ́ ɔ́, a sɔ́ nǔɖé bó ná wa ɔ́, a nǎ mɔ nu tɔn. Lě e nǔ ná nyɔ́ nú we gbɔn ɔ́ nɛ́.

⁹ Un ɖɔ nú we ɖɔ hwi ní kpan akɔ́n bó dó gǎn, ma wɔn ó. Ma ɖi xɛsi ó, ma lɔn nú awakanmɛ ní kú we ó, ɖó nyɛ Mawu Mavɔmavɔ, Mawu towe ɔ́, un ɖo kpɔ́ xá we ɖo fí e a nǎ gbɔn lɛ́ɛ bǐ.”

Jozuwée ɖo nǔ sɔ́ wɛ bó ná dó asá Judɛ́ɛn tɔ ɔ́, é kpó Izlayɛ́li togun ɔ́ kpó

¹⁰ Jozuwée ɖɔ nú gǎn e ɖo togun ɔ́ nu lɛ́ɛ ɖɔ

¹¹ yě ní gbɔn mɛ lɛ́ɛ bǐ jí, bó ɖɔ nú yě ɖɔ: “Azǎn atɔn gbe ɔ́, mǐ ná dó asá Judɛ́ɛn tɔ ɔ́, bó ná yí to e Mawu Mavɔmavɔ, Mawu mǐtɔn ná mǐ é. Mi bo jɛ nǔ e mi ná ɖu ɔ́ sín agban dó jí.”

¹² Jozuwée lɛ́ ɖɔ nú súnnu e ɖo akɔta Hwlibɛ́ni tɔn mɛ lɛ́ɛ kpó éé ɖo akɔta Gadi tɔn mɛ lɛ́ɛ kpó, kpódó éé ɖo Manasée sín akɔta vlɔ́ mɛ lɛ́ɛ kpán ɖɔ:

¹³ “Xó e mɛsɛntɔ́ Mawu Mavɔmavɔ tɔn Mɔyízi ɖɔ nú mi ɔ́, mi flín; é ɖɔ nú mi ɖɔ: ‘Mawu Mavɔmavɔ, Mawu mitɔn ná to énɛ́ ɔ́ mi, bɔ mi ná vo ɖ'é mɛ.’

¹⁴ Asi mitɔn lɛ́ɛ kpó vǐ mitɔn lɛ́ɛ kpó, kpódó kanlin mitɔn lɛ́ɛ kpán sixú nɔ ayǐkúngban élɔ́ jí, fí e Mɔyízi ná mi é. Amɔ̌, mi mɛ súnnu hlɔ̌nhlɔ́n ɖo wǔ e sixú fun ahwan lɛ́ɛ ɔ́, mi ná bɛ́ ahwanfunnú mitɔn lɛ́ɛ, bó ná nɔ nukɔn nú nɔví mitɔn lɛ́ɛ, bó ná dó asá Judɛ́ɛn tɔ ɔ́. Mi ná dó alɔ yě,

¹⁵ káká bɔ Mawu Mavɔmavɔ, Mawu mitɔn ná bló, bɔ yě ná yí ayǐkúngban e é ná yě ɔ́, lě e é bló gbɔn nú midɛɛ lɛ́ɛ é. Énɛ́ ɔ́ gúdo ɔ́, mi ná lɛ́ kɔ wá ayǐkúngban e mɛsɛntɔ́ Mawu Mavɔmavɔ tɔn Mɔyízi ná mi ɖo Judɛ́ɛn tɔ ɔ́ sín zǎnzǎnhwe jí ɔ́ jí.”

¹⁶ Ée Jozuwée ɖɔ mɔ̌ nú yě ɔ́, yě yí gbe n'i ɖɔ: “Mǐ ná bló nǔ e a zɔ̌n mǐ ɔ́ bǐ. A sɛ́ mǐ dó fí ɖěbǔ ɔ́, mǐ ná yi.

¹⁷ Mǐ ná se tónú nú we ɖo nǔ bǐ mɛ, lě e mǐ se tónú nú Mɔyízi gbɔn é. Mawu Mavɔmavɔ, Mawu towe ní vɛ́ kó sixú nɔ kpɔ́ xá we, lě e é nɔ kpɔ́ xá Mɔyízi é ɖɔhun.

¹⁸ Mɛ ɖěbǔ fɔ́n gǔ dó jǐ towe bó ná gbɛ́ gbe nú we ɔ́, è nǎ hu i. Nǔ e nyí towe kpowun ɔ́ wɛ nyí ɖɔ a nǐ kpan akɔ́n bó dó gǎn.”