Jowɛ́li 4 - MAWUXÓWÉMA

¹ Mawu Mavɔmavɔ ɖɔ: “Hwe énɛ́ ɔ́ nu ɔ́, un ná bló bɔ Judáa kpó Jeluzalɛ́mu kpó ná lɛ́ jɛ lě e yě kó ɖe gbɔn ɖ'ayǐ é.

² Un ná kplé akɔta lɛ́ɛ bǐ lobo ná kplá yě yi tɔdo Jozafáti tɔn ɔ́ mɛ; un ná ɖɔ hwɛ xá yě ɖo fínɛ́, ɖó Izlayɛ́li to e nyí togun ce ɔ́ ta mɛ, ɖó yě gba yě dó gbɔn akɔta ɖě lɛ́ɛ mɛ. Un ná ɖɔ hwɛ xá yě ɖó togun ce e yě má ɔ́ wú.

³ Yě nyi akɔ dó togun ce, bó má; yě sa súnnuví lɛ́ɛ bó zé akwɛ́ ɔ́ dó lɛ aga ná; yě sa ɖyɔ̌vǐ lɛ́ɛ, bó dó jɛ vɛ̌ɛn ná.

⁴ Tíinu lɛ́ɛ mi, Sidɔ́ɔnnu lɛ́ɛ e mi, mɛ̌ wɛ mi ka vɛ mì dó? Mi mɛ e ɖo Filisitɛ́ɛn lɛ́ɛ sín ayǐkúngban jí lɛ́ɛ e mi, ani lin dó wǔtu ce wɛ mi ɖe? Mi jló ná ba hlɔn mì wɛ a? Ényí mi jló ná ba hlɔn ɔ́, un ná yá wǔ bló bɔ é ná lílɛ́ jɛ ta nú mi.

⁵ Mi zé kpatágan ce kpó siká ce kpó; bɔ nǔ e un ɖó bɔ é xɔ akwɛ́ hú nǔ bǐ, bó nyɔ́ ɖɛkpɛ hú nǔ lɛ́ɛ bǐ ɔ́, mi zé yi ɖó vodúnxɔ mitɔn lɛ́ɛ mɛ.

⁶ Judáanu lɛ́ɛ kpó Jeluzalɛ́munu lɛ́ɛ kpó ɔ́, mi bɛ́ yědɛɛ lɛ́ɛ sa nú Glɛ̌sinu lɛ́ɛ, bónú yě ná lín dó to yětɔn.

⁷ Mi ɖótó! Un ná lɛ́ kɔ nú yě sín fí e mi sa yě dó ɔ́ wá xwé; nǔ nyanya e mi wa ɔ́, un ná bló bɔ é ná lílɛ́ jɛ ta nú mi.

⁸ Un ná sa vǐ mitɔn súnnu kpó nyɔ̌nu kpó nú Judáanu lɛ́ɛ, bɔ yědɛɛ lɛ́ɛ ná sa yě nú Sevanu lɛ́ɛ, dó to línlín mɛ.” Mawu Mavɔmavɔ wɛ ɖɔ mɔ̌.

Ahwanfunfun gǔdo gúdo tɔn ɔ́ kpó hwɛɖiɖɔ Mawu tɔn kpó

⁹ Mi sú xó bó ɖɔ nú akɔta ɖě lɛ́ɛ ɖɔ: “Mi sɔ́ ahwannú, mi ylɔ́ ahwanfuntɔ́ syɛ́nsyɛ́n lɛ́ɛ kplé. Sɔ́ja lɛ́ɛ bǐ ní sɛ wá, bó tɔ́n ahwan kɛntɔ́.

¹⁰ Mi fɔ alǐn mitɔn lɛ́ɛ dó tun hwǐ nǎ. Mi fɔ nǔkún-yanú mitɔn lɛ́ɛ dó tun hwǎn nǎ. Mɛ e vɔ́ ɔ́ nǐ ɖɔ: ‘Un dó hlɔ̌nhlɔ́n.’

¹¹ Togun e lɛ́ dó mǐ lɛ́ɛ mi, mi bǐ ní hwlɛndó bó wá, bó sɛ miɖée kplé ɖo tɔdo ɖokpó ɔ́ mɛ.” Mawu Mavɔmavɔ e, sɛ́ ahwanfuntɔ́ syɛ́nsyɛ́n towe lɛ́ɛ dó, bónú yě nǐ wá tɔ́n ahwan yě.

¹² Mawu Mavɔmavɔ ɖɔ: “Akɔta lɛ́ɛ ní sí te, bó wá tɔdo Jozafáti tɔn mɛ; ɖó fínɛ́ wɛ un ná jínjɔ́n, bó ná ɖɔ hwɛ xá akɔta ɖě lɛ́ɛ bǐ.

¹³ Mi zé nǔkún-yanú dó ya yě ná, nǔkún e ko nyɔ́ ya é ɖɔhun. Mi li yě vǐwun e è bɛ̌ dó vǐwunto mɛ ɔ́ ɖɔhun; gbǎ lɛ́ɛ gɔ́ túnflá, dǎkaxixo kɛntɔ́ lɛ́ɛ tɔn wá flá ayǐ.”

¹⁴ Énɛ́ ɔ́, ahwan wɔ̌buwɔ́bú ɖé wá tɔdo e mɛ Mawu Mavɔmavɔ ná ɖɔ hwɛ ɖe é, ɖó azǎn e gbe Mawu Mavɔmavɔ ná ɖe xomɛsin tɔn xlɛ́ ɖo fínɛ́ ɔ́ kó sɛkpɔ́.

¹⁵ Hwe kpó sun kpó kó dó ablu, bɔ sunví lɛ́ɛ sɔ́ nɔ ná wěziza ǎ.

¹⁶ Mawu Mavɔmavɔ wa adǎn, bɔ è se gbe tɔn sín Jeluzalɛ́mu, Sinyɔ́ɔ só ɔ́ jí; bɔ jǐnukúnsin kpó ayǐkúngban kpó sísɔ́. Amɔ̌, Mawu Mavɔmavɔ nɔ́ cyɔ́n alɔ togun tɔn jí; bibɛtɛn wɛ é nyí nú Izlayɛ́li ví lɛ́ɛ.

¹⁷ É ɖɔ nú yě ɖɔ: “Énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ, Mawu mitɔn, bó nɔ́ nɔ Sinyɔ́ɔ só mímɛ́ ce ɔ́ jí. Jeluzalɛ́mu ná lɛ́ húzú ce bǐ gbídígbídí, bɔ jǒnɔ lɛ́ɛ sɔ́ ná byɔ́ mɛ ɖě gbeɖé ǎ.”

Nǔ ná lɛ́ nyɔ́ nú togun Mawu tɔn ɔ́

¹⁸ “Hwe énɛ́ ɔ́ nu ɔ́, vɛ̌ɛn yɔ̌yɔ́ ná nɔ sa sín só ɖaxó ɖaxó lɛ́ɛ mɛ; anɔ̌sin ná nɔ sa sín só kpɛví kpɛví lɛ́ɛ mɛ, bɔ sin ná ɖo Judáa sín tɔ lɛ́ɛ bǐ mɛ. Tɔjɔtɛn ɖé ná tɔ́n ɖo nyɛ Mawu Mavɔmavɔ sín xwé gbe, bó ná hú sin nú Kasyatɔdo ɔ́.

¹⁹ Ejípu to ɔ́ ná gba hánnyá, bɔ Edɔ́mu ná húzú gbětótló, ɖó adǎka e yě xo Judáanu lɛ́ɛ wú ɔ́ wútu; ɖó Judáanu xomɛvɔ́nɔ lɛ́ɛ sín hun e yě kɔn nyi ayǐ ɖo Judáa ɔ́ wú.

²⁰ Amɔ̌, gbɛtɔ́ ká ná ɖo Judáa kpó Jeluzalɛ́mu kpó tɛgbɛ káká sɔ́yi.

²¹ Hun yětɔn e è kɔn nyi ayǐ, bɔ un ma ko ba hlɔn tɔn ǎ ɔ́, un ná ba, bɔ nyɛ Mawu Mavɔmavɔ ɔ́ ná nɔ Sinyɔ́ɔ.”