Jonási 1 - MAWUXÓWÉMA

Jonási tɛ́nkpɔ́n bó ná hɔn yi zɔ nú Mawu

¹ Mawu Mavɔmavɔ ɖɔ nú Jonási Amitayi ví ɔ́ gbe ɖokpó ɖɔ:

² “Jonási, yi toxo ɖaxó e è nɔ ylɔ́ ɖɔ Ninívu ɔ́ mɛ din tlóló, bó ɖó hwɛ n'i, ɖó agbɔ̌n kpé mì dó dǎka e xo wɛ to ɔ́ mɛ nu lɛ́ɛ ɖe ɔ́ wú.”

³ Jonási ka ɖɔ émí ná yi Taasísi, bó ná nɔ zɔ nú Mawu Mavɔmavɔ. Énɛ́ ɔ́, é yi Jafa, bó mɔ tɔjíhún ɖé ɖo fínɛ́, bɔ é xwe Taasísi. É sú axɔ́, bó dó tɔjíhún ɔ́, é kpó mɛɖé lɛ́ɛ kpó, bó tunwun ɖɔ émí ná yi Taasísi, bó nɔ zɔ nú Mawu Mavɔmavɔ.

⁴ Lo ɔ́, Mawu Mavɔmavɔ sɛ́ jɔhɔn ɖaxó ɖé dó xu ɔ́ jí; jɔhɔn ɖo adǎn wa wɛ káká, bɔ tɔjíhún ɔ́ ja gbigba gbé.

⁵ Xɛsi jɛ tɔjíhúnkuntɔ́ lɛ́ɛ jí, bɔ yě mɛ ɖokpó ɖokpó jɛ nǔmɛsɛn yětɔn lɛ́ɛ ylɔ́ jí; yě bɛ̌ agban e ɖo tɔjíhún ɔ́ mɛ lɛ́ɛ kɔn nyi xu mɛ, bónú hǔn ɔ́ ná dó fúɖá. Jonási ka mlɔ́ hǔn ɔ́ mɛ ɖo do, bó dɔ́ amlɔ bǐ gbídígbídí.

⁶ Tɔjíhúnkuntɔ́ lɛ́ɛ sín gǎn ká sɛkpɔ́ Jonási, bó kanbyɔ́ ɛ ɖɔ: “Étɛ́wú a ka ɖo amlɔ dɔ́ wɛ? Sí te bó ylɔ́ nǔ e a nɔ sɛn é; afɔ nyɔ́ ɔ́, é ná flín mǐ, bó ná jó mǐ dó bɔ mǐ ná dɔn ǎ.”

⁷ Mɛ e ɖo hǔn ɔ́ mɛ lɛ́ɛ jɛ ɖiɖɔ nú yěɖée jí ɖɔ: “Mi wá mǐ ní ba do ná, bó ná tunwun mɛ e wú awě élɔ́ ɖo mǐ xo wɛ é.” Ée yě ɖɔ mɔ̌ ɔ́, yě nyi akɔ, bɔ akɔ jɛ Jonási jí.

⁸ Énɛ́ ɔ́, yě ɖɔ n'i ɖɔ: “Hwi wɛ zɔ́n bɔ awě élɔ́ ɖo mǐ xo wɛ. Azɔ̌ tɛ́ a nɔ wa? Fítɛ́ a gosín? To tɛ́ mɛ nu wɛ a nyǐ? Akɔta tɛ́ mɛ wɛ a tɔ́n sín?”

⁹ Jonási ka yí gbe nú yě ɖɔ: “Eblée wɛ nú mì. Un nɔ sɛn Mawu Mavɔmavɔ, Mawu sɛ́xwé tɔn e bló xu kpó ayǐkúngban kpó é.”

¹⁰ Énɛ́ ɔ́ gúdo ɔ́, é tín nǔ lɛ́ɛ bǐ mɛ nú yě. Ée tɔjíhúnkuntɔ́ lɛ́ɛ se ɖɔ Mawu Mavɔmavɔ hɔn ná wɛ Jonási ɖe ɔ́, xɛsi ɖaxó ɖé jɛ yě jí, bɔ yě kanbyɔ́ ɛ ɖɔ: “Étɛ́ a ka dó sin nɛ́?

¹¹ Nɛ̌ mǐ ká ná wa nǔ towe gbɔn din, bɔ tɔ ɔ́ ná hwíhwɛ́ bɔ mǐ ná mɔ agbɔ̌n? Đó adǎn e wa wɛ xu ɔ́ ɖe ɔ́ lɛ́ ɖo syɛ́nsyɛ́n d'é jí wɛ.”

¹² Jonási ka yí gbe nú yě ɖɔ: “Mi sɔ́ mì nyi dó xu ɔ́ mɛ, énɛ́ ɔ́, xu ɔ́ ná hwíhwɛ́, ɖó nyi wɛ zɔ́n bɔ jɔhɔn ɖaxó élɔ́ ɖo tagba dó nú mi wɛ.”

¹³ Tɔjíhúnkuntɔ́ lɛ́ɛ tɛ́nkpɔ́n bó ná kun hǔn ɔ́ wá agě jí; lo ɔ́, yě kpé wú ǎ, ɖó adǎn e wa wɛ xu ɔ́ ɖe ɔ́ syɛ́n dín.

¹⁴ Yě gbɔ bó jɛ Mawu Mavɔmavɔ ylɔ́ jí ɖɔ: “Mawu Mavɔmavɔ! Ma lɔn nú mǐ dɔn ɖó nya élɔ́ wú ó; é ní má ká nyí ɖɔ mǐ wɛ hu xomɛvɔ́nɔ ó, ɖó hwi Mawu Mavɔmavɔ ɔ́, nǔ e jló we ɔ́ wɛ a nɔ wa.”

¹⁵ Énɛ́ ɔ́ gúdo ɔ́, yě sɔ́ Jonási nyi dó xu ɔ́ mɛ, bɔ xu ɔ́ hwíhwɛ́.

¹⁶ Ée nǔ nyí mɔ̌ ɔ́, yě jɛ xɛsi ɖi nú Mawu Mavɔmavɔ jí; yě sá vɔ̌ ɖokpó n'i, bó lɛ́ dó akpá n'i.