Jowɛ́li 1 - MAWUXÓWÉMA

¹ Mawu Mavɔmavɔ ɖɔ xó nú Jowɛ́li Petuwɛli vǐ ɔ́.

Nǔvínúví vun blá Judáa to ɔ́, akú ɖó

² É ɖɔ: Tomɛxó lɛ́ɛ mi, mi ɖótó xó élɔ́! Judáanu lɛ́ɛ e mi, mi bǐ ní hun tó mitɔn lɛ́ɛ bó se! Nǔ e ɖo jijɛ wɛ din ɔ́, mɔ̌hunkɔtɔn ɖě jɛ ɖo hwe mitɔn nu, abǐ tɔ́gbó mitɔn lɛ́ɛ sín hwenu kpɔ́n a?

³ Mi kpi tan tɔn nú vǐ mitɔn lɛ́ɛ, bónú vǐ mitɔn lɛ́ɛ ná kpi nú vǐ yětɔn lɛ́ɛ. Vǐ yětɔn lɛ́ɛ ká ná kpi nú vǐ e è nǎ wá ji dó gǔdo yětɔn lɛ́ɛ.

⁴ Nǔ ɖu gle lɛ́ɛ bǐ. Nǔ e wǎnvú lɛ́ɛ ɖu kpo ɔ́, wɛn lɛ́ɛ ɖu. Nǔ e wɛn lɛ́ɛ ɖu kpo ɔ́, vɛɛn lɛ́ɛ ɖu, nǔ e vɛɛn lɛ́ɛ ɖu kpo ɔ́, kle lɛ́ɛ ɖu.

⁵ Ahannumúnɔ lɛ́ɛ mi, mi fɔ́n bó ya avǐ. Vɛ̌ɛnnutɔ́ lɛ́ɛ mi, mi bǐ ní wɛn azɔn, ɖó vɛ̌ɛn yɔ̌yɔ́ e mi ma ná mɔ nu ǎ ɔ́ wú.

⁶ Đó nǔvínúví vun blá to mitɔn. Nǔvínúví maxamaxa wɛ, yě ɖó hlɔ̌nhlɔ́n ɖésú. Aɖǔ yětɔn lɛ́ɛ cí kinnikínní asú sín aɖǔ ɖɔhun; aglan yětɔn lɛ́ɛ cí kinnikínní asi sín aglan ɖɔhun.

⁷ Yě vɔ vǐwungbo mitɔn, yě já fígitín mitɔn wínníwínní, bó ɖu fló tɔn bǐ, lobo zin dó ayǐ. Vǐwun sín ala lɛ́ɛ wé tété.

⁸ Mi ji gbɛvíhan ɖyɔ̌vǐ e asúxɔ́ntɔn tɔn kú bɔ é sɔ́ nǔwamɛvɔ dó bó ví i ɔ́ ɖɔhun.

⁹ È sɔ́ nɔ hɛn jinukún kpó vɛ̌ɛn kpó wá Mawu Mavɔmavɔ xwé gbe ǎ. Énɛ́ ɔ́ wú wɛ azɔ̌watɔ́ Mawu Mavɔmavɔ tɔn vɔ̌sánú-xwlémawutɔ́ lɛ́ɛ ɖo aluwɛ mɛ.

¹⁰ Nǔ ɖu gle lɛ́ɛ bǐ. Ayǐkúngban ɔ́ ɖo aluwɛ mɛ, ɖó è hɛn jinukún lɛ́ɛ gblé. Vɛ̌ɛn ɖě sɔ́ ɖe ǎ, ami ɖě sɔ́ ɖe ǎ.

¹¹ Wǔ kú glesi lɛ́ɛ bɔ vǐwunglejíkpɔ́ntɔ́ lɛ́ɛ ɖo vo sa wɛ, ɖó blěe kpódó ɔ́ji kpó sɔ́ tíin ǎ, jinukún e è nǎ ya lɛ́ɛ bǐ wɛ gú mɛ.

¹² Vǐwungbo bǐ xú, fígitín bǐ mlú ɖa. Glenádi kpó dětín kpó, kpó aslɔ́tín kpó bǐ mlú ɖa. Atín e ɖo gle mɛ lɛ́ɛ bǐ mlú ɖa. Awǎjijɛ ɖěbǔ sɔ́ ɖo gbɛtɔ́ lɛ́ɛ tɛ́ntin ǎ.

Mɛ bǐ ní blá nu bo sa vo nú Mawu

¹³ Vɔ̌sánú-xwlémawutɔ́ lɛ́ɛ mi, mi sɔ́ nǔwamɛvɔ dó bó ya avǐ. Mi ji gbɛvíhan. Mi azɔ̌watɔ́ Mawu mǐtɔn tɔn lɛ́ɛ mi, mi wá, nǔwamɛvɔ ní ɖo kɔ mitɔn, ɖó è sɔ́ nɔ hɛn jinukún kpó vɛ̌ɛn kpó wá Mawu mitɔn sín xwé gbe ǎ.

¹⁴ Mi jlá ɖɔ è nǐ blá nu. Mi ylɔ́ mɛ bǐ kplé. Mi kplé tomɛxó lɛ́ɛ kpó toví tosi lɛ́ɛ kpó ɖó Mawu Mavɔmavɔ, Mawu mitɔn sín xwé gbe, bó sa vo nú Mawu Mavɔmavɔ.

Azǎn e gbe Mawu Mavɔmavɔ ná sin xomɛ é

¹⁵ Caxóxowǒóo! Azǎn baɖabaɖa ɖé ja. Xomɛsinzán Mawu Mavɔmavɔ tɔn kó sɛkpɔ́. Azǎn ɔ́ ná wá bɔ nǔ bǐ ná sú kún dó lě e Nǔbǐwúkpétɔ́ ɔ́ ko lɛ́n gbɔn é.

¹⁶ Nukún mǐtɔn mɛ wɛ è zě nǔɖuɖu mǐtɔn ɖe ǎ cé? Awǎjijɛ kpó xomɛhunhun kpó má kó gosín Mawu mǐtɔn sín xwé gbe ǎ cé?

¹⁷ Nǔkún e è dǒ lɛ́ɛ bǐ nyɔ dó kɔ́ glɔ́. Agɔ̌ lɛ́ɛ jɛ vɔ̌. Xɔ e mɛ è nɔ bɛ́ jinukún dó lɛ́ɛ gblé, jinukún ɖě sɔ́ tíin ǎ.

¹⁸ Kanlin lɛ́ɛ ɖo azɔn wɛn wɛ lóóo! Wǔ kú nyibú lɛ́ɛ ɖó yě sɔ́ mɔ nǔ ɖu ǎ. Lɛ̌ngbɔ́ lɛ́ɛ lɔmɔ̌ ɖo wǔvɛ́ mɔ wɛ.

Gbeyíɖɔ Mawu tɔn xo ɖɛ

¹⁹ Óo! Mawu Mavɔmavɔ, hwi sú xó ylɔ́ wɛ un ɖe. Đó myɔ ɖu gběhan e ɖo gbětótló mɛ lɛ́ɛ é, bɔ atín e ɖo gle mɛ lɛ́ɛ bǐ fyɔ́.

²⁰ Gběkanlin lɛ́ɛ lɔmɔ̌ ɖo xó sú ylɔ́ we wɛ, ɖó tɔ lɛ́ɛ xú, gběhan e ɖo gbětótló mɛ lɛ́ɛ bǐ fyɔ́.