Jowɛ́li 2 - MAWUXÓWÉMA

¹ Mi kún kpɛn ɖo Sinyɔ́ɔ. Mi kún kpɛn lélé ɖo só mímɛ́ ce jí. Mi mɛ e ɖo to ɔ́ mɛ lɛ́ɛ bǐ ní sísɔ́, ɖó Mawu Mavɔmavɔ zán ɔ́ ja; é kó sɛkpɔ́.

² Zǐnflú gɔngɔn sín azǎn ɖé wɛ. Akpɔ́kpɔ́ dó, ahǔn sú. Nǔvínúvíhwan ɖé ɖíe, bó sukpɔ́, lobo dó xɛsi ɖésú. Yě dó ahwan gbě bó ja, bɔ a nǎ ɖɔ zǎn wɛ kú sín só jí ja. È ko mɔ mɔ̌hunkɔtɔn kpɔ́n gbeɖé ǎ; è ka sɔ́ ɖo nǎ mɔ wɛ ɖo sɔ e ja é ǎ.

³ Yě ɖo yiyi wɛ, bó ɖo nǔ bǐ hɛn gblé wɛ myɔ ɖɔhun. Yě gbɔn fí ɖěbǔ dín ɔ́, è sɔ́ nɔ mɔ nǔɖé ɖo fínɛ́ ǎ. Jikpá Edɛ́ni tɔn ɔ́ ɖɔhun wɛ to ɔ́ kó ɖe ɖ'ayǐ, bɔ sín hwenu e yě gbɔn fínɛ́ dín ɔ́, é húzú gbětótló, é dó xɛsi. Nǔ ɖěbǔ gán ɖo yě sí ǎ.

⁴ A mɔ yě lě ɔ́, a nǎ ɖɔ sɔ́ wɛ dó ahwan gbě bó ja, sɔ́xátɔ́ lɛ́ɛ ɖo wezun jí xwe ahwangbénu ɖɔhun.

⁵ Yě nɔ́ lɔ́n sín só ɖě jí yi jɛ ɖě jí, bɔ a se zǐngídi yětɔn ɔ́, a nǎ ɖɔ ahwankɛkɛ́ wɛ, a nǎ ɖɔ gběhan wɛ ɖo zo ji wɛ, bó ɖo wǔwú wɛ. Yě jǎwe ahwangɔnu syɛ́nsyɛ́n ɖé wɛ sɔ́ ahwannú bó ja ɖɔhun.

⁶ Togun lɛ́ɛ nɔ sísɔ́ ɖo nukɔn yětɔn. Togun lɛ́ɛ bǐ nɔ blá wǔ ɖo nukún mɛ.

⁷ Wɛn lɛ́ɛ nɔ jɛ mɛ gúdo ahwanfuntɔ́ lɛ́ɛ ɖɔhun. Yě nɔ́ fán dǒ ahwanfuntɔ́ lɛ́ɛ ɖɔhun. Yě ɖokpó ɖokpó nɔ sɔ́ ali yětɔn yětɔn télélé ma zɛ sín jí.

⁸ Wɛn lɛ́ɛ ɖě nɔ́ nya glo ɖě ǎ. Yě ɖokpó ɖokpó ɖo tɛn yětɔn mɛ. Yě nɔ́ lɔ́n dó asá nǔ bǐ; nǔ ɖěbǔ nɔ́ hɛn yě ɖó te ǎ.

⁹ Yě gba kpé toxo ɖaxó ɔ́ mɛ. Yě nɔ́ kán wezun gbɔn ahohó lɛ́ɛ jí. Yě nɔ́ xá xɔ lɛ́ɛ ta. Yě nɔ́ gbɔn flɛtɛ́li nu yi jɛ xɔ mɛ ajotɔ́ ɖɔhun.

¹⁰ Ayǐkúngban nɔ́ sísɔ́ ɖo nukɔn yětɔn. Jǐnukúnsin nɔ húnhún. Hwe kpó sun kpó nɔ́ dó ablu, bɔ sunví lɛ́ɛ sɔ́ nɔ́ ná wěziza ǎ.

¹¹ Mawu Mavɔmavɔ ɖe gbe ɖo ahwangɔnu énɛ́ nukɔn, ɖó ahwanfuntɔ́ tɔn énɛ́ lɛ́ɛ nɔ́ se tónú n'i; yě dó xɛsi ɖésú. Đó Mawu Mavɔmavɔ zán ɔ́ kló, é dó abaɖa. Mɛ̌ wɛ sixú gán ɖo azǎn énɛ́ gbe?

Hwenu e è ná lɛ́ kɔ wá Mawu Mavɔmavɔ gɔ́n dó ɔ́ su

¹² Mawu Mavɔmavɔ ɖɔ: “Hwenu su nú mi din, bɔ mi ná lɛ́ kɔ wá gɔ̌n ce. Mi lɛ́ kɔ wá gɔ̌n ce kpó ayixa mitɔn bǐ kpó: mi blá nu, mi ya avǐ, mi sa vo nú mì.

¹³ Ényí awu mitɔn lɛ́ɛ wɛ mi ná tlɛ́n, bó dó ɖe xlɛ́ ɖɔ nǔ e émí wa ɔ́ vɛ́ nú émí ǎ, ayixa mitɔn lɛ́ɛ wɛ mi ná húzú.” Ɛɛn, mi lɛ́ kɔ wá Mawu Mavɔmavɔ, Mawu mitɔn gɔ́n, ɖó é nyɔ́ xomɛ bó nɔ́ kú nǔbláwǔ nú mɛ. É nɔ́ yá wǔ sin xomɛ ǎ; é fá xomɛ ɖésú, é ɖo gbesisɔ mɛ hwebǐnu, bó ná jó nǔ e é ná wa xá mǐ ɔ́ dó.

¹⁴ Afɔ nyɔ́ ɔ́, é sixú jó nǔ e é kó lin bó ná wa ɖ'ayǐ ɔ́ dó, bó ná nyɔ̌ná mi túnflá. Énɛ́ ɔ́, mi hɛn ɔ́, mi ná hɛn jinukún kpó vɛ̌ɛn kpó wá n'i.

Hwenu e è nǎ blá nu bo sa vo nú Mawu dó é

¹⁵ Mi kún kpɛn ɖo Sinyɔ́ɔ. Mi jlá ɖɔ è nǐ blá nu. Mi ylɔ́ mɛ bǐ kplé.

¹⁶ Mi ylɔ́ togun ɔ́ bǐ kplé, ní nyí kplé ɖaxó. Mi kplé degénɔ lɛ́ɛ, mi kplé yɔ̌kpɔ́vú lɛ́ɛ, bó kplé vǐ ɖo anɔ̌nu lɛ́ɛ lɔmɔ̌. Mɛ e da asi yɔ̌yɔ́ ɔ́ ní tɔ́n sín xwé tɔn gbe; nyɔ̌nu e yi asúxwé yɔ̌yɔ́ ɔ́ ní tɔ́n sín xɔ tɔn mɛ.

¹⁷ Vɔ̌sánú-xwlémawutɔ́ azɔ̌watɔ́ Mawu Mavɔmavɔ tɔn lɛ́ɛ ní ya avǐ ɖo Mawu Mavɔmavɔ sín xwé gbe, ɖo agba ɔ́ kpó vɔ̌sákpe ɔ́ kpó tɛ́ntin. Yě ní ɖɔ: “Mawu Mavɔmavɔ, kú nǔbláwǔ nú mǐ mɛ towe lɛ́ɛ. Ma jó mǐ mɛ towe lɛ́ɛ dó nú mǐ ɖu winnyá ó. Ma lɔn nú akɔta ɖěvo lɛ́ɛ ɖɔ slǎmɛ mǐ wú ɖɔ fítɛ́ Mawu yětɔn ka ɖe a jí ó.”

Mawu yí gbe nú togun tɔn

¹⁸ Mawu Mavɔmavɔ yí wǎn nú to tɔn. Togun tɔn sín nǔ blá wǔ n'i.

¹⁹ É yí gbe nú ɖɛ e togun tɔn xo ɔ́, bó ɖɔ: “Mi ɖótó, un ná lɛ́ sɛ́ jinukún, kpó vɛ̌ɛn yɔ̌yɔ́ kpó, kpó ami kpó dó mi. Un ná sɛ́ dó mi bɔ é ná kpé mi kpo. Un sɔ́ ná jó mi dó bɔ mi ná nyí nǔkiko ɖo akɔta lɛ́ɛ tɛ́ntin gbeɖé ǎ.

²⁰ Un ná nya kɛntɔ́ mitɔn e gosín totaligbé lɛ́ɛ dó zɔ nú mi. Un ná nya yě sɛ́ dó ayǐkúngban e ko sá bɔ mɛ ɖé má sɔ́ ɖ'é jí ǎ é jí. Un ná nya mɛ e ɖo nukɔn nú kɛntɔ́ mitɔn lɛ́ɛ dó Xu Kúkú ɔ́ mɛ, bó ná nya mɛ e ɖo gǔdo nú yě lɛ́ɛ dó Mɛditɛlanɛ́ɛ xu ɔ́ mɛ. Cyɔ yětɔn lɛ́ɛ ná dó cyɔ, bɔ wǎn ná vun blá fí bǐ; lě e mɛ e dó nǔ sin xá mi sɔ mɔ̌ lɛ́ɛ ná vɔ gbɔn é nɛ́.

²¹ Ayǐkúngban e, ma ɖi xɛsi ó. Xomɛ ní hun we, nú a nǐ j'awǎ, ɖó Mawu Mavɔmavɔ nɔ́ wa nǔ ɖaxó ɖaxó lɛ́ɛ.

²² Gběkanlin lɛ́ɛ mi, mi ma ɖi xɛsi ó, ɖó gběhan ná lɛ́ wú ɖo ayǐkúngban wɛnjɛ e ɖo gbětótló mɛ lɛ́ɛ jí; atín lɛ́ɛ ná lɛ́ sɛ́n. Fígitín lɛ́ɛ kpó vǐwun lɛ́ɛ kpó ná lɛ́ sɛ́n kɔn nyi kpɔ́.

²³ Sinyɔ́ɔnu lɛ́ɛ mi, mi hun xomɛ bo j'awǎ ɖo Mawu Mavɔmavɔ, Mawu mitɔn mɛ, ɖó é su jǐ hwenu ɔ́, é ná sɛ́ jǐ dó mi. É ná sɛ́ xwejí dó mi, bó ná sɛ́ zǒjí dó mi, lě e é ko nɔ bló gbɔn ɖ'ayǐ xóxó é.

²⁴ Jinukún ná gɔ́ xɔ. Vɛ̌ɛn yɔ̌yɔ́ kpó ami kpó ná gɔ́ gbǎ.

²⁵ Jinukún mitɔn e un sɛ́ wɛn lɛ́ɛ, vɛɛn lɛ́ɛ, kle lɛ́ɛ, kpódó wǎnvú lɛ́ɛ kpó nǔvínúvíhwan énɛ́ lɛ́ɛ kpó dó, bɔ yě wǎ hɛn bǐ gblé ɔ́, un ná sú axɔ́ tɔn mi.

²⁶ Mi ná ɖu nǔ bó gɔ́ xo. Mi ná kpa susu nú nyɛ Mawu Mavɔmavɔ, Mawu mitɔn e wa azɔ̌jíwǔ lɛ́ɛ nú mi é. Bɔ mi mɛ e nyí togun ce ɔ́, mi sɔ́ ná ɖu winnyá gbeɖé ǎ.

²⁷ Énɛ́ ɔ́, Izlayɛ́li ví lɛ́ɛ mi, mi ná tunwun ɖɔ un ɖo tɛ́ntin mitɔn. Mi ná tunwun ɖɔ nyɛ wɛ nyí Mawu Mavɔmavɔ, Mawu mitɔn, ɖɔ Mawu ɖěvo kún sɔ́ tíin zɛ nyɛ wú ó. Bɔ mi mɛ e nyí togun ce ɔ́, mi sɔ́ ná ɖu winnyá gbeɖé ǎ.”