Jɔ̌bu 7 - MAWUXÓWÉMA

Jɔ̌bu dó hwɛ Mawu

¹ Mɛɖe wɛ gbɛtɔ́ ɖe ɖo ayǐkúngban jí fí; gbɛ gbɛtɔ́ tɔn cí jokóxotɔ́ sín gbɛ ɖɔhun.

² Gbɛ gbɛtɔ́ tɔn cí kannumɔ e ɖo hwesivɔ́ gbe bó ɖo yɛtɛn ba wɛ ɔ́ ɖɔhun; é cí azɔ̌watɔ́ e ɖo nukún ɖó azɔ̌kwɛ́ tɔn wɛ ɔ́ ɖɔhun,

³ mɔ̌ wɛ é ɖe nú nyi lɔ; sín sun mɔ̌kpán ɖíe ɔ́, gbɛ ce sɔ́ ɖó ta ɖé ǎ; zǎn e kú ɔ́ bǐ ɔ́, wǔvɛ́zán jɛ́n nɔ́ nyí nú nyɛ.

⁴ Nú un mlɔ́ ayǐ ɔ́, un nɔ ɖɔ dó ayi mɛ ɖɔ: “Hwetɛ́nu un ka ná sí te dó?” Ayǐ nɔ́ gbɛ́ hǐnhɔ́n, bɔ un nɔ ɖo blǐblí wɛ ɖo zan jí káká bɔ ayǐ nɔ́ wá hɔ́n.

⁵ Agbaza ce bǐ ji wě, agbaza ce flé zǎ gbɔn fí bǐ; wǔtu ce bǐ nyí akpa, bó vó.

⁶ Gbɛzán ce ɖo wǐwá yi wɛ bléblé hǔntwé ɖɔhun: Vivɔ wɛ gbɛzán ce ko ɖe; nukúnɖíɖó sɔ́ ɖe ǎ.

⁷ Mawu ce! Flín ɖɔ gbɛ ce ɔ́, jɔhɔn kpowun wɛ. Un sɔ́ ná mɔ gbɛ víví gbeɖé ǎ.

⁸ Hwi mɛ e ɖo nukún kpé dó wǔ ce wɛ ɔ́, a sɔ́ ná mɔ mì ɖě ǎ; a nǎ zé nukún dó ba mì, a ka sɔ́ ná mɔ mì ǎ.

⁹ Lě e akpɔ́kpɔ́ nɔ́ yi bɔ è nɔ ba kpo ɔ́, mɔ̌ ɖokpó ɔ́, mɛ e yi kútomɛ ɔ́ sɔ́ nɔ́ lɛ́ wá gbɛ ǎ.

¹⁰ É sɔ́ ná lɛ́ wá xwé tɔn gbe gbeɖé ǎ; mɛɖé ka sɔ́ ná tunwun i ɖo fí e é nɔ ɖ'ayǐ ɔ́ ǎ.

¹¹ Énɛ́ ɔ́ wú ɔ́, un sɔ́ ná ɖó nu abwɛ̌ ǎ; nǔ wɛ ɖo gbigbo mì wɛ ɖo ayi mɛ; un ɖó ná ɖɔ xó. Un ɖo wǔvɛ́ mɔ ɖo ayi mɛ wɛ dín; un ná ɖɔ vo e sa wɛ un ɖe ɔ́.

¹² Étɛ́wú a ka ɖo cícɔ́ mì wɛ sɔ mɔ̌? Xu wɛ un nyí a, abǐ nǔdábaɖa xu mɛ tɔn lɛ́ɛ ɖě wɛ un nyí?

¹³ Nú un ɖɔ un ná mlɔ́ ayǐ, bó ná mɔ agbɔ̌n kpɛɖé, abǐ ayi ce ná j'ayǐ kpɛɖé ɔ́,

¹⁴ a nɔ dó xɛsi mì ɖo amlɔ mɛ; nǔ e a nɔ ɖe xlɛ́ mì ɔ́ nɔ́ dó adohu nú mì.

¹⁵ Nú a gbɔ bo fyɔ́n gbekan ce káká nú un kú ɔ́, é nyɔ́ hú. Nú un gbɔ bo kú ɔ́, é nyɔ́ hú xúgloxú élɔ́ e un kpo ɔ́.

¹⁶ É kpé mì lo! Un sɔ́ ɖo nǎ kú wɛ gbeɖé ǎ wɛ a? Gbɛ ce ɔ́, jɔhɔn kpowun wɛ; jǒ mì dó nú ma mɔ agbɔ̌n.

¹⁷ Aniwú wɛ a ka nɔ dó ga nú gbɛtɔ́ sɔ mɔ̌? Aniwú wɛ a ka nɔ ɖó kan dó gbɛtɔ́ wú sɔ mɔ̌?

¹⁸ Étɛ́wú a ka nɔ wá ba do nú gbɛtɔ́ zǎnzǎn tɛgbɛ? A nǎ nɔ́ wá tɛ́n ɛ kpɔ́n hwebǐnu wú wɛ a?

¹⁹ Hwetɛ́nu wɛ a ka ná ɖe nukún sín wǔ ce? Hwetɛ́nu wɛ a ka ná jó mì dó bónú má mì atán dó kɔ?

²⁰ Mɛcɔ́tɔ́! Ényí hwɛ ɖé wɛ un hu dó we hǔn, ɖɔ nú mì. Étɛ́ wɛ un wa nyi do nú we? Aniwú wɛ a ka ɖó kɛ́n jǐ ce sɔ mɔ̌? Agban wɛ un húzú bó ɖo kɔ jí nú we a?

²¹ A nǎ sɔ́ hwɛ ce kɛ mì ǎ cé? A nǎ wɔn nǔ e un wa nyi do lɛ́ɛ ǎ cé? Nyɛ ɖíe ɖo kúkú wɛ e; hwenu e a nǎ ba mì ɔ́, un sɔ́ ná ɖe ǎ.