Jonási 3 - MAWUXÓWÉMA

Jonási ɖɔ Mawuxó ɖo Ninívu

¹ Mawu Mavɔmavɔ ɖɔ nú Jonási azɔn wegɔ́ ɔ́ ɖɔ:

² “Yi toxo ɖaxó Ninívu ɔ́ mɛ din tlóló, bó ɖɔ xó e un ɖɔ nú we ɔ́ nú yě.”

³ Élɔ́ tɔn din ɔ́, Jonási se gbe nú Mawu Mavɔmavɔ, bó ɖidó Ninívu. Ninívu ɔ́, toxo ɖaxó ɖé wɛ bó dó agba ɖésú, bɔ azǎn atɔn wɛ è nɔ ɖi zɔnlin xɔ, cóbó nɔ xo toxo ɔ́ zlɛ́.

⁴ Ée Jonási yi jɛ toxo ɔ́ mɛ ɔ́, é sɔ́ kéze ɖokpó ɖó te, bó jlá gbɔn toxo ɔ́ mɛ bǐ ɖɔ: “Káká nú azǎn kanɖé (40) din ɔ́, Ninívu to ɔ́ bǐ ná vɔ.”

⁵ Ninívunu lɛ́ɛ ká ɖi nǔ nú Mawu, bó ɖɔ gbɔn toxo ɔ́ bǐ mɛ ɖɔ mɛ bǐ ná blá nu, bo kplá ati, bó dó ɖe xlɛ́ ɖɔ émí húzú jijɔ; bɛ́ sín mɛ e nyí gbɛtɔ́ nukúnɖéjí lɛ́ɛ jí, káká yi kɔn nyi gbɛtɔ́ kpaa lɛ́ɛ jí.

⁶ Xó énɛ́ ɔ́ yi jɛ axɔ́sú to ɔ́ mɛ tɔn sín tó mɛ, bɔ é sí te sín axɔ́súzinkpo tɔn jí, bó ɖe axɔ́súwu sín kɔ, bó sɔ́ ati cyɔ́n, bó yi jínjɔ́n afín mɛ.

⁷ É zɔ́n bɔ è sú xó, bó jlá gbɔn Ninívu to ɔ́ bǐ mɛ ɖɔ: “Axɔ́sú ɔ́ kpó tomɛxó lɛ́ɛ kpó ɖe gbeta tɔ́n ɖɔ gbɛtɔ́ kpó kanlin kpó ɖě má ɖu nǔ ó; ɖě má ká nu sin ó; kanlin ɖaxó kpó kpɛví kpó ɖě má yi ɖu ama ó; ɖě ní má yi nu sin ó.

⁸ Gbɛtɔ́ kpó kanlin kpó bǐ ní dó ati bó sú xó ylɔ́ Mawu kpó hlɔ̌nhlɔ́n kpó. Nú mɛ ɖokpó ɖokpó ní jó jijɔ nyanya dó, bó jó dǎka e é nɔ xo ɔ́ dó.

⁹ Afɔ nyɔ́ ɔ́, Mawu ná húzú gbe, bó ná jó xomɛsin dó bɔ mǐ sɔ́ ná dɔn ǎ.”

¹⁰ Mawu mɔ lě e wa nǔ gbɔn wɛ yě ɖe ɔ́, bó mɔ ɖɔ yě jó jijɔ nyanya yětɔn lɛ́ɛ dó. Énɛ́ ɔ́ wútu ɔ́, é lɛ́ lɛ́ kɔ wá gbeta e é kó ɖe tɔ́n ɔ́ jí, bɔ nǔ nyanya e dán é gblɔ́n nú yě ɔ́, é sɔ́ bló ǎ.