Jɔ̌bu 6 - MAWUXÓWÉMA

Jɔ̌bu dó hwɛ xɔ́ntɔn tɔn lɛ́ɛ

¹ Ée Jɔ̌bu sín xɔ́ntɔn Elifázi ɖɔ xó ɔ́, Jɔ̌bu yí xó bó ɖɔ:

² Áo! Nú è sixú da wǔvɛ́ e mɔ wɛ un ɖe ɔ́ kpɔ́n ɔ́, nú è sixú tunwun lě e adǎn e ɖo gbigbo mì wɛ ɔ́ kpɛn sɔ́ ɔ́,

³ è nǎ mɔ ɖɔ é kpɛn hú kɔ́ e gbɔn xuta é bǐ; nǔ e wú un ɖo nǔ wlá ɖɔ wɛ é nɛ́.

⁴ Đó Nǔbǐwúkpétɔ́ ɔ́ sín aɖǐgá lɛ́ɛ ɖo lan ce mɛ, bɔ lǐndɔ̌n ce ɖo aɖǐ yětɔn nu wɛ. Nǔ e Mawu nɔ́ dó dó xɛsi gbɛtɔ́ ná lɛ́ɛ bǐ ɖo ahwan fun xá mì wɛ.

⁵ Tócí gbě tɔn nɔ́ mɔ gběhanmú bó nɔ́ sú xó a? Nyibú nɔ́ mɔ ama bó nɔ́ sú xó a?

⁶ È sixú ɖu jɛnú jɛ mɛvo a? Azin ɔ́, wěwé e ɖ'é mɛ ɔ́, è sixú ɖu mǔ tɔn bó mɔ vǐví ɖ'é mɛ a?

⁷ Un jló ná ɖ'alɔ nǔɖuɖu énɛ́ lɛ́ɛ wú ǎ. Ya e ji wɛ un ɖe ɔ́, nǔɖuɖu ɖé wɛ bɔ un ɖo ɖuɖu wɛ ɔ́, vivi nɔ sɔ́ mì.

⁸ Ényí Mawu ká sixú bló nǔ e ba wɛ un ɖe ɔ́ nú mì ɔ́, ényí é sixú ná nǔ e ɖó nukún wɛ un ɖe ɔ́ mì ɔ́, é ná víví nú mì kpɔ́n!

⁹ Mawu ní kɛnklɛ́n bó li mì; é ní sɔ́ alɔ tɔn dó wɛ́n gbɛkan ce.

¹⁰ Nǔ ɖokpó nɔ́ dó gbɔ nú mì, un ɖo wǔvɛ́ mɔ wɛ cóbó ɖo awǎ jɛ wɛ, ɖó nǔ ɖokpó énɛ́ ɔ́ wú; é wɛ nyí ɖɔ: Mawu mímɛ́ ɔ́, un hɔn xó tɔn lɛ́ɛ ɖě nyi gbě ǎ.

¹¹ Un sɔ́ ɖó hlɔ̌nhlɔ́n e nɔ te kpɔ́n nǔɖé é ǎ, bɔ ani un ka ná nɔ gbɛ dó wa? Un sɔ́ ɖo nǔɖé ɖó nukún wɛ ǎ.

¹² Só wɛ un nyí bó ná dɛ ɖo nǔ bǐ nu a? Agbaza ce ɔ́, gan wɛ é nyí a?

¹³ Nǔɖé sɔ́ ɖo nyɛ ɖésúnɔ mɛ bó ná d'alɔ mì ǎ. Un sɔ́ mɔ nǔ kpɛví títí ɖé wú bó ná gán jɛ ǎ.

¹⁴ Mɛ e ɖo ya ji wɛ ɔ́, xɔ́ntɔn tɔn ɖě ɖó ná nyɔ́ xomɛ dó wǔ tɔn, é má nyí mɔ̌ ǎ hǔn, xɔ́ntɔn énɛ́ ɔ́ sɔ́ ɖó sísí nú Nǔbǐwúkpétɔ́ ɔ́ ǎ .

¹⁵ Mi mɛ e nyí xɔ́ntɔn ce lɛ́ɛ ɔ́, mi flú mì tɔhwín e è ɖǒ nukún bɔ é ká kó mɛ é ɖɔhun, mi flú mì tɔhwín e kó xú dó azan é ɖɔhun.

¹⁶ Nú avivɔ hwenu wá yi ɔ́, laglási kpó laglásilinfín kpó nɔ́ sínsín kɔn dó tɔhwín lɛ́ɛ mɛ, bɔ yě nɔ́ gɔ́ bó nɔ́ blú, bó nɔ́ sa.

¹⁷ Alǔun ká tɔ́n lě ɔ́, tɔhwín lɛ́ɛ nɔ́ mɛ; hwesivɔ́ hun ɔ́, yě nɔ́ xú dó azan.

¹⁸ Tomɛyitɔ́ lɛ́ɛ ɖo sin gbé mɛ bó zɛ ali, yě ɖo flúflú wɛ ɖo gbětótló mɛ káká bó kú.

¹⁹ Tomɛyitɔ́ Téma tɔn lɛ́ɛ tunwun ɖɔ émí ná mɔ sin ɖo tɔhwín lɛ́ɛ mɛ, tomɛyitɔ́ Saba tɔn lɛ́ɛ lɔ ɖo nukún ɖó tɔhwín lɛ́ɛ wɛ,

²⁰ ée yě ká wá bó ba kpo ɔ́, agbɔ̌n kpé yě; awakanmɛ kú yě, ɖó tɔhwín lɛ́ɛ wú wɛ yě ɖeji dó.

²¹ Tɔhwín énɛ́ lɛ́ɛ ɖɔhun wɛ mi cí din; ée mi mɔ adǎn e ɖo gbigbo mì wɛ ɔ́, mi jó agɔ dó gǔdo.

²² Un byɔ́ nǔɖé mi wɛ a? Un ɖɔ mi ní zé dɔkun mitɔn ɖě dó xɔ gbɛ nú mì wɛ a?

²³ Un ɖɔ nú mi ɖɔ mi ní hwlɛ́n mì sín kɛntɔ́ lɔ mɛ wɛ a? Un ɖɔ nú mi ɖɔ mi ní xɔ mì ɖo acɛ gannaganna kpa nú mɛ tɔ́ sí wɛ a?

²⁴ Mi tín nǔ mɛ nú mì, un ná ɖótó mi; mi ɖe nǔ e un wa nyi do ɔ́ xlɛ́ mì.

²⁵ Xó e xwe ali ɔ́ nɔ́ vɛ́ se nú mɛɖé ǎ. Étɛ́ sín hwɛ dó mì wɛ mi ɖe?

²⁶ É má nyí xó e un ɖɔ ɔ́ ná sɔ́ dó ɖɔ xó wɛ mi ɖe a? Mɛ e ma sɔ́ ɖó nukún nǔɖé ǎ, bó ɖo xó ɖɔ dó jɔhɔn mɛ wɛ kpowun ɔ́ sín xó sɔ́ dó ɖɔ xó wɛ mi ɖe a?

²⁷ Gbɛtɔ́ e hɛn ɔ́, é ná nyi akɔ dó tɔ́cyɔvǐ ɔ́ wɛ mi nyí, gbɛtɔ́ e hɛn ɔ́, é ná sa xɔ́ntɔn é ɖésúnɔ tɔn ɔ́ wɛ mi nyí.

²⁸ Mi kpɔ́n nukún ce mɛ céɖécéɖé, bó kpɔ́n ɖɔ adingban ɖó wɛ un ɖe a jí?

²⁹ Mi jó xó dó, mi ma dó hwɛ agɔ ó. Mi jó xó dó, xomɛvɔ́nɔ wɛ un nyí.

³⁰ Xó ce nyí adingban wɛ a? Adǎn ɖo mɛ gbo wɛ nú un mɔ ɔ́, un nɔ tunwun ǎ wɛ a?